رواية عهد الهوى بقلم فاطيما يوسف
أجابه والد مهرة:
_ والله ياحاج عزيز أنتم شرفتونا ونورتونا ، وإحنا مهرة نجهزها ونجيبها لكم لحد عندكم كفاية أصلكم الطيب وتشريفكم عندنا النهاردة ،
ابتسم إليه والد جواد وردد بتعقل :
_ ده إحنا اللي زادنا الشرف والله ، بس بردة لازم تقول لنا طلباتك ايه ؟
استمع لحديثه وأردف بهدوء قائلاً:
_ أنا مش هطلب حاجة ياحاج عزيز إللي تقدروا تعملوه أعملوه أهم حاجة عندي راحة مهرة وإن جواد ميزعلهاش علشان مهرة غالية وعالية عندي أوي.
ماإن استمع جواد لحديث حماه حتي رفع رأسه وقال باحترام:
_ مهرة في عنيا الاتنين ياعمي محمد ومتقلقش عمري ماهزعلها وربنا شاهد علي كلامي .
والد مهرة:
_ بس مهرة حالياً لسه في الكلية وقدامها ٣ سنين ومش هتتجوز قبل ماتخلص الكلية بتاعتها .
الحاج عزيز بثقة:
_ ميجراش حاجة لما تاخد سنتين عندك والسنة الأخيرة تاخدها عندنا ، ووعد مني هخليها تاخدها متقلقش.
ابتسم لحديثه براحة ثم قال بإبتسامة:
_ علي بركة الله نقرأ الفاتحة ،
وعلى التو قاموا بقراءة الفاتحة واتفقوا علي أن يأتوا بالشبكة بعد شهر من الآن وتكون عائلية فقط ،
ثم قال والد مهرة بفرحة:
_ ادينا زعروطة ياأم العروسة واندهي للعروسة تسلم علي أهلها.
استجابت أم مهرة لقوله وهللت بفرحة نابعة من القلب وخرجت لتنادي مهرة ،
دلفت للداخل وجدت مهرة في حالة شديدة من التوتر فمهرة رغم قوة شخصيتها إلا أنها شديدة الخجل جداً ،
تحدثت إليها والدتها وربتت علي ظهرها تحاول تهدئتها قائلة :
_ حبيبة قلبي إللي كبرت وبقت عروسة زي القمر وعريسها وأهله مستنين القمر في ليلة اكتماله يطل عليهم ،
وجذبتها من يدها تحثها علي الخروج معها مرددة بابتسامة:
_ يالا ياقمري علشان تقدمي الحاجة الساقعة للناس وأنا معاكي بالجاتوه ومتقلقيش ياحبيبتي وهدي نفسك خالص .
رفعت أنظارها إلي والدتها وتحدثت بتوتر:
_ أنا مكسوفة جداً ياماما مش هقدر أدخل قدام الناس دي كلها .
ابتسمت لها وأردفت بحب:
_ معلش حبيبتي اركني كسوفك دلوقتى ويالا علشان بابا ميقلقش في وسط الناس .
أجابتها بطاعة:
_ حاضر ياماما .
حملت مهرة المشروبات المثلجة ووالدتها قطع الحلوي ودلفا للداخل ، أم مهرة أولاً وتليها مهرة مطأطأة رأسها لأسفل،
ورددت بإستحياء:
_ السلام عليكم ورحمة وبركاته ،
ثم وزعت عليهم العصائر بيد مرتعشة من شدة الخجل ،
