رواية عهد الهوى بقلم فاطيما يوسف
أجابته علي الفور :
_ أنا إسمي رنا من القرية إللي جمبكم وعندي ٢٢ سنة ومعايا معهد خدمة اجتماعية ،
شفت فيديوهات لحضرتك عن كيفية تعليم الأطفال بطريقة عجبتني جداً ، بس بصراحة أنا معنديش أطفال ولا ليا إخوات أنا بكلمك علشان نفسي آخد الدورة التعليمية الخاصة بطريقة نور البيان إللي حضرتك بتتعامل بيها مع الأطفال وعندي أمل متكسفنيش ،
علشان مقدمة على شغل في حضانة خاصة ومن شروط قبولي للشغل إني أكون عارفة طريقة نور البيان ،
ها قلت إيه حضرتك ؟
أجابها علي بابتسامة خبيثة ظهرت علي معالم وجهه وهو يحدثها،
فهو فوراً دخل صفحتها ورأي صورتها الشخصية وصورة غلافها وانبهر بجمالها وخاصة الغمازات التي تحتل وجهها قائلا مدعياً الجدية :
_ وحضرتك ياآنسة رنا عندك استعداد نفسي أولاً، ووقتك يسمح ثانياً تاخدي الدورة في المواعيد إللي هحددها لك ؟
أجابته:
_ أيوه بإذن الله عندي استعداد نفسي ، وكمان عندي وقت فراغ كبير أنا مخلصة المعهد من سنة ومش بعمل حاجة،
وعلشان كده فكرت في الشغل ، وقالو لي علي شرطهم وبصراحة بعد بحث طويل ملقتش غير حضرتك تديني الدورة دي .
أرسل إليها قائلا بجدية:
_ تمام بإذن الله معنديش مانع هشوف مواعيدي وأبلغك بالمواعيد الخاصة بيكي ، هما هيبقو ٣ جلسات في الأسبوع لمدة ٣ شهور .
ردت عليه قائلة:
_ علي بركة الله ، وإن شاء الله المبلغ إللي حضرتك تحدده هبعته لك علي فودافون كاش ، ومتشكرة جدا لزوق حضرتك ياشيخ علي .
بعث لها إيموشن تأكيد دليلاً على إنهاء المحادثه .
تفاعلت هي معه وأغلقت الهاتف .
أما هو فعاد محدثاً نفسه بفرحة:
_ آه ياواد ياعلوة شكلك هتغير الصنف ، وتجدد النوع وترجع لأيام الشقاوة ،
وجلس يرتب مع حاله كيفية مدخل تلك الحسناء النضرة .
___________________________
في منزل محمد الشريف
كان رمضان جاره وصديق والد جواد يجلس معه ويحتسي مشروب الشاي ويتحدثون في موضوع جواد ومهرة حيث أنه أتي كي يستفهم منه سبب الرفض ،
ووالد مهرة لم يعرف يفلت من إلحاحه فأجابه بإمتعاض :
_ إنت مصر يعني تعرف السبب ، هيفرق معاك إيه يعني ، ولا هيزود ولا هينقص ده قسمة ونصيب وهما ملهمش نصيب في بعض .
رد عليه رمضان بإصرار:
_ أيوه مصمم أعرف ياجدع هي مش مهرة زي بنتي ، وبرده جواد زي ابني يالا اتكلم وخلصني تعبتني معاك ياجدع .
