أنت مكافأتي بقلم دفنا عمر الجزء الرابع
” فمن عفا وأصلح فأجره على الله” ..!
قاطع حديثها نداء الصغيران: ماما!
فالتفت أروى وسجدة معًا، وقالت الأخيرة:
دول ولادنا التؤام يا أروى،حسن وشمس!..بعد شهرين هيتموا 3 سنين!!
يلا ياحبايبي سلموا علي طنت أروى!
تأملتهم أروى بحنان، وخاصتًا حسن الذي يحمل نفس ملامح جدته شمس، وعمتها الحبيبة رحمة الله عليها .. وشمس الصغيرة التي منحتها ابتسامة بريئة جعلتها تلتقطها وتقبلها هاتفة:
أسمك أيه ياجميلة: فأجابت الصغيرة بصوت رقيق:
سمس( شمس).. ثم أشارت لأخيها هاتفة : أسن (حسن)..!
فضحكت أروى وقبلتها مرة أخرى، ثم أعادتها لوالدتها وأخذت حسن قائلة بحنان: تعرف يا حسن إنك شبه جدتك بالظبط وجميل زيها
أبتسم الصغير محركًا رأسه دون رد!!
هتفت سجدة:
دول ولادنا يا أروي اللي مش عايزاهم يكونوا في الدنيا لوحدهم من غير أهل يسألوا عليهم زيي.. أو زي وبهاء اللي بعيد عن أهله وصلة الرحم بينكم مقطوعة.. عايزة يبقى في علاقة تجمعنا وتجمع ولادنا في المستقبل .. مش هطلب منك غير إنك تفصلي بهاء عن ولاده لحد ما ربنا يصفي النفوس بينكم تاني ونتواصل أنا وأنتي وولادنا يكبروا وهما عارفين بعض.!
تأملتها أروى مبهورة بنقاء وطيبة وحكمة تلك الزوجة التي حظى بها ابن العمة.. ربما حقا هناك شيئا ببهاء يستحق عليه مكافأث بزوجة مثلها.. أحترمتها وقدرتها كثيرًا ، ولن تكون أقل منها خلقًا وطيبة.. فقالت:
بأذن الله يا سجدة مع الأيام كله هيتنسي، ومن ناحيتي خلاص مسامحة! قولي كده لبهاء!
قوليله بنت خالك مسمحاك وبتتمنالك الخير!
وإن كان على ولادنا، فأوعدك وعد أكيد .. إن مافيش حاجة هتفرقهم ابدا.. ولادك أخوات لولادي لما ربنا يأذن ويرزقنا بيهم على خير..
وأنا علاقتي بيكي اعتبريها ابتديت من اللحظة دي .. أنتي بجد دخلتي قلبي، وبهاء محظوظ بيكي!
ثم أكملت بمرح: واحب اعرفك إن صديقتي رغد هتكون معاكي، مش هتبقي لوحدك ودي لوحدها قرية بحالها .. هنبقي أحنا التلاتة دايما على اتصال وهنتقابل لما تصادف وتيجوا القاهرة!
عانقتها سجدة وهي تبكي فرحًا، لقد حصلت على مسامحة منها لزوجها ولم تعد تُضمر له حقدًا ولا كره! كما حظت هي على أخت وصديقة!
ودعتها أخيرًا وهي تتمني لها السلامة ودوام المحبة بينهما وصلاح الأحوال لها وللجميع! .. وتبادلوا أرقام هواتفهم للتواصل فيما بعد!
