أنت مكافأتي بقلم دفنا عمر الجزء الرابع
لقيت واحدة معرفهاش ومعاها ولد صغير، بتعرفني بنفسها وإنها لقيتني واقعة في الطريق وفاقدة الوعي، ساعدتني وجابتني المستشفى، والحمد لله قدروا ينقذوني!
أول ماطلبت مني عنوان أهلي عشان تتصل بيهم يستلموني حسيت بالضياع، وأني ماليش حد في الدنيا، ماكانش ليا غيرك أنت يا بهاء، بس خلاص مبقاش ينفع ارجعلك تاني وأمن على نفسي معاك، عجزي أني ارد سؤالها او ألاقي مخرج، خلاني بكيت قدامها بمنتهى القهر اللي جوايا!
صعبت عليها وحسيت إن ورايا حاجة كبيرة، فعرضت تاخدني معاها القاهرة، لأنها عايشة هناك مع زوجها وأبنها، بس زوجها بيسافر ويرجع حسب طبيعة شغله
ومن حظي انه سافر من أيام، وهقدر اقعد معاها لحد ما ادبر أموري واتعافى شوية.. كانت بالنسبالي طوق النجاه عشان ابعد خالص عن الشرقية!
وعشان أنا مبقاش عالة عليها، صممت اخدمها هي وابنها واتولى كل شئون بيتها قصاد لقمتي، الحقيقة كانت كريمة ورفضت، بس أنا صممت واتوسلتها تقبل .. وعشان تريحني قبلت، وأصرت تعطيني مقابل مادي وإن ده حقي!
المهم عدى 3 شهور كنت بقيت افضل صحيا .. قلت أخرج اتمشي شوية لاني تعبت من الحبسة، وعشان اشتري حاجة نفسي فيها!
صمتت تلتقط أنفاسها، رامقة بهاء بنظرة أججت وجعه أكثر وإحساسه بالذنب :
_كان نفسي أشتري هدوم لأبني .. حوشت اللي قدرت عليه من مرتبي من الست دي، وجبت بكل اللي معايا هدوم كتير عشانه، كنت مبسوطة أوي وانا بعمل كدة، إحساسي إن بعد فترة هايجي اللي يسندني في الدنيا ويعوضني وحدتي كان مخليني طايرة!
اتمنيت ساعتها تكون أنت اللي معايا وبتشتري إحتياجات ابنك وانت فرحان بينا!
غصة دموع أوقفت استرسالها مرة أخرى!
فجذبها بهاء وزرعها بأحضانه واحاطتها ذراعيه بقوة كادت أن تؤذيها حقًا! ظلت تبكي وهو يشدد من احتضانها أكثر باكيا بصمت ، مخفيا رأسه بتجويف عنقها يقبلها تارة ويعتذر تارة أخرى!
بعد أن هدأت نوبة البكاء واحاسيسه الجارفة التي بثها إياها .. عادت سجدة لتسترسل مرة أخرى :
_بعد ما اشتريت كل حاجة، حصلت صدفة غريبة، في نفس المحل اللي كنت فيه، صادفت خالد ومراته بيشتروا لابنهم يوسف هدوم وكمان للمولود الجديد اللي جاي في السكة .. خالد ماصدقش انه شايفني في القاهرة، وسألني عنك قلتله إني لوحدي لظروف خاصة.. وهو ما حاولش يستفسر واحترم سكوتي، وعرفني بمراته اللي فرحت اما شافتني واللي كان نفسها تعرفني بعد ما خالد حكالها كل حاجة عني، حتى زيارته عشان يطلب مني السماح..
وصممت تعطيني رقم تليفونها عشان ابقى اتواصل معاها وازورها ونتكلم سوا ..
