أنت مكافأتي بقلم دفنا عمر الجزء الرابع
أروى :أخيرا انتهينا من لوازم العروسة!
رغد: بعد ما رجلنا ورمت من التجول عشان نشتري للهانم كل طلباتها!
ندى: ياسلام ياختي، ذليني بالكام مشوار اللي جيتي فيهم معايا، لولا إن أروى حامل وتعبانة وغلط تمشي كتير، ماكنتش اتحوجت لتختوخة زيك!
رغد بغيظ: اغلطي وقلي أدبك كمان ياعود قصب ماسخ!
ندى : اتلمي يا رغد
أروى: بقولك أيه أنتي مش كل أنا نخرج تتخانقوا زي الديوك كده ماتعصبونيش!!
رغد: ماشي يا أروى اتعصبي براحتك علينا.. لولا الصرصار اللي بطنك كنت ظبطك يا أم عيون زي القطط أنتي!
أروى مقهقهة: والله هيوحشني جنانكم ده يا ولاد اللذينا.. وخصوصًا انتي يا رغد هتبعدي عننا وهتتجوزي في الشرقية! .. ياريت كان سيف خطيبك ياخدلك هنا شقة معانا!
رغد : حرام أطلب منه كده، عنده حياته هناك وشغله، ده غير مامته اللي عايشة معاه ومالهاش غيره، لأن بدر أخوه مستقر هنا في القاهرة!
أروى بتفهم: معاكي حق، المهم ربنا يتمملك بخير ويسعدك فين ما تكوني، وأكيد هنتقابل هنا كل أما تيجي تزوروا بدر أخوه!
ندى بحماس: اه والله وساعتها هنخربها هزار، وولادنا يبقوا حوالينا وتبقى زيطة!
رغد بحقد مصطنع: ما أنتوا ساكنين قصاد بعض يامحظوظين، وهتهيصوا وتظيطوا من غيري
ندى: أستر يارب، أنهاردة الخميس يوم خمسة في شهر خمسة!
ضحكت أروى ورغد، ثم هتفت الأخيرة:
خمسي في وشي ماهو ده اللي أهلك علمهولك يابنت الأصول.. طب قوليلي يانحنوحة أخبار معتصم أيه معاكي؟
ندى بهيام: الوزير ده مالي مركزه في قلبي وعقلي.. بحبه أوي أوي يا بنات!
أروى : ربنا يسعدكم يا قلبي، معتصم مافيش منه..
رغد: اللهم أمين.. بس ليه بتقوليلوا يا وزير؟!
ندي مبتسمة: ده كان بسبب موقف حصل بينا أول ما اتقابلنا، ومن وقتها بيحب جدا اقوله كده!
رغد: امممم فهمت يانحنوحة.. طب يلا بقي ياختي أنتي وهي هزرنا وضحكنا! ، نكمل لوازم خطوبتي وكتب الكتاب اللي لحد دلوقتي مش فاهمة استعجلوا فيه ليه!!
أروى: أنتي مش بتقولي إنك ارتاحتي لسيف ومعجبة بشخصيته؟؟.. يبقي خلاص دي أهم بداية، إن روحك تتقبله، والباقي سهل حبيبتي..
ندى : وبعدين انتي بتقولي الواد لوز وقمر، أحمدي ربنا انه عبرك ياتختوخة!!
رغد وهي تجز على أسنانها:
شايفة قلة الأدب يا أروى وكمان بتعاكس خطيبي قدامي الجزمة.
ندي باستفزاز: أعاكسه ليه ياختي، أنا عندي معتصمي حبيبي أحلى من خطيبك البيطري.!!!
