أنت مكافأتي بقلم دفنا عمر الجزء الرابع
ندى بضيق: رغد ارجوكي ماتسخريش من مشكلتي وتحسسيني إنك مش مقدرة اللي أنا فيه لو سمحتي!
رغد بابتسامة: أنا مش بسخر منها، بس كمان هي مش اخر الدنيا، الدكتور قالك فرصتك موجودة بس عايزة وقت وعلاج، امال لو لاقدر الله قالك متحاوليش من اساسه؟؟ ومع كده والله ياندى حالات كتير الأطباء أحتاروا في علاجهم وعجزوا..!
بس ربك مابتنتهيش عطاياه ومعجزاته ورزقهم بفضله.. ربنا عايز يسمع صوتك ياعبيطة، عايزك تدعيه وتترجي، ووالله ما هيرد ايدك فاضية وبكرة تفتكري كلامي، وانتي شايلة عيال مزز كده زيك!
ضحكت ضحكة قصيرة: هتعملي زي معتصم، بيقولي هتجيبي بنات مزز زيك يتعاكسوا، وانا اتخانق كل يوم بسببهم معادا الجمعة هاخدوا أجازة!!
اتفجرت رغد لدعابة معتصم هاتفة: وربنا الواد معتصم ده سكر!!
ندى بعدوانية: أحترمي نفسك يابت انتي! سكر في عينك.. هتعاكسي جوزي حبيبي قصادي!!
رغد وهي تلاعب حاجبيها بمشاكسة: ياواد ياغيور ياشرس أنت! ”
طب يلا ياقلبي تعالي نطلع لسجدة والولاد، وماتفكريش تاني في حاجة، وفرفشي وماتزعليش جوزك عليكي ياهبله وتنكدي عليه، الراجل يكره النكد! .. واعملي حسابك، مش هتمشوا قبل اسبوع!!
ندي باعتراض: انتي بتهزري؟ وشغل معتصم؟ وكمان هنقعد فين بلاش إحراج، شوية وهنمشي، وحلو كده!
رغد: يمين بالله ماتمشي، انا متفقة مع سيف، هنسيبلكم الدور التاني انتي وجوزك، وهننزل احنا عند والدته تحت وهي اساسا ماهتصدق عشان ميزو، حتى سيف فرح جدًا.. اصل بيني وبينك يابت يانودي، كانوا عايزين الدنيا هيصة، اعيش تحت يومي كله واطلع فوق ع النوم، بس على مين أختك مسيطرة ومشيت بنظامي أنا.. أيون لازم ادافع عن خصوصية بيتي!!!
ضحكت هاتفة:والله انتي جبروت ومفترية!
بس اوعي تكوني وحشة مع حماتك يارغد، دي شكلها طيب أوي.. اعتبريها زي مامتك!!
رغد بجدية: بالعكس انا بحبها فعلا وبحترمها وربنا عالم، سيبك من هزاري ده.. بس سبب قراري ده،
موقف حصل اول جوازي إني هزرت مع سيف قصادها عادي زي ما انتي عارفاني يعني، اتهمتني بقلة الذوق وإني مش بحترم زوجي، وطبعا ده مش حقيقي، سيف ده تاج راسي واغلى ما عندي ومش معني هزاري معاه أني مش بحترموا، المهم ياستي بعد ماكنت موافقة إن حياتنا تكون مختلطة، يعني ابقي عايشة يومي واكلي وشربي تحت مع مامته، واطلع شقتي ع النوم!
