عود ثقاب بقلم ندا سليمان الجزء الرابع
خديجه : أحمد هيطلع من الدرس ويعدي علي داليا يا حاج ، داليا كل ما أروحلها تسأل عنك يا عمران كنت الأول بتحجج إنك بتروحلها وهي نايمه دلوقتي الحمدلله بقت أحسن وفين وفين لما تاخد مهدئات ولا الدوا إللي بينيم ده مابقتش بلاقي حجه البت نفسها تشوفك أوي
زفر عمران : وأنا يعني إللي مليش نفس أشوفها !!! ده أنا نفسي أشوفها وأضمها فـ حضني أوووووي بس مش عارف مكسوف منها ليه يمكن عشان ماجبتلهاش حقها يا خديجه ؟! هو أنا ليه بنتي هي إللي يجرالها كده !
قربت خديجه وهي بتربت علي كتفه : إستهدي بالله كده يا اخويا والله يخليك روحلها وطمنها هي دلوقتي محتاجه حضنك اوي محتاجه تحس كلنا جنبها وبـ
وقبل ما تكمل رن جرس الباب
خديجه : هروح أشوف الباب واجي
رن جرس الباب تاني
خديجه وهي رايحه ناحية الباب : أيوه أيوه متسربع كده ليه يا إللي ع الباب جايه أهه يوه
فتحت الباب وإتسمرت فـ مكانها ….
داليا بتلعب فـ المصحه مع هنا وعلياء بتتأملها وهي مبتسمه وإختفت إبتسامتها لما إفتكرت علي وحاله وكلامه ! هي من جواها نفسها أووووي علي وداليا يرجعوا لبعض بس هي عارفه داليا كويس ومتأكده إن إللي حصل كسر جواها حاجات كتيير أوووي تمنعها إنها ترجعله وفـ نفس الوقت بتفكر فـ هاله إللي ملهاش أي ذنب فـ أي حاجه وقلبها إتكسر !
خرجها من شرودها داليا : مالك ؟
علياء : هه إنتي كنتي بتقولي حاجه ؟
داليا : لأ بس شيفاكي سرحانه يعني وملامحك بتقول إنك متضايقه من حاجه مالك يا حبيبتي ؟
علياء : ولا حاجه طمنيني صحيح أخبار القضيه إيه فيه جديد ؟
إتنهدت داليا : لأ لسه ماقبضش عليهم
علياء : يا سلام لحد دلوقتي ولسه ما إتحركش !!!!
داليا : هو بيقول إنه بيدرس القضيه و مش عاوز أي غلطه يعني هو فاهم شغله كويس وأكيد منتظر الوقت المناسب إن شاء الله خير
علياء : يا رب ، صحيح خالو ناصر بيسلم عليكي
داليا : الله يسلمه واحشني أووووي
علياء : هو نازل مصر عشانك أصلاً بس بيخلص شوية شغل كده ومشاكله مع كارولين عشان يعرف يقعد براحته هنا
داليا : ربنا ييسرله ويوصل بالسلامه إن شاء الله
علياء : يا رب
داليا : ناوليني الموبايل ده أما أصور هنوشتي كام صوره
إتناولت الموبايل وقامت تصور هنا …. رن موبايل علياء وظهر قصادها الإسم ع الشاشه #علي
إرتبكت ، حست بزغلله فـ عنيها فناولت الموبايل لعلياء من غير كلام وعلياء أول ما شافت المتصل هي كمان إرتبكت فكنسلت ، عملت الموبايل صامت وشالته فـ الشنطه ، فكرت تقول لداليا دلوقتي إن علي وهاله إتطلقوا عشان تشوف ردة فعلها
