عود ثقاب بقلم ندا سليمان الجزء الرابع
طارق : لأ كده بقي هنزعل من بعض ، طاب أقولك علي إتفاق لو حكيتلي عن إللي حصل هنخفف العقوبه عنك شويه
خالد : عقوبة إيه يا فندم أنا ماعملتش حاجه ولو سمحت أنا عاوز محامي
طارق : أممممم محامي ! يبقي أكيد عرفت مدي خطورة إللي عملته والورطه إللي فيها فعشان كده عاوز محامي يلحقك عموماً ماتستعجلش هنجيبلك محامي
رن الجرس ، وزي ما العسكري عمل مع جاسر سحب خالد ودخل الأخير وهو بيرتجف من قبل ما تبدأ التحقيقات !!!
طارق : شكلك كده مش هتتعبني يا مصلحه ، أقعد كده وإهدي يا راجل مفيش حاجه ، تاخد سيجاره ؟!
محمود : أنا يا باشا إللي حضرتك تشوفه
ناول سيجاره لمحمود وولعهاله ، مسكها بإيدين مرتعشه
طارق : بص يا مصلحه الإتنين إللي دخلوا قبلك دول عند أول مشكله وهيبيعوك هما ليهم ضهر ومسندوين وخصوصاً إللي إسمه جاسر ده لا هتهمه إنت ولا حتي خالد وخصوصاً هيفعصك إنت ، لإنك عنده مجرد مصلحه بتعدلهم المزاج وتسليهم وبس فخليك معانا وساعدنا نحل القضيه دي وساعتها وعد مني هخففلك العقوبه إللي ممكن تصدر ليك
محمود : أنـ نـا مش مش مش فاهم حاجه يا باشا عقوبة إيه وقضية إيه !
طارق : قولي هو إنت كنت فين ليلة 6 ديسمبر يا مصلحه ؟! وفكر قبل ما تنطق !
حاول يفتكر وبالفعل ماقدرش يفتكر إيه إللي حصل فـ التاريخ ده !
وطارق بعد شوية أسئله وجهها لمحمود وعصبيه وضغط ، أمرهم ياخدوه ، وحطوا كل واحد فـ حجز لوحده لحد ما يرتاح ويبدأ التحقيقات من تاني …
…
مريم راحت الجامعه وماقدرتش تركز فـ المحاضرات ، وهي ماشيه وقفها عمرو
عمرو : مريم ، فيه إيه مالك ؟
مريم : معرفش بس خالد لسه مارجعش
عمرو : إنتي غريبه أوي من إمبارح طيب ماهو كالعاده كده يا مريم وعارف إنك هتروحي تلاقيه رجع ! فليه تعملي فـ نفسك كل ده !
مريم : معرفش يا عمرو أنا حاسه إن قلبي مقبوض أوي وطول الليل أشوف كوابيس معرفش ليه أول مره أحس بكده
عمرو : طيب إهدي كده عشان خاطري وإن شاء الله خير ،، تعالي أوصلك البيت يلا
مريم : لأ لأ طبعاً توصلني إيه بس يا عمرو إطمن أنا هبقي بخير إن شاء الله
عمرو : متأكده ؟
مريم : متأكده وأول ما أروح إن شاء الله هطمنك
عمرو : خلاص هستنى تليفونك
مريم : إتفقنا
مشيت مريم ولسه قلبها مقبوض ونفسها تطمن علي أخوها …
…
ناريمان : هاي يا طنط
أم جاسر : هاي يا ناريمان أخبارك إيه يا حبيبتي ؟
