عود ثقاب بقلم ندا سليمان الجزء الرابع
سكت جاسر شويه ورد : مش فاكر !
طارق : إزاي بقي ده إنت المفروض رجل أعمال ناجح يعني الثانيه عندك ممكن تغير مسار حياه ! ولا إنت لسه مستجد بقي فـ عالم رجال الأعمال ؟!
جاسر وهو حاطط رجل علي رجل : ياريت تتكلم دوغري وتقول انا هنا ليه ؟!
وقف طارق وإتكلم بعصبيه : أنا هنا إللي أحدد الكلام يبقي إزاي ولما أسألك سؤال تقف وترد عدل يالا ، قوم
شد جاسر من التيشرت ووقفه ، وجاسر وقف بخوف قصاد طارق وبدأ يفتكر ليلة 6 ديسمبر حصل فيها إيه ؟!
طارق : يلا إنطق كنت فين !
جاسر : أ أنا أنا بجد مش فاكر ، ممكن حضرتك تقولي التهمه إيه عشان افتكر ؟!
طارق : لأ إنت هتطلع تفكتر براحتك لحد ما نعرف من صحابك كنتوا فين !
رن الجرس دخل العسكري حط الكلبشات فـ إيدين جاسر ودخّل خالد
وقف خالد وصوت أنفاسه واضح ، بيحاول يقف بثقه وثبات : خـ خير يا فندم ؟!
طارق : كل خير إن شاء الله ! كنت فين ليلة 6 ديسمبر فـ الفتره من الساعه 10 تحديداً للصبح ؟!
أول ما سمع التاريخ رجع فلاش باك لمريم وهي بتناوله الجاكيت قبل ما ينزل
مريم : ماتنساش تطلع لطنط فتحيه جارتنا وتقولها كل سنه وإنتي طيبه عيد ميلادها إنهارده )
خالد : ليه هو إنهارده كام ؟
مريم : 6 ديسمبر يا خلوده أوعى تنسي عشان خاطري إنت عارف هي بتحبنا أد إيه وملهاش حد يسأل عنها !
خالد : حاضر يا حبيبتي ما تقلقيش مش هنسي ، المهم خدي بالك من نفسك ولو إتأخرت ماتقلقيش إقفلي عليكي الباب كويس
مريم : حاضر بس عشان خاطري بلاش تتأخر لإني بقلق عليك ومابيجيليش نوم وإنت بره (
قبّل راسها : حاضر هحاول ما أتأخرش ، مش عاوزه حاجه من بره ؟
مريم : عاوزه سلامتك
سابها وطلع لجارتهم قالها كل سنه وإنتي طيبه وبعدها قابل محمود وجاسر وسهروا مع بعض ، وبعد ما سكروا قابلوا داليا ،، وبدأ خالد يفتكر تفاصيل الحادثه وحالته النفسيه فـ الفتره اللي مرت بعد اللي حصل ، وأول ما إفتكر بان علي ملامحه الذعر وبدأ العرق ينصب من جبينه وإيديه فيها رعشه خفيفه ، خرج من شروده علي صوت طارق
طارق : هنستني كتير ؟!!!!
خالد : أ أ أنا هنا ليه حضرتك لو سمحت !
طارق : أنا هنا إللي بسأل وبس رد علي سؤالي كنت فين ليلة 6 ديسمبر
زادت رجفت خالد وأصبحت ملحوظه لطارق
طارق : واضح إنك إفتكرت ومش هتتعبني كتير أقعد يا خالد
خالد وهو بيقعد : حضرتك أنا أنا معملتش حاجه
