أنت مكافأتي بقلم دفنا عمر الجزء الثالث
ترقرقت عين سجدة وهي تطالعه، الفرحة تُبكيها دون سيطرة !
فعصف القلق بقلبه من رؤية دموعها التي لم يفهمهاوكفكف بأصابعه وجهها هاتفًا بخوف :
مالك ياحبيبتي بتبكي ليه ، فيكي حاجة ؟ حصل حاجة معرفهاش ؟؟؟ اتكلمي ياسجدة قلقتيني!!
فهزت سجدة رأسها بابتسامة صافية، وقالت :
حصل يا بهاء .. في حاجة كبيرة حصلت!!
تعجب من ابتسامتها الباكية ، واحتار بتفسيرها ، هل ما حدث خير أم شر؟! انقبض قلبه بشدة، فدائما ما يتوقع أشياء سيئة ستحدث له!!!
جعلته تلك الهواجس الدائرة داخله أن يحتد عليها صارخا : أنطقي ياسجدة وبلاش الغاز، ماتتعبيش أعصابي!!!
تعجبت رد فعله المبالغ فيه، لما لا يدللها كعادته ويستفسر بهدوء ، لا شيء يدعو لنوبة غضبه تلك!
ابتعدت بغضب مصطنع، رامقه إياه بعتاب ثم اتجهت لفراشها مُضجعة عليه ، مولية ظهرها له..
فمسح على وجهه بكفيه ، وكأنه يزيل أثار غضبه الغير مبرر لها، ثم اقترب ممدا طول جسده بالفراش جانبها قائلا بنبرة خافته وأكثر هدوءً وحنان: أنا أسف يا حبيبتي .. أتعصبت أما شوفتك بتبكي وخوفت يكون حصل حاجة وحشة
ثم احاطها بذراعيه ودفن وجهه بجانب عنقها مرددا:
ممكن اعرف بقى حبيبتي عايزة تقولي أيه.. ؟
أدارت جسدها بين ذراعيه لتطالع وجهه وتري رد فعله عند سماع الخبر ، وتمتمت :
انا تعبت وروحت للدكتور انهاردة وقالي إني…………..
قاطعها بهلع :
دكتور ؟!! حصلك ايه؟!!! وازاي ماتعرفنيش إنك تعبتي ، وازاي أصلا تروحي لوحدك و……….
أحتضنته بقوة عاقدة ذراعيها حول عنقه، وهمست بأذنيه : انا حامل ياحبيبي!!
تصلبت ذراعيه حولها فور اختراق جملتها أذنيه وتوقفت انفاسه، وسكن جسده كأنه فقد الحياه!
بحدث لم يتوقع أبدًا حدوثه! ويخشى القادم معه!
************************
_أيه اللي أنت عملته ده يا بلال!
بلال متعجبا : في أيه يا ابني مالك!
معتصم. لتعابير وجه متجهمة:
_أخدت ورقي وروحت قدمت على شقتين من ورايا.. طب ليه، ظروفنا لسة ما تتحملش الخطوة دي.. كان كفاية أوي شقة واحدة، لأن أنت اللي خاطب ، عشان نقدر ندفع القسط بتاعها! ومايتأثرش شغلنا بنفس الوقت!
_ أنت تعرف عني أني ممكن اعمل خطوة مش دارسها كويس؟
_ بصراحة لأ!
_ تمام .. ببساطة أنا طبيعي بعد ما ارتبطت بأروى لازم أشوف شقة، واما سمعت عن شقق الشباب وإن كله يروح يقدم مع الأوراق المطلوبة، عملت كدة.. وحكاية أني قدمت على شقتين، ده لأن عمري ما هعمل حاجة وأنت مش مشاركني فيها، دلوقتي أو بعدين هتحتاج شقة، وأكيد أنت عارف ازاي الأسعار بتعلى بسرعة وممكن شهر واحد يفرق كتير في تمن شقة، وإن كان على المبلغ المطلوب مقدمة، أنا عامل حسابي بقرشين من جمعيات عملتها ورى بعض، ده غير جمعية تانية طلبتها من والدتك عشان يكمل المبلغ ونكون جاهزين.. والقسط هيبقي مش كبير وهنقدر عليه!
