رواية سبر أغوار قلبي ولكن بقلم نورهان سامي الجزء الحادي عشر
اؤمأ الطبيب برأسه بتفهم و قال بابتسامة : ربنا يكرمك يا أبنى و يكتر من أمثالك .. أقنعها أنت بس و أنا هقنع صديق ليا إنه يعملها عملية الإجهاض
اؤمأ ماجد برأسه إيماءة صغيرة ثم فتح الباب و خرج .. ذهب للغرفة التى تمكث بها تالا .. فتح الباب و دخل دون حتى أن يقرعه ليجدها جالسة على السرير تمسك حقيبتها و تبحث عن شئ ما فى عصبية و توتر .. أغلق الباب وراءه ثم دخل و اقترب منها و هو يضع يده بجيب بنطاله ليخرج مبتغاها .. اقترب منها و مد يده لها به و قال بتساؤل : بتدورى على ده مش كده !
رفعت عينها له ثم نظرت لهاتفها الموجود بيده و انتشلته بغضب و هى تقول بتوعد : و الله العظيم لتدفع تمن كل اللى بتعمله ده لما أدهم يعرف
ابتسم بسخرية و قال بجدية : كلميه بسرعة يلا و خليه يركب أقرب طيارة و يرجع عشان نخلص إجراءات الطلاق فى أسرع وقت .. كل أما يرجع بدرى كل أما كان أحسن ليا
صاحت به قائلة من بين دموعها : أنا عمرى ما هطلق من أدهم .. أدهم هيفضل جوزي و أبو أبنى أو بنتى اللى جايين لحد أخر نفس بتنفسه
جلس على طرف السرير ثم تحسس وجهها بيديه ليتكهرب جسدها بأكمله .. عادت بوجهها و جسدها للوراء و هى تصيح بحدة : قولتلك ميت مرة ماتلمسنيش
أشار لها بيده لتصمت ثم قال بجدية : خلاص أهدى مش هاجى جمبك أو أخلى ايدى تلمسك غير لما تبقى مراتى .. أردف قائلاً بتساؤل : تالا بذمتك مش نفسك أيام زمان ترجع تانى مش نفسك أقولك توتة ماجد .. مش نفسك حبنا يرجع مع الأيام اللى فاتت .. تالا أنا عمرى ما وقفت عن حبك و متأكد إنك كمان عمرك ما وقفتى عن حبى .. تالا حبك لأدهم مجرد حب مؤقت مش اكتر .. أنتِ عمرك ما حبيبتى و لا هتحبى غيرى .. أنتِ فاكرة إنك نسيتى حبى بأدهم لكن الحقيقة إنك لسه بتحبينى و بتعملى و بتقولى كده عشان تنتقمى لكرامتك إنى سبتك زمان مش أكتر .. أنا عارفك يا تالا .. أنا أكتر واحد ممكن يعرف أنتِ بتفكرى فى ايه أو ايه اللى بيدور فى دماغك .. ماجد دائماً بيقدر يقرأ أفكار توتته و عارف أن توتة قلبه أهم حاجة عندها كرامتها .. أنا عارف إنى غلطت زمان لما سيبتك بس أدينى جايلك بستسمحك إنك تسامحينى و ترجعيلى
صاحت به بغضب : أسكت أسكت كل كلامك ده غلط لو كان فى قلبى أى شعور ناحيتك مش هيبقى أكتر من كره .. أنا بحب أدهم و بحب الجنين اللى فى بطنى ده من قبل ما يتولد لمجرد أنه من أدهم
