للهوى رأي آخر بقلم سارة حسن الجزء الرابع
شهقت فيروز عندما جذبها قاسم لتكون بجانبه أكثر، قائلة بأحراج:
_قاسم الناس…
_ناس إيه، أنا عامل الفرح علشان ننبسط.
ثم نظر لها وتسائل بخفوت:
_فيروز، انتي مبسوطة؟
رفعت عينيها إليه وللحظات تمنت ألا يقف العالم هنا، أجابته بابتسامة حقيقية:
_جدا، عمري ما كنت مبسوطة قد النهارده، كل حاجة جميلة، شايفة في كل حاجة بتعملها لي قد إيه عايزني مبسوطة، بس أنا مبسوطة بيك أنت، وعيني مليانة بيك أنت يا قاسم.
أغمض عينيه ومال يقبل جبهتها قبلة مطوّلة، ممتنة ومحبة، مؤكّدًا لنفسه أنه سيظل لها هكذا للأبد.
………………….
وضعت السماعات بأذنيها بعد أن ابتعدت بمسافة كافية عن الضوضاء، فتحت الرسائل لعدة تسجيلات صوتية، انتبهت أسيل وعقدت حاجبيها بترقب:
_عايز توصل لإيه باللي بتعمله مع أسيل يا ياسين؟
أجاب ياسين بعد برهة:
_كويس إنك طلبت تقابلني بخصوص الموضوع ده يا قاسم، لأنك هاتعرف إذا كنت فعلا صادق ولا كذاب.
_أنا مش هاسمح أن أسيل تمر باللي مرت بيه معاك مرة تانية يا ياسين، أسيل بعتبرها أختي الصغيرة، بنت كمال، ومكانتها عند مراتي تسمحلي إني أدخل لأني خايف عليها.
أجاب ياسين وقال:
_أسيل مش بتديني أي فرصة معاها مرة تانية، من يوم ما سافرت لحد دلوقتي وانا بصلح فيها كل حاجة بعدتها عني، وتقدر تتأكد بسهولة وتعرف إيه حصل معايا طول الفترة اللي فاتت دي.
تحدث قاسم بنبرة بها بعض الحدة:
_وأنت اللي عملته مش قليل يا ياسين.
_كل إنسان فينا بيغلط، فيه اللي بيتمادي واللي بيصلح من نفسه، وعلشان بحبها مستعد أعمل أي حاجة عشانها.
صمت قاسم مفكرًا، الواقف أمامه عاشق وواضح وضوح الشمس في غسق النهار، أما عن الأخطاء، فأخطاء المحبين تكون دائمًا صعبة الالتئام.
لكن قرصة ودن صغيرة لن تضر شيء.
_أسيل جايلها عريس.
انتفضت وهي تسمع لشيء تحطم، وصوته الذي وصل لطبلة أذنها صارخًا:
_ده على جثتي!
لم تستطع منع تلك الابتسامة على ثغرها، حقيقة ممتنة لقاسم، وهي تسمع صوته البارد يهتف به:
_أسيل ألف شاب يتمناها!
_أسيل ليا، لو هاحارب الدنيا كلها!
_أسيل!
انتفضت والتفتت للخلف ووجدته، نظرت حولها لم يكن في المكان سوى هم، على سور حجري مطل على حوض سباحة ضخم، كانت تقف وهو أصبح قبالتها، يضع كلتا يديه في جيبي بنطاله، ملامحه حزينة، ونظرته بها من الرجاء والحب.
_كفاية بقى، ما تعبتش… ما حنتيش!
