عود ثقاب بقلم ندا سليمان الجزء الثالث عشر

تقى حضرت الجنازه وهي شبه غايبه عن الوعي ، ماقدرتش تقعد في العزا ، داليا إستقبلت الستات مكانها وهي فضلت حابسه نفسها في أوضة أمها ومش راضيه تفتح الباب لحد ولا راضيه تاكل ، بعد ما الناس مشيت بالليل عدّى أحمد عليهم يتطمن على تقى وقالتله إنها مش عاوزه تاكل ولا حتى عاوزه تفتح الباب لحد

_ طيب معلش يا داليا جهزي الأكل على صينيه صغيره

راح ناحية الباب ، خبط بهدوء : إفتحي يا تقى أنا أحمد

ثواني وكان الباب مفتوح ، وقفت عند الباب بتبصله وشفايفها مقوسه لأسفل ( من غير كلام ضمها لحضنه إنهارت بين إيديه وفضلت تبكي بحر,قه وعلى صوت نحيبها

فضل يطبطب عليها ويمسح على راسها ويصبرها برفق وحنان، جابت داليا الصينيه وخرجت

_ يلا يا حبيبتي

_ مليش نفس

_ لأ مفيش حاجه إسمها مليش نفس ، عشان صحتك يا حبيبتي يلا بقى عشان خاطري

_ والله ماليا نفس مش قادره

_ لقمتين بالضبط وبعدها هسيبك براحتك ، عشان خاطري

مد إيديه وبدأ يأكلها ويمسح دموعها ، بعد ما أكلت

_ بالهنا والشفا يا حبيبتي يلا إرتاحي شويه مانمتيش بقالك كتير

عدلها المخده وغطاها ، طبع قبله على جبينها وقبل ما يخرج مسكت إيديه : ماتسيبنيش يا أحمد

مسك إيديها بحنان : ما تخافيش أنا جنبك أهه

إتناول مصحف من ع الكومود ، حط كرسي جنب سريرها ، فتح المصحف على سورة يوسف ، بدأ يرتل وهو بيمسح على راسها لحد ما راحت في النوم

…

بعد مرور شهرين كان الحزن إلى حد ما بدأ يزول ، وأحمد بيجهز شقته عشان أول ماتخلص ناويين يتجوزوا على طول لإنه مش متطمن وتقى قاعده عند جدها لوحدها بيزورها كل يوم بس برده مش هيرتاح غير وهي جنبه وشايفها قصاده كل لحظه .

واقفه داليا في المطار منتظره وصول نِهال ، أول ما لمحتها جريت عليها وحضنتها ، كانت محتاجه أوي لحضنها في الفتره العصيبه إللي مرت بيها

_ واضح إنك هتحصليني بعدها بأسبوع ، كده يا نِهال 3 شهور بحالهم

_ معلش يا حبيبتي ما أنا قولتلك أحمد جاله شغل وإضطرينا نأجل السفر

_ خلاص سماح المره دي المهم إنك دلوقتي موجوده وحشتيني أووي

_ إنتي أكتر

_ يلا هسيبك ترتاحي إنهارده ومن بكره إن شاء الله هزهقك

_ ههههه حبيبتي يا دولّلي ، صحيح عوزاكي في أمر هام بس لما أروح وأهدى كده هكلمك

_ إتفقنا يا جميل ، نورتوا مصر

…

_ حفلة إيه يا نِهال بتهزري مليش أنا في الكلام ده بلا ملكات جمال الحجاب بلا بتاع