عود ثقاب بقلم ندا سليمان الجزء التاسع
على حاسس إن كل الظروف إتحدت ضده ..حتى الراجل إللي شاهد على حبهم وكان بيدعيلهم من قلبه خلاص مات زي ما هم دلوقتي بيموتوا كل ذكرياتهم ويستعدوا للحظة الفراق
حاولوا يتناسوا خبر وفاة بياع الورد وقعدوا ياكلوا الدرا جنب بعض ، سادت لحظات صمت بينهم لكن صمت يحمل جواه صخب وضجيج وآهات صمت مزعج كئيب بيوجع في قلوبهم أكتر ما هي موجوعه
إتنحنحت داليا وكسرت الصمت : علي ممكن توعدني وعد ؟
علي : أكيد ممكن خير ؟
داليا : ممكن ترجع لمراتك وتعوضها عن كل وجع سببتهولها ؟
علي : حاولت يا داليا بس لقيت نفسي هوجعها أكتر لو رجعتها وأنا مابحبهاش
داليا : بس دلوقتي الوضع يختلف أنا كنت في حياتك بس إنهارده قررنا نمحي كل حاجه ومانتعداش كوننا أصحاب وقرايب ، كمان طفلك محتاجلك جنبه وصدقني وقت ما يتولد وتشيله بين إيديك هتنسى الدنيا دي كلها
على : حاضر هحاول بس ما أقدرش أوعدك دلوقتي
داليا : طيب على الأقل إوعدني إنك هتحاول ؟
على : أوعدك إني هحاول ، إنتي ناويه على إيه ؟ هتتجوزي الضابط إللي اسمه طارق ؟!!!
بصتله ورفعت أحد حاجبيها : كإني كنت بكلم نفسي بقولك مش مستعده أبني حياه واسره واحب ، هو طارق أه اتقدملي بس يعني رفضته لإني مش هفكر أرتبط خالص ، كل إللي ناويه عليه حالياً إن شاء الله إني هشتغل وأحاول أرجع زي الأول وبس
رجع تاني الصمت يبقى سيد الموقف وجوه كل واحد فيهم خوف من لحظة الوداع إللي بيهربوا منها من الصبح
داليا : على ! بيتهيألي خلاص جه وقت الوداع حابه أشكرك على كل لحظه حلوه خلتني أعيشها في حياتي
على : يعني خلاص يا داليا
داليا : ماتنساش إتفقنا نتودع بإبتسامه
على : إنتي مسمحاني يا داليا ؟
داليا : أيوه مسمحاك يا علي ولو ماكنتش مسمحاك ماكنتش هعمل كل ده وأبقى لسه باقيه على صلة القرابه إللي بيننا ، خد بالك من نفسك ومن هاله وطفلك يا علي وربنا يوفقك ويسعدك
علي والدموع متجمعه في عيونه : وإنتي كمان خدي بالك من نفسك يا داليا وربنا يوفقك ويسعدك ، يلا عشان أوصلك
داليا : لأ ، يُستحسن كل واحد يمشي من طريق لوحده ..مع السلامه
على : مع السلامه
إدتله ضهرها وهو كمان ولسه روحه حاضنه روحها
داليا من بعد ما فارقت علي وهي بتحاول تتناسى وتعيش حياتها ، قربت من ربنا أكتر ويتدعي دايماً ربها يعينها وتقدر تنسى أوجاعها وتعيش حياه طبيعيه ، بدأت تدور على شغل لكن فيه ظاهره بتجرحها أوي ، كل ما تروح مكان يفضلوا إللي فيه يبوصولها ويتهامسوا عليها ، وأكتر من مره تروح تقدم وتلاقيهم بكل بجاحه بيسألوها مش إنتي داليا عمران بتاعة قضية الإغتصا,ب ؟
