عود ثقاي بقلم ندا سليمان الجزء الثامن

فتحت الباب سنه بسيطه وهي مرعوبه ، إتأكدت إنهم مش شايفينها ولا حاسيين بوجودها فبدأت تكمل الفيديو وأول ما رموا داليا ع السرير وبدأوا يغتصبوها ما استحملتش قفلت الكاميرا وجريت على تحت تستنجد بأبوها لكن ردة فعله صدمتها صفعها على وشها : إسمعي يا بت إنتي تجعدي هنه وما اسمعش حسك واصل إنتي ولا شفتي حاجه ولا سمعتي حاجه ولا جيتي هنه من أصله فاهمه

بصتله هنادي بصدمه فشدها من ياقة هدومها وصرخ في وشها : سمعتي ولا لا

هزت راسها بخوف وإستسلام ، خرج عوض من الأوضه وقفل عليها الباب ، كورت نفسها وجسمها كله بيتنفض :'( إتخيلت نفسها مكان داليا وهي بالفعل كان هيحصلها نفس إللي حصل لداليا في اللحظه دي ماتت كل أحلامها وإتكسرت صورة الأب القدوه قدام عينيها ، فضلت للصبح ترتجف والنوم مجافيها كل ما تغمض عينيها تشوف قصادها كل حاجه حصلت بتفاصيلها فضلت ع الحال ده لحد ما غلبها النعاس ولقت أبوها بيصحيها عشان يروحها ع البيت ، لمت حاجاتها و مشيت معاه بإستسلام وإنكسار

شافت الفيديو إللي صورته وبسرعه قفلت الموبايل وخبّته في دولابها ، وكل ما أمها تسأل تقول وقع منها ،،رجعت تاني لحالتها إللي فاتت لا بتاكل ولا بتشرب ولا بتروح مدرستها ، كل ما تبص في وش أبوها تفتكر إللي حصل مابقتش عاوزه تشوفه ،قفلت على نفسها وإنطوت على الاسرار إللي مخبياها جوا

جت اللحظه الحاسمه والكل مترقب الحكم النهائي

“وإعمالاً لقانون 267 و 290 من أحكام قانون العقوبات حكمت المحكمه حضروياً على كل من (جاسر توفيق محمد أحمد ممدوح الزغبي ) الشهير بـ ( جاسر الزغبي ) و (خالد منصور الضبع ) و ( محمود رمضان الدهشوري ) والشهير بـ مصلحه بـالإعدام شنقاً ورُفعت الجلسه …

أول ما وصلت كلمة الإعدام لمسامع داليا وقفت وهتفت بأعلى صوت من قلب مقهور بردت ناره : الله أكبر ولله الحمد الله أكبر ولله الحمد

فضلت تبكي بهستريا وتردد : ويمكرون ويمكر الله والله خير الماكرين

حقي اتردلي احمدك يا رب واشكر فضلك احمدك ياااااااا رب

ضمتها أمها لحضنها وهي مش مصدقه إن أخيراً ظهر الحق وبنتها أخدت حقها ونهال وشيماء وعليا جريوا على داليا منتظرين يجي دورهم ويضموها في حضنهم بس المره دي مش عشان يطمنوها المره دي عشان يهنوها بالإنتصار ، وداليا مازالت بتكبّر وتبكي لحد ما فقدت وعيها ، قام ناصر من سجدة الشكر إللى سجدها أول ما سمع الحكم ولقى داليا فاقده الوعي جري عليها زي طارق إللى نسي كل حاجه وجرى بأقصى سرعه يلحقها