عود ثقاي بقلم ندا سليمان الجزء الثامن
طارق شايف إن الخطوه إللي داليا أخدتها للظهور في البرنامج سليمه وهتوصل صوتها أكتر لكن خايف عليها ،،، زاد جواه إحساس إن داليا مسئوله منه ولازم يحميها ، نفسه توصل لبر الأمان ويزول كل خطر بيهدد حياتها
افتكر لما كانت عندهم في البيت واحساس السعاده اللي ملا قلبه لمجرد وجودها قريبه منه
مش عارف حقيقة مشاعره إيه حساس بلخبطه ومشاعر جديده عليه مش قادر يحددها لكن اللي واثق منه ان بيرتاح لمجرد سماع إسم داليا ) .
مريم زي ما وعدت داليا رجعت تذاكر وتسترد حلمها من تاني وتستعد لإمتحاناتها، بدأت تخرج من البيت ورجعت للجمعيه من تاني ، قابلت صحابها وبدأت تجهز معاهم اللافتات والشعارات اللي هيرفعوها يوم جلسة داليا ،بس رغم انها خرجت من عزلتها الا انها مازالت بتتجنب عمرو وخايفه من المواجهه…
داليا في المستشفى مع أمها حكتلها على موضوع البرنامج اللي هتظهر فيه وأمها ما عارضتش أي حاجه ممكن تساعدها تجيب حقها وهم بيتكلموا لمحت شخص واقف بعيد وأول ماشافت وشه اتوترت و إتأكدت من شكوكها في إن الشخص ده بيراقبها بقاله يومين ماشي وراها في كل حته وكانت بتفتكرها مجرد صدفه !
حست بالخطر وإن ممكن عزيز البنا يأذيها خصوصا بعد اعلانات البرنامج
ودعت أمها ومشيت بحذر ولاحظت انه لسه ماشي وراها ركبت تاكسي واول ما وصلت منطقتهم اتلفتت حوليها ولقته نازل من تاكسي وراها زاد توترها وخوفها بس قررت تتغلب على خوفها وتعلمه درس اتصرفت بشكل طبيعي ، دخلت الصيدليه واشترت علبة بيروسول شالتها في شنطتها ومشيت في اتجاه غير بيتهم لفت في شوارع كتيره و هو لسه وراها سرعت خطوتها ودخلت في شارع فاضي طلعت البيروسول بسرعه واستعدت أول ما دخل الشارع وراها ضغطت على مكان الرش بقوه وهو اتفاجئ وصرخ بألم
داليا : انت مين وعاوز مني ايييه ؟؟
وهو بيتألم ومش قادر يرد عليها ما ادتلهوش فرصه حتى يتألم ورشت تاني في وشه فوقع ع الأرض لمحت حديده على جنب اتناولتها ورفعتها
داليا : أنا واحده معندهاش حاجه تخسرها والله لو ما قلت عاوز مني ايه دلوقتي حالاً لأكسر دماغك بالحديده دي انطق مين اللي باعتك الكلب عزيز البنا مش كده
رفع ايديه وهو بيكح ويتنفس بصعوبه بيحاول ياخد نفسه عشان يقدر ينطق ويرد عليها : مش هأذيكي مش هأذيكييي
داليا : مين اللي باعتك ؟
