عود ثقاي بقلم ندا سليمان الجزء الثامن

وهناك في آخر القاعه واقف علي لسه مافاقش من زهوله ، أول ماسمعها بتهتف الله أكبر لقى نفسها بيهتف معاها بالتكبير دموع الفرحه سايله على خدوده وعاوز في اللحظه دي يضم داليا في حضنه ويلف بيها بفرحه ، بص عليها لقاها فقدت وعيها والكل جري عليها فجري بسرعه ناحيتها وقبل ما يقرب كان طارق سادد الطريق وسابقه ليها !

وقف على مش عارف يوصلها ولا عارف يتطمن عليها

طارق : شيلها بسرعه يا ناصر وإطلع بيها ع المكتب فوق من الزحمه دي

وبالفعل شالها ناصر وحاول يطلع بيها من الزحمه والهرج إللي في القاعه من بعد سماع الحكم ،، أخيراً قدر يطلع وكلهم وراه حتى على طلع معاهم يتطمن عليها …..

وشيماء مازالت بتلقط بعدستها ردود الأفعال بعد سماع الحكم ، مش عاوزه أي لحظه تفوتها ، بتصور ودموع الفرحه في عيونها

المتهمين أول ما سمعوا بالحكم كإن صاعقه نزلت عليهم جاسر فضل يصرخ بـ لأااااااااا بعدين قعد يبكي في الأرض بحر,قه ومحمود فقد وعيه وكل ما يفوقوه يهزي بكلام مش مفهوم ويفقد وعيه من تاني أما عن خالد ففضل يضحك بهستريا وفجأه إتحول ضحكه لـ بكى و صراخ وعويل وعلي صوت نحيبه

مريم أول ما سمعت حكم الإعدام حست كإن حد غرس خنجر في قلبها فجأه كده حست إنها مش قادره تاخد نفسها ، سمعت داليا بتكبر حاولت تبتسم ماقدرتش ! سرت رعشه في جسمها، حاولت تقوم تهنّي داليا بس لقت رجلها مش بتتحرك ، مش قادره تقوم بصت ناحية خالد ولقته بيضحك بهستريا بعدين بدأ يبكي وصوت نحيبه يعلى ، ماقدرتش تستحمل أكتر من كده جريت عليه ، قربت من القفص وهي مش عارفه هتقوله ايه ؟! مش لاقيه كلام مناسب في موقف زي ده تقوله ، مش لاقيه ردة فعل غير الدموع

مدت إيديها من بين القضبان ومسحت على شعره عشان يهدى ، رفع راسه وأول ما شافها هدي من بكاه بص في عيونها ومسك إيديها وفضل يبوسها ويردد سامحيني وهي مش قادره تنطق مش قادره حتى تقوله مسمحاك بتبكي بحر,قه وبس

…

أم جاسر أول ما سمعت الحكم جريت عليه وهي بتصرخ : مش ممكن إبني لأ برررئ مظلوم وقفت عند القفص ووقعت في الأرض

وتوفيق فضل جسمه يرتجف وهو قاعد في مكانه مابيتحركش وأول ما قام وقع من طوله

…

هنادي من وقت ما سمعت الحكم على أبوها وهي مش عارفه يا ترى إتصرفت صح ولا غلط ، كانت عاوزه تقول كلمة الحق بس ماكنتش تعرف إن أبوها هيتأذي ، بصت عليه وهو بيبكي وكان نفسها تجري عليه وتترمي في حضنه بس خايفه بعد إللي عملته مش بعيد يكرهها ، ويا ترى ناويه على ايه هترجع البلد ولا لأ ؟؟! ولو رجعت هيعملوا فيها إيه بعد ما يعرفوا بإللي عملته !