ليتني أعفو بقلم لمسة جمال الجزء الثاني
دلف فارس فى اتجاه مكتب الدكتور ماهر متمنيا ان يحصل على مقابلته ليقابل نائبه:صباح الخير
صباح النور بلغتنى السكرتيرة ان حضرتك عاوز تقابل الدكتور ماهر ممكن اعرف السبب
اسف بس الموضوع شخصى
الدكتور ماهر له فترة مش بيجي المستشفى لظروف مرضية ياريت تعرفنى سبب طلبك ليه وانا اقوله
طيب ممكن تديني عنوانه
صعب اننى اديه لك
بس اعتقد انه لو عرف انك رفضت تديني العنوان وانى عاوزه فى موضوع يخص بنته المختفية هيعمل ايه ؟
بتقول موضوع يخص بنته حضرتك تعرف مكانها
متهيالى الافضل اتكلم مع صاحب الشأن شخصيا
دق جرس الباب لتفتح له السيدة المسنة بوجه بشوش: السلام عليكم
وعليكم السلام ورحمة الله وبركاته خير يابنى
لو سمحتى الدكتور ماهر موجود
ايوة اقوله مين
الدكتور فارس المسيرى …..
كانت تعد نفسها بوجوم الى ان انهت ارتداء ملابسها واصرت الا تضع اى مساحيق تجميل فهى جميلة بطبعها ولكنها لا تريد ان تلفت نظره اليها وقررت ان تخبره بالرفض لانها مرتبطة باخر ستكذب حتى يتركها ويرحل هو رافضا لها حتى لا يفرضه والدها عليها ووسط شرودها سمعت والدتها القريبة منها تناديها:يالا ياسهر علشان تدخلى تشوفى العريس ابوكى طلبك من بدرى
ردت بتذمر :حاضر رايحة اهو
دخلت سهر وهى مسبلة رموشها ومنكسة راسها الى اسفل لتهمس :مساء الخير ثم جلست على مقعد بعيد قليلا لتلمح حذاء رجولى اسود لامع علمت انه للعريس المفروض عليها
هم والدها ناهضا:واضح ان العروسة مكسوفة حبتين انا هسيبكم تتكلموا شوية تتعرفوا على بعض وهكون قريب منكم هنا ثم اشار لغرفة اخرى وراجع لكم بعد شوية
اوما له الشاب برأسه
خرج والد سهر واستمر الصمت عدة دقائق الى ان اقترب منها الشاب ليجلس قربها وبصوت هادئ متزن قال :ازيك ياسهر عاملة ايه
دقات قلبها اصبحت تخفق بجنون اثر استماعها للصوت المألوف لترفع عينيها المترقبة صائحة :انت ….
الفصل الثامن عشر
دلف فارس الى غرفة المكتب حيث اشارت له الدادة بعد ان اخبرت د.ماهر
ليقول :السلام عليكم د ماهر
عليكم السلام ورحمة الله وبركاته وبعد ان صافحه : د.فارس مش كدة
اومأ له فارس ليقول ماهر بعدها : اتفضل اقعد .. سميرة قالت لى ان حضرتك عاوزنى فى موضوع خاص
جلس فارس على الكرسى المقابل لمكتب د ماهر ليلمح بطرف عينيه صورة مؤطرة لفتاة تضحك بشقاوة لوالدها وهو يحتضنها ليمسك الصورة هاتفا بتردد:بنت حضرتك
اوما له ماهر بعد ان زفر بالم :الدكتورة نور بنتى
احس فارس بكم الحزن الذى يعانيه هذا الرجل واراد ان يسعده ففضله كبير عليه ليبدا فى حديثه
من اكتر من ست شهور كان عندى مناوبة فى المستشفى وكنت راجع البيت متأخر يمكن كنت مجهد او تعبان مش عارف المهم ماكنتش مركز بدرجة كافية وفجأة ظهرت بنت قدامى حاولت انبهها بكل الطرق لكنها كانت منهارة وبتبكى ومش سامعة ولا شايفة اى حاجة حاولت على اد مااقدر اتفاداها ومااصدمهاش لكن للاسف صدمتها بالفعل على اخر لحظة ورغم ان الخبطة ماكانتش قوية الا انها دخلت فى حالة غيبوبة بارادتها من اللى عرفته بعد كدة ان حالة الانهيار اللى كانت عندها قبل الحادث اثرت عليها فى الاوعى عندها وقرر عقلها التوقف وعدم رجوع للواقع فضلت جنبها وحاولت معاها كتير والحمد لله من فترة بسيطة فتحت عينيها وفاقت من الغيبوبة
كان ماهر يستمع له بكل تركيز عاقدا حاجبيه
اكمل فارس:لكن اللى اكتشفناه انها فقدت الذاكرة بس الدكتور قال انه فقدان مؤقت نظرا للظروف النفسية اللى اتعرضت لها ولازم يكون عندها رغبة وارادة علشان الذاكرة ترجع لها وطبعا ماقدرناش نوصل لاهلها ولا نعرف ايه اللى حصل لها قبل الحادث وصل حالتها للدرجة ديه وبالصدفة امبارح بس عرفت انها دكتورة
اتسعت عيني ماهر وخفق قلبه بجنون
ليكمل فارس :اطفال دكتورة اطفال وبدات اسأل معارفى لو حد سمع عن دكتورة اختفت فى الفترة اللى فاتت ديه وبالفعل عرفت …
ثم صمت ولم يكمل ليصيح ماهر بانفعال :بنتى ..عاوز تقول ان اللى صدمتها ديه تبقى بنتى اللى فاقدة الذاكرة طيب هى فين ارجوك وديني ليها انا متأكد انها اول ماتشوفنى هتعرفنى على طول هى مالهاش غيرى وعارفة انا بحبها اد ايه وانها كل حياتى اناعيشت علشانها وبس منعت نفسى عن متع الدنيا علشان ماسببش ليها اى الم او عذاب بس انا دورت عليها كتير ايوة ماخليتش ولا مستشفى مادورتش فيها من يوم مااختفت ازاى ماقدرتش اعرف اللى جرى لها ارجوك رد عليا
فارس :اهدا يادكتور ارجوك الانفعال مش كويس على صحتك انا فعلا اخطأت ويمكن ضللت حضرتك لما سجلتها باسم اختى فى المستشفى بس يعلم الله انا حاولت احميها من اسئلة الشرطة ودوشتهم وقلت هى لما تفوق هتقول لنا على اسمها ومكان عيلتها والوضع اتغير بعد كدة نتيجة لفقدانها للذاكرة بس بمجرد ماعرفت ان حضرتك ممكن تكون والدها جيت على طول انا هروح واحكى لها على كل حاجة واجيبها لحضرتك فورا
لا..انا هروح معاك انا مش هقدر اتحمل الانتظار اكتر من كدة كفاية الشهور اللى فاتت وانا مش عارف هى فين وعايشة ازاى مش قادر اقولك الفترة ديه مرت عليا ازاى
تمام يالا بينا ….
