ليتني أعفو بقلم لمسة جمال الجزء الثاني

بابتسامة دافئة : ازيك ياسهر عاملة ايه
انتفضت سهر ناهضة من مكانها وبنظرات نارية:انت بتعمل ايه هنا يايوسف
ببراءة:متهيألى ان والدك قالك سبب زيارتى ليكم
واشمعنى انا
لانك انسانة محترمة متعلمة ومثقفة وجميلة و..
قاطعته بسخرية :ليه انا يايوسف بالزات ايه السبب ممكن اعرف ولا تحب اقولك انا بقى السبب
حضرتك اترفضت من حبيبة القلب قلت اسهل طريقة للوصول ليها وتكون قريب منها انك تيجي تخطبنى وبكدة تضرب عصفورين بحجر واحد
كان يحرك راسه نفيا يمينا ويسارا لتهتف سهر قائلة :اسفة ياشمهندس طلبك مرفوض عن اذنك الزيارة انتهت
بتوسل :سهر استنى لحظة ارجوكى واسمعينى شوية وبعدها هسيبك ومش هضايقك تانى
اضطرت للجلوس لتستمع اليه حتى طال الصمت فهو متردد فيما سيقوله ولكنه يجب ان يخبرها بالحقيقة اخذ نفسا قويا حتى امتلات رئتيه بالهواء و استجمع شجاعته قائلا :مش هكدب عليكي ياسهر واقولك ماحبيتهاش واكيد انتى عارفة كل اللى حصل ومقابلتى الاخيرة ليها
كانت تضغط على قبضة يديها فالمها قلبها لما تسمعه ولكنها صمتت فى انتظار تتمه حديثه
لكن اللى حصل فى مقابلتى الاخيرة بيها فوقنى خلانى اعرف اد ايه انا كنت عايش فى وهم كبير اسمه الحب الاول حبست نفسى طول السنين جوة حلم كاذب حتى لما اتجوزت كان جوايا صراع دائم عقلى بيقولى انسى وابدا حياتك من جديد وقلبى رافض انه يحب غيرها وينساها وفضلت فى الصراع ده لحد ماعرفت انها اتطلقت واتجدد الامل جوايا من جديد وقابلتها وحاولت افرض نفسى عليها لكن اللى اتأكدت منه يومها اننى ماكنتش اعرفش الانسانة اللى كنت متعلق بيها طول حياتى وغرقان فى حبها لحد الثمالة كل اللى كنت اعرفه عنها انها اخت صاحبى كنت بشوفها من بعيد هادية خجولة مؤدبة وبس لما اتكلمت معاها شوفت الرفض فى عينيها يعنى حتى لو اطلقت هى عمرها ماهتكون ليا
مرر يوسف يديه فى شعره بتوتر واكمل وفى نفس الوقت لما اتهجم جوزها علينا شوفت نظرات الشوق واللهفة ليه اللى حاولت تخفيهم عن الكل بغضبها وعصبيتها عليه وساعتها سالت نفسى فيه واحدة ممكن تستمر فى حب اللى خانها بالشكل ده اكيد الحب اللى بتكنه ليه غير طبيعى حب بيسرى فى دمها وانا ماليش مكان فيه لاقيتنى بضحك على نفسى انا اعجبت بجمال اميرة ببرائتها وعفويتها واللى ممكن الاقيها فى غيرها وبسهولة ازاى كنت غبى وعيونى عليها غمامة مش شايف اللى حواليا ولا شايف حد غيرها وساعتها وجه واحد بس طرأ على بالى وظهر فى خيالى وجه كنت لما بشوفه بهرب منه وببعد عنه مش عارف ليه كنت بحس انه بيهاجم كل دفاعاتى والهالة اللى لاففها حوالين نفسى واللى بتقول ممنوع اللمس كنت بشوف نظراتك المصوبة عليا فى كل مرة كنت بلتقى فيها مع اميرة واللى كلها بتنطق بمعنى واحد وانا بكل تعنت مصر ارفضه وابعد عنه
حاولت اتعرف عليكى اكثر راقبتك فترة بدون علمك حاولت اتعرف على اهتماماتك اسلوب حياتك وكل شئ فيها كان بيزيد اعجابى بيكي اكثر
بصوت اجش قال :انا عارف انك بتكرهيني دلوقت وانى مااستاهلش حبك واننى اصبحت فى نظرك انسان حقير اللى يحب واحدة متجوزة ويستمر فى حبها بس اقسم لك انها انتهت من حياتى للابد ومن قبل ماافكر فيكي وانك اصبحتى كل حياتى اللى هعيش علشان اسعدها وبس
رفعت سهر عيونها لتغرق فى عيون حبيبها :ماتقولش كدة عن نفسك انت تملك قلب جميل انا حلمت بيه طول حياتى واتمنيت انه يكون ليا طول العمر
نظر لها بلهفة : يعنى افهم من كدة انك قبلتى تتجوزيني وتكمليني وتكونى نصى التانى ومعاكى وبيكي هدفن الماضى للابد
هزيت راسها بالموافقة ووجهها متورد بالخجل لينهض من مكانه مسرعا فى اتجاه باب الخروج لتوقفه سهر بسرعة :هتعمل ايه يامجنون
هنادى على عمى علشان يجي واحدد معاه معاد اجى فيه انا واهلى ونتقدم لك رسمى ونقرا الفاتحة ونحدد معاد الخطوبة انا ماصدقت انك وافقتى حبيبتى ….