عود ثقاب بقلم ندا سليمان الجزء الثاني عشر

مالقهاش في القاعه ولمحها واقفه بره ، راح ناحيتها ووقف فجأه (( إنت فاكر الموضوع بسهوله كده يا عدنان !! ولما تصدمها بالحقيقه إللي مخبيها عنها يا ترى هتتقبلها وتتقبلك على كده !!! طيب وهي ذنبها إيه ؟!! هي أكيد تستاهل الأحسن مني ألف مره ، لكن إللي متأكد منه إن محدش هيبقى زيي في الدنيا دي ! طيب أقولها إني عاوز أتجوزها ولو وافقت أحكيلها ؟! لأ من حقها تعرف قبل ما تاخد قرارها ، صدقني يا عدنان مش ده الوقت المناسب

إتنهد بحرقه ورجع عن قراره ، لف تاني ودخل القاعه لكن روحه لسه واقفه هناك ضامه روحها

وصلوا لآخر فقره في الفرح ، وقفت العروسه بضهرها ومسكت البوكيه وإترصوا بنات الفرح وراها منتظرين ترمي البوكيه ، بصت سما وراها مالقتش داليا واقفه وسط البنات لقتها واقفه على جنب وبتتابعهم مبتسمه ، بصت قدامها وإستنت لما خلص العد التنازلي

5

4

3

2

1

0000 إستعدوا البنات ولكنها مارمتش البوكيه ، لفت وراحت لداليا والكل مستغرب وقصادها وإدتلها البوكيه هديه ، وداليا واقفه مذهوله ، أخدت منها البوكيه وحضنتها وعدنان واقف بيبصلهم ومبتسم

خلص الفرح وودعوا العروسين ،مشيوا المعازيم وفضلت داليا واقفه مع أمها بتطبطب عليها وتواسيهاجه عدنان ضمها وفضل يشاكسها لحد ما ضحكت ، حوطها زوجها بدراعه وأخدها ع العربيه ، بص عدنان لداليا : إنتي هتروحي إزاي ؟؟

_ إتصلت بخالو وهو أهه جاي في الطريق

_ طيب تمام هستناه معاكي لحد ما يجي

_ لأ ما تتعبش نفسك أكيد مجهد من ترتيبات الفرح تقدر تروّح وأنا هستنى هو أكيد قرب يوصل

_ ماطلبتش رأيك على فكره ولا بعزم عزومة مركبيه أمر غير قابل للنقاش

إبتسمت : خلاص إللي يريحك قصدي إللي يريح حضرتك يعني

_ إدخلي أقعدي في العربيه لحد ما يجي وأنا هشم شوية هوا هنا

_ لأ أنا مش عاوزه أقعد مرتاحه كده )

باصه في الأرض وبتقاوم نفسها من إنها تبصله

فجأه كسر حاجز الصمت : تعرفي يا داليا إنك بتفكريني بأغلى إنسانه عندي أو نقول أغلى إتنين عندي واحده أمي والتانيه

داليا : ساره مش كده ؟!

إلتفتله : أيوه ) عرفتي منين ؟

_ سما حكتلي عنها وكانت كل شويه تقولي إنتي فيكي كتير أوي من أختي التوأم ساره بس واضح إنها كانت غاليه عند الكل ومحبوبه

_ كانت عباره عن براءه وطيبه ونور ماشي ع الأرض هي إللي خلتني أقتنع إن الموت بيختار الطيبين لإن الدنيا دي ما تستاهلش ناس زيهم يعيشوا فيها