عود ثقاب بقلم ندا سليمان الجزء الثاني عشر

….

لفوا شعر سما وحطولها ماسك على وشها ، بصت لداليا ولاحظت إنها زهقت : دودو ممكن يا حبيبتي لو عاوزه تنزلي تتمشي إنزلي كده كده لسه مطولين وأنا هسترخي شويه عشان تعبانه لحد ما الماسك ده ينشف

وكإنها ما صدقت : ماشي يا سمسم هنزل بس أتمشى شويه عشان ضهري وجعني من القاعده وهجيلك

غمضت سما عيونها واسترخت شويه وداليا نزلت تتمشى تحت ، إتمشت شويه وفجأه لمحت عدنان قاعد على كرسي قريب منها ، ماقدرتش تمنع دقات قلبها من سرعتها ولا قدرت تمنع عيونها وملامح وشها من الإبتسام ) ، كشرت فجأه ونهرت نفسها (( إيه إللي بتعمليه ده يا ست داليا هو ده إللي اتفقنا عليه! مش قلنا نشيل الحاجات دي من دماغنا وبعدين ماينفعش تبصيله وتكزي فيه كده استغفر الله العظيم ))

وقبل ماتمشي لمحت دموعه نازله وملامح وشه بتتحول واضح إنه مغمض عيونه وبيعاني أو شايف كابوس ، نسيت نفسها ، مشيت خطوتين ناحيته وبعدين وقفت (( وأنا مالي وأنا يعني هعمله إيه !! طيب يا ترى إيه إللي حصل وضايقه كده معقوله يكون هو كمان بيبكي لنفس سبب زعل سما وبكاها !! أكيد عشان ساره لإن مامة سما كمان كان باين عليها الزعل إمبارح ربنا يرحمها ويجعل مثواها الجنّه ))

رجعت مكانها وقبل ما تطلع بصت عليه ومش عارفه تعمل أي حاجه مفيش في إيديها حاجه تعملها ومش عارفه تقول لسما تخفف عنه لإن فيها إللي مكفيها !!

طلعت قعدت جنب سما وفضلت تدعيلهم ولسه حاسه بضيق علشانه ، خرجت في البلكونه وبصت ناحيته لقت عصام واقف معاه فإتطمنت شويه إنه هيبقى جنبه ويخفف عنه !

جهزت سما وداليا كمان لبست فستانها وخمارها ووقفت تتأمل سما بفرحه : ما شاء الله تبارك الله عليكي ربنا يحفظك ويديم الحب والود بينكم يا حبيبتي

إبتسمت سما : يعني بجد حلو كده ؟

_قمررر ما شاء الله ربنا يحرسك

_ يا رب وعقبالك يا حبيبتي

سمعوا خبط ع الباب ، داليا : شكل العريس وصل

فتحت الباب وإرتبكت لما لقت عدنان واقف قصادها ، وشها إحمر وبصت في الأرض

وهو أول ما اتفتح الباب وشافها قصاده اتمنى في اللحظه دي لو كانت حلاله عشان يضمها ، لفت إنتباهه أناقتها وفي نفس الوقت ماهماش فرح ولا حفله وفضلت محافظه على إحتشامها و إحترامها ^^ ، ابتسم لما اتكسفت وبصت في الارض ، إتنحنح وسأل : هي سما خلصت ؟؟

_أيوه

_طيب قوليلها تستعد عشان عمي واقف في انتظارها يعني والحفله هتبدأ تحت