عود ثقاب بقلم ندا سليمان الجزء الثاني عشر

…

ساب عصام نايم شويه ونزل يتمشى في الفندق ، قعد في مكان هادي ، رجّع ضهره لورا وسند راسه ع الكرسي في محاوله للإسترخاء ، غمض عيونه

وشاف نفسه وهو متمدد ع الشيزلونج وبيقرا كتاب في أوضته ، خبّط الباب ودخلت قبل ما يأذنلها بالدخول : أنا قلت أكيد لسه مانمتش وبتقرا كتاب

ساب الكتاب إتعدل ، قعد وهو مبتسم : لا ناصحه يا ست سوسو فرد دراعه بحنان : تعالي

جريت بشقاوه على حضنه <3 حوطتها بدراعه : هااا هاتي ماعندك !

_ إحم إحم

_ أيووووه المقدمه دي بتقول إنك ناويه تصدعيني بخطاب

_ لا والله ده هم كلمتين وهقوم على طول بس بعد ما اخد منك كلمه طبعاً

_ أمممم طاب قولي كلي آذان صاغيه

_ بص بقى ، بما إن يعني سليم قالك نتجوز وأكمل دراسه معاه وإنت وافقت ممكن تقنع عمو عشان سما وعصام

_ أممممم بصي هو الموضوع صعب بس مفيش حاجه تطلبها دلوعة قلبي وأقولها صعب أوامرها تتنفذ وبس وأنا يعني عندي في الدنيا كام ساره وسما

_ هم واااحد

ضمته بقوه : يعني أقدر أقول للبت سما إن خلاص فرحنا هيبقى في يوم واحد ؟؟!

_ أمممم أفكر

خبطته على كتفه : يا سلااااام

_ طاب خلاص بالراحه ، قوليلها يا ستي وبقلب جامد كمان

_ ييييسسسسسس فليحيا عدنان حامي الديار

_ ههههههههههههه حامي الديار! أه بني عبس وجو أفلام الجاهليه ده يبقى بدأتي تخاريفك يلا يا ماما مش فاضيين

_ كده يعني ماشي طاب ده الموضوع ده كله عشانك انت وبس تخيل كده معايا يوم الفرح لما تدخل وإنت ماشي كده في النص وعلى يمينك أميره بالفستان الأبيض وعلى شمالك أميره تانيه برده بنفس الفستان كده وإنت ماشي بـ بـ إسمها إيه !!!

_ إيه قصدك فخر مثلاً أو أنفه أو إيه عايزه تقولي إيه

_ بص مش لازم ألاقي كلمه حسني هه حاسس

_ هههههههههههههههه أه خلاص حسيت

_ شفت بقى إن أنا قلبي عليك وعاوزه أتجوز أنا واختي في يوم واحد بس عشان تبقى إنت مبسوط إزاي

_ يا سلام على الطيبه والبراءه يا سلاااام ، يلا بقى سحبتي الأكسجين إللي في الأوضه

_ كده ماشي ماشي ، أنا هتكرم وأمشي دلوقتي بس بكره تندم يا جميل بكره أتجوز وأسيب البيت وتستمنى بس لحظه كده لأ لحظه إيه فيمتو ثانيه كده أقعدها معاك وأشاكسك ولا هعبرك ساعتها

سالت دموعه وهو مغمض عيونه : صدقتي يا ساره ودلوقتي مش لاقي حتى أقل من الفيمتو ثانيه أشوفك فيها وأقعد معاكي  لو كنت أعرف إن هيجي اليوم ده ماكنتش سيبتك تخرجي من حضني لحظه