عود ثقاب بقلم ندا سليمان الجزء الثاني
نِهال : أوك ،، مع السلامه
علياء أخدت بنتها هَنا لداليا عشان تشوفها ، أول ما شافتها إبتسمت وضمتها لحضنها فضلت تلاعب فيها وهَنا بتضحك من قلبها
علياء : حماتي هتتجنن عليها ومش عوزانا نسافر تاني ، مش مدياني فرصه حتي أقعد مع بنتي شويه ليل نهار حطاها فـ حضنها
داليا : هي أصلاً هنوش روح قلب خالتو تتحب أوي
هنا : دولّي حبّك
ضمتها داليا : يا روح قلب دولّي إنتي بمووووت فيكي :
علياء : لسه جدتها مشغلالها الفيديو بتاع فرحي إمبارح تصوري البت مش عرفاني هههههههه
عرفت أبوها والوحيده إللي عرفتها هي إنتي وعلـ . .
ووقفت علياء عن الكلام لما لقت نفسها هتجيب سيرة علي ، رفعت داليا الحرج عنها وسألت : حماتك كويسه صحيح ؟
علياء : أه الحمد لله بخير
كملت علياء كلامها وداليا فـ عالم تاني داليا سرحت فـ يوم فرح علياء
كانت لابسه فستان بنفسجي أنيق أوي ، علي هو إللي إختاره بنفسه بعد ماكانت مختاره واحد وماعجبهوش وهو كان لابس كرفته بنفس لون فستانها
كانوا لسه ما لبسوش دبل بس علي معتبرها مراته وملزمه منه من وهم صغيرين !!
مش ناسيه يوم الفرح بكل تفاصيله يومها علي إتحداها إنه يقدر يعمل أي حاجه مجنونه عشانها وهي قبلت التحدي وطلبت يغنيلها
ورغم إن صوته مش حلو تماماً إلا إنه ما إتكسفش علي طول مسك المايك وغنّالها رغم إن إللي فـ الفرح إعتبروها فقرة كوميديه وفضلوا يضحكوا عليه بس داليا هي الوحيده إللي كانت بتسمعه مبتسمه وعيونها بتلمع زي ما قلبها كان بيرقص علي صوت غناه
ماكنتش سامعه صوت النشاز إللي كان بيغني بيه لإنها كانت سامعه صوت إحساسه وقلبه بيلحنله سيمفونيه مع كل دقه والتانيه إفتكرت لما علياء رمت بوكيه الورد ولإن علي أطول منها هو إللي قدر يمسكه وعلى طول راح إداهولها
داليا لما إفتكرت ماقدرتش تمسك دموعها ،، علياء كانت بتتكلم وفجأه لقت داليا بتبكي ضمتها من غير كلام وإنهارت داليا فـ حضنها
…
هاله راحت تستقبل أهلها من المطار وحاطه إيديها علي قلبها ، وصلوا وسلّمت عليهم وكل مايسألوا عن علي تجاوب بإجابات مختصره ، رجعوا البيت ولما أمها سألتها عن السبب إللي مخليها قاعده عندهم إتحججت بسفر علي !
مروا يومين وأم هاله حاسه إن فيه حاجه مش طبيعيه بينها وبين علي وهاله مازالت بتنكر لحد ما تلاقي حجه تقولها !
