عود ثقاب بقلم ندا سليمان الجزء الثاني
ناريمان : ليه طلعت أجمل من وصفها !
جاسر : الله أحب الثقه بالنفس أوي ! أيوه وصفت بس إللي قالته مايجيش حاجه فـ جمالك
ناريمان :thanks it’s kind of you
جاسر : دي مش مجامله علي فكره
ناريمان : ، إنت درست إيه ؟
جاسر : English commerce وإنتي كمان مش كده ؟!
ناريمان : أيوه
كملوا كلام عن إهتماماتهم وطبعاً الحوار كان معظمه غزل ، حقيقه هي دي المهنه الأساسيه لجاسر إنه يميّل قلب كل واحده من أمثال ناريمان !
مشي أشرف الصايغ ونتيجة إجتماع عقد الصفقه المتخفيه فـ صورة جواز دي كانت مبهره وده إللي خلّي توفيق الزغبي يقرر يوفي بوعده لجاسر ! وبالفعل تاني يوم تم إفتتاح الشركه وإللي مديرها جاسر الزغبي وزي ما أبوه وعده الإعلام مالهوش سيره غير جاسر وشركته الجديده !
…
نِهال راحت لقريبها عشان تحكيله عن قضية داليا
نِهال : إزيك يا طارق ؟
طارق : يا هلا يا هلا بخير الحمدلله يعني ينفع كده يا دكتور مانشفكيش غير ساعة القضايا !
نِهال : معلش بقي يا طارق إنت عارف مشاغل الدنيا
طارق : فـ دي عندك حق الواحد ما بيلاقيش وقت حتي يكح
وهم بيتكلموا لفت إنتباههم إللي بيتكلم فـ التليفزيون
نِهال : مش ده توفيق الزغبي !
طارق : بالضبط كده
نِهال : طاب وهو فيه إيه معلش عشان بقالي كتير منعزله عن التليفزيون !
طارق : إفتتح شركه جديده يا ستي وسلمها لإبنه
نِهال : مش توفيق ده بتاع قضية الأغذيه الفاسده ؟!
طارق : بس طلع منها زي الشعره من العجينه كعادته محدش بيعرف يمسك عليه حاجه !
نِهال : هي المشرحه ناقصه قتله ولا البلد ناقصه فساد رايحين يفتحوا شركه جديده !!!!
طارق وهو ماسك الريموت وبيوطي التليفزيون : ياستي سيبك منهم يتحرق ده علي ده المهم ندخل فـ موضوع قضيتك إحكيلي بقي فيه إيه ؟!
حكتله نِهال عن إللي تعرفه عن قضية داليا
طارق : كويس جداً إنها هتقدر ترسم المغتصبين بالشكل ده هتسهل علينا القضيه وهنقدر بكل سهوله إن شاء الله نمشي فـ الإجراءات
نِهال : تمام أوي هي خلاص قربت تخلّص رسم اللوحات أول ما تخلّصهم هجيبها عشان تقدم بلاغ رسمي بقي وتبدأ القضيه
طارق : إن شاء الله
نِهال : هستأذنك أنا بقي عشان عندي شغل
طارق : طيب تمام الله يعينك
نِهال : ويعينك أبقي سلملي علي خالتو
طارق : يوصل إن شاء الله وإنتي كمان سلميلي علي كل إللي فـ البيت
