زوجي العزيز عفواً لست قاتلة بقلم منال جميعى. الجزء الاخير
دخل عصام فجلست شيرين إلى جوار شريف وضمته إليها قائلة بحنان..ممكن تهدى بس وتفهمني بالراحة إيه اللي حصل إن كان على الفلوس يا سيدي فستين داهية الفلوس بتروح وتيجي صحتك اهم من أي حاجة واللي راح يتعوض إن شاءالله
مسح شريف دموعه قائلا..اللي مأثر في نفسي اوي إني ضيعت الثروة اللي بابا تعب سنين فجمعها لكن منها لله زي ما ضيعتني وضيعت كل حاجة كنت ماشي كويس فالشغل والأمور كانت مستقرة فضلت تزن على دماغي وتقنعني ان البورصة مكاسبها كبيرة ومضمونة لحد ماخسرت مبالغ كبيرة جدا وكل ما احاول اعوض الخسارة تزيد اكتر وفالآخر الهانم طلعت
سكت شريف للحظات فحثته شيرين قائلة..طلعت إيه يا شريف متتكلم
شريف..طلعت مجرمة وخاينة وليها عشيق سمعتها وهيا بتكلمه فالتليفون وتقوله انها هتطلب الطلاق عشان يتجوزوا لإني خلاص مابقاش عندي حاجة تستنى عشانها والمصيبة إني لما واجهتها ما انكرتش وقالتلي بكل بساطة انها بتحبه من قبل ما نتجوز وان أهلها هما اللي ضغطوا عليها تتجوزني عشان فلوسي
ارتسمت علامات الذهول على وجهها وهي تستمع لكلمات شقيقها خشيت أن يكون قد فعل بها مكروها فسألته بقلق قائلة..وعملت معاها إيه يا شريف أوعى تكون
طمأنها شريف قائلا..لا متخافيش للأسف طلعت أجبن من إني اعمل كده كل اللي عملته إني طلقتها بعد ماخليتها تتنازل عن كل حقوقها وعن كل مليم خدته مني وبعدين رميتها فالشارع تتصوري يا شيرين ان الهانم كانت مانعة الحمل من ورايا عشان متخلفش مني لما قلتلها هبيع الشقة والشركة بتوع القاهرة ونروح نعيش في الفيلا فإسكندرية رفضت وقالتلي أنا مبعدش عن أهلي واتاريها عايزة تفضل جنب حبيب القلب
ربتت شيرين على ظهره قائلة..معلش يا حبيبي كل حاجة تتعوض إن شاءالله.
رفع بصره إليها وابتسم قائلا برجاء..سامحيني يا شيرين أنا عارف انها جاية متأخرة بس عشمان انك توافقي وتسامحيني على اللي عملته معاكي أنا حاسس إن اللي حصل ده ذنبك وربنا بيخلصه مني طيب عارفة يا شيرين والله كل اللي أنا عملته ده برضه كان بتخطيط منها أنا كنت ماشي بما يرضي الله ومكنتش باعمل أي حاجة غلط فالشغل لكن بعد ما اتجوزتها فضلت تقولي لازم نعمل مستقبل لينا ولولادنا اللي هنخلفهم خلتني سرقت أبويا وموته بحسرته وسرقتك انتي كمان حتى هي اللي قالتلي على الإتفاق اللي عملته مع فيفي قالتلي فيفي لو عرفت حاجة مش بعيد تبلغ عنك وتدخلك السجن لكن شيرين اختك مش هتهون عليها تعمل فيك حاجة لو عرفت
