زوجي العزيز عفواً لست قاتلة بقلم منال جميعى. الجزء الاخير
أجابته قائلة بجدية..أنا كنت فاكرة انك غيرت رأيك بعد اللي عماد قالهولك
أجابها ياسين بإصرار..بالعكس اللي عماد قاله ده خلاني مصمم على طلبي اكتر يعني دلوقتي نقدر نتجوز ونخلف عادي وابنك أو بنتك اللي جاي ده تأكدي إنه هيكون عندي زي خديجة بالظبط ها يا يمنى قلتي إيه
نكست يمنى رأسها وقالت بخجل..ياسين أنا متشكرة اوي على انك فكرت فيا واخترتني أنا بالذات أنا كان نفسي اقدر أوافق على طلبك ده لكن صدقني أنا مش هقدر أكون الزوجة اللي تسعدك يمكن اتقابلنا في توقيت غلط مش عارفة اقولك إيه بصراحة
ياسين..يمنى أنا قولتلك إني عندي إستعداد استناكي زي ما تحبي طيب على الأقل مترديش على طلبي دلوقتي سافري وهناك هتبعدي عن أي ضغوط وتفكري بهدوء وساعتها تقدري تقرري
يمنى بأسف..أنا أسفة يا ياسين لكن حقيقي القلب ميقدرش يحب اتنين وأنا لو وافقت هبقى بظلمك معايا
خفض بصره وقال بأسى..هترجعي لدكتور عمرو
أجابت قائلة بحيرة..تصدقني لو قلتلك مش عارفة
ابتسم قائلا بمرارة..عموما أنا اتمنالك السعادة من كل قلبي سواء مع دكتور عمرو أو مع أي حد غيره أشوف وشك بخير مرة تانية
غادر ياسين فاستدارت يمنى خلفها لتعود لكنها فؤجئت بعمرو يقف خلفها وهو يبتسم بوهن قائلا والأسى يقطر من كلماته..مقدرتش امنع نفسي إني آجي اودعكم وانتو مسافرين انتي وابني أشوف وشك بخير يا يمنى .
اشاحت بوجهها بعيدا وهي تجيبه قائلة بخفوت..متشكرة اوي
ثبت نظره على عينيها الممتلئتين بالدموع وقال بحزن..وقت ما تقرري ترجعي هتلاقي قلبي وحضني مفتوحينلك قبل بيتي أنا مش هفقد الأمل ابدا اننا نكون لبعض من تاني وبقولهالك لتاني مرة مش عشان ابننا لكن عشان أنا بحبك ومقدرش أعيش من غيرك أنا عارف انك سامحتيني لكن أنا مش هسامح نفسي ابدا لو خسرتك كفاية عليا إني هتحرم من إحساس جميل كان نفسي أعيشه وهو إني أشوف إبني وهو جنين بيكبر ادام عنيا واكلمه وأقوله أنا مستني اللحظة اللي اشوفك فيها بفارغ الصبر واخدك فحضني أنا هعتبره عقاب من ربنا ليا أنا استحقه فعلا أشوف وشك بخير يا يمنى خلي بالك من نفسك
يمنى بدموع..أشوف وشك بخير يا عمرو.
عمرو..يمنى ممكن أطلب منك طلب أخير ماما جت معايا ونفسها تشوفك وتسلم عليكي قبل ما تسافري لكن طلبت مني أسألك الأول إذا مكنش عندك مانع وعلى فكرة هي لسه متعرفش بموضوع الحمل إذا كنتي عايزة تقوليلها انتي يكون أحسن لكن لو مش عايزة أنا هقولها بس بعد ما تسافري
