زوجي العزيز عفواً لست قاتلة بقلم منال جميعى. الجزء الخامس

شعرت بالخوف يسري في أوصالها وهي تجيبه قائلة..ايوه روحت بس والله مش زي ما انت فا
لم تستطع أن تكمل كلامها فقد تلقت للتو صفعة قوية اسالت الدماء من جانب فمها لم تكن الضر….بة التي تلقتها مؤلمة بقدر ماكانت كلمته التالية اكثر إيلاما حين نطق قائلا..انتي طا…لق

حدقت فيه غير مصدقة ما سمعته أذناها فيما وقفت مشيرة خلف ظهره وقد وضعت ذراعيها في خصرها وارتسمت على شفتيها إبتسامة نصر ممزوجة بالشماتة.

اقترب عمرو منها وجذبها من ذراعها ثم فتح الباب والقاها خارجه قائلا في غضب..مش عايز اشوف وشك ده مرة تانية  فاهمة ولا لأ

ثم دخل واغلق الباب خلفه ثم ارتمي على اقرب مقعد واضعا رأسه بين كفيه رافضا تصديق كل ما حدث اقتربت منه مشيرة وقالت بصوت أقرب إلى فحيح الأفاعي وهي تبث سمومها..متزعلش نفسك يا حبيبي الحمد لله ان ربنا بعتني ليك عشان اكشفلك حقيقتها والحمد لله ان ربنا بعتك ليا فالوقت المناسب قبل متعمل فابننا حاجة

رفع بصره إليها قائلا بلهفة..انتي كويسة والبيبي كويس حد فيكم حصلوا حاجة يلا عشان اوديكي للدكتور نطمن عليكي وعلى البيبي

اشاحت بوجهها بعيدا وقالت بتلعثم..لا يا حبيبي ماتخافش انا كويسة الحمد لله والبيبي كمان كويس وبخير صدقني أنا مش حاسة بحاجة ولو تعبت هبقى اقولك توديني متقلقش عليا

اسرع عمرو متجها نحو الباب فاوقفته مشيرة قائلة..رايح فين يا عمرو

عمرو بضيق..حاسس ان انا مخنوق ومحتاج اتمشى شوية

مشيرة..طيب خلي بالك من نفسك

عمرو..حاضر عن اذنك