زوجي العزيز عفواً لست قاتلة بقلم منال جميعى. الجزء الخامس

بعد مرور أسبوع كانت مشيرة تجلس بمكتبها الذي تشاركها إياه منى كاد قلبها أن ير….قص فرحا وهي تحادث أحدهم في الهاتف سمعتها منى وهي تقول بفرحة..انت متأكد من الكلام ده يا عم دسوقي طبعا طبعا ليك الحلاوة ودي عايزة كلام متشكرة اوي  مع السلامه

قطبت منى جبينها في دهشة وهي تراها على هذه الحالة فبادرتها قائلة..مشيرة مش دسوقي ده يبقى الفراش بتاع مكتب عمرو الألفي

مشيرة مصدقة على كلامها..أيوه هو  الجاسوس بتاعي مش عايزة تقولي كده

منى..وده إيه اللي فكره بيكي ده بقاله اكتر من سنتين من يوم عمرو ما اتجوز مبيكلمكيش

مشيرة..عشان مكنش فيه حاجة مهمة يقولها بس النهاردة بقى كان جايبلي خبر بمليون جنيه

منى بتهكم..اللهم اجعله خير

مشيرة بسعادة..كل خير…هو كان بيقولي ان عمرو هيتجوز

منى بدهشة..يتجوز تاني

مشيرة..ايوه اصل مراته مبتخلفش…وعم دسوقي سمعه وهو بيكلم مامته وبيقولوا انه بيدور على زوجة تانية فكلمني علطول

مني ..طب وانتي ناوية على إيه يا مشيرة

مشيرة وقد لمعت عيناها بخبث..ودي عايزة كلام برضه فرصتي وجت لحد عندي مش لازم اضيعها المرة دي كمان

منى..يعني إيه

مشيرة..يعني المرة دي مافيش هاني خلاص يبقى فيه عمرو

منى بذهول..إيه اللي بتقوليه ده يا مشيرة

مشيرة..بقولك اني لازم اتجوز عمرو وفاسرع وقت ممكن ولازم اتحرك بسرعة قبل ما يلاقي عروسة

منى..وانتي ضامنة اوي كده انه هيرضى يتجوزك

نظرت إلى الفراغ أمامها وهي تقول بتحد ظاهر..بكرة تشوفي مشيرة هتعمل إيه

ما إن خطت أولى خطواتها داخل مكتبها هذا الصباح حتى حدقت فيها مني بدهشة ظلت لفترة تتأملها من رأسها حتى إخمص قدميها ثم صاحت فيها قائلة..مش انتي مشيرة برضه ولا أنا بيتهيألي  ثم استطردت قائلة بدهشة أكبر..ايه اللي انتي عاملاه فنفسك ده يا مشيرة

اطلقت مشيرة ضحكة مدوية ثم أجابتها وهي تدور حول نفسها قائلة..مشيرة بعد التعديل إيه رأيك ف النيولوك ده

اجابتها منى قائلة بتهكم..مقولتيليش قبل كده انك ناوية تشهري إسلامك يعني

مشيرة ضاحكة..احترمي نفسك هو أنا كنت كافرة ولا حاجة

مني موضحة..لا مقصدش طبعا أنا اقصد انك مقولتيليش انك ناوية تغيري إستايل لبسك لأ وكمان تتحجبي إيه طلعت فدماغك كده مرة واحدة

مشيرة..لزوم الشغل يا عبيطة

مني بدهشة..شغل إيه ده ما احنا بقالنا سنين بنشتغل فالشركة وعمر ما حد طلب مننا اننا نتحجب  اشمعنا النهاردة يعني