عود ثقاب بقلم ندا سليمان الجزء العاشر

بعد مرور 7 سنوات .... السما صافيه والشمس بتستعد للمغيب ، قاعد في نفس المكان وعيونه متركزه على مكانها ، كالعاده منتظرها ! واخيراً ظهرت بفستان رقيق زي ملامحها ونسمات الهوا بتشاكسها وتطير خمارها ، دايماً بيحسها مَلِكه رغم انها بلا تاج ! يمكن لإنها فجأه احتلت عرش قلبه بلا استئذان !! طول حياته قافل على قلبه لحد ما جت هي وغيرت كل قواعد حياته ، اتحول من شخص الثانيه عنده بتفرق لشخص مستعد يضيع ساعتين كل يوم ولمدة 3 سنين من غير مايزهق ، بيقعد في نفس المكان ويستناها ، اصبحت انيسه في وحدته وغربته رغم ان عمره ما اتجرأ وكلمها ، قربت وقعدت في نفس المكان زي كل يوم وكالعاده لقطلها صوره ويا الشمس وهي بتستخبي في حضن نهر التايمز ..... بيحسها منه وشبهه ، نفسه يعرف السر في إن هي بالذات تأسر عقله وتخلي قلبه يتجرأ ويتمرد عليه ويحب ! قعدت في مكانها المعتاد تودع الشمس في غروبها ، اتنهدت براحه وشوق وحنين وهي بتتأمل النهر رغم ان كل حاجه في المكان مختلفه بس دايماً لما تبصله تفتكر مكانها المفضل ، تفتكر نهر النيل ، بقت بتدور في غربتها على اي حاجه من ريحة وطنها ، حولت نهر التايمز لنيل مصر، نيل مصر شريان الحياه فيها والتايمز اصبح شريان حياه بيخليها تفرغ طاقة الحنين جواها وتعيش لحظات مع ذكرياتها ، بقت كل يوم قبل الغروب تروح تقعد في مكان هادي لوحدها تتفرج على لوحة ابدعها الخالق في الطبيعه ... مازال في مكانه بيتأملها لحد ما قطع لحظات تأمله صوت موبايله ، رد _ السلام عليكم _وعليكم السلام ورحمة الله وبركاته ، حضرتك مش ناسي حاجه يا أخ ؟؟؟!!! _لأ فيه ايه ! _المفروض يعني سيادتك كنت هتتكرم وتيجي تاخدني من المطار وسبحان الله وصلت وركبت لبيت حضرتك وطلعت كمان مش فاكر الميعاد ! _يا خبررر انا اسف والله يا عصام نسيت خالص _طبعاً وتفتكر ليه !! انا واثق بنسبة 100% انك دلوقتي بتراقب ملهمتك اللي بقالها 3 سنين مدوخاك وراها وسيادتك مش عاوز تتلحلح ، ده لو أبوالهول كان نطق !!!! _والله حاولت قبل كده بس ماجتليش الجرأه اني حتى مجرد اكلمها ، وبعدين إنت عارف رأيي في الموضوع ده بقى _ومبسوط بحالك كده ؟! _عصام الله يكرمك مش ناقصيين كلام كل مره والله حفظته وعارفه كويس اووي كفايه ! _بس يا ابني انت مــ قاطعه لما لقاها وقفت : عصام عصام بص انا ساعه وهكون عندك في البيت إن شاء الله ، بس هقفل دلوقتي مع السلامه ما استناش رده ، قفل ، حط موبايله في جيبه ومشي وراها وهو عارف كويس هتروح على فين .... ! قامت من مكانها وراحت تكمل عادة كل يوم ، إلى حيث إدجوار رود ، شارع العرب ، بتحب تمشي فيه لإنها بتلاقي نفسها ، بتلاقي ناس تشبهلها ، بتسمع ناس بتتكلم عربي ، بتشوف لوحات مكتوبه بلغتها إللي مفتقداها في غربتها ،بتسمع آذان ، بتشوف مصليين ، بتشوف محجبات زيها ، بتلاقي تفاصيل كتيييره أوي إتحرمت منها ! وقفت عند محل صغير ولفت إنتباهها مداليه على شكل كعبه ، إبتسمت بـ راحه ، مسكتها وإفتكرت يوم ما زارت أطهر مكان على وجه الأرض ، إفتكرت زيارتها لمكه ، اليوم إللي خرجت فيه من وطنها وهي بتودعه لآخر مره ، شايفه قصاد عيونها دلوقتي نفسها وهي واقفه عند الكعبه بتناجي ربها ، واقفه بتبكي بحرقه وتردد : يــا رب مش همشي من بيتك غير وأنا مجبور كسري ، يا جابر المنكسرين إجبر كسر قلبي وقويني يا رب عشان أعيش ، قويني يا رب و إلهمني الصبر من عندك يا كريم من أجمل الرحلات في حياتها وكل ما تفتكر أيام العمره تدمع عيونها من الشوق والحنين للمكان ، عاشت روحانيات كانت مفتقداها أووي ، كانت بتقعد تتأمل الحمام في الحرم وتحس إن روحها طايره وبترفرف وياهم ، حست إنها طفل كان تايه ورجع لحضن أمه ، حست بسلام وسكينه ضامه روحها، بعد ما رجعت كانت حاسه إنها طفل لسه مولود بلا ذنوب ولا وجع ولا خوف ، إتقربت من ربنا ، عرفت دينها أكتر وحاولت على أد ما تقدر تلتزم بيه فاقت من شرودها على صوت إللي واقف في المحل : يا هلا فيكي إختي إذا بدك إتفضلي هالمره هديه من المحل لإنو لسه جداد وبيسعدنا زيارتك مره تانيه إبتسمت بإمتنان : شكراً أنا عندي منها واحده جبتها من الحرم ، أكيد إن شاء الله هاجي مره تانيه ، بالتوفيق كملت جولتها ومازال ماشي وراها ، رن موبايلها _أيوه يا حبيبي أنا اسفه عارفه إني أتأخرت بس ماتقلقش أناكويسه ، في ادجوار رود دلوقتي ، خلاص راجعه ع البيت أهه مع السلامه ركبت للبيت وهو واقف مذهول بعد ما سمع مكالمتها وسأل نفسه : معقوله تكون متجوزه ولا حتى مخطوبه ؟! معقوله يكون فيه حد في حياتها حس بضيق لمجرد إن الفكره دي تيجي على باله ، رجع بيته وهو مهموم وأول ما إستقبله صاحبه ع الباب حاول يبتسم وهو بيضمه ويربت على ضهره _ عصااام باشا منور لندن عصام : منوره بوجودك فيها يا عدنان بيه ، طمني عليك ، كله تمام ؟ عدنان : أه أه الحمدلله كله تمام عصام : مش باين يعني ! حصلت حاجه ؟؟! عدنان : بقولك إيه سيبك منّي دلوقتي و تعالى نتعشى الأول عشان أكيد جاي جعان وأنا كمان ما اتغدتش إلتفت للشغاله : We will have dinner in the garden , please عدنان : يلا يا عصام نستني في الجنينه لحد ما العشا يجهز ... أول ما فتحت الباب جريت عليها : دولّييي على فكره أنا زعلانه منك داليا : ليه بس يا لارا ؟! لارا : عشان المفروض كنتي هتاخديني معاكي زي ما اتفقنا داليا : كنتي نايمه وماحبتش أصحيكي لارا : This is not an excuse شيرين : لارررااا بطّلي عناد أنا إللي قلت لداليا ماتصحكيش عشان كنتي تعبانه لارا : بس يا مام أنا بجد كان نفسي أروح معاها داليا : خلاص يا لولو وعد بكره إن شاء الله هاخدك معايا إنتي ومرام ومحمد لارا بفرحه : yeeeeeeh, I love you so much, Dalia شيرين وهي بتضحك : يعني خلاص ناويه تريحينا من العفاريت ولو ساعه واحده بكره إن شاء الله ! داليا : ههههههههه لأ ماتقلقيش 3 ساعات بحالهم إستفرضي بناصر بقى وخليه يخرجك شويه بدل ما التوأم خلوكي تخللي في البيت شيرين : أه يا أختي فعلاً تعبيرك سليم جدااً ومُعبّر ، من يوم ما مرام ومحمد شرفوا وأنا حاسه إني مش أنا داليا : لا دي ملامحي ولا شكلي شكلي ولا ده أنا ضربت داليا على كتفها : بتتريقي يا زفته طيب بكره إن شاء الله نتفرج عليكي لما تتجوزي وتخلفي ونشوف هتعملي ايه يا هانم ! إختفت ضحكتها وردت بحِده : شيرين أظن إحنا إتفقنا قبل كده الموضوع ده مايتفتحش تماماً حتى ولو على سبيل الهزار ! قالت جملتها ولسه هتطلع أوضتها ، مسكتها شيرين من إيديها : ولحد إمته يا داليا ؟؟! داليا : لحد ما أموت يا شيرين أنا مش للجواز أنا خلاص قررت أعيش وأكمل لوحدي وبالفعل أنا مرتاحه كده شيرين : أنا كنت زيك في وقت من الأوقات لما إفترقت أنا وناصر كنت بقول زيك كل الشعارات دي أنا هقدر أعيش لوحدي وأكمل لوحدي إيه يعني حياتي من غير راجل !!! قدرت أعيش أه رغم إن كان بيجي عليا أوقات أحس بوحدتي ووجعي بس كملت ولما إتجوزت خالك وعيشت معاه تحت سقف واحد وربنا رزقنا بالتوأم عرفت الفرق بين حياتي وأنا لوحدي وحياتي دلوقتي وأنا معايا شخص وقت ما أتعب هلاقيه جنبي وقت ما أزعل هلاقيه بيساندني ويحاول يخرجني من حالتي ، هلاقي حد يشاركني فرحتي وحزني ، حد يحمل همي ويهتم بيا داليا : ده عشان إنتي معاكي راجل زي خالو ناصر ، والرجاله في الزمن ده خلاص بحححح ، عشان خاطري يا شيرين لو بتحبيني بجد يبقى مانتكلمش في الموضوع ده تاني أنا خلاص فعلاً شيلته من حساباتي ومرتاحه كده والله ، قلبي إتملى بحب ربنا ومابقتش عاوزه أي حاجه تانيه من الدنيا شيرين : ربنا يزيدك يا حبيبتي بس الزواج سنـ داليا في محاوله منها لتغيير الموضوع : أمال خالو فين ؟ إتصل بيا وأنا في ردجوار رود وقالي أرجع ع البيت وقبل ما ترد عليها نزل ناصر من ع السلم : أنا أهه يا ست دولّي بص لشيرين : إيه الأخبار ؟! شيرين : هي مدياني فرصه أجيب سيرة الموضوع أصلاً إتفضل إنت إتكلم معاها داليا : ما تتكلموا دوغري أحسن بدل اللف والدوران ده وإنتوا عارفييني مابحبوش ! شيرين : بإختصار كده يا داليا جالك عريس ، شافك يوم ماروحنا من اسبوعين فرح صاحب خالك ! داليا : أمممممم وياترى رأيك إيه يا خالو ؟ إستنى وقبل رأيك قولتله ؟؟!! ناصر : الموضوع ده مايتقالش كده يا داليا إنتي عملاه أزمه بشكل مش طبيعي !! وإنتي ممكن لما تقعدي معاه وتشوفيه وتتـ قاطعته : بص يا خالو لو متضايقيين من وجودي معاكم هنا قولوا وانا هسيب البيت وأشوفلي أي مكان تاني لكن عشان تجوزوني فده من عاشر المستحيلات ناصر بعصبيه : إيه إللي بتقوليه ده !! هتخليني أتعصب عليكي ليه ! بطلي كلام ملهوش لازمه وبعدين انا ماقولتش بجبرك وأنا من الاول رفضت من غير حتى ما أقولك عشان عارفك لكن شيرين هي إللي قالت من حقك تعرفي بالموضوع يمكن تغيري رأيك ! شيرين : أنا اسفه يا داليا والله ما أقصد المعني إللى فهمتيه ده أبداً وإنتي عارفه كده كويس داليا بعصبيه : لو سمحتم أنا الصفحه دي خلاص إتقفلت بل إتقطعت من حياتي كلها أرجووووكم ماتفتحوش الموضوع ده تاني وبجد لو إتفتح هحس أد إيه وجودي مضايقكم وهمشي وأسيب البيت قالت جملتها وطلعت على أوضتها بص ناصر لشيرين بعتاب : أنا قولتلك إيه ؟؟!! مش قولت بلاش وحضرتك قولتي لأ نجرب يا ناصر أهه جيتي تكحليها عميتيها ! أنا قولتلك عارف داليا مش هتوافق ، خلاص يبقى تسمعي كلامي وماتجادليش بقى !! طلع ناصر ورا داليا ، خبط على باب أوضتها داليا : إتفضل ! ناصر : إنتي يا نيله إيه الكلام إللي قولتيه ده >.< ! داليا : أنا عارفه يا خالو إن ده مش قصدكم بس أنا قلت كده عشان تبطلوا كلام في الموضوع ، إنت مش يهمك راحتي ؟؟! ناصر : أكيد داليا : بس ! وأنا كده بجد مرتاحه ، إنت مش ملاحظ إني فعلاً بقيت أحسن من الأول بكتييير حتى أحسن من داليا القديمه ، أنا كنت زمان الدين عندي صوم وصلاه وبس ! ودلوقتي بتقرب من ربنا أكتر حاسه إن قلبي بقى أحسن ، بقيت بستعين بالله على وجعي ، بإختصار يا خالو خلاص حياتي مابقاش ينفع يدخل فيها راجل ناصر بثقه : أممممم مقتنع بكلامك بس أنا حاسس إن هيجي يوم وتغيري كل النظريات إللي بنيتيها لنفسك دي وبكره أفكرك داليا : وقتها إن شاء الله هبقى أقولك مع إني أشك في ذلك ناصر : ماشي يا ستي هنشوف وعموماً خلاص أوعدك الموضوع ده مش هيتفتح تاني لحد ما إنتي بنفسك إللي تفتحيه إتفقنا ؟ داليا : إتفقنا ، ربنا ما يحرمني منك أبداً يا خالو ناصر : ولايحرمني منك يا عيون خالو ... عصام : إييييه يا عم ! بقالي ساعه بتكلم إللي واخد عقلك يتهنابه ! بس شكلك مش مضبوط حصلت حاجه ولا إيه ؟! زفر عدنان بضيق : مش عارف يا عصام بس إنهارده سمعتها بتكلم واحد في التليفون وواضح يعني من كلامها إنهم مرتبطين ، يعني بإختصار شكلها طلعت متجوزه ولا مرتبطه عصام : بتهزر ؟! ههههههههههههههه عدنان : إنت بتستفزني ؟؟! إيه إللي يضحّك دلوقتي >.< ؟؟!! عصام : تستاهل :P عشان أنا قولتلك من الأول إتلحلح كلمها إعمل أي حاجه ! عدنان : عصام إنت عارف كويس أوي إيه إللي منعني إني أحاول أكلمها كل السنين دي ! عصام : والله إللى أعرفه إن إللي يحب حد بالشكل إللي إنت بتحب بيه البنت دي بيعمل المستحيل ومابيهمهوش أي حاجه ! عدنان : السبب إللي مانعني مش أي حاجه وإنت عارف كده كويس ! بقولك إيه أنا هطلع آخد دوش سريع لحد ما العشا يجهز ... مددت داليا ع السرير وشردت في السقف ، سمعت صوت موبايلها وأول ما قرأت الإسم إبتسمت وردت : حبيبة قلبي وروحي وكل حياتي وحشاني أوووووي يا أمي : خديجه : إنتي أكتر يا وحشه مع إني ماكنتش ناويه أكلمك تاني أصلاً أنا هنت عليكي يا داليا ؟؟! داليا : ماتقوليش كده يا حبيبتي بس إنتي عارفه كويس أووي إني مش عاوزه أرجع مصر ، وبعدين مش خالو قالك هيحجزلك تذكره تيجي هنا تقضي معانا كام يوم زي السنه إللي فاتت ؟ خديجه : لأ إسكتي يا اختي توبه إني أجرب الموال ده تاني وأسيب أبوكي هنا هنادي أه كتر خيرها ماقصرتش معاه بس هو مابيرتحش غير معايا داليا : هو عامل إيه صحيح كويس ؟ خديجه : الحمدلله يا حبيبتي ، بس كان مصدع ونايم شويه داليا : لما يصحى سلميلي عليه وهبقى اكلمه اتطمن بنفسي ،كل إللي عندك كويسين ؟ خديجه : الحمدلله بخير وأحمد لسه راجع من الكليه ودخل يريح شويه داليا : واحشني أوووي الواد ده أول ما يصحي يا ماما بالله عليكي خليه يرنلي نفسي أسمع صوته أوووي خديجه : حاضر يا نور عيني طمنيني عليكي بتاكلي كويس ؟ كل إللي عندك كويسين ؟ داليا : الحمدلله يا حبيبتي كلنا تمام ومش ناقصنا غير وجودكم معانا خديجه : عامله إيه في شغلك ؟ لسه برده مخنوقه منه ! داليا : ماتفكرنيش يا ماما بجد تعبت شكلي مش هكمل في الشغل ده مليش في الحسابات والكلام ده أنا بجد زهقت خديجه : طيب ماخالك قالك تشتغلي معاه وإنتي اللي رفضتي مش كان أريحلك لو معاه ؟! داليا : يا ماما يا حبيبتي خالو عامل إداره كويسه جداً ماشاء الله لشغله والموظفين على أد الشغل بالضبط أنا هاجي ليه أقلبله كيان شغله إما هيضطر يمشّي حد عشاني أو هيديني وظيفه ملهاش لازمه أصلاً وهو مش محتاجها ، عموماً خلاص أنا هستحمل لحد ما ربنا ييسر وألاقي شغل تاني خديجه : مابلاش تشتغلي خالص يا داليا هو يعني إنتي ناقصك حاجه عند خالك ؟! داليا : أولاً يا ماما خالو ناصر كتر خيره وزياده مش مخليني محتاجه حاجه وكفايه إنه إتحمل تكاليف دراستي والدراسه هنا أصلاً تكاليفها غاليه جداً وبعدين الشغل مش عشان الفلوس أنا مش عاوزه أستسلم لأي فراغ في حياتي وإنتي عارفه الفراغ ممكن يعمل في بنتك إيه ! ثم إن المصاريف تقلت عليكم في البيت علاج بابا وجامعة أحمد ومرتب عادل هيكفي بيته ومراته وعياله ولا يكفي إنه يشارك في مصاريف البيت ! خديجه : لحد إمته يا حبيبتي هتفضلي حامله هم كل إللي حوليكي ومش حامله هم نفسك إبتسمت داليا : أنا هبقى مرتاحه لما أشوفكم مرتاحيين ومبسوطين يا أمي أنا مش عاوزه أي حاجه من الدنيا غير سعادتكم خديجه : ربنا ما يحرمنا منك أبداً داليا : ولا يحرمني منكم خديجه : ميعاد دوا أبوكي يا حبيبتي هقفل عشان أديهوله وهبقى أكلمك تاني سلميلي على كل إللي عندك داليا : يوصل إن شاء الله وسلميلي على بابا وكل إللي عندك برده خديجه : حاضر ، مع السلامه داليا : مع السلامه قفلت داليا وحضنت الموبايل وهي مغمضه عيونها ، أد إيه مشتاقه لحضن أمها ومشتاقه لضمتها ، مشتاقه تطمن لما تسمع دقات قلبها وهي نايمه في حضنها ، مشتاقه لأبوها ولإخواتها وبيتهم ، مشتاقه لأصحابها وجيرانها ومشتاقه لحضن وطنها ،،زفرت بهدوء ، حطت الموبايل ع الكومود وإتناولت المصحف تطمن بيه قلبها وتطفي نار الشوق والحنين .... ... رجع عدنان لعصام ولقاه ماسك الكاميرا وبيقلّب في الصور عصام : إيه الصور دي كلها يا ابني ! مش شايف فيها حاجه مميزه يعني عشان يتشقلب كيانك كده ! أخد عدنان الكاميرا منه : أولاً ما اسمحلكش تبص عليها كده! عصام : لا يا راجل ! عدنان : وثانياً بقى وده الأهم إني شايفها كلها على بعضها مميزه بص لصورتها وإبتسم: عارف ، أول مره شوفتها جذبتني بطريقة ماكنتش متخيلها ، غصب عني ماقدرتش أغض بصري ، في لحظه واحده لقتها حطمت كل الأسوار إللي كنت بانيها حولين قلبي عشان مفيش واحده تقدر توصله ، بكل بساطه وبنظره واحده من عيونها لقيت الأسوار اتهدت وفي لمح البصر إستعمرت قلبي ، إتربعت على عرش مملكته بكل تحدي، حسيت فيها أمي إللي إتحرمت منها وأنا طفل يدوبك 10 سنين ، مر طيف أمي قصادي وقلبي إرتجف لما شميت ريحة حضنها إللي لسه لحد دلوقتي مش قادر أنساها ، للحظه لقتني بنسي كل الحدود إللي حطتها في حياتي بيني وبين كل الناس ، للحظه نسيت ان ممنوع على قلبي يفكر في الحب ، للحظه نسيت انا اد إيه دربت نفسي على غض البصر ولقتني كل يوم براقبها وأمشي وراها زي إللي مسحور وماشي يلف ورا النداهه ، فجأه كده أصبحت ونيسي ، بحس بأُلفه وسكينه في الساعات اللي بقضيها معاها بصمت ، بقضيها معاها من غير ما تعرف ، بكلمها بعيوني ومش مهم عندي ألاقي إجابه المهم إني مرتاح كده ، أنا عارف إني إللي بعمله ده ماينفعش، المفروض أغض بصري وأوقف نفسي عند حدها بس أنا فعلاً لأول مره ما ابقاش قادر أسيطر على نفسي، لأول مره بنسي كل الأسباب إللي تمنعني إني أحب ، لكن لكن إنهارده ! حسيت إن أرض الأحلام لفظتني قالتلي مالكش مكان هنا أرض الواقع هي ملجأك الوحيد ، إهتز كيان قلبي لما سمعتها بتقوله كلمة حبيبي مش عارف ليه ! وقفت مكاني وماقدرتش أتحرك ! عصام : الله يسامحك يا أخي إنت إيييه حرام عليك نفسك كل ده جواك وساكت !!!! إتحرك يا عدنان مش يمكن ماتكونش متجوزه ولا مرتبطه وانت سمعت غلط ولا مثلاً كانت بتقول كده لأبوها ؟؟ عدنان : مش عارف ! ومش عارف لحد إمته هفضل مستمر في عادة المراقبه دي ! لو فعلاً كانت متجوزه ولا مرتبطه أصبح دلوقتي ماينفعش حتى أفكر فيها أساساً أنا مش عارف إيه إللي خلاني أتنيل وأنسي نفسي بالشكل ده !! عصام وهو بيصفق : والله ووقعت يا عدنان وجه اليوم إللي اشوفك فيه متبهدل وغرقان في الحب ههههههههههههه عدنان : عصام الله يكرمك بلاش هزار دلوقتي أنا بتكلم بجد عصام : كلامي مابيعجبكش يبقى هتكلم ليه بقى !! وقبل ما يرد عدنان وصل العشا عدنان : أظن نغير الموضوع ده أحسن طمني إيه أخبار الفرع عندكم ؟ ... داليا كانت بترتل سورة يوسف لحد ما سمعت النغمه إللي مخصصاها لأحمد أشرقت إبتسامه على شفايفها ، صدّقت ، كنسلت عليه وإتصلت داليا : حبييبيييي أحمد : إنتي إللي حبيبي وروحي بس ما ردتيش ليه وربنا شاحن الموبايل ، عَمران ماتقلقيش داليا : مش هتفرق يا قلبي أنا وإنت واحد طمني عليك بقى أحمد : الحمدلله يا دولّي بس سامحيني عارف إني مقصر في حقك بس والله طالع عينيا في الكليه أساساً مابناخدش أجازه داليا : عارفه يا حبيبي والله وعذراك خلاص هااانت كلها سنه واحده بس وهتتخرج وترتاح أحمد : أرتاح ! قلبك أبيض داليا : على الأقل هترتاح شويه من هم الدراسه والمذاكره وتبدأ بقى الحياه العمليه أحمد : الله المستعان داليا : طمني أحوالك إيه مع ربنا ؟ إبتسم أحمد : الحمدلله تمام ماتقلقيش داليا : أيوه كده يا حبيبي أوعى الدراسه والدنيا ومشاغلها ينسوك إنك مش هتقدر تكمل خطوه زياده في حياتك من غير رضا ربنا وقربه أحمد : ونعم بالله ، ماتقلقيش ، أخبار خالو ومراته وولاده إيه ؟ داليا : الحمدلله كلنا بخير قولي عملت إيه في الكورس إللي حكتلي عنه ؟ فضلت تتكلم مع أخوها شويه وتطمن على أحواله وتشجعه بكلامها كالعاده ... ... تاني يوم عدنان فضل في البيت مع صاحبه لكن طول الوقت كان مركز مع xxxxب الساعه أول ما قربت من الميعاد المحدد إرتبك ، إمبارح كان مقرر مايروحش تاني بس دلوقتي مش قادر ، فضلت أصوات كتيره تتردد جواه ، صاحبه بيتكلم وهو في وادي تاني وفي النهايه الغلبه كانت لصوت القلب بص لعصام : عصام معلش عندي مشوار ضروري بس وهرجعك تاني ضحك عصام : قال إيه مش هروح تاني أنا خلاص قررت أنهي الموضوع ده بقى كفايه لحد كده ! عموماً ماشي يا سيدي أنا كده كده مش قاعدلك في البيت رايح أسلم على صحابي بسرعه طلع عدنان غير هدومه أخد الكاميرا وراح كعادة كل يوم يستناها ، مرت نص ساعه وهو منتظرها ، وأخيراً ظهرت ... وقبل ما تترسم إبتسامة سعاده على شفايفه سبقتها معالم صدمه على وشه لما شافها جايه ومعاها 3 أطفال لحظتها إتردد في ودانه صوتها وهي بتتكلم في الموبايل إمبارح (أيوه يا حبيبي أنا اسفه عارفه إني أتأخرت بس ماتقلقش أناكويسه ، في إدجوار رود دلوقتي ، خلاص راجعه ع البيت أهه مع السلامه) دلوقتي إتأكد من شكوكه ، حس بأشواك في حلقه وزاغ بصره مش قادر يتخيل ان بعد كل ده تطلع متجوزه وأم حس بألم اعتصر قلبه قبل ما يحس بألم شديد في رجله ماقدرش يتحمله فقعد مكانه ولسه عيونه بتتأملها وهي بتضحك مع ولادها ، غمض عيونه وافتكر أول يوم شافها فيه ، كان جاي لندن لإجتماع رجال أعمال وبعد ماخلص الاجتماع قرر يسترجع ذكرياته في لندن بعد غياب طويل عنها ، فضل يتمشى في الشوارع لحد ما رجله اخدته للنهر ، وقف عنده وفرد ايديه واستسلم لنسمات الهوا البارده اول ما فتح عيونه لمح بنت واقفه على بعد خطوات وفارده دراعها زي ما كان عامل دلوقتي ، رافعه راسها للسما وبتضحك لكل نسمة هوا تصافح وشها ، لفت انتباهه لبسها اللي أكدله انها مسلمه ، تملكته لحظة فضول انه يبص لوشها وبمجرد مابص في ملامحها خمن انها مصريه ، انتبه انه بقاله فتره بيتأملها فغض بصره وقعد ، غصب عنه لقى انه مش قادر يتحكم في نفسه وبيختلس النظرات ليها فقرر من الأفضل يسيب المكان ويمشي وقد كان رجع الفندق وقضى يومين كمان في لندن يخلص شغله وجه وقت سفره ، قرر ياخد جولة وداع يمكن يغيب فتره اطول عنها ، راح عند النهر و اول ما لمحها هناك ارتبك ودقات قلبه زي الطبول مسموعه في ودانه ، للمره التانيه بيشوفها في نفس المكان ، استغرب من نفسه لإنه قابل عربيات كتير بس عمره ما رفع عينه ولا بص لأي واحده لا عربيه ولا غيرها مش عارف ليه البنت دي فيها حاجه مميزه شدته بس مش قادر يحددها !! بص في ساعته وبعدين قام ياخد جوله في شارع العرب قبل ما يجي ميعاد طيارته ، زار اصحاب ليه هناك واتجول بين المحلات وفجأه لمحها وحس بنفس الإرتباك ، إدالها ضهره ، ولهى نفسه بالفرجه ع الأنتيكات إللي في المحل ، سمعها وهي بتلقى السلام وتسأل عن سعر ميداليه وابتسم لما سمع لهجتها المصريه وعرف ان تخمينه لما شافها كان صحيح سافر وباشر حياته بشكل طبيعي بس صورتها مافارقتش خياله وأول اجازه ليه قرر يقضيها في لندن وفي نفس يوم وصوله ما استناش يرتاح من رحلته ، راح عند النهر في نفس الميعاد وكإنهم متواعدين يتقابلوا كل مره هناك ، راح وجواه صوتين بيترددوا صوت بيقوله هتيجي وصوت تاني بيقول بطل جنان كل اللي فات مجرد مصادفه عاديه يرد الصوت الأول ويقول لأ انا حاسس انها مش مجرد مصادفه انا حاسس انها قدر ! وسكتت كل الأصوات اللي جواه لما لمحها جايه و قعدت في نفس المكان ، ابتسم بإنتصار ع الصوت المثبط جواه ^_^ وجودها بيحسسه براحه غريبه ، من يوم إللي حصله وهو بيكره الحب بل وجت عليه فتره يكره كل البنات اللي في الكون ،عاش سنين ع الحال ده ، راكن مشاعره ع الرف ومركز في شغله وبس ، لحد ما شافها ومن غير مايقصد ولا يعرف السبب اتعلق بيها مد اجازته وبقى كل يوم يجي المكان ده في نفس الميعاد ويلاقيها برده جايه ، خلصت اجازته ولقى نفسه مش قادر يبعد ولا قادر يقرب اكتر ! هو مبسوط وراضي بالمساحه دي بينهم يكفيه احساس الفرحه والراحه اللي مفتقدهم قلبه وبيحسهم في وجودها ، فكر يفتح فرع شركته اللي قفله من سنتين في لندن ويستقر هنا ولأول مره يسمع لصوت قلبه ويفتح الفرع من جديد ، اشترى بيت واستقر فيه وكل يوم في نفس الميعاد يروح عند النهر ويلاقيها ، يصورها صوره من غير ما تاخد بالها ولما تقوم تاخد جوله في شارع العرب يقوم معاها رغم ان عمره ما كلمها والمسافات بينهم ياما بس قربها لقلبه قرب كل المسافات ، انهارت واتحطمت كل القيود والسدود اللي حطها على قلبه وتحول اعجابه بيها لحب ، حب خلاه يرضى بمجرد ساعتين او تلاته يشوفها فيهم كل يوم بصمت ، فضل ع الحال ده 3 سنين خايف يقرب اكتر وخايف يبعد في نفس الوقت ، حاول كتير يبعد لكن ما قدرش ! فاق من شروده وذكرياته على صوتها وهي بتنده لبنتها : لاراااا هاتي مرام و تعالي هنا ماتقوموش من جنبي اتملت الدموع في عينيه ، حس بألم في قلبه وحاول يقوم فإنتقل ألم قلبه لرجليه ، مش قادر يتحرك فإتصل على صاحبه يجي ياخده ، فضل في انتظاره وهو بيمنع نفسه بالقوه من انه يبصلها ، شافها وهي قايمه وكان عارف وجهتها بس المره دي مش هيرافقها ، بص للسما وترك العنان لدموعه ، شرد في حياته واتقلّبت عليه كل المواجع ولقى ايد بتربت على كتفه ، مسح دموعه بسرعه وقبل ما عصام يتكلم قال : مش عاوز كلام في أي حاجه واقفل الموضوع ده خالص عصام : طيب فهمني بس ايه اللي حصل ؟! عدنان : قولتلك مش عاوز الموضوع ده يتفتح او تيجي سيرته نهائي ويلا عشان تعبان وعاوز انام رجع البيت وفعلاً قفل على نفسه الاوضه ، مدد ع السرير وحاول ينام لكن هيهات النوم رجع من تاني يجافيه ... بمجرد ما داليا أخدت مرام ومحمد انتهزت شيرين الفرصه وجريت ع السرير تلحق تنام شويه ، صحيت على صوت المنبه بعد ساعتين ولقت جنبها ع السرير مفرود فستان وفوقه ورده وورقه مطويه ، ابتسمت ومسكت الورده تأملتها بحب ، اتناولت الورقه وقرأت المكتوب : يسرنا أن ندعو جلالة الملكه شيرين لحفل عشاء فاخر يليق بسموها ونرجو ان تقبل دعوتنا وتتكرم بإرتداء هذا الفستان المتواضع والنزول الي الطابق الأرضي حيث ينتظر حضورها عاشقها ناصر بفارغ الصبر والله الموفق والمستعان ،،، قرأت كلماته وهي بتضحك ، قامت وكلها نشاط وحيويه ، اتناولت الفستان واتأملته ، بتحب الفستان ده اوووي لإنه بيحب يشوفها بيه ، لبسته وفردت شعرها ، حطت مكياج خفيف ، مسكت الورده ونزلت ، ولقته منتظرها عند آخر سلمه ولابس بدله انيقه ، نزلت بدلال ومازالت الابتسامه مرسومه على وشها لحد ما وصلتله _ ايه الجمال ده كله يا سلطانة قلبي طبع قبله على جبينها و اتناول الورده اللي في ايديها وحطها ورا ودنها ، مسك ايديها واخدها للسفره واول ما شافتها انبهرت بالمنظر ، اصناف اكل وشموع في كل مكان _ ايييه ده كله _كل ده قليل عليكي انا مقصر في حقك اووي يا حبيبتي سامحيني _يا خبر هو كل اللي بتعمله ده ومقصر طاب ده انا حاسه ان ربنا بيحبني عشان رزقني براجل زيك ابتسم وقبل ايديها : يلا بقى عشان نتعشي يا ست الحسن والجمال قعدوا ع السفره واكلها بإيديه _الأكل طعمه يجنن ، تسلم إيديك يا حبيبي ! _أهه دي ميزة إني كنت عايش لوحدي فتره كبيره ، الفتره دي علمتني اعتمد على نفسي في كل حاجه _يا بختي بيك يا شيف ناصر _بالهنا والشفا يا عيون الشيف ناصر وقف فجأه وانحني ناحيتها : تسمحيلي بالرقصه دي _ليا الشرف بس هنرقص على ايه ؟ فين الموسيقى : _هنرقص على موسيقى قلوبنا _ تحبي ترقصي على أي أغنيه من أغاني الست وهجيبلك أم كلثوم لحد عندك هنا ؟ _ هههههههههههه وسعت منك دي بس ماشي أممممم الحب كله _ طاب سيبك من الست بقى وتعالى احنا نقوم بكل الأدوار يلا نغنيها على لحن قلوبنا ، جاهزه _جاهزه حطت ايديها على كتفه ، مسكها من خصرها وبدأوا يغنوا سوا : الحب كله حبيته فيك الحب كله وزماني كله انا عشته ليك زماني كله حبيبي قول للدنيا معايا ولكل قلب بدقته حس يا دنيا حبي وحبي وحبي ده العمر هو الحب وبس واسقيني واملى واسقيني ، تاني اسقيني تاني من الحب منك من نور زماني اسقيني ياللي من يوم ما شفتك حسيت كأني اتخلقت تاني ضحكت شيرين بفرح فضحك ناصر وقبّل إيديها: الست دي بتقول حكم كل يوم معاكي بحس إني إتخلقت من جديد ربنا ما يحرمني منك أبداً شيرين : ولا يحرمني منك يا أنا حطت راسها على كتفه ولسه بيرقصوا ، إللي هيشوفهم هيقول ازاي من غير موسيقى !! ومين قال إن مفيش موسيقى بيرقصوا عليها ؟ دلوقتي أهه دقات قلوبهم بتعزف أحلى لحن غمضت شيرين عيونها ورجعت بالذاكره ليوم فرحها ، حست يومها إنها بتتولد من جديد ، إفتكرت أجمل شهر عسل في أطهر مكان ع الأرض ، كان حلمها دايماً تزور مكه مع ناصر واتحقق حلمها وعاشته بتفاصيل أحلى من إللي كانت بتحلم بيها ، رجعت وكانت كل ليله بتدعي ربنا يرزقها بذرية صالحه من أحب إنسان لقلبها وربنا إستجاب لدعائها وحملت في توأم ، إفتكرت دموع ناصر من الفرحه يوم ما عرف الخبر ، كان فرحان كإن أول مره ربنا يرزقه بأطفال ، افتكرت ازاي كان حنين عليها وبيتحمل تعبها ولحظات عصبيتها ، إفتكرت كل لحظة حلوه مرت بيها معاه وإزاي رغم مشاغله كان بيساعدها في تربية التوأم ويساندها في كل لحظة ألم في حياتها ...فاقت من شرودها على قبله حانيه طبعها على جبينها بصتله وكل تفصيله في ملامحها بتبتسم ، وقلبها بيدعي ربنا مايحرمها من نعمة وجوده في حياتها ... داليا قعدت وحوليها عيال خالها بيلعبوا ، تأملتهم وإفتكرت إسلام و أسماء و أروى ولاد أخوها عادل ، شافتهم في الصور والفيديو وبس ، كان نفسها تحضر فرح عادل أووي وتحضر ولادة أطفاله وتضمهم لحضنها لكن ماقدرتش ، كل ما تحصل مناسبه وخالها يقنعها تنزل مصر تحضرها إحساس قوي جواها بيمنعها _دولّي !! _هه بتقولي حاجه يا لولو ؟ _ يلا نروح الملاهي أنا زهقت من القعده هنا ! _ أوك يلا بينا ودتهم الملاهي وقعدت جنبهم ، تتأملهم وهم بيلعبوا وفرحانين ، جالها إتصال ، ردت بفرحه : نِهااااااال وحشتينييي _ إنتي أكتر والله العظيم طمنيني عليكي يا حبيبتي أخبارك إيه ؟ _الحمدلله كله تمام ماعدا مشكلة الشغل لسه زي ما هي _ لسه برده ! من رأيي تسيبي الشغل ده بقى يا داليا مش جايبلك غير الهم _ نِهال أنا لقيته بالعافيه محدش هنا هيشغل واحده محجبه زي حجابي كده وإنتي شوفتي تعبت أد إيه عشان ألاقي الشغل ده ! _طيب خلينا نأجل المشكله دي هنحلها سوا ان شاء الله لما آجيلك _ تيجي ، تيجي فين _ إحم إحم هو أنا ماقولتلكيش ؟ أصل خالتو داليا وحشت سيف ونور وأمهم صراحةً يعني فبيقولولها ياريت تستنينا في المطار الأسبوع الجاي إن شاء الله داليا بإندهاش : لأ بتهزريييي إنتوا بجد جايين _ أه والله وناويين مدة طوويله المره دي إن شاء الله داليا بفرحه : الله الله هي دي الأخبار الحلوه ولاّ بلاااش ربنا ما يحرمني منكم أبداااا _ ولايحرمنا منك أبداً أبداً خدي كلمي نور بتشد مني الموبايل إتكلمت مع نِهال شويه وقفلت معاها والفرحه مش سيعاها ، أخييراً هتشوف حد من أحبابها ، خلاص ملت الغياب والفقد والحرمان ... ماشيه وعندها فضول شديد تعرف ليه طلبها تيجي انهارده بكل اوراقها ضروري ! وصلت ، خبطت على باب المكتب ودخلت لما سمحلها بالدخول _صباح الخير يا دكتور _صباح النور يا دكتوره ، اتفضلي اقعدي وهي بتقعد : متشكره جدا ،، خير حضرتك طلبت اجي واجيب اوراقي انهارده ليه ؟ _طيب خدي نفسك الاول يا دكتور وقوليلي تشربي ايه ؟ _ متشكره جدا يا فندم _اممم يبقى هطلبلك قهوه معايا اوك ؟ أومأت بإبتسامة إمتنان ومنتظره يتكلم طلب القهوة وبصلها : انا عارف انك طبعا عندك فضول تعرفي جايبك انهارده ليه ! اتفضلي اقري اتناولت منه الاوراق ، بدأت تقرا وعلامات الاندهاش على وشها ، سألت بفرحه : يعني ايه يا فندم انا خلاص اتقبلت في البعثه واخيرا هسافر و اخد الدكتوراه من هناك !!!! _بالضبط كده انا وعدتك وكان لازم اوفي بوعدي إنتي إنسانه جاده و متميزه تستحقي وبجداره كمان _ربنا يكرم حضرتك ويحفظك _ وماتقلقيش هناك انا موصي عليكي ناس هيريحوكِ في كل حاجه ان شاء الله واخترتلك الدكتور اللي هيشرف على رسالتك هو مصري ومتميز وخدوم جدا هيساعدك وطبعاً لو احتجتي اي حاجه انا موجود وتليفوني مفتوح في اي وقت _متشكره جدا جدا يا فندم _العفو يا دكتور يلا بقى ابدأي الترتيبات ، عاوزك تشرفيني هناك _ماتقلقش يا فندم حضرتك مش هتندم انك رشحتني ابدا _انا واثق من ده بالتوفيق يا دكتور _بعد اذن حضرتك ومتشكره مره تانيه خرجت من مكتبه والفرحه مش سيعاها واخيرا بعد طول انتظار هتحقق حلمها وتاخد الدكتوراه من بره مصر .... بعد معاناه قدر ينام يمكن من كتر التفكير تعب وياريته ما نام ، شاف كل لحظة ألم مرت في حياته وحس بعذابها ووجعها كإنها بتتكرر و تحصل في اللحظه دي ، خبّط عصام ع الباب ومالقاش رد فدخل بهدوء لقى عدنان نايم ، كان هيخرج ويسيبه بس سمع صوت أنينه ، فسأل : عدنان إنت صاحي ؟ مالقاش رد ، قرب منه ولقى وشه أصفر والعرق بيتصبب منه ، متشنج ولسه بيإن واضح كده إنه شايف كابوس ، بسرعه بدأ يصحيه وأنين عدنان وتشنجاته بتزيد ، قلق عصام وهزه بقوه : عدنااااان قام عدنان مفزوع ومش قادر ياخد نفسه ، ناوله كوباية مايه وفضل يربت على كتفه _انت كويس ؟؟؟! من غير ما يرد أومأ براسه وبدأ يمسح قطرات العرق _رجعت تشوف الكوابيس من تاني _عصام معلش سيبني لوحدي دلوقتي عصام بإستسلام : طيب لو احتجت حاجه اندهلي قام وقبل ما يخرج إلتفت لعدنان وتأمله بأسى ، مش عارف يقوله إيه ولا في إيديه حاجه يعملها ، قفل الباب وقعد تحت محتار ومتضايق لحال صاحبه ، نفسه يفهم إيه إللي حصل ! خمن إنه أكيد إتأكد إنها مرتبطه ، زفر بضيق وحس إن عدنان نفسيته رجعت تاني لنقطة الصفر ! هو أقرب واحد ليه ، عاش معاه طفولته وكل لحظات حياته ، شاف اد ايه اتعذب لحد ما ظهرت البنت اللي اصبحت طوق نجاه ليه ، كان دايماً بيشجعه ياخد خطوه زياده لكن كان بيرد : مستحيل !!!! واهه حتى دي طلعت متجوزه ! وبدأ يرجع تاني لحالته زمان ، خرجه من شروده صوت الموبايل ، وابتسم لما لقاها خطيبته ، كلمها وحاول يخفي عنها خوفه وقلقه على صاحبه ، وفجأه سمع صوت فزعه سمع صوت ازاز بيتكسر فقفل معاها بسرعه وجري على أوضة عدنان فضل يخبط ع الباب : عدنان إنت كويس ؟؟ لو سمحت افتح الباب ! عدناااان ما إستناش ردّه ، كسر الباب ولقاه منهار وبيكسر في كل حاجه تقابله حاول يسيطر على حركته جري عليه وضمه من ضهره وعدنان بيحاول يفلت نفسه من بين إيديه : سيبنيييي قولتلك عاوز أكون لوحدي أنا مش عاوز أشوف حد ، سيبني وإطلع برررره عصام : لأ مش هسيبك >.< مش هسيبك ترجع تاني لنقطة الصفر وأنا ما صدقت إنك قدر تتناسى ، كفايه يا عدنان أرجوووك إهدا كفااايه ماتعملش في نفسك كده بقى فلت من إيديه : إطلع بره وسيبني يلااا بررره أنا ماقولتش لحد يحمل همي لسه شايف كل إللي مر في حياته قدام عينيه وكل ما يشوف مشهد تزيد ثورته ويكسر كل حاجه تقع في إيديه ، عصام مش قادر يسيطر ع الموقف فإتصل بالدكتور إللي كان بيعالجه ، مرت ساعه ولسه حالة عدنان زي ما هي بل بيزداد إنهياره ، وصل الدكتور وطلب من عصام يكتفه ، إداله حقنه مهدئه حطوه ع السرير ، لحظات وخارت قوته وبدأت عيونه تتقفل غطاه عصام وخرج يتكلم مع الدكتور بره . _ إيه إللي حصل يا عصام ؟!! عصام : هو آخر مره جه لحضرتك إمته ؟! _ عدنان ماشفتهوش من ساعة ما سافر نيويورك ولما رجع هنا تاني كان بيجي يدردش معايا شويه ، يعني دردشة صحاب كده لكن الجلسات والعلاج بطلناها من زمان لإنه كان يعتبر خف خلاص وبدأ يتناسى كل إللي حصل ويعيش حياه طبيعيه عصام : يعني رجعنا لنقطة الصفر من تاني خلاص !!! _ لأ أظن عدنان بس تحت تأثير صدمه لسه حاصله قلبت عليه كل مواجعه ، بعد ما يفوق من المهدئ هيكون كويس إن شاء الله وتقدر تتكلم معاه وبعد ما يفوق ياريت تخليه يزورني في العياده عشان اتطمن عليه أكتر عصام : أوك يا دكتور إن شاء الله ، وأسفين لإزعاج حضرتك بس ماكنتش قادر أسيطر عليه _ ده واجبي يا عصام المهم زي ما قولتلك ضروري يزورني في العياده وكلمني لو حصل أي حاجه عصام : أوك يا دكتور حاضر _مع السلامه وصّله عصام للباب وطلع لأوضة عدنان بص عليه وهو نايم ، بص على منظر الأوضه و رَقّ قلبه لحاله نده للشغاله تنضف الأوضه قبل ما عدنان يصحى وطمنها لما لقى نظرات ذعر في عيونها ، سابها تنضف الأوضه ونزل اتصل بخطيبته يطمنها ... ... عادل إتصل بداليا عشان تفتح النت وتكلمهم فيديو ، كلمته وهي ماسكه دموعها ، عادل وحشها أوي ، وحشها إن كل ما تحس بخنقه تفضفض معاه ، وحشها إنه يشاركها كل لحظات حياتها ، لا حضرت فرحه ولا ولادة أطفاله ، نفسها تترمي في حضنه وتبكي وهو رغم ضحكتها إللي ما فارقتهاش وهي بتكلمه حس بيها _ مالك ؟ _ مالي إيه يا ابني ما أنا زي الفل أهه _ الكلام ده تقوليه لحد غير عادل هه _ مفيش بس مشتقالكم أوووي _ ماترجعي يا داليا وكفايه بقى غربه لحد كده ، مش عارف ليه مُصره تفضلي هناك ! _ أنا نفسي معرفش يا عادل كل ما خالك ينزل مصر ويعرض عليا آجي معاه حاجه جوايا بتمنعني ، الله المستعان ! المهم سيبك مني ومن دلعي ده وقولي نوده فين ؟! _ هنادي بتجهز الشنط جوه عشان مسافرين الصعيد الولاد وحشوا جدتهم وعاوزه تشوفهم وكمان هنادي أهلها وحشوها وبقالها كتير مستحمله ضغط شغلي صراحه قلت أعوضهم بأجازه هناك بقى ومن ساعة ما عرفت وهي طايره من الفرحه وبتجهز في الشنط تقولي حابسهم ولا معتقلهم يا بنتي هههههه _ هههههههههه ربنا يخليكم لبعض يا حبيبي ، ابقى سلملي عليها وانا هكلمها بكره ان شاء الله _ ماشي يا جميل بس خدي بالك من نفسك عشان خاطري وانا متأكد إن فيه حاجه شغلاكي ومستنيكـِ~ وحشتني الفضفضه معاكـِ~ يا نيله _ وأنا والله وحشتني أكتر منك بس لو فيه حاجه أكيد هقولك ، خد بالك من نفسك ومن الولاد _ حاضر وإنتي كمان وسلميلي على كل إللي عندك _ حاضر لا إله إلا الله _ محمد رسول الله قفل مع داليا وبص لصورة فرحه إللي ع المكتب ، إبتسم بحب وهو بيمرر إيديه على صورة هنادي ، إفتكر أيام ما كانت عايشه معاهم بعد سفر داليا ، ماكنش بياخد باله من إهتمامها بيه ، في الأول كان بيعتبرها أخته بل ماكنش بيهتم بوجودها في البيت من الأساس ، لحد ما فـ يوم كان راجع من الشغل لقاها ماشيه بسرعه وواحد وراها بيعاكسها ، يومها جري عليهم قالها تروّح ع البيت وفضل هو يضرب فيه بلا وعي لما كان هيموت في إيديه ، لولا الناس إتلمت وحجزت بينهم ، بعد ما خلصت الخناقه لقاها واقفه وماسكه شنطته ، مشيوا ع البيت وهم في طريقهم وقف وصرخ في وشها : إيه إللي خرجك دلوقتي ردت بخوف : ما أني كل يوم بخرج في الوجت ده عشان أجيب طلبات البيت _ وبعدين انا مش قولتلك روحي ع البيت فضلتي واقفه ليه _ أصل أصل خفت عليك أ أ جصدي يعني خفت تموته وتضيع نفسك يعني والحكايه مامستهلاش _ مامستهلاش طاب إمشي وإنتي ساكته بقى و لو سمحتي بعد كده طلبات البيت إكتبيها في ورقه وهجيبها وانا راجع من الشغل _ حاضر إللي تشوفه في اليوم ده تحديداً خد باله إن هنادي تعنيله ، فضل يبرر لنفسه ويقول عشان إعتبرتها أختي وفرد من البيت وكان واجب عليا ….إلخ ولما كانت عاوزه تنزل تشتغل وسمعها بتستأذن من أمه على شغل في محل ملابس وقتها إتعصب وتدخل في الكلام بينهم ورفض شغلها وأمه كانت مستغربه موقفه ومستغربه أكتر إن هنادي ماجادلتش وماكسرتش كلمته بعد ماكانت مُصره ع الشغل وبتقنعها بيه في لحظه ومن كلمه واحده منه غيرت موقفها ! إفتكر لما أمه بدأت تلاحظ تغيره وإتكلمت معاه وقالتله لو جواه مشاعر ناحية هنادي معندهاش مانع يتجوزها ، يومها إتصدم من كلام أمه ونفى عن قلبه حبها ، لكن بعد ما خرجت من الأوضه قلبه عاتبه وطير النوم من عينيه ! فضل يكدّب قلبه ويحاول يتجنبها لحد ما جه عمها صابر يشكرهم وياخدها من عندهم ، الفكره لوحدها كانت هتجننه ، مش متخيل إنه مايشوفش هنادي في البيت تاني ! يومها كانت بتبصله بحزن وقرا في عيونها كلام ومشاعر كتيره من ضمنها إنها بتستنجد بيه ، في اللحظه دي بس إكتشف إنه بيحبها ، لمت هدومها وودعتهم وقبل ما تخرج مع عمها وقف وقال : حاج صابر أنا عاوز أتجوز هنادي ما همهوش صدمة أمه وكل الموجودين أول حاجه عملها بص عليها هي ولقى عيونها مبتسمه ودموع الفرحه نازله تحضن خدها وأول ما عينها جت في عينه بصت في الأرض بخجل _ واه بس الأمور دي ما تتجالش إكده يا ولدي ، هي أه عاشت عنديكم وجت طويل بس بردك هي ليها أهل لازمن تجيلها بيتها معززه مكرمه _ على راسي طبعاً يا حاج صابر ، أنا بس بقولك عشان أستأذن منك ، نيجي إمته نطلبها ؟! _ يعني يا ولدي عنروح البلد نصفي الأمور وإنت عارف إللي حُصل زين ولما إن شاء الله الأمور تهدى عتصل عليك لما أحدد معاد مع أعمامها _ طيب تديني كلام رجاله إنك مش هتخلي حد يلمسها أو يأذيها ؟! _ عيب يا ولدي أني من غير ما تجول عنفذ وصية عوض الله يرحمه ومش عخلي حد يجرب منّيها ولا يظلمها واصل مشيوا وإستلمته أمه سين وجيم ، بس كانت فرحانه جداً من قراره هي وأبوه ،، إفتكر لما راحوا طلبوها من الصعيد ، ومن يوم ما اتجوزها وهي بتثبتله إن قلبه إختار صح ، بتستحمله وتسانده وراضيه بالقليل معاه وعمرها ما اشتكت ولا حملته فوق طاقته ، وزاد حبه ليها لما ربنا رزقه منها 3 أطفال ، ده غير برها بأهله إللي زود حبها فـ قلبه أضعاف خرج من شروده على قبله حانيه على خده : سرحان فـ إيه ؟! إبتسم وقبل إيديها : وهسرح في مين غيرك يا ست الحسن والجمال _ ربنا يخليك ويجبر بخاطرك يا رب _ جهزتي الشنط ؟ _ أه الحمدلله كل حاجه جاهزه ونيمت الولاد ، أجهزلك العشا ؟ _ لا يا حبيبتي مش جعان ، مصدع بس شويه هقوم أنام عشان أصحى فايق للسفر إن شاء الله ، أه وصحيح لسه مكلم داليا وبتسلم عليكي _ الله يسلمها من كل رضي ، هكلمها جبل ما نسافر بكره إن شاء الله _ إن شاء الله طبع قبله على جبينها : تصبحي على خير يا حبيبتي _ وإنت من أهل الخير ، وأنا دجيجتين بس عجهز الزيارة بتاعة أمي وأحصلك إن شاء الله جهزت كل حاجه ودخلت تنام ، بصتله وهو نايم جنبها وإبتسمت ، إفتكرت حبها ليه من أول مره شافته فيها ، كان واجع قلبها إنه مش حاسس بيها ودايماً تفوّق نفسها إنتي فين وهو فين ! لحد ما كان واحد بيعاكسها ودافع عنها وكإنها حد يخصه مش مجرد شهامه وبس ، من اليوم ده بدأت تلاحظ تغير معاملته معاها وإهتمامه لأمرها ، كانت بتفرح أووي لما يتدخل في حاجه تخصها وكانت بتنفذ كلامه بفرحه، مش ناسيه وقوفه جنبها يوم ما عرفوا خبر وفاة أبوها في السجن ، و يوم ما عمها صابر جه ياخدها من عندهم ، رغم إنها المفروض تفرح عشان خلاص أخيراً هتتصالح مع أهلها وترجع لحضن أمها بس كانت حزينه لفراق خديجه إللي إعتبرتها أمها وعمران إللي كان في مقام أبوها وأحمد أخوها وأهمهم عادل إللي ماكنتش مستوعبه فكرة إنها ما تشفهوش تاني ! بصتله تستنجد بيه ، وماكنتش مصدقه لما سمعته بيطلبها في آخر لحظه وآخر أمل كان جواها ، حست إنها في حلم ، لما سافرت مع عمها وواجهت المشاكل كانت تبكي في أوضتها وتدعي ربنا ينجيها ويجمعها بعادل قريب ، كانت تفرح أووي لما تفتكر وصيته لعمها إن محدش يلمسها أو يأذيها ، جملته دي كانت بتهون عليها إللي شافته ، وربنا إستجاب لدعائها وبعد شهرين من الصراعات أهلها رضيوا عنها وقبلوها ، وجه عادل إتقدملها ، من يوم ما اتجوزته وهي عايشه سعاده حقيقيه عمرها ما عاشتها في حياتها ، حتى في الأوقات العصيبه إستحملت ، يكفيها إنها جنبه ، وفرحتها إكتملت لما ربنا رزقها بثمرة حبها أولادها ، قربت منه ودفنت راسها فـ حضنه ، غمضت عنيها وهي مبتسمه وقلبها بيدعي ربنا ما يحرمها من السعاده إللي عيشاها مع حبيبها ... صحي عدنان في نص الليل حاسس بصداع شديد ، مسك راسه وقايم للحمام وقع في الأرض ، سمع عصام صوته وجري عليه ، صرخ عدنان في وشه : أنا مش قولت ما تشيلهمش أبدااا _ الدكتور قال غلط كده يا عدنان لازم ترتاح شويه _ أنا مرتاح كده إياك تكررها تاني ، أنا مش محتاج لشفقة ولا مساعدة حد _ طيب خلاص إهدى أرجوك أنا أسف لانت ملامحه وزفر بضيق : أوووففففف ، ما تزعلش مني يا عصام _ وهو حد إشتكالك يا جدع إنت _ طاب إسندني للحمام بقى إتوضى وخرج لقى عصام خرج من الأوضه و مجهزله سجادة الصلاه والمصحف ، إبتسم ، وقف وهتف بخشوع الله أكبر طال سجوده وعلا صوت نحيبه وهو بيشكي لربه ع إللي في قلبه :'( صلى وقرأ قرآن وقرر ما يفكرش تاني في البنت دي ، لام نفسه لإن هو إللي وجع قلبه بإيديه لما فكر في واحده حتى ما يعرفش عنها أي حاجه ، قرر يرجع تاني زي ما كان الأول شغله عنده أهم حتى من نفسه …. صحي عصام مفزوع على خبط في كتفه ، فتح عيونه ولقى عدنان لابس بدلته وبيقوله : يلا بلاش كسل ورانا شغل كتيير لازم يخلص _ إنت سخن ولا إيه يا عدنان من إمته بتروح الشركه بدري أوي كده : _ من دلوقتي ، يلا عشان ما نتأخرش أكتر من كده _ مانتأخرش ! حضرتك مش هتلاقي ولا موظف في الشركه دلوقتي _ مش مهم ، المدير لازم أول واحد يروح ، يلا عشان عاوز أراجع الحسابات _ الله الله شكلنا رجعنا للنكد والغم من تاني _ نعم ؟! _ ولا حاجه يلا يا عمنا ، هقوم ألبس أهه ، صبرني يا رب عصام حاول كتير يقنع عدنان يزور الدكتور في العياده لكنّه رفض و رجع لحياته الأولى بيركز في شغله وبس ، اليوم كله إنضباط وقرارات حازمه ، حتى الضحكه إتمنعت من الشركه ، كله شغل وإنضباط وبس ، يخرج من الشركه يروح البيت ومن البيت للشركه ، بطّل عاداته القديمه ، بطّل يروح عند النهر ويستناها ، ركن مشاعره ع الرف وعصام خايف عليه ومش حابب يشوفه بالشكل ده ، نفسه يعمل أي حاجه تساعده ، ماقدرش يسافر ويسيبه كده ، قرر يفضل معاه لحد ما يشوف حل لمشكلته وترجع البسمه من تاني لحياته ~ ... داليا واقفه في المطار ، ماسكه بوكيه ورد وباصه على بوابة المسافرين بترقب ، حاسه قلبها هيقف من سرعة نبضاته ، وأخييراً ظهرت نِهال ، وبمجرد ما عيون داليا لمحتها نزلت دموع أشواق وفرحه على خدها :'( إبتسمت نِهال وجريت عليها ، رفعت إيديها ومسحت دموع داليا فإترمت في حضنها وبكت بحرقه ، بكت بكل لحظة عذاب إتحملت فيها ومسكت دموعها وبدلتها بشبح ضحكه ، بكت بكل لحظة حست فيها بالوحدة ونِهال ماقدرتش تمسك دموعها بتبكي بصمت وتربت على كتفها مرت لحظات الإستقبال الحار وأحضان الأشواق والحنين بين داليا ونهال لحد ما وصل زوج نهال ، كانت مُصره داليا تيجي معاها البيت لكنّها رفضت وقالتلها هتزورها بكره إن شاء الله لما ترتاح من تعب السفر ، ركبت مع زوجها وهي مبتسمه وبتشاور لداليا وداليا بتشاورلها هي وولادها والفرحه ماليه قلبها ، لسه مش مصدقه إنها من شويه كانت ضامه حد من أحبابها ، بصت للسما وشكرت ربها إللي عالم بحالها وبعتلها إللي تطبطب على قلبها وتآنس وحدتها ... خلّصت كل الإجراءات ومنتظره ميعاد طيارتها ، رغم إنها كانت منتظره قرار السفر بفارغ الصبر وفرحت جداً لما إتحققت أمنيتها إلا إن جوه قلبها وحشه وخوف وغربة ، بررت إن ده إللي بيحسه كل واحد بيتغرّب عن وطنه ثم إنها كانت حاسه بغربة وهي بين أحضان وطنها ، الحزن والذكريات الأليمه بدأت تتسرب لقلبها فبسرعه طردتها وقامت تستعد لما سمعت نداء وصول طيارتها ... كان نايم بهدوم الشغل لما وصله تليفون يجي يحقق في جريمة ق,تل ، عدل هدومه ، غسل وشه وراح لمكان الجريمه ، بدأ التحقيق ومش قادر يفتح عيونه من الصداع > وفجأه لمحها فغلي الدم في عروقه طلب من زميله يكمل ، ساب إللي في إيديه وراح ناحيتها ، سحبها من إيديها بعصبيه رغم مقاومتها ، حطها في العربيه وساق وهو في قمة غضبه _ إنت إتجننت إزاي تعمل كده !!! مش هتبطل همجيه بقى بتستفزه وهو مازال ساكت لحد ما وصل للبيت ، نزل فتح باب العربيه وسحبها من إيديها _ أه أه سيب إيدي حرام عليك ، كفايه بقى _ هشششششش ياريت ما اسمعش نفسك لحد ما نطلع البيت أظن كفايه فضايح قصاد الجيران _ ما تقول لنفسك وهو مين إللي بيعمل الفضايح دي زفر بغضب وهي إستسلمت ومشيت معاه ساكته لحد ما طلعوا شقتهم ، دخلوا ورزع الباب ، فلت إيديها فمسكتها بألم وهي بتصرخ في وشه : أقدر أفهم إيه الهمجيه دي رد بهدوء : أولاً قولتلك ألف مره ماتعليش صوتك عليا ، ثانياً يا مدام يا محترمه إزاي تخرجي من بيت أهلك من غير علم جوزك ، إحنا أه فيه مشاكل بينا وإنتي سيبتي البيت بس ده مايديش لسيادتك الحق تخرجي بدون علمي ! _ وأنا يعني خرجت فين ده شغلي رد بغضب رعبها : وإنتي عارفه كويس أوي إن شغلك ده هو السبب في كل مشاكلنا وهو الجحيم إللي خلّى حياتنا مع بعض مستحيله _ وليه ما تقولش إنه شغلك إنت ليه أنا إللي لازم أضحي وأسيب شغلي ونجاحاتي إللي تعبت عشان أحققها :'( !!! _ أه فكره فعلاً أسيب أنا الشغل وأقعد في البيت و أربي البنت و إنتي تصرفي علينا بقى إيه رأيك :/ ؟ _ من فضلك ما تسخرش مني يا حضرة الظابط عموماً أنا ريحتك مني وسبتلك البيت سيبني في حالي بقى _ أه حضرتك سبتي البيت بس ناسيه إنك لسه تبقي مراتي ولا الشغل نساكـِ~ دي كمان زي ما نساكـِ بنتك _أنا عمري ما نسيت بنتي ،،، كملت كلامها بسخريه : ولا ده كله كلام الهانم مامتك صفعها على وشها فصرخت من الألم ، مسكها من ياقة بلوزتها : أنا ممكن أعديلك أي حاجه وأي تصرف تعمليه لكن عند أمي وأقفي عند حدك وإتكلمي عنها بأدب فاهمه وهي بتبكي : للأسف أنا دلوقتي بقيت فاهمه كل حاجه ، لمّا إنت كنت بتحبها أوي كده لدرجة إنك تسمّي بنتنا على إسمها إتجوزتني ليه _تاني هنعيد الموضوع ده !!! إنتي إخترتي الإسم معايا وكنتي موافقه عليه _ عشان كنت فعلاً بحسها قدوه أي بنت تقتدي بيها وكنت عاوزه بنتي تبقى قويه زيها لكن ما كنتش أعرف إني إخترت مع جوزي إسم حبيبته _ بطّلي جنان يا شيماء قولتلك 100 مره من يوم ما خطبتك وداليا خلاص مابقتش بفكر فيها أكتر من كونها أخت ، ليه مُصره تكبّري حجم الفجوه إللي إتكونت بينا ليييه !!!! قعدت على أقرب كرسي ، دارت وشها بإيديها وفضلت تبكي بحرقه : رق قلبه وقعد قصادها ع الأرض : عشان خاطري كفايه بكى بقى يا حبيبتي والله وحشتيني ، إمته هترجعي لبيتك وجوزك وبنتك ، إمته هحس بوجودك جنبي إحنا بقى البيت مجرد فندق ولا إستراحه بننام فيها ، إنتي عارفه كويس إن كل إللي بعمله عشانك وعشان مصلحتك إنتي وبنتنا صرخت بصوت متهدج : لأ عشان نفسك ومصلحتك انت وبس ، عشان ترجع تلاقي خدامه في البيت تطبخلك وتغسلك وتحطلك رجليك في ميه وملح وناسي إن ليها كيان وشخصيه ومن حقها تحقق ذاتها _ تاني هنرجع لكلام ملهوش لازمه !!! وأنا إمته منعتك من شغلك !!! ما انا قولتلك اشتغلي بس بلاش قسم الجرايم والحوادث ده ، ماينفعش أبقى رايح مكان خطر وألاقي مراتي سبقاني لهناك بدون علمي عشان تعمل سبق صحفي ، والأهم من ده كله ماينفعش مراتي تنشر أسرار شغلي ، ماينفعش نبقى بنتغدا وتستدرجيني في الكلام وانا عشان إنتي مراتي وأكتر شخص لازم أثق فيه أحكيلك فتاني يوم كل كلمه تنزل في الجرايد ، ماينفعش كل يومين أروح أجيبك من القسم ، ماينفعش بنتك تستناكـِ~ عند بوابة المدرسه وسيادتك تنسي إنك المفروض تجيبيها عشان كنتي بتعملي سبق صحفي ، وناسيه إن دلوقتي بقى خطف الأطفال أسهل حاجه في البلد ، ماينفعش بنتك تسخن وماتكونيش جنبها ، ما ياما فيه سيدات عاملات كتير وصحفيات وعارفين ينظموا حياتهم ، مش أنانيين زيك بيفكروا في نفسهم وناسيين إن ليهم بيت وأطفال هم أهم مسئوليه عندهم !!! _ لو خلصت كلامك ياريت توصلني لبيت أهلي ! _ برده !! _ أيوه ، وياريت تمشي في إجراءات الطلاق بسرعه _ أمممم بس ساعتها ما تلومنيش يا شيماء ، ساعتها إنسي إن بنتك تعيش معاكـِ~ _ إنت عاوز تحرمني من بنتي يا طارق _ لأ لا سمح الله ، أنا بس عاوز أخلي مسئوليتك عشان تتفرغي لشغلك ونجاحاتك إللي فضلتيهم على بيتك ،، إتفضلي يلا عشان أوصلك مشيت وراه ولسه بتبكي وصلها لبيت أهلها ، ومشي بالعربيه في الشوارع بلا هدف ... وصلت الكافيه في الميعاد ، دورت على نِهال بعيونها بين الترابيزات لحد ما لقتها ، شاورتلها وراحت ناحيتها ، وبعد السلامات الحاره طلبوا مشروبات ، فضلت داليا تحكيلها شويه عن أحوالها ونِهال كذلك داليا : أمال الولاد فين ؟ _ راحوا الملاهي مع أبوهم ، طمنيني على أحوال الشغل بقى ؟ _ أنا بطلت أروح وخلاص قررت أقدم إستقالتي ، صليت إستخاره ومش مرتاحه إني أكمل ، هتوكل على الله وأسيبه وأكيد ربنا هيعوضني ربتت على إيديها : إن شاء الله يا حبيبتي _ أخبار مصر إيه وطمنيني صحيح طارق وشيماء عاملين إيه ؟؟ _ سؤال صعب صراحه ، مصر من وقت ما سبتيها وهي بتتطور بس للأسف للأسوأ يا داليا أما عن طارق وشيماء فأظن كده إن قريباً هتسمعي خبر طلاقهم _ لا إله إلا الله ليييييه كده إيه إللي حصل _ طارق وشيماء أول ما اتجوزوا كانوا تمام أووي مع بعض ما شاء الله وقمة الحب والإنسجام لحد ما ربنا رزقهم بداليا بعدها على طول جه لشيماء شغل إضافي لشغلها في الجريده إنها تقدم برنامج في التليفزيون وطبعاً كانت فرصه بتحلم بيها وافقت وطارق كان مبسوط جداً عشانها ، بعدها إترقت، غير الصفحه إللي ليها في الجريده زي ما هي ، من حوار صحفي ، للقاء ، لسفريات ، لشغل في قلب الحدث ، لسبق صحفي ورا التاني كل ده وطارق كان مبسوط عشانها ، وفجأه إتبدلت شيماء لكائن تاني ، حتى كلنا إستغربناها جداً ، بقى الشغل عندها رقم واحد محدش بيشوفها أصلاً ، بنتها مره تسيبها عند مامتها ومره عند خالتي وإنتي عارفه خالتي مابيعجبهاش العجب ، ده غير إن إسلوبها وحش مع خالتي وإنتي عارفه طارق مامته عنده فوق كل الناس ، حجم المشاكل بيزيد كل يوم بينهم لحد ما اتخانقت مع خالتي يعني خناقه أخيره زادت من الطين بلّه ، يعني خالتي في لحظة غضب ذكرت إن طارق كان متقدملك وأهه دلوقتي سايبه بيتها وقاعده عند بيت أهلها _ لا حول ولا قوة إلا بالله عشان كده بقى شيماء لما كلمتها من يومين أتطمن عليها ماكنتش بلعاني خالص ! _ إزاي يعني ؟! _ مش عارفه بس كل مره أكلمها وأتطمن عليها بتكون المكالمه كلها ود كده وحب صادق فعلاً لكن آخر مكالمه ردت بعد معاناه أصلاً بعد ما يأست إنها ترد وكانت بترد على اد السؤال وقالتلي هتبقى مشغوله الفتره الجايه ومش هترد ع الموبايل يعني ما اتصلش تاني من الآخر ولما سألتها مالك قالت ما انا تمام اهه بس يمكن ارهاق الشغل أه وبالمناسبه طارق كويس جداا لو مكسوفه تسألي عنه يعني فسألتها مالها لإن إستغربت يعني إنها تذكر طارق أو تتكلم بالشكل ده قالت ولا حاجه سوري يا داليا لازم اقفل دلوقتي عندي اجتماع ! قفلت معاها وانا مش فاهمه فيه إيه وقلت أكيد حاجه مضيقاها والمكالمه الجايه هفهم منها _ أمممممم أنصحك بلاش تدخلي انتي في الصوره الفتره الجايه وماتكلميهاش تاني على الأقل لحد ما المشاكل دي تختفي _ ما انا بقول كده برده ، ربنا يصلح بينهم ويهديهم _ يا رب _ مريم أخبارها إيه ؟! _ مريم مين ؟! _ مريم يا نِهال ، مهندسه مريم !! _ آآآآآه ياااه تصدقي بالله معرفش عنها أي حاجه من سنين ! إنتوا لسه بتتواصلوا _ اه لكن بقالها 8 شهور مختفيه موبايلها دايماً مقفول ومش عارفه اوصلها مابتردش ع الإيملات إللي ببعتها _ ماتقلقيش يمكن مشغوله شويه وهترد أول ما تشوف الرسايل _ أتمنى فضلوا يتكلموا عن حياتهم وداليا بتحكيلها عن قراراتها ، لحد ما زوج نِهال إتصل بيها فوصّلت داليا لبيت خالها ومشيت بعد ما اتفقوا على يوم تاني يخرجوا فيه .. ... وصلت طيارتها وكانت منبهره بالمكان ، وطغى إندهاشها على إحساس الغربه إللي مرافقها من مطار مصر ، خلّصت إجراءات المطار وخرجت من البوابة ، لمحت مُسنّه أجنبيه رافعه لافته مكتوب عليها إسمها ، إبتسمت وراحتلها ، سلّمت عليها وإتعرفوا على بعض ، ركبت مع المُسنّه عربيتها وإتحركوا للبيت إللي هيستضيفها أثناء فترة الدراسة ... طارق تعب من اللف في الشوارع بالعربيه ، ركنها وسند راسه ع الكرسي ، لمح صوره متعلقه في ميداليا فيها صورة شيماء وبنته داليا ، ماكنش متخيل إنه هيعيش حياه غير مستقره كده لما يتجوز ، مش هو ده إللي كان بيتمناه لحياته بعد ما داليا رفضته كان مقرر مش هيتجوز ويصبر عليها من حقها ترتاح نفسياً من الحادثه كان مستعد يستناها ، لكن قبل ما تسافر طلبت منه يوعدها إنه يفكر في حياته لإنها مش هترجع مصر تاني و لو رجعت مابتفكرش في الجواز ، ومع إصرار أمه وإلحاحها إنه يتجوز ، بدأ يفكر في الموضوع ، وقتها كانت أقرب حد ليه هي شيماء ، شايف فيها قوه وإصرار وعزيمه بيتمناهم في شريكة حياته ، إتقربت منه أكتر ، عجبته شخصيتها وثقتها ، تغاضى عن أي صفه تانيه كان بيتمنى تكون فيها ، كان مجرد إعجاب شديد بيها ماوصلش لدرجة الحب ، لكن إتقدملها وفي فترة الخطوبه حبها بجد ، إتجوزوا وزاد حبه ليها ، بعد سنه من زواجهم ربنا رزقهم ببنتهم داليا ، يومها إختاروا الإسم سوا ماكنش في نيته يسميها على إسم داليا عشان حبها في يوم لكن شيماء إقترحت إسم داليا لإن ليها الفضل عليها في تحقيق حلمها بعد فضل ربنا وشاف إن إسم داليا مناسب فوافق وسموا بنتهم ، بدأت شيماء تنشغل في تحقيق نجاحاتها وكان مبسوط عشانها وبيدعمها لكن بدأت المشاكل بينها وبين أمه وعشان يتجنب المشاكل إشترا لشيماء شقه منفصله قريبه من بيت أمه بعد ما كانوا عايشيين معاها وهو كان بيراعيها دايماً ويتطمن عليها ومابيحسسهاش إنها وحيده ، لكن للأسف برده زاد حجم المشاكل وأمه ماكنش عاجبها حال شيماء وعدم إهتمامها ببيتها وفي آخر خناقه أمه في لحظة غضب ذكرت سيرة داليا ، خد باله دلوقتي من كلام أمه وإتردد في ودنه : كان مالها داليا لما تبقى مراته ما هو كان متقدملها وكان هيعيش سعيد مع إللي بيحبها بس أنا السبب انا السبب فاق من شروده وإعتدل في جلسته وهو بيسأل نفسه إمه تقصد إيه بأنا السبب ؟!!! شغّل العربيه وراح لأمه ، فتحتله وكانت بتبكي :'( ضمها بخوف وقلق _مالك يا أمي _ مفيش بس إشتقت للمرحوم أبوك قبل راسها وربت على ضهرها : ربنا يرحمه _ يا رب ،، طارق أنا كنت عاوزه رقم داليا إستغرب وسأل : إيه إللي فكرك بيها دلوقتي وعوزاها ليه يعني يا أمي بتوتر : يعني عاوزه أتطمن عليها _ حاضر ، بس تعالي إغسلي وشك الأول ونقعد مع بعض شويه وحشتيني غسلت وشها وقعدت في حضنه على كنبة الأنتريه ، إفتكر وسألها : صحيح يا أمي يوم ما اتخانقتي حضرتك وشيماء ليه جبتي سيرة داليا ؟! _ من قهرتي يا حبيبي سامحني لو كنت السبب في مشاكلكم بس هي اللي اسمها شيماء دي ما تعمرش في بيت أبداً _ طيب حضرتك كنتي تقصدي إيه بأنا السبب يا أمي ؟ رفعت راسها من حضنه وفركت إيديها بتوتر ، لاحظ حركتها الـ لا إراديه وتوترها فمسك إيديها وقبلها ، بصتله ، إنهارت في البكا وإترمت في حضنه ، ضمها وهو قلقان وبيسأل : فيه إيه يا أمي مالك يا حبيبتي ؟؟! طيب طمنيني إيه إللي حصل ؟ بصوت متهدج : إللي حصل وبيحصلك ده ذنب داليا بسببي أنا _ مش فاهم تقصدي إيه وإيه علاقة داليا بحياتي !! حكتله عن حوارها مع داليا إللي خبته عنه من 7 سنين ، ظهرت علامات الصدمه على وشه وماكنش لاقي كلام يقوله : _ أنا أسفه يا طارق ضيعت سعادتك يا حبيبي سامحني _ ليه بس كده يا أمي !! ليه تجرحي إنسانه بريئه ملهاش ذنب فـ حاجه ليييه عملتي كده لييييه ؟!!! _ سامحني يا نور عيني لو كنت اعرف ان ده اللي هيحصلك ماكنتش عملت كده _ لا حول ولا قوة إلا بالله العلي العظيم ، أنا مش بتكلم عني أنا دلوقتي بتكلم عن داليا إللي جرحتيها _ هاتلي رقمها وانا هتأسفلها وأطلب منها تسامحني _ ويفيد بإيه بعد 7 سنين تفتحيلها الجرح من تاني يا أمي يفيد بإيه الأسف !!!! بكت بحرقه وهو ما استحملش دموعها ضمها لحضنه وربت على ضهرها : خلاص يا أمي كفايه أرجوكـِ~ إنتي عرفاني مابستحملش دموعك ، خلاص قدر الله وما شاء فعل وأكيد داليا نسيت دلوقتي ، إنسي إنتي كمان وإللي حصل في حياتي مش ذنب داليا ولا حاجه ، شيماء إنسانه كويسه وطيبه وتتعاشر يا أمي ومتربيه ومثقفه هي بس إنشغلت شويه ومسيرها هتفوق وترجع لبيتها وزوجها وبنتها ، أرجوكـِ~ ما تكرهيهاش لو بتحبي إبنك بجد يا أمي حبيها عشان خاطري أنا وتقبليها أنا بحب شيماء بجد وبحب بنتي ومش عاوزها تعيش مشتته بيني وبين أمها ، إدعيلي يا أمي ربنا يصلح الأحوال ، أنا خايف على بنتي قبلت راسه : ما تقلقش يا حبيبي ربنا هيصلح الأحوال وتعيش أحسن حياه كمان مسح دموعها ، قبّل راسها وإبتسم : يلا بقى يا ست الكل ضناكـِ~ جعااااان عاوز آكل ، أكلك وحشني إبتسمت بفرح : من عينيا يا نور عينيا _ تسلم عيونك يا ست الكل قامت تحضرله العشا وهو دخل أوضته ، رمى نفسه ع السرير ولسه مصدوم من كلام أمه : رجع لـ 7 سنين فاتوا واتخيل المشهد بين أمه وداليا وقلبه وجعه ، فهم دلوقتي سبب الوجع إللي كان في عيون داليا لما تبصله ، فهم إصرارها على رفضه رغم إنه كان حاسس بقبول منها ، راسه هتنفجر من الصداع وكتر التفكير ومابقاش عارف يتصرف ولا يحل عقد حياته ، مسك راسه وفضل يستغفر الله ويدعيه يفرج كربه ويفرح قلب داليا ويعوضها خير ..~ .. شيماء من وقت ما طارق روّحها عند أهلها وهي حابسه نفسها في أوضتها وبتبكي إفتكرت إعجابها بطارق من أول مره شافته فيها ، وبدأ الإعجاب يزيد لحد ما اتحول لحب بعد تعاملها معاه عن قرب في قضية داليا ، بعد القضيه بقى قريب منها جداً وبيربطهم شغل وتعاملات كتيره ، زاد القرب بينهم وإتقدملها وإتجوزوا وكانت بتحس بسعاده حقيقيه في كل لحظه تعيشها معاه ، كانت حاسه إن داليا سبب من الأسباب إللي ربنا بعتهالها عشان تحقق أحلامها عشان كده قررت أول بنت تجيبها من حبيبها تسميها على إسمها وفعلاً من وقت ما عرفوا إن إللي في بطنها بنت وهم مقررين يسموها داليا إفتكرت المشاكل إللي بدأت في حياتهم ، كان لازم تضحي بحاجه مقابل حاجه تانيه ، يا بيتها يا شغلها ، حاولت توفق بينهم بس ما قدرتش ودي كانت النتيجه خسرت بيتها وزوجها ، فكرت كتير تسيب الشغل بس عقلها مش قادر يستوعب الفكره ، مش قادره تتخلى عن طموحاتها وأحلامها وتضحي بيها كده بسهوله ، رنت في ودنها جملة أمه في آخر خناقه : (( كان مالها داليا لما تبقى مراته ما هو كان متقدملها وكان هيعيش سعيد مع إللي بيحبها بس أنا السبب انا السبب )) أول مره في اللحظه دي تعرف إنه كان متقدم لداليا ولا كان بيفكر فيها في يوم ، فضلت تبكي بحرقه وهي حاسه بالضياع :'( سمعت خبطه خفيفه ع الباب وصوت بنتها بتبكي : إفتحيلي يا ماما مسحت دموعها وفتحت الباب ، نزلت في الأرض في مستوى طول بنتها وسألت : مالك بتعيطي ليه ؟؟!! _ عسان إنتي بتعيطي ضمتها لحضنها وبدأت تبكي من تاني وداليا بتربت على كتفها : معلس يا ماما أنا اسفه مس هضايقك تاني والله ماتعيطيس بقى إبتسمت وقبلت راسها : أنا مش متضايقه منك يا حبيبتي بس تعبانه شويه _ طيب إتسلي ببابا يوديكي للدكتور _ لا يا حبيبتي أنا خلاص دلوقتي بقيت كويسه الحمدلله عشان انتي في حضني _ طيب تعالي في حضني تاني عسان تخفي إبتسمت وسط دموعها وضمت بنتها لحضنها وجملة طارق بتتردد في ودنها ((ساعتها إنسي إن بنتك تعيش معاكـِ ضمت بنتها لحضنها أوووي وهي مش مصدقه إن ممكن تتحرم منها في يوم ... ... داليا توكلت على الله و قدمت إستقالتها بشكل رسمي ، وقررت هترتاح فتره وبعدين تبدأ تدور على شغل من تاني ، مشغول بالها على طارق وشيماء ، كلمت نهال بشرتها بإستقالتها وسألتها عن طارق وشيماء ولقت الوضع زي ما هو ، بتعز طارق جداً ومش ناسيه فضله عليها ، متضايقه إنه واقع في مشاكل دلوقتي ومش قادره تسانده ، خايفه تتدخل تزود حجم المشكله ، بدون ما تقصد جه على بالها أمه ورجعت فلاش باك لـ 7 سنين فاتوا موقف عمرها ما نسيته ولا هتنساه إفتكرت لما أمه جتلها البيت فاكره كل حاجه حصلت كإنها بتحصل قدام عيونها دلوقتي داليا : يا أهلاً وسهلاً إزي حضرتك يا طنط منورانا والله إتفضلي سلمت عليهم وإلتفتت لداليا : معلش يا حبيبتي كنت عوزاكي فـ كلمتين على إنفراد إستغربت داليا : أه ماشي إتفضلي أخدتها أوضتها وضايفتها بـ كوباية عصير وقعدت جنبها وفضولها موترها منتظره تعرف هي جايه ليه ! إتنحنحت أم طارق وبدأت تتكلم : في الحقيقه أنا أنا مش عارفه أبدأ منين أبو طارق الله يرحمه لما مات وسابلي طارق إتعذبت كتيير أوي وتعبت عشان أربيه ويبقى راجل وسند وضهر ليا داليا : بصراحه يا طنط ونعم التربيه ربنا يحفظهولك كملت : ربنا يكرمك يا حبيبتي ، المهم إني بقالي كتيير أوي من يوم ما طارق إتخرّج وأنا نفسي أشوفه عريس يكون أسره وعيله ويملى عليا البيت ولاد ويعوضني عن كل حرمان عشته فـ حياتي من بعد وفاة المرحوم ، كنت كل يومين أجيبله صور بنات وهو برده يرفض داليا مستغربه إنها بتقولها الكلام ده بس ماحبتش تقاطعها وسابتها تكمل كلامها _طبعاً إنتي مستغربه إني بقولك الكلام ده ! إبني طارق إمبارح فاتحني في موضوع الجواز وقالي إنه إنه لقى الإنسانه إللي بيتمناها والبنت دي هي إنتي يا داليا إحمر وشها وإرتبكت وقبل ما تنطق إتكلمت أمه : بصي يا داليا يا بنتي إنتي عارفه أنا بحبك أد إيه وبحترمك ويمكن لو في ظروف غير إللي حصلت كنت هفرح أووي إن إبني إختار إنسانه زيك بس بس إتجمعت الدموع فـ عيون داليا من تلميحات أمه : بس إللي حصلي غير مُشرف لإني أكون زوجة إبنك مش كده _مش قصدي والله يا بنتي بس إنتي عارفه المجتمع إللي عايشيين فيه محدش بيرحم وإنتي صورك بقت في كل مكان ومفيش حد في مصر مايعرفش إللي حصل وكمان ولاد إبني لما يكبروا ويو قاطعتها داليا لإنها ماقدرتش تسمع كلمه زياده من كلامها الجارح : فهمت قصد حضرتك وأنا أساساً مابفكرش في الجواز دلوقتي وحتى لو فكرت إبن خالتي أولى بيا يعني كان بيحبني وأنا كمان و وممكن لو فكرت تاني نتجوز ان شاء الله و و مش عاوزه حضرتك تقلقي خالص مش هقرب من إبنك وربنا يرزقه بالإنسانه إللي تستحقه _مش عارفه أشكرك إزاي يا بنتي ربنا يكرمك بس أرجوكي طارق مايعرفش حاجه بإللي دار بيننا هو كل إللي يعرفه إني جايه أطلب إيديك للجواز داليا : ماتقلقيش مش هجيبله سيره قوليله هي مابتفكرش دلوقتي في الإرتباط وربنا يرزقه بالأحسن مني _متشكره مره تانيه ، أستأذنك وماتزعلـ داليا : ماحصلش حاجه إللي حضرتك قولتيه هو الحقيقه وأنا مش زعلانه وصلتها للباب ورجعت جري على أوضتها رمت نفسها ع السرير وإتفتحت في العياط ، إتجرحت أووي من تلميحات أمه ، رغم إنها كانت عارفه كل الكلام ده بس ماكنتش حابه حد يواجهها بيه لما إفتكرت الموقف ده نزلت دموعها وحست بإحساس الوجع إللي حسته يومها إستغفرت الله ومسحت دموعها ، قامت صلت ودعت من قلبها لطارق وشيماء ودعت ربنا يطمن قلبها على مريم لإن غيابها المفاجئ ده قالقها ... رتبت هدومها في الدولاب وفضلت تتفرج ع الأوضه ، بصت من الشباك بتتأمل الشارع ، حاسه براحه نفسيه للمكان وللست إللي عايشه معاها ، سمعت خبط ع الباب ، فتحت ولقت السيده المسنه مبتسمه وبتقولها : العشاء جاهز _ Wow , you can speak in Arabic ?? _ نعم أستطيع التحدث بالعربية ، هيا لنتناول العشاء وسأقص عليك كيف تعلمتها إبتسمت : حسناً لحظة ، فقط سأرتدي حجابي _ لا تقلقي زميلك الآخر لن يعود قبل أسبوع _حسناً هيا بنا نزلت للعشا معاها ناولتها طبق : لا تقلقي هذا لحم حلال ، كوني مطمئنه _ شكراً لك _ لقد تعلمت العربية الفصحى من أحد الطلاب الذين كانوا يسكنون هنا ، كان من المغرب ، في أحد المرات لم يستطع دفع الإيجار فإقترحت عليه أن يعلمني العربيه وبالفعل علّمني إياها ، وأنا أتحين الفرص وأتدرب بالتحدث مع الطلاب القادمين من العرب إلى هنا _ رائع ، جيد جداً _ كان ذلك منذ 10 سنوات ، توالى الدارسين على هذا البيت ، كان لدي إبنه ولكن الآن تعيش في باريس ، لم يعد بهذا المنزل سواك أنت و أستاذ جامعي بجامعتك في نفس مجالك وهو عربي أيضاً مثلك _ أها رائع جداً ، العشاء مذاقه طيب شكراً لك _ على الرحب والسعه ، هيا إرتاحي اليوم وغداً صباحاً سآخذكـِ~ في جولة لتتعرفي على لندن _ شكراً لك طلعت أوضتها وهي حاسه براحه نفسيه ، بقالها كتير مفتقده الجو الأسري إللي حسته من الست دي ، من وقت ما نزلت من الطياره وهي حاسه بصداع ، إتناولت مسكن وحاولت تنام ..~ ... رجعت من الشغل متأخر ، بصت في الساعه وهي بتفتح باب الشقه ولقت كل أنوار البيت مطفيه ، مستغربه إنه لسه مارجعش لحد دلوقتي ، قالها هيزور صاحبه وياخد الولاد معاه وهيرجع بسرعه ، لسه بترفع إيديها عشان تفتح النور وكانت المفاجئه جريت بنتها عليها وحضنت رجلها : كل ثنه وإنتي تيبه يا ماما إنحنت وشالتها ، قبّلت خدها وهي مبسوطه : وإنتي طيبه يا روح ماما _ كل سنه وحضرتك طيبه يا أمي إنحنت وقبّلت راس إبنها : وإنت طيب يا حبيبي _ والآن حان دووري لا بس ماينفعش بالتورته دي هحطها واجيلك نزلي البت دي حالاً إبتسمت ، نزّلت بنتها للأرض وهي بتراقبه وتضحك من تصرفاته :D حط التورته على تربيزة السفره وقرب قبّل راسها وإيديها وضمها لحضنه : كل سنه وإنتي جنبي يا حبيبتي إستخبت في حضنه أكتر وبدأت دموع الفرحه تتجمع في عنيها : وإنت جنبي ومنور حياتي ربنا ما يحرمني منك أبداً يا علي وهو بيمسح دموعها : ولا يحرمني منك أبداً يا روح علي _ يلا يا ماما أنا عاوزه آكل من التورته وبابا قال لما ترجعي يلا بقى أنا جعانه _ هههههههههههه فضحتينا ، البت دي طالعه لمين لا أمها ولا أبوها كده أظنها طالعه لعمتها علا خبطته على كتفه : طاب هقولها ونشوف رأيها كده : _ لا خلاص يا باشا وأنا قلت حاجه ، يلا بس أحسن الأنسه فاطمه تاكلنا إحتفلوا بيوم ميلادها وقعدوا في البلكونه لحد ما ولادها ناموا ، شالت بنتها وهو شال الولد ، حطوهم في سريرهم وراحوا يناموا ، إبتسمت بإرتياح وسندت راسها في حضنه إبتسملها قبل راسها حوطها بدراعه وسرح في السقف ، ماكنش متخيل إن ممكن حياته بعد إللي حصل تتحول كده وتبقى بالإستقرار والسعاده دي ، وماكنش متخيل إن هاله ممكن تسامحه في يوم ، رجع فلاش باك لأول لحظه ندم فيها على ظلمه لهاله يوم ما لقى في شقته دفتر فتحه ، إستغرب وهو بيقرا العنوان : ((إلى الشئ الوحيد الذي يربطني بأكثر رجل أحببته .. إلى قطعة مني و منه...... إلى ابني الحبيب )) فتحه وبدأ يقرا ، ماكنش يعرف إن هاله بتحبه بالشكل ده ، مع كل سطر بيحس أكتر إنه ندل وأناني قرا كل المشاعر إللي مخبياها عنه وبتحكيها لإبنها ، مقدرش ينام غير لما خلّص كل كلمه فيه ، قفله ووقف قدام المرايه بص لنفسه بإحتقار ، حس إنه طايش ، لا قدر يثبت لداليا حبه ويحافظ عليها ولا قدر يحافظ ع الإنسانه إللي حبته ، وجع الإتنين وكان أناني معاهم وفي النهاية خسر الإتنين ! موبايله رن ، بص في الإسم وإستغرب إن أم هاله تكلمه قرب الفجر كده ! _ ألو _ أيوه يا علي ، معلش يا ابني لو صحيتك _ لا يا أمي أنا صاحي _ طيب أرجوك تعالى بسرعه ، هاله بتولد وأبوها مسافر ومش عارفه أتصرف لوحدي _ حاضر حاضر ، مسافة السكه وهكون عندكم لبس هدومه ، وإتناول محفظته ومفاتيحه بسرعه ونزل ، وصل البيت أمها فتحتله الباب وهي بتكلم دكتوره يسرا _ خلاص يا يسرا اهه جوزها وصل مسافة السكه وهنكون عندك مع السلامه ، أهلا يا علي ثواني هسندها واجيبها من جوه وقبل ما تتحرك سمعوا صوتها بتصرخ ، جري مع أمها ناحية الصوت ، شالها من الأرض ونزل بيها للعربيه وأمها وراهم _ مكان العياده فين ؟ أمها وهي بتمسحلها العرق : في نفس البرج إللي فيه عيادة هاله ساق بأقصى سرعه ، شالها وطلع بيها للعياده وكانت دكتوره يسرا في إنتظارهم ، دخّلوا هاله أوضة الولاده وفضل علي مع أمها بره قلقان ومنتظر يتطمن عليها ، قربت أم هاله : متشكره أوي يا ابني على وقفتك جنبنا _ حضرتك بتشكريني إزاي ده واجبي ، وإللي في بطن هاله ده يبقى طفلي إبتسمت وربتت على كتفه وبعد مرور ساعه ونص خرجت الدكتوره وهي مبتسمه وبتبشرهم : مبارك يا بشمهندس ربنا رزقكم بولد أم هاله : اللهم لك الحمد ، هي كويسه يا دكتوره ؟؟؟ _ الحمدلله كويسه جداً والمولود لحظه بس الممرضه بتعمله اللآزم وهتخرجهلكم ، بعد اذنكم لحظه وراجعه تاني _ إتفضلي قربت من علي وربتت على كتفه بفرح : ألف مبروك يا ابني يتربى في عزك _ الله يبارك في حضرتك ، اللهم آمين _ أهم خرّجوا هاله هدخل أتطمن عليها _ إتفضلي وياريت يعني تطمنيني عليها وتبلغيها سلامي _ لأ سلم عليها انت بنفسك بس استنى اما اشوفها الأول _ حاضر دخلت تطمن على بنتها وهو فضل واقف بره لحد ما خرجت الممرضه شايله ابنه ، أول ما لمحه لمعت عيونه شاله من الممرضه وهو بيتأمله ، قرب ايديه من شفايفه وهو بيتعجب من جمال صنع الله ، حس لحظة ما شال إبنه بمشاعر أول مره في حياته يحسها ، مشاعر ما تتوصفش ، نسي الدنيا كلها من حوليه نسي حتى نفسه ، شايل حته منه وعاوزه يفضل في حضنه ، قربه ليه وبدأ يأذن في ودنه بصوت متهدج مختلط بدموع الفرحه خرجت أم هاله من الأوضه وإبتسمت لما شافت علي شايل إبنه فـ حضنه ، قربت منه : هاله فاقت يا حبيبي وعاوزه تشوف إبنها علي : حاضر ، إتفضلي _ لا لا شيله إنت وتعالى إتطمن عليها دخل باصص في الأرض ، مش قادر يبص فـ عنيها ، إتنحنحت أمها فخرج من شروده : حمداً لله على سلامتك يا هاله هاله بإقتضاب : الله يسلم حضرتك يابشمهندس ، ومتشكره على تعب حضرتك معانا ، معلش أزعجناك أم هاله : إيه إللي بتقوليه ده يا هاله ده إحنا أهل يـ قاطعتها بحده : لأ إحنا مش أهل يا ماما ، بعد إذنك عاوزه أشوف إبني لو باباه خلّص ياريت تجيبهولي علي : كويس إنك عارفه إني باباه يا هاله _ صلّوا ع النبي يا ولاد ، طيب ع الأقل إنسوا الخلاف دلوقتي وخلونا نفرح بإللي نور حياتنا ده قربت وإتناولته من علي ، قبلت راسه وناولته لأمه ، أول ما هاله شالته إتردت فيها الروح ، ضمته لحضنها وهمست فـ ودانه : أخيراً ،، إستنيتك كتير يا نور عيني وحته مني نزلت دموعها فربتت أمها على كتفها وإلتفتت لعلي : أقعد يا ابني هتفضل واقف كده ؟! _ هنزل بس أصلي الفجر يا أمي _ إتفضل ، تقبل الله نزل علي وإلتفتت لبنتها : إنتي بتستهبلي يا هاله وده وقته الكلام ده ، طاب سيبي الراجل يفرح بإبنه شويه _ إبنه إنتي فكراه فرحان يا ماما !!! علي بس بيعمل الشويتين دول عشان إنتي أحرجتيه ولجأتيله _ ما هو لو شفتي دموع الفرحه وهو بيأدن في ودن إبنك مش هتقولي كده ولا لو شفتي خوفه عليكي _ خوفه عليا ودموع فرحه !!!! والله ؟ وهو إمته إفتكر إن أنا حامل أصلاً ؟! إمته سأل فيا ، 9 شهور لا حس ولا خبر دلوقتي بس إفتكر يا ماما دلوقتي قربت وضمتها لحضنها : طاب عشان خاطري أنا ماتضيعي فرحتنا ، إعتبريه فرحان وبلاش تضيعي فرحته _ طاب وأنا ليه ضيع فرحتي بكل حاجه فـ حياتي لييييه : _ خلاص بقى يا هاله المسامح كريم _ مسامح حضرتك إللي بتقولي كده يا ماما ؟؟!! _ طاب لو أنا غاليه عندك بلاش تفكري فـ أي حاجه دلوقتي غير إبنك سيبي المشاكل على جنب بصت لإبنها ، لمعت الدموع فـ عيونها وردت : حاضر يا ماما جت دكتوره يسرا إتطمنت عليها ودربتها ع الرضاعه وخرجت على بعد ما صلى الفجر رفع ايديه للسما وتاب عن كل ذنب عمله واكبرهم ذنب هاله من وقت ما قرا مذكراتها وهو مش طايق نفسه ، بكا بحرقه وهو بيدعي ربنا يغفرله ويبارك في طفله ، ووسط دموعه ابتسم لما افتكر لحظة ما ضمه لحضنه ، انهي صلاته وحس ان جبال انزاحت من على قلبه ، اشترا فطار وطلع لأوضة هاله خبط ع الباب ودخل بعد ما أذنتله أمها بالدخول ، بص لهاله ولما عينه جت في عنيها لفت وشها الناحيه التانيه ، أمها لاحظت وحبت تلطف الجو شويه _ماكنتش تعبت نفسك وجبت فطار يا ابني احنا الفرحه خلتنا مش حاسيين بجوع _ولاتعب ولا حاجه يا امي بعدين انتوا ماكلتوش حاجه من بالليل حاجه بسيطه تسندوا نفسكم بيها بإبتسامه حانية : طاب أقعد بقى وقولولي انتوا الاتنين ناويين تسموا المولود إيه إن شاء الله ؟؟ ردوا ف نفس واحد : آدم إلتفتتله بصدمه وعنيها بتسأله عرفت منين على عرف من المذكرات انها ناويه تسمي ابنها آدم ، لاحظ الصدمه والتساؤل إللى في عيونها فإبتسم رمقته بغضب ولفت وشها الناحيه التانيه ، فضل قاعد معاهم ، ضامم آدم لحضنه وبيتأمله بإبتسامة صافيه وعيون بتلمع فيها دموع الفرحة ، بصتله هاله وقلبها حاسس بصدق فرحته بالمولود ظهرت ابتسامه على شفايفها وسرعان ما اختفت لما افتكرت إللي عمله فيها ، بصتله بضيق ورجعلها تساؤل هو عرف انها هتسمي آدم منين ؟!! طبعا استبعدت امر المذكرات إللي لسه لحد دلوقتي فاكره انها وقعت منها في مكان في البيت ولما كانت بتدور عليها جالها وجع الولاده واتصلوا بعلي لذلك رجحت ان امها هي اللي قالتله ع الإسم بما إنها عاوزاهم يرجعوا لبعض ، أول ما الفكره جت على بالها حست بكمية غضب شديده ناحيته وقالت لنفسها : مستحيييل اسامحه وارجع تاني ! وفي الظهر وصل أبوها من السفر وجري ملهوف على حفيده ، اتطمن على بنته وشكر علي وهو شايل حفيده ضحكت امها : ابوكي عند الاطفال بينسى نفسه مابالك بإبنك إللي كان مستنيه على نار هاله: ربنا مايحرمنا من بابا ابدا ما هو هيقوم بدور الاب لآدم بقى ابني محظوظ ببابا احمر وش علي من الغضب وقف : بعد اذنكم هروح البيت ، اطمن اهلي وارجع التفت لهاله : وبالمناسبه يا مدام هاله ابنك مش محتاج باباكي يقوم بدور الاب ليه لأن ابوه عايش ومش هيخليه محتاج حاجه لا ماديه ولا معنويه ، بعد اذنكم بعد ما خرج إلتفتتلها امها بعصبيه : ايه اللي قولتيه ده كان لازم تتسحبي من لسانك _وانا قلت حاجه غلط !!! _ماتجادليش كتير عشان انا عارفاكي انتي كنتي قاصده تقولي جملتك دي أبو هاله : تقصد ولا ماتقصدش خلاص يا سماح حصل خير إهدوا بقى وكفايه خناق مش معقول كده ! خرجت من المستشفى وعلي راح هو وأهله يشوفوا آدم ، هاله رحبت بيهم أما عند علي فإلتفتتله بنظرة غضب ،، أصبح بيزورهم كل أسبوع 3 مرات عشان يشوف إبنه ، يفضل مع إبنه وبمجرد ما يمشي يحس بشوق ليه ويفضل طول اليوم في البيت بيفكر فيه ويبتسم ، مهموم ونفسه إبنه يفضل معاه 24 ساعه ، كان سرحان في آدم وقت ما رن موبايله ولقاها داليا _ ألو إزيك يا داليا داليا : ألف ألف مبروووك يا أبو آدم والله فرحت خاالص لما عليا عرفتني الخبر وبعتتلي الصوره ، ربنا يباركلك فيه ويجعله ذريه صالحه يا رب _ يا رب _ مالك ؟؟!! _ مفيش ! _ هكرر سؤالي مااالك يا علي ؟! _ مش عارف مالي ، الأول حمل هاله وهاله نفسها أصلاً ماكنتش فارقه معايا ، بس من ساعة ما شيلت إبني والله ما عارف يا داليا حصلي إيه ! مابقتش قادر أبعد عنه مش مكفيني مجرد 3 أيام في الأسبوع أنا عاوزه كل يوم وكل لحظه جنبي ، أنا تعبان ومش عارف أتصرف إزاي فكري معايا أعمل إيه !!! _ رجع هاله لبيتها وساعتها هتعيش مع ابنك وتربيه في حضنك مستني إيه يا علي ، إتحرك بقى لازم ترجع هاله قبل ما ابنك يكبر ويعيش مشتت بين أمه وأبوه _ أرجع هاله !!! هي هاله أصلاً طايقه تشوف وشي خلال الـ 3 أيام ما بتطلعش من أوضتها ولو لمحتني بتبصلي بقرف _ قولي الأول إنت مستعد ترجعها ومقتنع بإنك لازم تعمل كده ؟! _ أيوه ، أنا مقتنع وعاوز أربّي إبني وأعوضها عن أي ظلم سببتهولها _ يبقى قاتل عشان توصل لقلبها يا علي ، إكسب حبها _ ما هي مش مديالي أي فرصه _ إللي أعرفه إن هاله بتحبك هي بس بتعمل كده من الغضب إللي عامي قلبها منك لكن لما تحس صدق مشاعرك فعلاً هترجع وهتسامحك إنت بس حاول وإستحملها _ حاضر ، إدعيلي يا داليا بالله عليكي _ بدعيلك والله _ أخبارك إيه في لندن صحيح ؟ _ لسه ما سافرناش لندن إحنا في مكه ، هنسافر الأسبوع الجاي إن شاء الله _ توصلوا بالسلامه ، إبقي طمنيني _ إن شاء الله ، خد بالك من نفسك وبوسلي آدم _ حاضر _ مع السلامه _ مع السلامه إتكلم مع أم هاله عن رغبته فـ إنه يرجعها وأمها فرحت جداً وقررت تساعده ، وبالفعل بدأت تتحين الفرص وتقربهم من بعض أكتر وعلي فعلاً كان عنده رغبه إنه يرجعها ويعوضها عن كل لحظة ظلم شافتها بسببه عشان كده كان بيحاول ويستحمل غضبها وأسلوبها معاه ، وزي ما داليا قالتله بدأت بالفعل شعلة الغضب إللي جوه هاله تخمد تدريجياً قصاد حبها ليه ، ولما إتقدملها في الأول رفضت لكن مع إصراره طلبت من أبوها تقعد تتكلم معاه الأول _ إنت عاوز إيه بالضبط يا علي ظلمتني مره وإتجوزتني عشان تنسى بيا حبك القديم ودلوقتي عاوز تظلمني تاني وتتجوزني عشان إبنك هفضل لحد إمته كوبري عشان توصل من عليه لأهدافك ؟!! _ هاله أرجوكي إديني فرصه المره دي والله العظيم المره دي أنا عاوزك بجد ومحتاجلك جنبي مش هكدب وأقولك كنت بحبك بس ملكيش دعوه بزمان وكانت مشاعري إيه خلينا في دلوقتي ، والله العظيم أنا المره دي صادق فعلاً وعاوزك إنتي لشخصك مش عشان إبني ولا عشان أي حاجه تانيه ، أرجوكي يا هاله إديني فرصه أخيره وقفت وردت عليه بحده : ردي هيوصلك في الميعاد إللي حدده بابا إن شاء الله سابته في الأوضه ومشيت ، سابته وهو متيقن من رفضها ليه ، روح البيت ، صلّى ودعا ربنا بصدق إنه يرد هاله ليه وتسامحه ع إللي إرتكبه في حقها ، وهاله بعد ما مشي حست بصدق مشاعره صلت إستخاره ، ووصلت لقرارها النهائي بمساعدة أبوها وأمها ، جه علي يعرف القرار النهائي وهو متيقن من الرفض ، طلبت من ابوها هي إللي تقوله قرارها _ أنا إستخرت ربنا وفكرت كتير ووصلت لقراري النهائي المره دي أنا هقوم بدورك إللي دايماً تعمله معايا يا علي _ مش فاهم ؟؟! _ المره دي هرجعلك بس عشان إبني مايعيش مشتت بينا ومن غير أب ، المره دي هرجع عشان آدم وبس يعني زواجنا هيبقى على ورق ، هعيش معاك بس كل واحد فينا في أوضه وهقوم بكل واجباتي تجاهك في البيت لكن كل واحد فينا في مكان منعزل أظن فاهمني _ يعني إنتي بجد مواافقه ترجعي ؟؟!! _ لكن بالشرط إللي قولتلك عليه _ وأنا موافق على أي حاجه المهم إنك ترجعي وبالفعل عملوا حفله عائليه كتبوا فيها الكتاب ورجعت بيتها هي وآدم ، أول ما دخلت من الباب حست بقشعريره إجتاحت جسمها كله ، إفتكرت آخر حاجه جمعتها بعلي بين حيطان الشقه دي وحست بصداع شديد ، قرب منها علي وهو شايل آدم : لو تحبي تغيري ديكور الشقه دي أو الشقه نفسها أنا معنديش مانع _ أحب أغير الديكور أو أغير الشقه لما تكون حاجه تخصني لكن انا هنا ضيفه عشان ابني وبس زفر بضيق من كلامها ورد : إللي يريحك يا هاله أخدت إبنها ودخلت أوضة الأطفال ، طلعت هدومها ورصتها في الدولاب ، بقت عايشه معاه كإنه جايب مربيه لإبنه مش زوجه ، بتقوم بكل واجباتها ، بترتب البيت وتطبخ وتكنس لكن عمرها ما طلبت منه حاجه ولا قعدت تتكلم معاه كزوجه في وجوده بتقفل على نفسها الأوضه ، بتعذبه أكتر مما كانت رافضه رجوعها ، لحد ما في ليله من ليالي الشتا ، كان في مطر غزير ورعد وبرق فضلت طول الليل منتظره رجوعه وقلقانه لتأخيره وكبريائها مانعها إنها تتصل بيه ، قررت تحط الكبرياء على جنب ولسه هتتصل بيه سمعت صوت المفتاح في الباب وكعادة كل ليله بتفضل منتظراه وأول ما يرجع تدخل الأوضه وتقفل على نفسها ، دخلت أوضتها وفجأه سمعت صوت خبطه شديده ، فتحت الباب بهدوء ولقت علي واقع ع الأرض جريت عليه بخوف وسندته لحد السرير ، كانت حرارته مرتفعه جداً ، إدتله حقنه وبدأت تعمله كمادات ، فضلت جنبه ، هتموت من القلق نسيت كل لحظة ألم وظلم شافتها منه في اللحظه دي مش عاوزه أكتر من إنه يفوق ويرجعلها هي وإبنها ، عملتله اللازم وتفرغتله 3 أيام وهي ما بتنامش من خوفها عليه ، لحد ما فاق ولقاها قاعده على كرسي جنب السرير ماسكه إيديه وسانده راسها جنبه ، إبتسم وقرر يعمل نفسه تعبان ، صحيت تقيس حرارته وهو عمل نفسه نايم ، فرحت جداً لما لقت حرارته نازله ومن كتر فرحتها بكت وطبعت قبله على جبينه وفجأه فتح عيونه ، إتصدمت بعدت عنه ومن إرتباكها لسه هتخرج بره الأوضه مسك إيديها _ يعني أفضل عيان عشان اشوف الحنان والرضا ده كله يعني !! من غير ما تبصله : سيب إيدي لو سمحت يا علي _ خلاص بقى ، طيب إعتبري إني كنت هموت هـ قاطعته : بعيد الشر عنك ما تقولش كده >.< _ خايفه عليا ؟؟؟ _ أ أ أه طبعاً لازم أخاف عليك عشان إبني _ إبنك بس ؟!! _ أيوه طبعاً _ طاب والله العظيم بحبك يا هاله ومفيش واحده في قلبي غيرك دلوقتي أرجوكي بقى كفايه بعد لحد كده ، إديني فرصه أخيره _ سيب إيدي عشان أقوم أشوف آدم يا علي _ مش هسيب إيديك غير لما تقولي إنك هتديني فرصه تانيه وبعد دقايق من الصمت إبتسمت وردت بخجل : موافقه ^^ ومن غير كلام ضمها لحضنه فإنسابت دموعها مسحلها دموعها وإعتذرلها ، قالها كل إللي في قلبه ، فسألت : علي إنت حبتني الحب ده كله من إمته وحبتني إزاي _ ربنا هو إللي أراد ثم إنتي السبب أو آدم مش عارف مين فيكم إللي فتح عيني ع الحقيقه وشال الغشاوه إللي كانت على قلبي _ مش فاهمه !!! _ أمممممم ((إلى الشئ الوحيد الذي يربطني بأكثر رجل أحببته .. إلى قطعة مني و منه...... إلى ابني الحبيب )) الجمله دي بتفكرك بإيه ؟؟!! وقفت مصدومه : إنت إنت قريت مذاكراتي هز راسه بالإيجاب _ إنت جبتها منين ؟؟!! _ معرفش إيه إللي جابها الشقه ، لقتها هناك وقريتها وبحمد ربنا إني قريتها إفتكرت لحظة ما وقعت في الشقه والصوره بدأت توضحلها دلوقتي من 7 سنين فتحت الدرج وطلعت الأوراق بتاعتها ، حطتهم في الشنطه وخرجت بسرعه حتى من غير ما تقفلها ، خرجت وهي بتمسح دموعها وتهرب من الذكريات وفجأه اتكعبلت في طرف السجاده وقعت ع الأرض وكل حاجه في شنطتها إتنطرت في كل حته ، قامت وهي بتحمد ربنا إن الوقعه مش شديده ، سمعت موبايلها بيرن ، الممرضه وصلت وبتستعجلها فلمت الورق بسرعه ، حطته في الشنطه ومشيت ... وقف وضمها : خلاص بقى أنا ماكنتش أعرف إنها مذكراتك انا استغربت لما لقيتها عندي وقريتها بدافع الفضول _ أنا كنت بكتبها لآدم _ وأهه الحمدلله وقع الدفتر في إيد أبو آدم عشان يصلح أكبر غلطه في حياته _ يا سلام ! _ وعمك عبدالسلام ، أيوه كده يا شيخه إضحكي ده إنتي كنتي كئيبه ورخمه اووي بس برده بحبك ;) مرت الأيام وحياتهم بتتحول للأحسن ، وربنا رزقهم بفاطمه ، المره دي علي كان معاها في حملها لحظه بلحظه ومابيفوتش متابعه غير وهو معاها ، بيحاول يعوضها عن كل إحتياج وظلم ووجع حسته بسببه بصلها بحنان وهي نايمه في حضنه ، طبع قبله على جبينها وإستسلم للنوم ... ... داليا كانت بتكلم أمها وأبوها ع الموبايل وقفلت معاهم وهي مهمومه ، المصاريف والديون زادت من بعد ما داليا سابت شغلها ، حتى أحمد لما اتكلمت معاه كان متضايق لإنه محتاج كورسات ومش حابب يضغط عليهم ، ده غير دوا أبوهم الغالي إللي كانوا بيشتروه من مرتبها ، قررت تاخد سُلفه من خالها لحد ما تلاقي شغل ، نزلت دورت عليه في البيت ولارا قالتلها إنه في أوضته ، راحت ولسه هتخبط سمعت صوت شيرين : يا حبيبي عشان خاطري ماتعملش في نفسك كده وأنا متأكده إن ربنا هيعوضك عن الصفقه إللي ضاعت دي _ عارف والله يا شيرين بس الضيق ده غصب عني ، الحاله الماديه أصلاً متأزمه لوحدها ماكنش وقت الصفقه إللي راحت دي خالص بس قدر الله وما شاء فعل _ قولها برضا يا حبيبي الحمدلله إنها جت على أد كده والحمدلله إنها جت في الشغل مش في حد من عيالك ولا حبايبك _ عندك حق الحمدلله على كل حال _ إيه رأيك لو بدأت أدور على شغل _ إنتي بتستهبلي يا شيرين ، ده أنا ماصدقت إن داليا استقالت مش عاوز واحده فيكم تشتغل وتتبهدل في البلد دي ، ماتقلقيش ربك هيفرجها من عنده وقفت داليا مذهوله بعد إللي سمعته هي عارفه إن خالها كان مبسوط بالصفقه وحاطط عليها آمال كتيره هتنقل شركته نقله كبيره ، إتنهدت بهم وجريت إتوضت وصلت صلاة حاجه عشان ربنا يفرجها ويرزقها وظيفه تساعد بيها أهلها وخالها وماتخليهمش محتاجين حاجه ، بعد ما صلت نزلت تحت ولقت شيرين بتعيط في المطبخ ، ضمتها وربتت على كتفها : ربنا هيفرجها ما تقلقيش _ أنا مش ع الفلوس والله تغور الصفقه ومش مهم عندي الرفاهيات إللي كنا عايشيين فيها أنا بس مابحبش أبداً أشوف ناصر زعلان وموجوع ، فرج كربه وفرحلي قلبه يا رب _ يا رب ، طيب بقولك إيه ما تيجي كده ناخد ناصر ونطلع نتمشي شويه بره _ ياريت والله قوليله انتي يا داليا بالله عليكي _ حاضر هقوله وأستخدم عيالك معايا ممتازين في الزن ع الودان صراحه _ ههههههههه ، إلا صحيح إنتي عرفتي منين بموضوع الصفقه ده !!! _ما احنا منتظرين النتيجه انهارده ، وطبيعي لما اشوفه شارد ومتضايق وانتي بتعيطي اعرف في ايه ، ربنا يصلح الاحوال _يا رب فضلت تتحايل على خالها هي ولارا ومرام ومحمد لحد ما وافق ، لبسوا وراحوا الملاهي وبعدها اتمشوا شويه عند نهر التايمز في مكان داليا المفضل لارا : ماما أنا عاوزه آيس كريم أخدتها شيرين هي وأختها مرام وسابت محمد نايم على رجل داليا ، إتكلمت مع خالها شويه وحاولت تخرجه من حالته وتصبره راجع من شغله وكان عنده فضول يمر من عند النهر في الوقت ده قلبه بيقوله إنه هيلاقيها هناك ، طلب من السواق يمشي من عند النهر وإتصدم وهو شايفها بتتكلم مع واحد وشايله طفلها إللي شافه معاها آخر مره ، طلب من السواق يقف على جنب وفضل مراقبها ، خمن إن ده زوجها ، ضرب الكرسي إللي قصاده بقبضة إيديه ولما لمح زوجها بيطبع قبله على جبينها إستشاط من الغضب وطلب من السواق يرجع ع البيت بسرعه مر الأسبوع وماحستش بيه ، إنهارده أول يوم دراسه ليها ، لبست ونزلت سلمت ع السيده مارثا _ أووووه ملابسك أنيقه جداً إبتسمت : شكراً لك سيده مارثا وشكراً على جولاتك السياحية الرائعه اليوم هو الأول لي في الدارسه _ أتمنى لكـِ~ حظ وافر _ شكراً لك وقبل ما تمشي ندهتلها : أوه نسيت أن أخبرك ، اليوم سيعود زميلك في السكن إنه يحب الأسماك كثيراً وسأصنعها له اليوم هل تحبينها أم أصنع لك اللحم _ لا مانع لدي أحبها جداً _ حسناً ، حظاً سعيداً لك _ ولك ودعت مارثا و راحت للجامعه من نفس الطريق إللي وصفتهولها مارثا أثناء جولتهم ، وصلت للجامعه وكلها نشاط وحماس ، وصلت وماكنتش تعرف المفاجآت إللي في إنتظارها وعلى بعد دقائق قليله منها كانت في طريقها لمكتب الدكتور المشرف على رسالتها لما جالها اتصال من مصر ، ردت بإبتسامه ودوده : الو اخبار حضرتك ايه يا دكتور ؟ _انا الحمدلله بخير انتي اخبارك ايه يا بنتي ؟ _الحمدلله بخير أنا اهه في طريقي لمكتب دكتور عماد _كويس اني كلمتك قبلها ، دكتور عماد اعتذر لأن والدته تعبت واضطر يرجع مصر وهيطول شويه هنا ، بس ماتقلقيش هو رشح دكتور تاني مصري وممتاز جدا وانا موافق على ترشيحه صراحه لأن الدكتور ده كان طالب متميز جدا عندي وخدوم برده زي دكتور عماد هتلاقيه في انتظارك في مكتب دكتور عماد _تمام مفيش مشاكل ومتشكره جداً لتعب حضرتك يا دكتور _العفو على ايه بس ده انتي زي دكتوره صفا بنتي ربنا يوفقكم _يا رب _يلا اسيبك مع المقابله بقى وأبقي طمنيني _حاضر إن شاء الله _مع السلامة _مع السلامة وصلت عند باب المكتب ، تممت على مظهرها وأوراقها وخبطت ، جالها الإذن بالدخول فتحت الباب وكانت المفاجئه : ... خلّص شغله بدري وقرر يروح يشوف بنته ، فتحتله حماته الباب ورحبت بيه وداليا أول ما سمعت صوته جريت واترمت في حضنه ، ضمها بحب وحنان، قعد في البلكونه وقعدها على رجله _وحستني اوووي يا بابا إنت جاي تاخدني أنا وماما عسان نرجع البيت ؟؟ _ انتي وحشتيني أكتر يا روحي هرجعكم البيت إن شاء الله بس أنا عندي شغل ومش عاوز أسيبكم في البيت لوحدكم خليكم عند تيته لحد ما أخلص الشغل _طيب ماتتأخرس عسان البيت وحسني اووي وكمان صحابي _حاضر يا حبيبتي ، هي ماما فين ؟؟ _ في السغل ، سفت صحبتي الجديده ؟؟ _ الله جميله اووي العروسه دي ماما جابتهالك ؟؟ _لا عمو سريف جبهالي إستغرب وقبل ما يسألها أي سؤال تاني ردت البنت بفرحه وهي بتشاور تحت : ماما أهه جت ، ده عمو سريف إللي جابلي العروسه يا بابا بص لقى شيماء نازله من عربية راجل غريب ، إستشاط غضباً ودخل هو وبنته للصاله في إنتظار وصولها أول ما دخلت من باب الشقه وشافت طارق إتصدمت : طارق :! طاريق بسخريه : إيه ماكنتيش عامله حسابك إنك هتلاقيني موجود ولا إيه ؟؟!! فهمت قصده فبصت لبنتها : داليا إدخلي أوضتك دلوقتي وأنا هبقى أندهلك مسكت إيد أبوها : لأ أنا عاوزه أقعد مع بابا وخايفه يمسي تاني ويسيبني إنحني وقبل راسها : ما تخافيش يا حبيبتي زي ما اتفقنا لما أخلص شغل هاجي أخدك عشان نرجع البيت _ وعد ؟؟ _ وعد دخلت داليا أوضتها وإلتفت شيماء لطارق : خير يا طارق ؟؟ _ إنتي إللي خير ؟! إللي شفته من شويه ده تفسيره إيه إن شاء الله ؟؟!! _ عادي يعني تعبت إنهارده في الشغل وزميلي صمم يوصلني _ وهو يا مدام يا محترمه يصح تركبي مع راجل غريب لوحدك كده عربيته مهما كان الظرف !!! ولا شغلك نساكي الأصول كمان !!! _ هتبدأ تاني تلبخ يا طارق!! _ لا العفو انا هادي اهه وبتكلم بهدوء وبروووود مش ده إللي حضرتك عوزاه ! _ أنا ماعملتش حاجه غلط !! _ ماهي دي مشكلتك إنك بتعملي الغلط بحذافيره ومش شايفه نفسك غلطانه فـ حاجه !! صحيح جميله أوي العروسه إللي إشتراها عمو شريف لداليا ، أظن كنتي تعبانه وجه يزورك فجاب عروسه هديه لداليا أو يمكن أسرار بيتنا طلعتله فعرف إن الدنيا متكهربه قرر يصطاد في الميه العكره ولا إيه ! _ طارق لو سمحت شريف إنسان خلوق ومايستحقش تتكلم عنه كده كمان هو مجرد زميل وبس _ عموماً أنا كنت جاي أقولك إني موافق ع الطلاق بكره إن شاء الله أكون خلصت المأموريه إللي أنا فيها هكلم عمك وبعد العصر نتقابل عند المأذون وماتنسيش تجهزي شنط داليا وتودعيها ومبروك عليكي العريس الجديد نهى كلامه ومشي ، ندهتله شيماء ماردش عليها ، خرج وقفل الباب بعنف ، جريت ناحية الباب خبطته برجلها بعصبيه وجعتها رجلها فقعدت في الأرض تبكي بصوت عالي زي الأطفال جريت أمها من المطبخ وضمتها لحضنها ووقفت داليا بعيد خايفه ، حاضنه عروستها وبتبكي على بكا أمها

مقالات ذات صلة

حب أمتلاك بقلم حنان إسماعيل الجزء الأول

سيد القمر الأسود بقلم زينب مصطفى الجزء الرابع

حجر الشيطا,ن بقلم شاهندة الجزء الأول

جواد بلا فارس بقلم منى سلامة الجزء السادس

عش العراب بقلم سعاد محمد سلامة الجزء الثالث

عاد ليعاقبني بقلم امونة الجزء الرابع

اترك تعليقاً إلغاء الرد