عود ثقاب بقلم ندا سليمان الجزء الخامس

_ والله ما عارف أجولك إيه

هنيه بخوف : خير عوض جرتله حاجه

_ جوزك مجبوض عليه

هنيه : يا مُري ليه الراجل عِمِل ايه طول عمرنا فـ حالنا

_ اني معرفش حاجه يا بت عمي كل اللي عرفته انه مجبوض عليه فـ ايه معرفش !

هنيه : طيب ما تعرفش فـ أنهي حته

_ لسه ما عرفتش بس أول ما اعرف عجولك طوالي

هنيه : الله يكرمك

_ انتي ما عوزاش حاجه انتي وهنادي جبل ما امشي

هنيه : تسلم من كل رضي يا اخوي

_ سلام عليكم

هنيه : وعليكم السلام

هنادي كانت كالعاده فـ أوضتها وسرحانه جنب الشباك سمعت صوت أمها وجريت على بره

هنيه : يا مُرك يا حنضلك يا هنيه ، الراجل عِمل إييه يا وجعه مطينه بطين

هنادي : فيه ايه يا أما

هنيه : اخفي من جدامي دلوك يا مرزيه انتي من يوم ما جيتي على وش الدنيا والمصايب حاله علينا غوري

هنادي : الله يسامحك يا أما ، طاب جوليلي مالك

هنيه : أبوكي جبضوا عليه يا حزينه

هنادي : يا مراري  ! طاب قبضوا عليه ليه و فين

هنيه : وهو اني لو كنت اعرف حاجه كان زماني جاعده الجعده السودا دي وحاطه يدّي على خدي

يا ترى عِمِلت اييييه يا عوض !!! استرها يا رب

…

أم جاسر قاعده على اعصابها وأول ما دخل جوزها جريت عليه _ طمني يا توفيق على جاسر وهو فين

توفيق وهو بيفك الكرفته وأزرار القميص : ابنك ودا نفسه فـ داهيه وفين دي بقى أحب أقولك ورا الشمس!

_ توفيق أنا مش فاهمه حاجه اتكلم عدل الولد قبضوا عليه ليه وإزاي تسمحلهم يقبضوا على ابنك

توفيق وهو بيقعد : المره دي صعب أداري على وساخة ابنك بسهوله يا هانم ! البيه هو والبهوات اللي ملموم عليهم اغت,صبوا بنت فـ الفيلا بتاعتنا اللي فـ (…..) والبنت بلغت عنهم

_ مش ممكن : جاااسر يا روح قلبي ( طيب انت ازاي معملتش حاجه ماينفعش ابني يبات فـ المكان البشع ده ليله واحده >

توفيق : اه بالمناسبه ابنك مقبوض عليه من امبارح يعني بات امبارح فـ الحجز

_ لأ يا توفيق أنا مش مصدقه ان ابني يعمل كده

توفيق : احنا هنضحك على بعض انا وانتي متأكدين انه عمل كده فعلاً

_ عادي طيش شباب وكل الولاد بيعملوا كده !

توفيق : لا مش كل الولاد انا بس اللي خلفتي سودا

_ وهتعمل ايه !!

توفيق : قومتله اكبر محامي فـ البلد ومستني أشوف هيعمل ايه

قاعد توفيق بيفكر فـ حل ومراته جنبه بتعيط على ابنها وإللي جراله !!!!

توفيق : اسكتي بقى كفايه مناحه مش عارف أركز