وصية صفية بقلم منال ام ابراهيم مرجان الجزء الثاني
– يعني انت مصمم يا خالد?
– يا حبيبتي صدقيني أنا مش عايز من الدنيا دي حد غيرك …ويا ستي اعتبريني ابنك وعامليني على الأساس ده…هو انا اطول يعني يكون عندي أم زي القمر زيك كده
ابتسمت أمنية ثم أخذت تجفف دموعها التي انسابت مع كلماته قبل أن تقول:
– ربنا يخليك ليا يا خالد …انت مش عارف كلامك ده بيعمل فيا إيه
عادت يديه للإلتفاف حول خصرها مرة أخرى ثم قال بإبتسامة:
– وانتي كمان مش عارفة كلامك ده بيعمل فيا إيه…ميت مرة قلتلك بلاش الرقة اللي بتتكلمي بيها دي واحنا فالمكتب احسن تبقي انتي الجانية على روحك
افلتت أمنية نفسها من بين ذراعيه وقالت وهي تتجه نحو باب الغرفة:
– لا وعلى إيه أنا ماشية احسن
وضع خالد يده علي الباب مانعا إياها من فتحه وقال بمزاح: هو دخول الحمام زي خروجه ولا إيه?
تراجعت أمنية إلى الخلف وهي تقول بمزاح:
– خالد اعقل يا خالد…مش فيه إجتماع كمان شوية للمهندسين بتوع المكتب
اقترب منها خالد وقال مشاكسا إياها:
– انتي ماتعرفيش… مش أنا لغيته وحولته لإجتماع مغلق أنا وانت وبس يا جميل …ولا انتي فالحة بس تقوليلي عايزة عيال عايزة عيال وساعة الجد تخلعي
لفت أمنية ذراعيها حول رقبته وقالت بحب:
– بحبك يا مجنون
*************************************
كانت لبنى تجلس على سريرها وهي تحادث نورا في الهاتف قائلة:
– وماتجيش انتي ليه تذاكري معايا هنا ان شاءالله? اشمعنا أنا اللي آجي عندك…اعتقد دلوقتي مابقاش فيه حد تتكسفي منه …لكن أنا بقى افرضي سامح جه وأنا عندك
تنهدت نورا بشدة ثم قالت بجدية:
– ماتقلقيش يا ستي سامح اصلا مابيجيش هنا …وبعدين ماهو كمان عنده إمتحانات …عشان خاطري بقى يا لبنى تعالي انتي
شعرت لبنى بالقلق من لهجتها فسألتها مستفسرة:
– مالك يا نورا هو علي مزعلك ولا حاجة? قوليلي وأنا اخلي ماما تجيبلك حقك
مسحت نورا على شعرها ثم قالت بضيق :
– يا ستي ولا مزعلني ولا مفرحني … ممنبقى تسمعي الكلام وخلاص
اعتدلت لبنى في جلستها وقالت بتعجل:
-طيب باقولك إيه يا نورا …سلام بقى دلوقتي وبعدين حابقى اكلمك احسن احمد على الويتنج بيرن عليا
– آه طبعا…من لقى أحبابه نسي نورا …مش كده برضه?
– معلش بقى يا نورا…أصل احمد مش بيعرف ينام قبل مايسمع صوتي …سلام بقى
