عود ثقاب بقلم ندا سليمان الجزء السابع

قرأت نهال المقال بمشاعر مختلطه فرحه ان فيه حد واقف جنب داليا وقضيتها واسي لما قرأت التفاصيل وافتكرت اللي حصل امبارح في الجلسه مرت على داليا وكانت احسن من امبارح بكتيير ولما شافت الجريده كان رد فعلها الوحيد ابتسامه مكسوره واصرت ترجع البيت هي وأمها عشان أبوها مايفضلش قلقان عليها أكتر من كده فوافقت نهال وكتبتلها ادويه تمشي عليها الفتره دي وبالفعل رجعت داليا البيت و أول ما وصلت جريت على ابوها واستخبت في حض,نه عشان تحس بالأمان شيماء قاعده في الجريده حاسه بفرحه وكلها طاقه ونشاط ، بعد ما شافت اللي عزيز البنا عمله انهارده عشان يوصل لأمل فهمت ان رئيسها كان عنده حق لما خلاها تكتب بإسم مستعار بتفكر في الخطوه الجايه ولقت موبايلها بيرن شيماء : السلام عليكم طارق: وعليكم السلام ورحمة الله وبركاته مبااارك النجاح المبهر ده يا انسه شيماء ولا نقول أمل ؟ ضحكت شيماء : خليها أمل بقي عشان الحيطان ليها ودان طارق : ماشي يا أمل عموما حبيت اشكرك عشان حاجتين اولهم انك هتساعدي داليا وتوصلي صوتها وما شاء الله الصوت انتشر بسرعه محدش له سيره غير القضيه وثانيا لانك من غير حتي ما اقولك عملتي طمس على صورة داليا ومانزلتيش اسمها شيماء : ده واجبي وماتشكرنيش انا بعد اللي شفته في القاعه ومدي الافترا والكدب بتاعهم قررت مش هسيبهم كفايه بقي فساد صحيح مش عزيز البنا جه الجريده انهارده طارق بتعجب : وده بيعمل ايه ان شاء الله ولا صحيح ايه السؤال ده طبيعي جاي يعرف مين امل ! شيماء : بالضبط كده وبشكل غير مباشر انطرد وما استفدش اي حاجه طارق : احسن اسيبك بقي تخلصي شغلك وشكرا مره تانيه شيماء : العفو يا فندم مع السلا... اه صحيح معلش يا طارق بيه كتت عاوزه رقم داليا طارق : امممم انا معنديش مانع ولكن شايف من الافضل تاخدي رقم نهال وهي تقولك حالتها الصحيه تسمح ولا لأ شيماء : تمام مليني الرقم اخدت منه الرقم وقفلت معاه ورجعت تاني ترتب افكارها وخطواتها الجايه ،،،، ... توفيق راح الشركه وكان عزيز في انتظاره وعلى طول سأله عن اللي ناوي يعمله عزيز : انا شايف اننا نستخدم نفس اسلوبهم وهم ليهم الجرايد بتاعتهم واحنا لينا بتاعتنا برده توفيق : تقصد ؟؟ عزيز : ايوه اللي جه على بال حضرتك زي ما هم عاوزين يوصلوا للناس انها شريفه ومظلومه احنا كمان نقدر نوصلهم اننا مظلومين وبعدين مش ملاحظ انهم لا حطين اسمها ولا صورتها بوضوح واجبنا برده نعرف الناس هم متعاطفين مع مين اسم وصوره ولا ايه؟؟! ضحك توفيق : هههههههههه فهمت اللي ناوي عليه وبديلك الاذن ابدأ وعاوز من بكره الموضوع ما يستناش اكتر من كده عزيز : تمام يا باشا انا بس كنت مستني الأوكيه بعد اذنك بقي عشان اروح اشوف شغلي ... شيماء كلمت نهال تستأذن منها عشان تعمل حوار مع داليا لكن نهال طلبت منها تنسي موضوع الحوار ده على الاقل في الوقت الحالي لإن حالة داليا ما تسمحش .... ... علياء بتقرا المقال ع النت بعد ما داليا قالتلها عليه وحاسه الدم بيغلي في عروقها وهي بتقرا الجزء بتاع كلام عزيز وعوض وصابر ، مندمجه في القرايه لحد ما رن موبايلها علياء : السلام عليكم ، ازيك يا على ؟ على : وعليكم السلام ماشيه الحمدلله وانتي وهنا وجوزك كويسين ؟ علياء : الحمدلله > على : مال صوتك يا عليا في ايه ؟؟ وكإنه بسؤاله حطم سد دموعها ، انفجرت في البكا وهو قلقان وبيسأل مالها وهي مش قادره ترد عليه ،،، فضل معاها ع الخط لحد ما هديت وبدأت تتكلم بوضوح علياء : انا تعبانه اوي يا علي واصلا متخانقه انا وجوزي على : ليييه طيب اهدي يا حبيبتي وفهميني ايه اللي حصل بينكم علياء : مش راضي ينزلني مصر وانا مش مستحمله اشوف كل ده بيحصل في داليا واعرف اخبارها من بعيد لبعيد كده ، داليا محتاجالي في الفتره دي ومش لازم تطلب مني اول ما سمع اسم داليا انتفض من مكانه وسأل بخوف : هي داليا حصلها ايه ؟ علياء : انت لسه بتسأل يا على انت نايم في العسل ده مصر كلها عرفت علي : معلش يا عليا انا منعزل عن الدنيا كلها الفتره دي ارجوكي فهميني حصل ايه علياء : عندك جريدة الحقيقه ؟ على : عرفاني من زمان بطلت اقرا جرايد علياء : طاب لو عندك نت افتح موقع جريدة الحقيقه وانت تعرف فيه ايه يووووه هنا صحيت معلش يا على هقفل وهبقي اكلمك تاني على : خلاص ماشي يا حبيبتي خدي بالك من نفسك وكل حاجه بالتفاهم مع جوزك بلاش خناق علياء : حاضر خد بالك من نفسك مع السلامه على : مع السلامه قفل معاها وعلى طول فتح اللاب توب و الصفحه الرسمية لجريدة الحقيقه ،، الصفحه بتحمل وهو مترقب بتوتر قرا اول مقال والتاني بتاع اول جلسه وهو مصدوم ، كان في قمة غضبه وهو بيقرا اللي حصل في الجلسه ، شاف صور داليا وهي خانقه عوض ورغم الطمس اللي على صورها بس عرفها عيونه احمرت من الغضب رزع اللاب توب ووقف وهو بيتخيل داليا وحالها وقت ما سمعت الكلام ده كله عليها في الجلسه واتخيل لو كان معاها وقتها حس بالعجز قرب من المرايه وهو كاره حتي ملامحه ومن شدة الغضب مسك الفاظه وفضل بلا وعي يكسر في المرايه انهار ع الارض والدم سايل من ايديه ودموعه نيران بتكوي قلبه وتحرقه ... هنادي قاعده في الفصل دخل المدرس : انا عندكم دلوقتي حصه احتياطي عاوزين تتكلموا مع بعض ماشي بس اسمع نفسكم ولا صوتكم يعلا هيبقي نهاركم زي وشكم العكر ده فاهمه يا بت انتي وهي ولا لأ _فاااااهمين يا استااااذ هنادي قاعده في الاول لوحدها صحبتها غايبه انهارده فسندت راسها ع الديسك لحد ما يضر.بوا الجرس ، قعد الاستاذ قصادها وفتح الجريده يتسلي فيها ويقت,ل ملل الحصه رفعت راسها وجحظت عنيها وهي شايفه صورة ابوها وقبل ما تقرا قلب الصفحه طلبت منه يدلها الجريده تشوف حاجه نهرها ففضلت قاعده مش على بعضها لحد ما سمعت الجرس وجريت بسرعه على كشك الجرايد اللي بعد مدرستها بشارعين اشترت الجريده ورجعت ع البيت قفلت على نفسها اوضتها ومن غير ما تغير هدومها بدأت تقرا الخبر وتتفرج ع الصور وهي مصدومه وبتردد : دلوك بس فهمت جضية ايه دلوك فهمت كل حاجه ليه كده يابا ليه سمعت صوت امها بره : يا مري ايه اللي حصل يا سي عوض ؟؟ خرجت بسرعه ولقت ايد ابوها ملفوفه بشاش عوض: يدي اتحرجت انهارده وصابر خدني ع المستشفي هنيه : سلااامتك يا سيد الرجاله دلوك عروح اجهزلك الوكل راحت هنيه ع المطبخ وعوض انتبه لهنادي اللي واقفه شارده عوض: واجفه كده ليه يا بت وبعدين مش تاجي تجولي لابوكي سلامتك وتطمني واجفه كيف خيال المجاته كده ليه هنادي : _____________ عوض : مش بكلمك يا بت ما تردي ولا البسه كلت لسانك هنادي : ما انا لو رديت كلامي مش عيلد عليك يا بوي عوض : هو ايه ده اللي ما عيلدش على ان شاء الله !!! هنادي : ليه عملت كده يا بوووي ليييه سكت عن الحج وانت عارف زين انك افتريت على بت الناس لييييه مش يمكن كنت انا اللي اكون مكانها انتفض عوض مكانه ومسكها من دراعها : اجفلي خاشمك يا بت الجزمه انا مش نبهت عليكي جبل كدهه الموضوع ده ماتجيبيش سيرته هنادي : عارف يا بوي يدك انحرجت ليه ! ده غضب من ربنا عشان يدك دي هي اللي حطيتها ع المصحف وحلفت على كتاب الله زور وافترا صفعها على وشها ومسكها من شعرها : اتجنيتي اياك يا بت ولا ايه انا مش جلت عجطع لسانك لو جيبتي سيرة الليله الغبره دي تاني هنادي وهي بتتألم من مسكته : ولحد ميته عسكت يا ابا لحد ما اتشوي بنار جهنم يوم الجيامه جت امها من المطبخ على صوتهم : حصل ايييه عملت ايه هنادي ؟ دفعها عوض جوه اوضتها : رجلك ما عتعتبش خطوه بره البيت وانا عربيكي من جديد يا بت الكلب ولو سمعتلك حس تاني عدفنك حيه سامعه ولا لا قفل عليها الباب وهي قعدت في ركن من الاوضه خايفه وبتبكي بحرقه وتردد : سامحني يا رب : ... شيماء زارت داليا بعد ماحالتها اتحسنت وعملت معاها حوار نزلته في الجريده وبعد الحوار اللي نزل ده بيومين بدأت الجرايد الصفرا تنشر كذب وافتراء عزيز البنا بالاضافه لإنهم نزلوا صورة داليا بدون طمس وكمان اسمها بالكامل واصبح فيه جزء من الناس مصدق وضد داليا وسواء مع او ضد المهم ان هدف طارق اتحقق وبقت قضية داليا شاغله الرأي العام ،،،، مريم حالتها النفسيه بتسوء ، امتحاناتها قربت وهي فاقده تركيزها تماما ورجعت تاني تقفل على نفسها وعمرو كل يوم يروح يطمن عليها من ورا الباب ويسيبلها ملازم مراجعه ومحاضرات نقصاها ويمشي ..... الوقت بيمر وميعاد الجلسه التانيه قرب ، علاء محامي داليا اصبح عليه عبء كبير وبدأ يثبت ان داليا ليلة الحادثه كانت في الفندق راح هناك وطلب من صحباتها شهادتهم في المحكمه ووافقوا بيمر الوقت وداليا حالتها النفسيه من سيئ لأسوأ وخصوصا بعد اللي كتبته الجرايد اللي تبع توفيق الزغبي عنها ماشيه ع الادويه اللي كتبتهالها نهال وكل اسبوع بيعملوا جلسه وكل ده وداليا قصاد ابوها بتحاول تبين انها قويه عشان حالته الصحيه ومر الشهر بكآبه وبطء وجه ميعاد الجلسه التانيه ...... داليا ماكنتش عاوزه تحضر لحد قبل الميعاد بيوم قاعده مع امها وابوها في الصاله ورن جرس الباب قامت تفتح واندهشت لما شافت اللي كان بيخبط ع الباب، إرتسمت إبتسامه واسعه على وشها وجريت عليه وهي بتهتف بفرح : خالووو ناصر حبيبي اتشعلقت في رقبته وبدأت دموع اﻻشتياق والفرحه باللقا تحضن خدها جريت أمها عليه ودموع الفرحه ماليه عيونها ناصر : أوعي يا بت يا داليا كفايه عليكي كده حضن أمي وحشني أوي اترمت خديجة في حضنه واتفتحت في العياط وهو كمان بدأت الدموع تنزل أول ما احتوته ضمتها عمران : طاب سيبوا الراجل باخد نفسه وبعدين ضايقوه بسلاماتكم الغريبه دي ضحك ناصر وراح يسلم عليه : لا مؤاخذه يا عم عمران أصلهم كانوا واحشني أوي انتهت السلامات بأحمد اللي اول ما سمع الصوت خرج من أوضته وجري على خاله خديجه وهي قاعده جنبه و بتربت على رجله : طمني على احوالك وصحتك يا حبيبي وفين بنتك ؟ ناصر : والله يا ست الكل انا الحمد لله بخير أما بخصوص لارا فعند أمها شويه قبل ما تتجوز وتسافر شهقت خديجه : تتجوز ازاي انت مش لسه مطلقها ناصر : ههههههههه وهم عندهم شهور عده يا حبيبتي ! بعدين احنا بقالنا شهر متطلقين وانا مستحيل هرجعها تاني يعني فخليها تتجوز بقى براحتها داليا : مش المحكمه حكمتلك بحضانة لارا ! ناصر : ايوه بس انا سيبتهالها يعني بشكل ودي كده انا مش قلبي قاسي لدرجة اني احرم ام من بنتها مهما حصل بينّا ! خديجه بعصبيه : وهي دي تسميها ام ولا تعرف حاجه عن الأمومه داليا : خلاااص سيبونا بقى من السيره دي ويلاااا يا خالو قوم غير هدومك وارتاح شويه ناصر : نسيتي حاجه مهمه يا داليا وتاكل انا بطني نشفت من الاكل الخفيف عاوز حاجه حرشه من ايد ست الكل اكلك وحشني يا أمي علت الضحكات وردت خديجه : يا نور عيني بس كده حااالا وهيكون الاكل اللي بتحبه جاهز قبل ايديها : تسلملي الايد الحلوه دي يا رب راحت خديجه ع المطبخ وناصر اتكلم شويه مع عمران بعدين عمران اعتذر ودخل ينام ناصر : والواد احمد كمان راح يذاكر ما بقاش غيرنا يا بت انتي يلااا بقى دلوقتي حالا تعترفي ايه اللي قريته في عينك ده ! داليا وعلى شفايفها شبح ابتسامه :قريت ايه ! ناصر : خوف ورهبه وحزن وعدم ثقه بنفسك مشاعر كتير عينك بتحكي عنها بس للأسف كلها وحشه ومش مطمنه ! داليا : طيب بعد ما تاكل ان شاء الله نبقى نسهر سوا ونحكي براحتنا ناصر : اتفقنا يا دولي ودلوقتي بقى وانتي زي الشاطره كده قومي ساعدي ماما لحد ما اشوف اخبار الواد دكتور المستقبل في دراسته ايييه ! قامت داليا تساعد أمها وهو دخل اتطمن على احمد وشجعه شويه لان امتحاناته بعد شهر لحد ما ندهتله داليا عشان الأكل جهز ، اتجمعوا كلهم وبدأوا ياكلوا وهم بيضحكوا على المواقف اللي ناصر بيحكيها وبعد الأكل شرب ناصر الشاي مع خديجه ، ساعه و دخلت تنام ، عملت داليا كوبايتين نسكافيه وراحوا ع البلكونه يحكوا براحتهم .... ناصر وهو بيرتشف من كوبابة النسكافيه : مستعده لجلسة بكره ان شاء الله داليا من غير ماتبصله : أنا اصلا مش رايحه ناصر : نعممممممم !! مش بقولك عنيكي فيها حاجه ما تطمنش مش هتروحي ليه ان شاء الله داليا : مش عاوزه اللي حصل في الجلسه اللي فاتت يتكرر مش عاوز افقد اعصابي وانا شايفه وشوشهم المقرفه ناصر : حاسس كده بنبرة استسلام وهروب في صوتك يا نصه ! داليا : لا والله ولا هروب ولا استسلام تقدر تقول زهقت خلاص وتعبت وكل مره يخترعوا قصه قذره ويشوهوا سمعتي وانا مابقتش مستحمله اني ابقي بموت من جوايا وابين اني كويسه وقويه عشان محدش يحس بيا ويتعذب بسببي وخصوصا ماما وبابا ناصر : ما هو اللي انتي بتقوليه ده استسلام ولكن من نوع آخر ما ضاع حق وراءه مطالب يا انسه ماينفعش تعتمدي ع المحامي بس وبعدين انتي اقوى من كده ومهما قالوا ولا كتبوا ثقتك بنفسك تخليكي ما تلتفتيش للكلام العبيط ده من الاساس احنا اصلا هنروح سوا بكره ان شاء الله داليا : اذا كان كده ماشي ناصر : وانني تقدري تقولي حاجه غير كده يا بت انتي معندكيش اختيارات ضحكت داليا : وانا نطقت يا باشا ! ناصر : ههههههه والله يا داليا كنت جاي احضر معاكي اول جلسه وربنا وحده العالم كان نفسي اكون جنبك طول الفتره دي ازاي بس القضيه كانت مغلباني شويه داليا : ولايهمك يا حبيبي انا عارفه والله بس مش مهم اللي فات لإن اللي جاي هو الاصعب والحمدلله جيت في وقتك ناصر : ان شاء الله ولا اصعب ولا حاجه انتي ادها ابتسمت داليا : طاب يلا بقى قوم نام ونبقى نكمل كلامنا بكره ان شاء الله ناصر : مش هقولك لا عشان جفوني دلدلت خلاص داليا : هههههههه ماشي يلا يا حبيبي قوم نام تصبح على خير ناصر : وانتي من اهل الخير يا دولي استني يا بت داليا : نعم ! ناصر : عاوز حضن ابتسمت داليا وضمته طبع قبله على جبينها : خليكي واثقه في نفسك يا ست البنات ابتسمت داليا وراحت على اوضتها بحماسه ونفس جديده غير اللي كانت قاعده من شويه ... الصبح نزلت داليا هي وخالها خالها ، ركبوا مع نهال العربيه وراحوا ع المحكمه وأول ما وصلوا اندهشت ! لقت مجموعه من الشباب و البنات واقفين عند المحكمه وماسكيين لافتات لتشجيعها والمطالبة بحقها، نزلت من العربيه وهمس ناصر في ودانها : معقوله ماكنتيش عاوزه تيجي عشان تضيعي المنظر إللي يفرح القلب ده، ابتسمت داليا ودخلت المحكمه مع خالها ونهال بثقه وثبات ولسه هتافهم بيتردد صداه في ودانها ويشعل الحماس جواها : (( اقفي في وش الظلم يا داليا حقك راجع ماتخافيش )) ! وعند الباب قابلوا شيماء وسط مجموعه من الصحفيين اللي اول ما شافوا داليا جريوا عليها ووجهولها سيل من الاسئله ! دخلت داليا القاعه من غير ما تجاوب وطبعا الوحيده من صف الصحفيين اللي دخلت معاها جوه هي شيماء، جريوا الصحفيين على توفيق الزغبي ومراته وهم داخليين زي المره اللي فاتت من باب غير الرئيسي ، اتفاجئوا وارتبكوا بس قدروا يفلتوا منهم ويدخلوا القاعه توفيق : ايه الهرجله دي الصحفيين دول ايه اللي جابهم هنا !! عزيز : خلاص بقى يا توفيق بيه القضيه وصلت للصحافه وبالتالي طبيعي يكونوا موجودين هنا من الصبح مش هنقدر نمنعهم بس الحمدلله مش هيدخلوا القاعه منعا لأي ازعاج اثناء الجلسه وصلوا المتهمين وجاسر بص لداليا نفس النظره بس المره دي ما هربتش من عنيه المره دي بصتله بقوه وثبات وثقه ... خالد بيدور وسط الموجودين على مريم يمكن تحن المره دي وتحضر لكن مش لاقيها قعد بخيبة امل ولسه الخوف بيحرق قلبه زي كل يوم عايشه ورا القضبان ! كتير فكر يعترف ويريح نفسه من العذاب اللي عايش فيه ده ومش مهم يعدموه بس هيرتاح من الخوف والقلق والرعب اللي عايش فيه كل ليله اصل انتظار البلاء اشد من وقوعه ،، لكن سرعان مابيطرد الافكار دي من دماغه ويستمر على كدبه وانكاره يمكن فعلا ابو جاسر يقدر يخرجهم من الورطه دي محمود قاعد جنبه وباصص في الارض مش ناوي يتعب نفسه ويدور على حد ليه في القاعه لإنه في الاساس ملهوش حد ! سرح بأحلامه لما القضيه دي تنتهي ويخرجوا على طول هيدور على اي طريقه يسافر بيها بره كده كده ملهوش حد هنا يزعل عليه او يحمل همه عايش في غربه اكبر من اللي ممكن يعيشها لما يسافر ! مريم قررت مش هتحضر الجلسه المره دي اعصابها تعبت في أول جلسه ومعندهاش استعداد تحط عينها في عين داليا او حتي تلمحها أم جاسر زي المره اللي فاتت واقفه بتبكي وتواسي ابنها لحد ما بدأت الجلسه ،،، طبعا المره دي محامي داليا جاب شهود كتير اولهم اللي كانوا معاها في الفندق ليلة الحادثه بالاضافه للدكتوره اللي كانت في الطوارئ واستقبلتها واول دكتوره نفسيه قعدت معاها في المستشفي ونهال كمان شهدت وشرحت الحاله النفسيه اللي اتسببت فيها الحادثه لداليا وقدمت تقارير تثبت كلامها زي عزيز البنا اللي كان جايب شهود برده لكن للأسف مأجرهم عشان يشهدوا بالكدب اللي حفظهلهم والقصص القذره اللي اخترعها !!!! وهناك في اخر الصف كان قاعد والدم بيغلي في عروقه وحاسس انه عاوز مسد.س يضر,ب بيه كل واحد من اللي واقفين بيفتروا على حبيبته ! على قرر يحضر الجلسه وفعلا راح بس لما شاف داليا مقدرش يبص في عنيها ولقى نفسه بيستخبى منها لحد ما دخلت وبعدين دخل وراها مش مهم تعرف انه موجود المهم يفضل جنبها حتي لو من بعيد لبعيد احتدت المواجهات بين المحاميين وفي النهاية عزيز البنا طلب تأجيل القضيه شهر كمان وتمت الموافقه على طلبه ! بعد خروجهم من القاعه ام جاسر : عزيز انت ليه اجلت القضيه مش هستحمل ابني يقعد شهر كمان في المكان القذر ده توفيق : صحيح يا عزيز انت ماقولتليش انك هتأجل القضيه ! عزيز : ده قرار مفاجئ وانا نفسي ما كنتش اعرف اني هضطر اجلها وماكنتش متخيل ان علاء شاطر لدرجة انه ينافسني بالقوه اللي كان فيها انهارده دي ! توفيق : يعني ايه ! عزيز : يعني ماكنتش متوقع انه هيسحب القضيه في صفهم كده انهارده لذلك طلبت التأجيل لحد ما الاقي حاجه جديده اقوّي بيها موقفنا مره تانيه بس ماتقلقش مش حتة محامي صغير زي علاء ده اللي هينافسني وهو فيه سمكه صغيره بتنافس حوت !!! بص لام جاسر : ماتقلقيش يا هانم بعد شهر هتنتهي المهزله دي ولصالحنا وابنك هيرجع لحضنك تاني ... ... ناصر : فيه ايه يا داليا ايه العكننه والعصبيه اللي انتي فيها دي ! داليا : مش شايف يعني حاجه تحرق الدم انا بجد تعبت وماصدقت اني هخلص انهارده يقوموا يأجلوا القضيه كمان شهر والله اعلم هيأجلوها تاني لحد امته انا بجد تعبت علاء : ماتقلقيش يا انسه داليا طلب التأجيل ده اكبر دليل على ان عزيز حس بمدي ضعف موقفهم وطلب تأجيل لحد مايشوفله لعبه تانيه ولا كدبه جديده بس ماتقلقيش خلاص وصلنا للنهايه وكلها شهر بإذن الله وهترتاحي من القضيه دي داليا : اتمني فعلا وكفايه تأجيل بقى والله مليت وتعبت بس بجد مش عارفه اشكر حضرتك على مجهودك معانا ازاي ربنا يبارك في حضرتك ويكرمك علاء : ده واجبي يا انسه داليا ومش عاوزك تقلقي من اي حاجه ان شاء الله خير ، أستأذنكم بقى عشان عندي شوية شغل لازم اخلصهم هنا داليا وناصر : اتفضل داليا واقفه مع خالها ومنتظره نهال تخلص كلامها مع شيماء وطارق وفجأه شمت ريحة اربكتها ! ناصر : مالك يا داليا ؟ داليا لنفسها (( معقوله اللي انا شماه ده البرفيوم بتاع على ! معقوله يكون على هنا ! ولا دي ريحة الحنين والاشتياق اليه !! يوووه يا داليا مش ناويه تفوقي من الاوهام دي بقي وعلى هيجي هنا ليه وبعدين هو مفيش حد غيره يعني بيحط البرفيوم ده !! بس الموضوع مش برفيوم بس انا حاسه بوجوده معرفش ليه !! )) ناصر : داليااااااا !!! داليا : هه بتقول حاجه يا خالو ؟ ناصر : لا ده انتي مش معايا خالص ! طيب دكتوره نهال ندهتلك روحي يلا عشان تروحي معاها داليا : وانت ؟! ناصر : عندي مشوار مهم هروحه واحصلك ع البيت داليا : طيب خد بالك من نفسك ناصر : حاضر وانتي كمان ناصر وهو في الجلسه لمح على بس كدب عيونه وافتكر بيتهيأله بس إتأكد ان هو لما لمحه للمره التانيه دلوقتي وهو واقف مع داليا فقالها تمشي وراحله ناصر : طاب مش تسلم على خالك يا ندل ! ابتسم على وحضن خاله ناصر : قعدت ليه في اخر صف وماسلمتش ليه علينا من اول ما جيت ! على : يعني ماظنش ان داليا حابه تشوفني فقلت اطمن عليها من بعيد لبعيد ناصر : طاب تعالى نتمشي شويه واحكيلي عن احوالك واحشني اوي يلا خرجوا من المحكمه واتمشوا شويه ع النيل وناصر بيحكي عن شغله وقضية مراته ناصر : انا بقالي ساعتين بتكلم وانت ساكت ايه يا ابني اتخرست ! على : فعلا اتخرست أو زهقت من الكلام ومابقليش نفس ولا قدره على اني اتكلم يمكن لإني مابقتش لاقي نفسي ! الحمدلله على كل حال ناصر : انت عاوز ترجع لداليا يا علي ؟ على : اصبح حلم من احلامي ناصر : طاب وطليقتك والطفل اللي بطنها ومش الطفل وبس اللي فهمته من عليا انها بتحبك ! وبعدين يا على من غير ما تزعل مني إنت إللي فرطت في داليا من الأول وإتخليت عنها وماكنتش متخيل أبداً إنك هتعمل حاجه زي دي ! على : انا تعبت من الصراعات اللي بعيش فيها كل يوم يا خال عموما أرجوك سيبنا من القصص دي كلها خلاص فات اوان الكلام ناصر : وهتفضل ع الحال ده لحد امته ! على : الله اعلم بس الله يخليك ما تسيبش داليا لوحدها انا دلوقتي ندمان على كل لحظه عشتها بعيد عنها وندمان عشان فرطت فيها فضلوا يحكوا شويه عن الحياه ومشاكلها وكل واحد فضفض للتاني باللي جواه بعدين ناصر راح مع على يسلم على اخته ويتغدى عندها... داليا من وقت ما رجعت وهي بتفكر في علي مش عارفه ايه السبب اللي خلاها تحس اوي بوجوده المره دي ! ارتسمت ابتسامه على وشها وسرعان ما حولتها لملامح ألم ووجع لما افتكرت تخليه عنها وردت على نفسها ( وحتى لو كان موجود هيفيد بإيه اي حاجه ممكن يعملها ما خلاص فات الأوان رجع على شقته أول ما دخل رمى جسمه على كنبة الأنتريه وافتكر الجلسه انهارده وإحساسه أول ما شاف داليا ولقى نفسه بيبتسم كل تفصيله فـ ملامحها كانت وحشاه كان نفسه أول ما شافها يجري عليها يضمها ضمه تقت,ل أشباح الحنين ووجع الفراق إللي بقت ساكنه في قلبه فضل سرحان في ملامحها وذكرياته وياها لحد ما راح فـ النوم ..... ... هنادي لسه محبوسه في اوضتها ابوها منعها حتي من انها تروح المدرسه ! بتذاكر في البيت على امل انه يسمحلها تحضر الامتحانات قامت تشوف التاريخ في النتيجه ولمحت حكمه مكتوبه في اخر الورقه (( الساكت عن الحق شيطان اخرس )) حست كإن الجمله دي جايه دلوقتي رساله ليها ، قطعت الورقه وقعدت ع السرير وهي لسه باصه للجمله ورجعت فلاش باك ليوم ما كانت في الصعيد قاعده هي وعيال عمامها مع جدها جدها : جولي الحج يا هنادي شفتي فرغلي وهو بيضر,ب محمود ولا لا ؟؟ هنادي : أ أني ما شفتش حاجه يا جدي محمود : كدابه يا جدي والله العظيم كانت جاعده لما فرغلي ضر.بني وخد مني كيس الشيبسي الجد : طيب خلاص حصل خير خد الجرش ده هاتلك بيه كيس شيبسي تاني والعبوا سوا بطلوا مناجره وخناج مع بعض مشيوا وقبل ما تمشي هنادي معاهم : استني يا هنادي انا عاوزك هنادي : نعم يا جدي ! جدها : لما يتحط الوكل بعد شويه اوعاكي ألمحك جاعده معانا ! هنادي : ليه يا جدي! جدها : لإن اللي مايشهدش بالحج مايجعدش معايا على طلبيه واحده هنادي : ... جدها : اني عارف ان فرغلى ضر.ب واد عمه وجريت الكدب في عيونه بس اني مش زعلان منه كد ما انا زعلان منيكي عشان شفتي حاجه غلط وما شهدتيش بالحج هنادي : والله يا جدي اني ماكنتش عاوزه فرغلي يزعل مني و اصل جدها : لا اصل ولا فصل يا بتي حطيها حلجه في ودنك طول حياتك الساكت عن الحج كيف الشيطان الاخرس سرت قشعريره في جسمها ولسه جملة جدها بتتردد في ودنها (( الساكت عن الحج كيف الشيطان الاخرس )) مددت ع السرير وهي بتردد : الله يرحمك يا جدي ... طارق في بلكونته بيشرب كوباية قهوه وشارد في الليل وسكونه دخلت أمه ربتت على كتفه فإلتفتلها وهو مبتسم طارق : سهرانه لحد دلوقتي ليه يا أمي ؟ _ هيجيلي نوم ازاي قبل ما اتطمن انك في سريرك قبل ايديها : اتطمني يا امي بقى انا خلاص كبرت يا ست الكل بلاش الخوف ده كله عليا _ مهما كبرت يا حبيبي هتفضل في عيوني لسه العيل الصغير اللي ما اطمنش ولا يجيلي نوم غير لما اشوفه نايم في سريره واغطيه بإيديا كمان وبعدين لو عاوزني اطمن صحيح اتجوز وطمن قلبي عليك طارق : هههههههه والله كنت متأكد إنك هتفتحي الموضوع ده دلوقتي يا حبيبة قلبي انا وعدتك هفكر في الموضوع ده ان شاء الله بعد ما القضيه اللي شغاله حاليا تخلص _ الا صحيح يا حبيبي وصلتوا لإيه مع الزغبي واشكاله ده ! طارق : الله ده انتي متابعه بقى يا امي _ متابعه طبعا وداليا دي صعبانه عليا اووووي واللي صعبان عليا اكتر امها وابوها تلاقيهم قلبهم محروق عليها اوي طارق : الله يكون في عونها وعونهم يلا يا امي بقى ادخلي نامي واتطمني بقى _طيب يا حبيبي بس عشان خاطري ماتطولش في السهر طارق : حاضر طبعت قبله على جبينه ومشيت وسابته لسه سرحان في افكاره ! مش عارف ليه صورة داليا مش عاوزه تروح من باله ! اليومين دول بقت شاغله تفكيره كتير اوي وبيدعي طول الوقت تاخد حقها وتنتهي كل احزانها وتتحسن حالتها النفسيه والصحيه ، طول عمره بيتعاطف مع المظلومين في القواضي اللي بيشوفها بس مع داليا احساسه مختلف مش مجرد تعاطف حاسس انها حد قريب منه وواجب عليه انه يقف جنبها ويجيبلها حقها ويرجعلها ضحكتها من تاني ، افتكر المره الوحيده اللي شافها فيها بتبتسم ولقى الابتسامه اترسمت على شفايفه اتنهد وبص في الساعه لقى الوقت اتأخر جدا فقرر يمدد ع السرير ويتحايل ع النوم يزوره !!.... ... شيماء كتبت مقال جديد ونزلته في الجريده والناس مازالت متابعه ، مديرها طلبها فراحتله هناها على تألقها وطلب منها تكلم داليا عشان يعملوا معاها حوار في برنامج الجريده في التليفزيون شيماء: ايوه يا فندم بس انا مش عارفه اذا كانت داليا هتوافق على الموضوع ده ولا لأ ! _وليه ترفض ! الامر في مصلحتها هي وبعدين رغم ان الناس خلاص عرفت شكلها الحقيقي بس احنا برده مش هنظهر وشها ولو عاوزه نغير في صوتها كمان مستعدين يبقي فين المشكله بقى ! شيماء : بس يا فندم _ولا بس ولا حاجه يا شيماء انتي هتخسري ايه !! قوليلها مش يمكن تلاقيها فرصه بالنسبه لها وتوافق بسرعه ! شيماء : حاضر يا فندم هبقي اكلمها واشوف رأيها ، بعد اذن حضرتك _اتفضلي ومنتظر منك اخبار حلوه شيماء : ان شاء الله ... توفيق : ايه الاخبار يا عزيز ؟ عزيز: الجرايد لسه مستمره في فضح داليا توفيق : وخطتك اللي قولتلي عليها ناوي تنفذها امته ؟ عزيز : لسه عليها شويه هتتنفذ قبل الجلسه على طول ، ماتشغلش بالك انت يا توفيق بيه الجلسه الجايه هتبقى الضر,به القاضيه ده غير اني مجهز للست داليا دي شوية قرصات ودن هتعلمها الادب توفيق : اتمني فعلا بقى ينتهي الكابوس ده وخد بالك من اي غلطه ممكن تكون ضدنا عزيز : اطمن يا توفيق بيه كل خطواتي محسوبه كويس اوي ... شيماء راحت لداليا البيت ، استقبلتها داليا بترحاب، دخلوا اوضتها وعرضت عليها شيماء موضوع البرنامج داليا : شيماء انتي بتقولي ايه ! انا نفسيتي تعبانه بسبب الصور والمعلومات الكامله اللي نزلت في الجرايد دي تقومي تقوليلي اطلع في التليفزيون !!! شيماء : مش هيظهروا وشك يا داليا ولو عاوزه يغيروا صوتك كمان مفيش مشكله داليا : مش عارفه يا شيماء انا كل خوفي على بابا هو اه بيساندني في القضيه بس مش هقدر اعمل حاجه زي دي صحته مش مستحمله وانا خايفه عليه جدا شيماء : طيب بصي بلاش تقوليلي اي قرار دلوقتي فكري على مهلك وخدي رأي أهلك وابقي ردي عليا براحتك داليا : ان شاء الله بس ما اوعدكيش بالموافقه ! بعد ما مشيت شيماء داليا حكت لخالها وخدت رأيه ، هو شايف ان مفيش مشكله بس عنده نفس خوفها على عمران لذلك اقترح عليها تستني يومين وتشوف رأي أبوها بهدوء ... مريم عرفت أخبار القضيه وإللي حصل في الجلسه من الجرايد ، كانت قاعده شارده لما رن جرس الباب في ميعاد عمرو المعتاد ، استنت لما مشي فتحت الباب واتناولت الملازم والورق إللي سايبه ولسه هتدخل لقت ورقه غريبه وسطهم !!! ... بعد اسبوعين وهم بيتغدوا جه تليفون لخالها من مراته بتبلغه ان بنته تعبت ونقلتها المستشفي فإضطر يحجز في أول طياره ويسافر ووعد داليا انه هيجي على ميعاد الجلسه الجايه ان شاء الله راحت هي وأحمد المطار وصلوا خالهم ورجعت ادت لأبوها الدوا قبل ما ينام ، ذاكرت لأحمد شويه وخرجت تقعد مع أمها في الصاله داليا : مالك يا ماما ؟ خديجه : مش عارفه يا داليا حاسه ان قلبي مقبوض اوي داليا : يا ستار يا رب يا امي ماتقلقيش على خالو ناصر اللي فهمته ان لارا جتلها سخنيه شديده واضطرت امها تنقلها ع المستشفي وبلغت خالو ،، ان شاء الله هو هيوصل بالسلامه ويطمنا خديجه : مش عارفه بقى يا داليا بس انا من قبل ما التليفون يجي لخالك اصلا وقلبي مقبوض استرها يا رب داليا : يا رب ماتقلقيش يا امي استعيذي بالله من الشيطان الرجيم كده واستهدي بالله ان شاء الله خيـ وقبل ما تكمل كلمتها سمعوا خبط جامد ع الباب بصت خديجه لداليا برعب وردت داليا وهي بتلبس حجابها : ايوه ايوه جايه جريت ع الباب فتحته وجحظت عنيها ، زي امها اللي اتصدمت وشهقت : #عادل خرج أحمد من اوضته على صوت الخبطه واول ما شاف اخوه وقف مصدوم هو كمان دخل عادل بهيئه مزريه بيحك انفه وينقل بصره بينهم واخيراً كسر السكوت اللي عم المكان من الصدمه : ايه مالكم متسمرين كده شفتوا عفريت ان شاء الله ولا ايه ! قربت منه خديجه والدموع ماليه عنيها مسكت وشه بين كفيها بحنان : حمدلله على سلامتك يا حبيبي كنت فين كل ده غايب عننا بصلها بنظره مكسوره بتصرخ ضميني في حضنك وقبل ما تلبي نداء عينيه بعد عنها وبدأ يهرب من عيونها ، بص لداليا بغضب : أهلا بالسنيوره إللي خلت سيرتنا على كل لسان ! استغربت داليا من لهجته وردت بهدوء : وحشتنا يا عادل بس غريبه إيه إللي فكرك بينا بعد الغياب ده كله ! عادل بتهكم : تقدري تقولي كده جاي اغسل عارك يا ست داليا ! اتصدمت داليا من رده وضر,بات قلبها بدأت تزيد وقبل ما هي او امها يردوا عليه كان احمد واقف قدام داليا ورادد : هه طاب مش كان اولي تفوق وتغسل ريحة الخمره اللي فايحه منك والمخدرات اللي مخلياك واحد تاني ! على الاقل العار اللي بتتكلم عنه ده داليا كانت مغصوبه عليه وهو ولا عار ولا حاجه الدور والباقي على العار اللي اخترت انك تعيش فيه بنفسك ! قرب من احمد والشرر بيتطاير من عنيه مسكه من ياقة قميصه وصرخ في وشه : انت اتهفيت في عقلك يالا حتة عيل بيعملها على نفسه هيكلمني كده تدخلت داليا وحاولت تخلص احمد من ايديه : خلاص يا احمد انت وعادل بالله عليكم رد احمد بنفس الصوت العالي : العيل اللي بتقول عليه ده لو حد فكر يقرب لداليا هيوريه نفسه ويعلمه الادب عادل : هههههههههه وانت بقي اللي هتعلمني الأدب يا ننوس عين امك ! خديجه حاطه ايديها على قلبها وبتتفرج عليهم حاسه ان لسانها تقل ومش قادره تنطق الدموع بتسيل من عنيها من غير صوت وفجأه سمعوا صوت عمران : داليا ، خديجه ! ضر,بات قلب داليا بتزيد اكتر بصت لامها ولقتها واقفه في مكانها همست : ماما ارجوكي روحي شوفي بابا واقفلي عليه الباب يلا يا ماما بصتلهم خديجه واتحركت ناحية جوزها وهي بتمسح دموعها ، اول ما دخلت وقفلت الباب قربت داليا من عادل : ارجوك يا عادل وطي صوتك بابا صحته مش مستحمله بصت لأحمد : وانت يا احمد ادخل يلا حالاً شوف مذاكرتك عادل : لا مذاكرة ايه بقى استني اما نشوف هيعملي ايه وبعدين انتي خايفه على ابوكي وهو انتي عملتي حسابه من الاول ولا فكرتي فيه قبل ما تدوري على حل شعرك اتسعت عنيها بصدمه ولا اراديا رفعت ايديها وصفعته : اخرس جز على سنانه وهو بيتحسس خده مكان صفعتها ، حك انفه رفع ايديه وصفع داليا وقبل ما تفوق من المفاجأه مسكها من شعرها : واحده زيك تتجرأ وتمد ايديها عليا انت اتجنيتي يا بت هجم احمد عليه وخلص شعر داليا من ايديه وبدأت الخناقه تحتد بين احمد وعادل وداليا واقفه مش عارفه تتصرف عمران : ايه الدوشه دي يا خديجه فيه ايه ؟؟؟ خديجه : م م م مفيش مفيش دد عمران : انتي لسه هتمأمأي مين اللي بره خديجه : عادل رجع يا عمران عمران : عادل !! طاب حطيني ع الكرسـ وقبل ما يكمل جملته سمعوا صوت ازاز بيتكسر وبعدها صرخت داليا : أحمممممد خديجه سابت زوجها وجريت على بره لقت عادل ماسك فاظه ازاز مكسوره وواقف مصدوم واحمد ممدود ع الارض في حضن داليا وملامحه مش باينه من الدم اللي مغرق راسه ووشه صرخت بخوف وجريت على احمد وهو بيأن بألم في حضن داليا ، قلبها بينتفض على منظره بصت لعادل والشرر بيتطاير من عنيها قامت وهجمت عليه فضلت تضر,به على وشه : فووووووق انت ميييين انت مستحييييل تكون ابني عادل حسبي الله ونعم الوكيل فيك يا ريتني مت قبل ما بطني تشيلك ربنا ينتقم مننننك وهو واقف مستسلم لضر,بها ومابينطقش ، جريت داليا على جارهم ، جه شال معاها احمد وهو مزهول ومش فاهم حاجه ! حطوه في العربيه وجريوا بيه ع المستشفى ... مريم بعد ما اتناولت الملازم اللي سايبها عمرو لمحت ظرف فتحته واستغربت اول ما شافت الورقه اللي فيه ، حطت الملازم ع التربيزه وفتحت الظرف كويس ، طلعت الورقه واتسعت عنيها وهي بتقراها لقت في الظرف ورقه تانيه فتحتها وكانت جواب من عمرو بيقول فيه : إزيك يا مريم ؟ أتمني تكوني بخير أكيد استغربتي لما شفتي الورقه إللي في الظرف أنا نفسي مش عارف عملت كده ليه بس يمكن حسيت انك عاوزه تقابلي خالد وتتكلمي معاه فطلبت من ضابط صاحبي يعملك إذن الزياره ده بكره ان شاء الله الساعه 1 الظهر هعدي عليكي عشان اوصلك ومش هتكلم معاكي خالص اعتبريني سواق او اعتبري نفسك راكبه تاكسي انا مش حابب ازعجك بس مش هكون متطمن لما تروحي مكان زي ده لوحدك خدي بالك من نفسك عمرو قرت الجواب بعيون دامعه هي فعلا محتاجه تتكلم مع خالد وكان صعب اي زيارات في الفتره دي بس عمرو قدر يحس بيها ويفهم هي عاوزه ايه من غير ماتقول ونفذه علشانها ، حاسه قلبها بيوجعها اوووي كانت فاكره انها هتكون لعمرو ومفيش حاجه في الدنيا هتقدر تفرقهم بس اللي خالد عمله خلاها هي اللي تختار تبعد عن اكتر انسان اتمنت تكمل باقي عمرها جنبه فضلت باصه للجواب وواقفه عند اسمه والدموع سايله من عيونها اللي الحزن طفاهم ...... ... داليا قاعده ع الكرسي اللي جنب اوضة أحمد قرب منها جارهم _حمدلله على سلامة احمد يا داليا والحمدلله انها جت على اد كده داليا : الحمدلله ، مش عارفه اشكرك ازاي يا عم سالم _بتقولي ايه يا بنتي ده احنا اهل ، بس لامؤاخذه يعني في السؤال هو اخوكي عادل رجع امته وليه يعمل ف اخوه كده !!! داليا بأسى وهي مش عارفه هتقوله ايه : رجع انهارده من ساعه بالضبط يا عم سالم ويعني هو واحمد شدوا مع بعض والشيطان دخل بينهم يعني و و واهه الحمدلله انهم خيطوا دماغ احمد بس _الحمدلله وربنا يصلح احوالكم يا رب ، هناخد احمد ونمشي ولا ايه النظام ؟ داليا : الدكتور اللي خيطله دماغه قالي اخده بكره الصبح عشان عاوز يعمله اشاعه على راسه _على خير ان شاء الله يا بنتي خدي تلفوني طمنيهم وروحي وانا هبات معاه داليا : الله يعزك يا عم سالم بس هم هنا مانعيين حد يبات هنروح وانا هجيله بكره الصبح إن شاء الله انا بس مستنياه يفوق عشان اطمن عليه واروح وابقى اجيله الصبح _ان شاء الله طاب خدي طمنيهم في البيت مدت ايديها واتناولت الموبايل وهي مبتسمه بإمتنان ، طلبت رقم امها خديجه : الو داليا : ايوه يا ماما خديجه بصوت باكي فزع داليا : الحقيني يا داليا وقفت داليا من مكانها وسألت بخوف : ماما ايه اللي حصل فيكي ايه خديجه بصوت متهدج : اابوكي جتله الازمه وطلبتله الاسعاف واهه واصلين يجي من نص ساعه كده ، خدوا ابوكي جوه ومش عارفه عنه حاجه داليا بصدمه : مش ممكن لييه ليه يا امي ايه اللي حصل بس خديجه : عادل فضل يستفزه بكلامه ووراله الجرايد اللي كاتبه عنك كلام كدب وخبتيها من ابوكي فضل يردد مهما كتبوا انا واثق في بنتي اطلع بره بيتي وبعدها سكت وبسرعه كلمت الاسعاف زي ماقولتيلي اطلبهم ازاي وخدوه وانا هنا لوحدي داليا : ماتقلقيش يا ماما انا جيالك حالاً خديجه : طاب واخوكي احمد طمني قلبي عليه ؟ داليا : خيطوا دماغه والدكتور طلب ناخده الصبح بعد مايعمله اشاعه لان الخبطه شديده والحمدلله انه نجا منها خديجه : الحمدلله يااا رب فوضت امري ليك يا كريم انا مش قولتلك حاسه ان قلبي مقبوض حسبي الله ونعم الوكيل داليا : بالله عليكي يا ماما كفايه اهدي وانا ثواني وهكون عندك _خير يا بنتي فيه حاجه ؟ داليا : بابا يا عم سالم الازمه جتله وماما جابته على هنا _لا حول ولا قوة إلا بالله العلى العظيم ، طاب يلا ننزل نطمن عليه وابقى ارجعي بصي على اخوكي تاني نزلت مع جارها وهي بتحاول تكون متماسكه عشان امها ،،،،، لقت امها منهاره جنب العنايه المركزه جريت عليها وضمتها خديجه وهي منهاره في حضن داليا : ابوكي هيروح مني يا دالياااااا واحمد ضنايا الاتنين في يوم واحد يا ربي آآآآآه داليا وهي بتبكي : عشان خاطري اهدي يا ماما وادعيلهم فوضي امرك لله خديجه بحرقه : فوضت امري اليك يا رب سالم : استهدي بالله يا ست ام داليا ربك كريم خديجه : يااااا رب فضلت داليا ضامه امها وبتقرالها قرآن لحد ما الدكتور خرج من عند ابوها، جريت عليه هي وجارهم سالم : خير طمنا يا دكتور ؟ _اظن انا نبهت عليكم قبل كده ممنوع تحطوه تحت اي ضغط داليا : والله حاولنا يا دكتور بس غصب عننا حصلت شوية مشاكل انهارده طاب هو بابا مش كويس ؟ _والله مش عارف اقولك ايه ادعوله الحاله المره دي يعني محتاجه نجاه بمعجزه من عند ربنا هو في غيبوبه والله اعلم هيفوق منها ولا لا ! ربت على كتف سالم : شدوا حيلكم وادعوله سالم : لا حول ولا قوة الا بالله العلي العظيم كلام الدكتور كإنه سهام متصوبه في قلب داليا شكروا الدكتور وراحت لأمها اللي مش قادره تقوم من مكانها وهي مش عارفه هتقولها ايه !! مسحت دموعها وتصنعت البسمه : ماتقلقيش ياماما الدكتور لسه مطمنا حالا وقال ان بابا بقى كويس الحمدلله بصلها جارهم بشفقه : وحدي الله بقى ما هي داليا اهه طمنتك خديجه : لا إله إلا الله داليا : يلا يا ماما نروح بقى وجودنا ملهوش لازمه خديجه : لا انا مش هتحرك من هنا إلا و معايا راجلي انا هبات معاه اقعدي انتي مع اخوكي احمد وطمنيني عليه داليا : ممنوع وجود مرافق مع احمد يا ماما هو زمانه فاق تعالي نبص عليه ونروح خديجه : لا هنطلع نبص عليه وروحي انتي انا هبات هنا مش هسيب جوزي وابني داليا : خلاص اللي يريحك يا ماما طلعوا اطمنوا على احمد وكان بالكاد فايق وبيتكلم بصعوبه ، امه ما استحملتش تشوفه كده جريت على بره وانخرطت في البكا ، حصلتها داليا وحاسه ان قلبها محروق اوووي على ابوها واخوها وامها قعدت شويه مع امها لحد ما مشوهم من المستشفي عشان مواعيد الزياره انتهت وقبل ما داليا تمشي ندهتلها خديجه : اوعي يا داليا تروحي ع البيت روحي عند اي حد بس اوعي تروحي لوحدك والزفت ده موجود في البيت انا مش ناقصه مصيبه جديده ربتت على كتف امها : ماتقلقيش عليا يا ست الكل انا هبقى كويسه ان شاء الله المهم انتي تاخدي بالك من نفسك وابقى طمنيني مشيت مع جارها وهي بتفكر في كلام امها وتحذيرها ! للحظه فكرت تسمع كلامها لإن عادل مش في وعيه بس مالقتش حد قريب تروح عنده وحتى لو فكرت تروح محتاجه تاخد حاجات من البيت يعني لازم برده تروح !! توكلت على الله وراحت ع البيت ، شكرت جارهم وقالها لو عاوزه اي حاجه تقوله دخل بيته وهي وقفت عند باب بيتهم ومتردده تخبط ولا لأ سمت الله ورنت الجرس ، فتحلها عادل وهو بيشرب سجاره شكلها غريب وريحتها بشعه خلت داليا تكح و من غير ما تحتك بيه أو حتى تلتفتله دخلت على اوضتها وقفلت الباب عليها بالمفتاح ، دقيقتين وسمعت خبطه ع باب اوضتها ، سرت رعشه في جسمها وحست بخوف لإن اللي قصادها ده مش عادل واحد تاني مغيب عقله ! خبط مره تانيه : افتحي يا داليا عاوز اتكلم معاكي شويه رغم الخوف اللي جواها ورغم انه شارب وده واضح في طريقة كلامه بس خدت نفس عميق ، سمّت الله وتصنعت انها قويه وفتحت جزء من الباب : خير ؟ عاوز تتكلم معايا في ايه ! عادل : قدامك 3 اختيارات يا تفضيها سيره وكفايه فضايح وتتنازلي بكره عن الزفته القضيه دي يا هق,تلك داليا : والاختيار التالت ! عادل : تطلعي مـ البيت ده وتغوري في اي داهيه ولو لمحت طرفك هنا ولا في اي حته قدامي هقت,لك داليا : هه يعني كل الطرق بتودي للقت,ل برده ! عادل : لا عندك الاختيار الاول اتنازلي ويا دار مادخلك شر ها قلتي ايه ؟ داليا بتحدي : قلت مش هختار حاجه من التلاته دول يا عادل ولسه هتقفل باب الاوضه حط ايديه ودفع الباب ، رجعت داليا لورا بخوف لما شافت المطواه اللي في ايد عادل بدأ جسمها يرتجف وعنيها مش شايفه غير محمود وهو حاطط المطواه على رقبتها قرب منها عادل وشمت نفس الريحه اللي كانت طالعه من المجرمين ليلة الحادثه بدأت تتنفس بسرعه وتجز على اسنانها صرخت في وش عادل : لأاااااااا مش هسمحلكم تق,تلوني تانييييي فضلت تهزي بكلام مش مفهوم وتدفع عادل بكل قوتها لحد ما خرجته من الاوضه ووقعت منه المطواه ع الأرض ،ارتبك لانه ماكنش متوقع هجومها وهي مش في وعيها قبضت على رقبته ، بدأ يستعيد قوته فلت ايديها من رقبته ومسكها من شعرها خبطها في الحيطه بقوه فوقعت ع الارض ، حاولت تقوم بس داخت ووقعت تاني قرب منها ،مسك ياقة هدومها وصرخ في وشها : اقسم بالله عندي استعداد اق,تلك دلوقتي حالا وادفنك ومحدش هيعرفلك طريق بس هديكي فرصه تانيه يا تتنازلي يا تختفي وتعتبري نفسك ملكيش اهل ولحد ما تفكري وتردي تاخدي بعضك وتغوري من هنا سامعه سابها واقعه ع الارض ودخل جوه وهي بتبكي بخوف تحسست راسها ولقت دم بدأت ترتجف ، من يوم اللي حصلها وهي بتخاف من الدم ، كورت نفسها ع الارض وفضلت تبكي بحرقه زي طفل تاه عن امه رد من جوه بصوت عالي : اوعي تكوني فاكره دموعك دي هتأثر فيااا خلصي يلاااا مش عاوز اشوف وشك هنا سندت ع الحيطه وهي حاسه بالألم وجع قلبها اكتر بكتير من وجع راسها اللي بتنزف من قوة الخبطه ، قامت بوهن والدنيا بتلف بيها فتحت الحنفيه ونزلت راسها تحت المايه الساقعه وهي بتأن من الألم فتحت صندوق الاسعافات وحطت شوية مطهر على قطنه وحطتها بلصق طبي مكان الجرح اللي في راسها خرجت على اوضتها بوهن وهي بتتمني لو فيه اسعافات اوليه بتداوي جروح القلب اكتر اتنين كانت فاكره هيساندوها ويجيبوا حقها هم نفس الاتنين اللي اتخلوا عنها وخذلوها ضحكت بسخريه بينها وبين نفسها : على الاقل عادل المخدرات مغيبه عقله ومخلياه واحد تاني لكن على كانت حجته ايه ! مسحت دموعها وقررت تمشي من البيت أمها مش مستحمله مصايب تانيه اتناولت شنطه صغيره من دولابها حطت فيها شوية هدوم بسيطه عدلت حجابها واتناولت شنطة ايديها وقبل ما تخرج من البيت طلعلها من الاوضه : قدامك فرصه لحد بعد بكره مستني يا تتنازلي يا تموتي ضحكت بسخريه : ما انا خلاص مت من زمان : قفلت الباب ونزلت وهي مش عارفه هتروح على فين ! لو فكرت تروح اي فندق مش معاها غير فلوس مواصلاتها! مفيش حد من اهل امها هنا غير خالتها ام على ودي مستحيل داليا تروحلها ولو هتبات في الشارع اهون ! ومش عاوزه تروح عند حد من قرايب ابوها عشان ابوها كان متخانق معاهم بسبب عادل ! فكرت في اصحابها ومالقتش واحده منهم تقدر تروحلها في وقت زي ده ! وكمان بعد اللي الجرايد كتبته عنها بدأت تحس ان ازواج صحباتها بيجبروهم يبعدوا عنها وكإنها جرثومه او مرض معدي ! الاحساس ده لوحده بيق,تلها مالقتش غير نهال بس افتكرت ان نهال سافرت اسكندريه من يومين هي وامها بس معندهاش حل غيرها فقررت تجرب يمكن تكون رجعت نهال: دولّيييي وحشتيني داليا : انتي اكتر نهال : مال صوتك ؟ داليا : هو انتي رجعتي من اسكندريه ولا لسه ؟ نهال: لسه مارجعتش ليه فيه حاجه حصلت ؟! داليا : ... نهال : داليا ردي عليا فيه ايه ؟ داليا : ... نهال : داليااااااا فيه ايه يا بنتي ماتقلقنيش ! داليا بصوت متهدج : ع عادل ط طردني من البيت ومـ مش مش عارفه اروح فين نهال : عااادل اخوكي هو رجع داليا : ايوه (حكتلها داليا ع اللي حصل من وقت ما خبط عادل ع الباب لحد ما طردها ) نهال : ايه المهزلة دي مش من حقه اصلا يطردك وازاي يعمل كل ده داليا : انا عذراه يا نهال انا كنت حاسه انه واحد تاني غير عادل اخويا :'( المخدرات قلبت كيانه وخلته كائن بشع نهال : لا حول ولا قوة الا بالله انتي فين دلوقتي يا داليا ؟ داليا : في الشارع مش عارفه اروح فين نهال : فين بالضبط ! (قالتلها داليا على مكانها ) نهال: اوك خليكي عندك ماتتحركيش داليا : هتعملي ايه ؟ نهال : ثواني بس وهتعرفي خدي بالك من نفسك وماتتحركيش من عندك قفلت معاها نهال وداليا فضلت قاعده بتتلفت حوليها تحسست الخبطه اللي في راسها وكل ماتمسح دموعها تسيل اكتر بصت للسما وهتفت بحرقه : وافوض امري الي الله ان الله بصير بالعباد طارق كان لسه بيغير هدومه لما سمع صوت موبايله ، اتناوله ورد : الناس اللي عند البحر وسيبانا في المعاميع هنا دي انا بحقد نهال: اعوذ بالله محسسني اني رايحه اصيف بحر ايه في البرد ده يا استاذ انا رايحه زيارة مريض عموما مش وقته الحقد ده فيه مشكله حصلت طارق : خير ايه اللي حصل ؟؟ نهال : داليا اخوها طردها من البيت وهي دلوقتي في الشارع ومش عارفه تروح فين ! طارق : نعمم ويطردها ليه ان شاء الله >.< وبعدين اخوها احمد يعمل كده ليه اللي اعرفه انه بيحبها ويحترمها جدا و قاطعته نهال : لا ده اخوها عادل طارق : هي داليا ليها اخ اسمه عادل ! نهال: مش وقته يا طارق انت هتخرجنا من الموضوع الاساسي لحكايه تانيه خالص بليييز اعمل اي حاجه دلوقتي داليا لوحدها في الشارع وانا هبقى أحكيلك بعدين قصة عادل ده طارق : خلاص ماتقلقيش انا هتصرف هي فين دلوقتي ؟! قالتله نهال على مكانها غير هدومه بسرعه وخرج ، امه كانت بتحط الاكل ع السفره استغربت : انت مش لسه راجع ! رايح على فين تاني !!! طارق : معلش يا امي مش هقدر احكي دلوقتي بس كنت عاوز استأذن من حضرتك نستضيف داليا عندنا امه : داليا مين !!!! طارق : داليا عمران يا امي نسيتي القضيـ وقبل ما يكمل : ايوه ايوه بس هنستضيفها عندنا ليه فيه ايه !! طارق : هفهمك بعدين يا امي بس الحكايه بإختصار يعني اخوها طردها من البيت وهي في الشارع دلوقتي ومش لاقيه مكان تقعد فيه يرضيكي يعني بنت تقعد لوحدها دلوقتي في الشارع امه بنفاد صبر : طيب روح يا حبيبي ومستنيه لما تيجي تفهمني فيه ايه ! طبع قبل على جبينها ونزل بسرعه ركب عربيته وراح لداليا ،،، داليا من وقت ماقفلت مع نهال وهي قاعده في الارض سانده راسها بين كفيها وبتبكي بحرقه وقف طارق بالعربيه اول ما لمحها وجري عليها ، وقف ومش لاقي كلام يقوله ، قلبه بيوجعه اوي لما يشوفها بتبكي وهي من كتر البكا مش حاسه بيه وهو واقف جنبها ! طارق : ممكن تبطلي عياط ؟ سكتت عن البكا ووقفت وهي بتمسح دموعها : ا انا اسفه انا ماقولتش لنهال تكلمك والله انا ازعجتك بما فيه الكفـ قاطعها : اييه حيلك حيلك ايه الكلام ده ! اساساً انا زعلت لإنك لما لقيتي نهال في اسكندريه مافكرتيش تتصلي بيا رغم انك قبل كده وعدتيني لو حصلت اي حاجه هتكلميني داليا : ماحبتش ازعجك وعموما اصلاً خلاص انا انا كلمت واحده صحبتي وهروحلها دلوقتي طارق : غريبه مع ان نهال قالت انك مالقتيش حد عموماً ماشي اتفضلي اوصلك لحد بيتها داليا : لأ ما هو اصل هي قالت استناها وهتيجي تاخدني اتفضل انت روح وانا هستناها هنا لحد ما تيجي فهم طارق انها مش عاوزه تتقل عليه فرد بخبث : طيب مفيش مشاكل نستناها سوا داليا : لا ماهو طارق : ما هو ايه بس ! عندك حجه تانيه تقوليها ؟! بصت داليا في الارض بخجل طارق : يلا يا داليا اركبي العربيه داليا : لأ كفايه انا تعبتك معايا وازعجتك بما يكفي طارق : ممكن ماتقوليش الكلام ده تاني ! واتفضلي يلا عشان ست الكل منتظراكي في البيت داليا : ايه لا انا مش هقدر اروح معاك البيت بجد خلاص والله انا هروح اي فندق ابات الليله والصبح ان شاء الله هروح عند صحبتي طارق : ماتقلقيش لو وجودي في البيت هو اللي مسببلك الإحراج تقدري تطمني هتكوني لوحدك مع امي انا اصلا اليومين دول مش ببات في البيت قاعد في شقة واحد صاحبي مغترب يعني فيه شغل بينا وقضيه واخده كل وقتنا فياريت بقى يلا تتفضلي تركبي العربيه عشان الوقت بقى متأخر مش عارفه تتصرف ازاي ولقت نفسها مضطره تروح معاه مفيش حل قدامها غير كده ، طارق شال الشنطه منها وهي قعدت قدام بإستحياء قلع الجاكيت بتاعه وناولهولها : البسي ده عشان البرد داليا : لا انـ طارق : هو انتي على طول كده لازم تجادلي ! ارحمينني >.< ابتسمت بخجل واتناولت منه الجاكيت ولبسته لانها فعلا كانت حاسه بالبرد قعد طارق وبدأ يسوق للبيت وداليا ساكته تماماً وباصه في الارض طارق : ايه الجرح اللي في راسك ده ! داليا : ا انا اتخبطت رغم انه شاكك ان السبب اخوها بس ماحبش يضغط عليها ويسأل تاني فضلوا ساكتين طول الطريق ، وصلوا وطلعت معاه وكانت فعلاً امه في انتظارهم استقبلت داليا بود وكانت مجهزالها اوضة الضيوف ، دخلتها وراحت لأوضة طارق تفهم منه ايه اللي بيحصل ! ولقته بيكلم نهال فهمته كل حاجه وهو طمنها ان داليا عندهم ، شكرته وقفل معاها واستلمته امه بالاسئله ، فهمها بإختصار واتضايقت جداً عشان داليا واللي حصلها ولأهلها ، لمحت شنطة السفر بتاعته _ايه الشنطه دي مطلعها ليه ! طارق : رايح عند ممدوح صاحبي فاكراه ؟ جه اتغدى معايا هنا في مره _اه فكراه بس رايح عنده ليه ! طارق وهو بيرص هدومه : يعني فيه قضيه شغالين فيها سوا وعندنا شوية شغل واخد اغلب وقتنا _اضحك على حد غيري يا ولا انت هتسيب البيت عشان داليا ؟ طارق : هههههههه هو انا من صغري مابعرفش اكدب عليكي كده ابدااا ! يعني يا امي شايف ان يُستحسن ماكنش موجود في البيت عشان ما احطهاش في اي موقف حرج وعلى فكره بقى انا ماكدبتش برده فيه شغل وقضيه شغالين فيها يعني سايب البيت لسببين _طيب على الاقل بات هنا يا حبيبي وامشي الصبح مابحبش خروجات بالليل دي طارق : ماتقلقيش لو طلع عليا حرامي هطلبله البوليس خبطته خبطه خفيفه على كتفه : بطل غلبه يا ولا اسمع الكلام وبات الليله هنا بقى طارق : ماتقلقيش عليا يا أمي بس خدي بالك من داليا وشوفي لو هتاكل اي حاجه عشان شكلها ماكلتش وبلاش تضغطي عليها بأي أسئله سيبيها تنام عشان شكلها تعبانه أوي _ماتقلقش المهم تاخد بالك من نفسك وابقى سلملي على صاحبك طارق : حاضر قبل راسها وخد شنطته ومشي ،،،،، داليا من وقت ما دخلت الاوضه وهي بتبكي صعبت عليها نفسها أوي ، وأهه قاعده في بيت ناس غريبه ، الموقف ده بينلها أد إيه هي وحيده ،سمعت خبط خفيف على باب الاوضه فمسحت دموعها وقامت فتحت لقت ام طارق واقفه مبتسمه يلا يا حبيبتي تعالي اتعشي معايا واقعدي براحتك خلاص طارق مشي ومش هيبات هنا داليا بخجل : أ أنا اسفه اوي ع اللخبطه اللي عملتها دي ام طارق : بتتأسفي على ايه يا حبيبتي بس اعتبريه بيتك وبلاش كسوف انتي زي بنتي ويلا بقى تعالي عشان نتعشى سوا داليا : متشكره اوي لحضرتك بس انا مليش نفس ام طارق : لا انا كده هزعل منك قلت بلاش كسوف وبعدين انا والله مابعرف اكل لوحدي تعالي اقعدي معايا حتى لو مش هتاكلي ابتسمت داليا : حاضر قعدت ع السفره شارده وام طارق صعبانه عليها داليا اوي ، خرجتها من شرودها بطبطبه خفيفه على ايديها أم طارق : ربك كريم اوي يا داليا افتكري دايما (( ضاقت فلما استحكمت حلقتها فرجت وكنت أظنها لن تفرج )) داليا : ونعم بالله بعد اذن حضرتك هدخل انام شويه عشان مانمتش من الصبح أم طارق : اتفضلي يا حبيبتي بس استني الاول اغيرلك ع الجرح اللي في راسك عشان شكله نزف داليا : ملوش لزوم مش عاوزه اتعب حضرتك قامت ام طارق من غير ما ترد جابت صندوق الاسعافات وغيرت لداليا ع الخبطه ورغم انها متأكده ان السبب خناقتها مع اخوها بس قررت تنفذ اللي قالها عليه طارق وماتضغطش عليها بأي سؤال شكرتها داليا ودخلت الاوضه على طول كلمت امها اتطمنت عليها بس ماقدرتش توجع قلبها باللي عمله عادل طمنتها وهي حابسه دموعها وكاتمه شهقاتها عشان ماتزودهاش عليها ، قفلت معاها وحست انها عاوزه تصرخ بآآآآآآه وتطرد بصرختها كل وجع ساكن قلبها ، على صوت نحيبها ، مسكت المخده وبدأت تكتم انفاسها عشان ام طارق ماتسمعهاش كورت نفسها ومن شدة التعب واللي عانته في اليوم ده ماحستش بنفسها وراحت في النوم ودموعها سايله على خدها طارق اول ما وصل عند صاحبه دخل ينام ، فضل يتقلب في السرير ، مش جايله نوم كالعاده صورة داليا مش عاوزه تفارق خياله وخصوصا منظرها وهي بتبكي انهارده ، مش عارف ليه حس في اللحظه دي انه عاوز يضمها بقوه لحد ما تطمن وتحس انها في امان قام من السرير وقف في الشباك شويه يتأمل السما في سكون الليل ، نفسه اوي القضيه تنتهي لصالح داليا اصبحت مش مجرد قضيه عاوز يكسبها بس لكن كمان عاوز داليا تحس بالإنتصار وان حقها رجعلها بعد كل لحظة الم وخوف شافتها ، كل ما يتخيل منظرها وهي بتُغتصب وتضر,ب يحس الدم بيغلي في عروقه وخرج من شروده على صوت موبايله وكانت امه بطمنه على داليا وتطمن عليه ، قفل معاها ومدد ع السرير يمكن يجيله نوم ..... داليا راحت في نوم عميق وصحاها اتصال مزعج ، فتحت عنيها بفزع وبصت في الموبايل بعين لسه فيها النوم لقت رقم غريب ، استغربت مين اللي هيتصل عليها في وقت زي ده ، حطت الموبايل ولسه هتكمل نوم اتصل تاني ، واضح انه مُصر ! قررت ترد يمكن تكون امها عاوزه اي حاجه داليا بصوت لسه فيه النوم : السلام عليكم _شكلي صحيتك من النوم مع اني شكيت ان ممكن يجيلك نوم بعد اللي شوفتيه انهارده ! داليا : مين معايا ؟! _ ههههههههه معقوله لحقتي تنسي صوت عمو داليا بعصبيه : لو ماقولتش انت مين هقفل السكه _ليكي حق صراحه تبقى متعصبه بعد ما خدتي علقه محترمه واطردتي من بيتك وابوكي واخوكي في المستشفى إلا انتي صحيح لقيتي حته تباتي فيها ولا ناويه تباتي في الشارع ! كان قدامك يا بنت الحلال فرصه تريحي دماغك من وجع القلب ده وقولتلك بلاش محاكم واهه جبتيه لنفسك ودي آخرة اللي يلعب بالنار اعتدلت داليا في جلستها وفاقت من نومها لما عرفت ان اللي بيكلمها عزيز ردت بتحدي : ده انا متراقبه بقى ! عموما انا لعبت بالنار عشان انا ادها ومش هرتاح غير والنار دي حرقاكم كلكم عزيز : بس ايه رأيك في المفاجأه الحلوه اللي قدمتهالك انهارده دي ! لقيتكم كنتوا تعبانين وبتدوروا على اخوكي جبته لحد عندكم ولسه المفاجآت جايه كتير ! فهمت دلوقتي سر رجوع اخوها عادل وطلبه بإنها تتنازل عن القضيه عزيز : من رأيي تسمعي كلام اخوكي وتتنازلي احسنلك داليا بتحدي : هه العب غيرها يا عزيز انا مش هتنازل لو مهما عملتوا واعلى ما في خيلك اركبه عزيز : عموما بقولهالك للمره التانيه انا عرضي لسه قائم ولحد اللحظه دي ماخسرتيهوش بس المره دي لو رفضتيه يبقى انتي اللي جنيتي على نفسك ، بس تصدقي ماكنتش اعرف ان المخدرات لحست مخ اخوكي اوي كده هههههههههه عشان الكيف باعك وبالكيف برده هيتلفقله كام قضيه محترمه تخليه يقضي عمره كله زي الكلاب في السجن وبرده هتخسري القضيه استشاطت داليا غضبا وصرخت فيه : انت اللي كلب وستين كلب كمان ومش هتقدر تلوي دراعي بعادل ولا غيره لإني مش هتنازل لو فيها موتي يا أحقر وأقذر خلق الله ربنا ينتقم منك انت واشكالك اتفو على كل حقير من صنفك قالت كلامها وقفلت السكه في وشه ، حدفت الموبايل وهي في قمة غضبها فضلت تفرك في ايديها بعصبيه ، انهارت ع الارض ، ام طارق جت على صوتها واول ما فتحت الباب لقت داليا منهاره ع الارض وبتتنفس بصعوبه جريت عليها وبتحاول تفوقها : داليا حبيبتي مالك حصل اييييييه !!! وداليا في عالم تاني ، بتصرخ بلا وعي وتقول كلام مش مفهوم ، بسرعه ام طارق اتناولت موبايلها واول ما جالها الرد هتفت بخوف : الحقني يا طارق طارق بفزع : فيه إيه يا أمي إيه اللي حصل !!! _معرفش داليا مالها مش عارفه اتصرف تعالى شوف فيه ايه ! طارق : ثواني وهكون عندك قام من السرير ومن غير ما يغير هدومه اتناول مفتاح العربيه ونزل جري ركبها وساق بسرعه لـ بيتهم أول ما وصل استقبلته أمه وهي بتبكي بخوف ، جري معاها وشاف منظر داليا طارق : إيه إللي حصل يا أمي ؟؟؟ _معرفش أنا كنت في أوضتي بـ اقرا وردي قبل ما أنام وسمعت داليا بتزعق لحد في الموبايل وبعدها سمعتها بتصرخ ولما دخلت الاوضه لقيتها بالحاله دي منهاره ومش قادره تاخد نفسها طارق : طاب معلش يا أمي إفتحي كل الشبابيك اللي في الاوضه ،نيمي داليا على ضهرها وغطيها هثبتهالك وإنتي إرفعي رجلها عشان الدم يوصل للمخ على طول نفذت كلامه ، و طارق طلب نهال وجاله الرد من تاني اتصال نهال بصوت فيه النوم : خير يا طارق فيه ايه ! طارق : نهال قوليلي على إسم أي مهدئ أديه لداليا لإن جتلها نفس الحاله إللي كانت يوم ما عرضنا المتهمين قدامها نهال بفزع : هو حصل حاجه لداليا ! طارق : معرفش ايه اللي حصل ماكنتش في البيت وماما اتصلت بيا نهال : طيب تمام تمام اكتب الاسم عندك بعد ما كتب اسمه نهال : لازم تاخده ببطئ وخليكم فاتحيين الشبابيك وكمان خلي خالتو تدفيها وتفضل رافعه رجلها عشان الدم يوصل للمخ ومعلش قولها تمسكها كويس عشان الحركه الكتير غلط عليها طارق : تمام تمام حاضر انا فاكر كل إللي عملتيه وهنفذه بس اروح اجيب المهدئ الأول قفل مع نهال وجري ع الصيدليه اللي فـ شارعهم جاب المهدئ وطلع لقى امه نفذت التعليمات اللي قالها عليها ، مسك داليا وأمه ادتلها الحقنه ، دقايق وبدأ المفعول يسري في جسمها ، حركتها بدأت تهدي وعينها بتقفل لحد ما غابت عن الوعي تماماً ، شالها طارق حطها في السرير وغطاها وخرج هو وأمه من الأوضه _لا حول ولا قوة إلا بالله العلي العظيم ، أنا أعصابي سابت أول مره اتحط في الموقف ده طارق : معلش يا أمي وربنا يجازيك خير على إللي عملتيه مع داليا ، معلش لو تكرمتي يا أمي ناوليني موبايلها من الأوضه دخلت جابتله الموبايل ركب بطاريته وفتحه ، بص لآخر رقم كلم داليا ، كتبه على موبايله وجرب يتصل لقاه مقفول ، حط موبايل داليا لحد ما تفوق إن شاء الله وتفهمه إيه اللي حصل ، كان هيمشي بس أمه خافت داليا تحصلها حاجه تاني وماتقدرش تتصرف فطلبت منه يقعد معاهم ، دخلت امه نامت وهو دخل اوضته والنوم مجافيه ( ومع شروق الشمس بدأت داليا تفتح عيونها وهي حاسه جفونها تقيييله أوي تحسست الخبطه إللي ف راسها وبدأت تفتكر كل إللي حصلها إمبارح خبطت أم طارق ودخلت مبتسمه : صباح الخير يا داليا إعتدلت داليا بوهن : صباح النور _خليكي مرتاحه يا حبيبتي ، أحسن دلوقتي ؟ داليا : الحمد لله ،،بجد مش عارفه اقول إيه انا جيت امبارح ولخبطتلكم الدنيا اسفه اوووي ع اللي عملته امبارح والله ماكنتش في وعيي ربتت على كتفها : ماتقوليش كده يا حبيبتي ، المهم إنك بخير ، تحبي تفطري معايا أنا وطارق دلوقتي ولا هتنامي وأما تصحي تفطري براحتك ؟ داليا : لا لا هقوم أنا كنت عاوزه طارق دلوقتي ضروري وكمان هروح لأهلي في المستشفى _طيب يا حبيبتي أنا هسبقك ، ومنتظرينك أنا وطارق ع السفره إبتسمتلها داليا بإمتنان طارق : ها يا أمي لقيتيها صاحيه ؟ _أيوه وجايه تفطر معانا كمان بتقول عوزاك ضروري قالت جملتها ولقوا داليا جايه عليهم :صباح الخير طارق وأمه : صباح النور قعدت بإستحياء وبدأوا ياكلوا بصمت ، لكن أم طارق لاحظت ان داليا شارده ومابتاكلش ربتت على ايديها فإلتفتت _مابتاكليش ليه يا حبيبتي داليا : هه أنا باكل أهه تسلم إيد حضرتك فطروا وقام طارق على أوضته ، ماحبش يفتح أي حاجه بخصوص إللي حصل امبارح لحد ما داليا تهدى وهي إللي تتكلم ، غير هدومه و سلم على أمه وقبل ما يطلع خرجت داليا من الأوضه وندهتله داليا : معلش لحظه واحده هجيب شنطتي واجي انتظرها لحد ما جابت شنطتها ونزلت معاه ، ركبت العربيه طارق : هتروحي لأهلك ؟ داليا : أيوه بس كنت عاوزه اطلب منك طلب قبل ما أروح لأهلى ممكن اجي معاك الشغل وأعطلك بس ساعه واحده؟؟ طارق مبتسم : ممكن اليوم كله كمان مش ساعه واحده وصلوا ودخلوا مكتبه ، طارق : اتفضلي اقعدي يا داليا طارق وهو بيقعد : تشربي ايه ؟ داليا : ولا حاجه ممكن ادخل في الموضوع عشان مش مستحمل أي تأخير ؟ طارق : أكيد اتفضلي داليا : انا عوزاك تقبض على عادل أخويا رفع طارق أحد حاجبيه داليا : بس يعني مش تقبض عليه بشكل رسمي مجرد تمثيليه كده طارق : مش فاهم حاجه وضحي أكتر ؟!! داليا : الأول السبب إللي يعني خلاني أفقد أعصابي و و ابقى في الحاله اللي كنت عليها امبارح هو ان عزيز البنا كلمني اندهش طارق : وقالك ايه ؟! داليا : طلع هو السبب في رجوع عادل وفي انه يطلب مني اتنازل عن القضيه طارق : هو طلب منك تتنازلي !!! داليا : أيوه خلى عادل يضغط عليا عشان اتنازل وقالي لو ما اتنازلتش هيلفق لعادل أي قضيه وطبعا بما أن عادل يعني للأسف بيتعاطى مخدرات فهيكون سهل عزيز البنا يلوي دراعي بيه (حكتله كلام عزيز ليها بالتفصيل طارق : تمام كملي داليا : فأنا كنت عوزاك تعمل تمثيليه وتقبض على عادل وتجبره يتعالج في مصحه وبكده عزيز مش هيقدر يلوي دراعي بيه وكمان تعمل إللي مش قادره أعمله في إن عادل يتعالج ويرجع إنسان طبيعي سكتت شويه ونزلت دموعها ،كملت بصوت متهدج : أأ أنا أناا عارفه إني بتقل عليك أوي بس إعتبره إعتبره آخر طلب هطلبه منك أرجوك تساعدني طلع من جيبه منديل وناولهولها : خلاص يا داليا أرجوكي ماتعيطيش وماتقلقيش أنا هنفذ كل إللي إنتي عوزاه إبتسمت بعيون باكيه : مش عارفه أشكرك إزاي بجد ربنا يجازيك كل خير ابتسم طارق : ماتقلقيش أنا هفضل جنبك للآخر داليا وهي بتمسح دموعها : طيب أنا مش عاوزه اعطلك اكتر من كده هروح أطمن على بابا وأحمد في المستشفى طارق : طيب إستني هوصلك داليا : لا لا معلش أنا عاوزه اتمشي لوحدي شويه وكمان مش حاكيه لماما أي حاجه لو شافتك هناك ممكن تشك يعني ان عادل عمل حاجه وهي مش مستحمله طارق : خلاص زي ما تحبي خدي بالك من نفسك وياريت لما ترجعي من عند أهلك ترجعي عندنا في البيت بلاش ترجعي بيتكم تماماً لحد ما أنفذ اللي طلبتيه وابلغك داليا : حاضر ، مع السلامه طارق : مع السلامه بعد ما مشيت طارق كلم واحد صاحبه يجيله المكتب عشان يرتب إللي ناوي يعمله مع عادل وكمان كلم علاء المحامي وحكاله ع إللي دار بين داليا وعزيز راحت داليا ع المستشفي وهي راسمه إبتسامه مصطنعه بس أمها أول ما شافتها قدرت تحس بيها وزاد خوفها وقلقها لما شافت الجرح إللي في راسها داليا : يا أمي ماتقلقيش بقى أنا بخير خديجه : والجرح إللي في راسك ده جه منين ؟ داليا : الكهربا امبارح قطعت وانا كنت بدور ع الكشاف واتخبطت في الضلمه خديجه : سلامتك يا نور عيني صحيح إنتي نمتي عند مين امبارح ؟ داليا : في البيت يا ماما أصل أصل أنا روحت ومالقتش عادل يعني خديجه : في ستين داهيه سكتت شويه وسألت : بس ماتعرفيش راح فين داليا : ما انتي لسه قايله في ستين داهيه بتسألي ليه بقى ! بدأت الدموع تسيل من عنيها : إللي كان امبارح ده مش ابني يا داليا ، قلبي واجعني عليه أوووي حسبي الله ونعم الوكيل في كل إللي كان السبب في حالته دي اتنهدت داليا وضمت امها من كتفها : خلاص بقى يا قلبي ادعيله ربنا يهديه ويرجعلنا زي الأول وأحسن كمان خديجه : يا رب :"( إوعي تزعلى من الكلام اللي قاله امبارح ده مش في وعيه داليا : ما انا عارفه يا ماما ومش زعلانه منه المهم دلوقتي نتطمن على بابا خديجه : انتي مش قولتي امبارح الدكتور قالك انه بقى كويس امال مافاقش ليه ! بلعت داليا ريقها وكإنه أشواك في حلقها : ادعي لبابا يا ماما هو اه يعني خرج الحمدلله من مرحلة الخطر بس لسه مافاقش يعني ادعيله ان شاء الله يفوق بسرعه ويرجعلنا أحسن من الأول خديجه : يا رب داليا : أحمد كويس ؟ خديجه : لسه نازله من عنده من قيمة ربع ساعه كده وكان نايم يا حبة عيني ومش دريان بحاجه داليا : معلش يا ماما هي الخبطه كانت شديده شويه هقوم اتطمن عليه واشوف الدكتور هيعمله الاشعه امته ان شاء الله وارجعلك خديجه : طيب هاجي معاكي داليا : ﻻ ارتاحي انتي يا امي هو ان شاء الله هلاقيه كويس نخلص الاشعه واجيبهولك لغاية عندك طبعت قبله على جبين أمها وطلعت لأخوها لقته نايم قعدت جنبه وفضلت تتأمله ودموعها سايله ، رغم ان قلبها موجوع عليه بس حست بفرحه انه كبر وبقى راجلها وحمايتها فضلت تدعيله ربنا يشفيه ويتعافي قبل إمتحاناته ويعينه يحقق كل أحلامه ، راحت للدكتور وقالها الاشعه هيعملوها أول ما يصحى ان شاء الله ففضلت قاعده جنبه وماسكه إيديه لحد ما يصحي وتطمن عليه ..... طارق : أنا عاوزك تنفذ إللي طلبته منك ده في أسرع وقت ممكن _طاب ما تخليها بكره ان شاء الله طارق : ﻷ إنهارده أي تأخير ممكن مايكونش في صالحنا بس زي ما إتفقت معاك كل حاجه بشكل ودي ومش عاوز أي حد يعرف حاجه عن اتفاقنا حتى اللي هتاخدهم معاك وانتوا بتقبضوا عليه وأنا تقريباً خلصت إجراءات دخوله المصحه _تمام ماتقلقش يا طارق باشا ، بعد إذنك طارق : إتفضل مع السلامه ... أحمد صحي ولقى داليا جنبه ، ابتسمتله بفرحه وقبلت إيديه داليا : حمدلله على سلامتك يا حبييب قلبي أحمد : الله يسلمك ، طمنيني إنتي كويسه ؟ داليا : المفروض أنا اللي أسأل السؤال ده طمني عليك أحمد : ماتقلقيش أنا أحسن دلوقتي الحمدلله ،ايه ده ؟ ايه اللي في راسك ده هو مد إيديه عليكي داليا : لا لا ماتقلقش الكهربا امبارح قطعت واتخبطت وانا بدور ع الكشاف وبعدين بقى بعد مع حبيب قلبي دافع عني امبارح تفتكر في حد يقدر يمد إيديه عليا ربنا ما يحرمني منك أبدا أحمد : ولا يحرمني منك يا أغلي وأحن أخت وأم في الدنيا داليا : هقوم أقول للدكتور إنك صحيت عشان يعملك الأشعه بلّغت الدكتور وعملوا لأحمد الأشعه ، ولحد ما تظهر النتيجه داليا حكتله بهدوء عن إللي حصل لأبوهم وعن حالته وطلبت منه مايتكلمش قصاد أمه ولا يضعف هم الاتنين محتاجيين يكونوا أقوى عشان يساندوا أمهم إتطمنوا على أشعة أحمد وبعد ما الدكتور كتبله على خروج نزلوا سوا يتطمنوا على أبوهم وأمهم ،،وفضل أحمد يواسي أمه ويطمن قلبها خديجه : صحيح يا داليا ، ناصر كلمني من شويه بيسلم عليكم وكان عاوز يكلمك بيقول تليفونك مقفول داليا : اه يا ماما انا قفلته هفتحه شويه كده واكلمه ان شاء الله ، بس طمنيني لارا كويسه ؟ خديجه : الحمدلله بقت كويسه وقال هيجيبها معاه وهو جاي إن شاء الله داليا : إن شاء الله خديجه : يلا يا داليا خدي أخوكي ريحوا في البيت وأبقوا تعالوا بالليل داليا : لا يا ماما حضرتك وأحمد إللي هتروحوا وانا هفضل مع بابا هنا خديجه : الله يرضى عليكي انا مش حمل مناهده خدي أخوكي وروحوا من هنا ومعلش يا حبيبتي ابقى طلعي فرخه من الفريزر واعمليهاله على شوربة خضار عشان يعوض الدم اللي فقده ويتغذى داليا : حاضر يا ماما اللي تشوفيه خرجت سانده أحمد وبتفتح الموبايل لقت اتصالات من خالها وطارق ، اتصلت بطارق داليا : ايه الاخبار نقدر نرجع البيت أنا وأحمد ؟ طارق : ﻷ لسه روحي عند أمي وخدي معاكي أحمد بلاش تروحوا البيت دلوقتي لحد ما أكلمك داليا : خلاص تمام حاضر أحمد بيسمعها وهو مستغرب وقبل ما يسألها وقفت تاكسي ركبوا ولقاها بتقول على عنوان غريب غير عنوانهم أحمد : إحنا رايحيين على فين ؟؟! داليا : عند بيت طارق أحمد : ليه ؟!!!! داليا : هفهمك بعدين يا أحمد مش وقته الله يخليك وبعدين ما تتكلمش كتير عشان ما تصدعش سكت ومازال مش فاهم حاجه ومنتظر تريحه وتفهمه إللي بيحصل حوليه ،،،، وصلوا بيت طارق وأول ما أمه فتحت الباب وشافتهم إبتسمت _اتفضلوا اتفضلوا داليا وهم داخلين : ده أحمد أ قاطعتها : عارفه أحمد أخوكي طارق لسه مكلمني وقايلي قولتله تنوري إنتي وأي حد من أهلك داليا : ربنا يكرم حضرتك ويحفظك بصت لأحمد : حمدلله على سلامتك يا حبيبي ربنا يحميك أحمد : الله يسلم حضرتك متشكر _دخلي أخوكي الأوضه يرتاح يا داليا وأنا هدخل أشوف إللي ع النار دخلت أخوها ، نام ع السرير وهي غيرت هدومها وراحت ع المطبخ تساعد أم طارق _مش عاوزه أتعبك يا حبيبتي والله مايصحش أبدا ادخلي انتي ارتاحي داليا : حضرتك زي أمي وإللي مايصحش إني أسيب أمي تطبخ وأنا قاعده وكمان أنا مش تعبانه والله الحمدلله بقيت أحسن وماتقلقيش بعرف أطبخ بدأت تطبخ مع أم طارق وبالها مشغول على ابوها ومنتظره اتصال طارق على أحر من الجمر عشان تعرف عمل ايه مع عادل .... ... الساعه 1 الظهر كان عمرو في إنتظار مريم قدام باب العماره ، ركبت جنبه بعد ما قالت سلام عليكم وبعدها ما نطقتش وهو كذلك رد السلام و فضل ساكت لإنه وعدها مايتكلمش وصلوا وأول ما دخلوا مكتب صاحب عمرو رحب بيهم ، طلب يجيبوا خالد ومريم من التوتر بتهز رجلها بسرعه وتفرك في إيديها مش متخيله اللقاء هيبقى إزاي ولا لما تشوفه هتقوله إيه !!! وعمرو رغم إنه بيتكلم مع صاحبه بس عينه على مريم وملاحظ توترها ! ... خالد قاعد في ركن لوحده ومحمود وجاسر في ركن جاسر : جرى إيه يا عم خالد هتفضل لحد إمته واخدلك جنبك ومابتردش علينا إن شاء الله !! محمود : إحنا في مركب واحده يا اسطا ولازم نفكر سوا ونتحد عشان نقدر نتنيل نخرج من الورطه المهببه دي قرب منه جاسر وإتكلم بلين : طاب ده أنا حتى عندي ليك أخبار حلوه عزيز بشرني إن الجلسه الجايه خلاص هنطلع من هنا ،،عنده خطط متأكد من نجاحها رفع خالد راسه وقبل ما يرد دخل عسكري ونده إسمه وقف خالد مترقب يعرف فيه إيه ! _فيه زياره ليك ! خالد : ليا أنا ؟! _أمال لخيالك يلا ومش عاوز كلام كتير محمود وجاسر بصوا لبعض ومستغربين مين قدر يعمل تصريح زياره ويجي لخالد !!!! مشي خالد مع العسكري وفي إيديه الكلبشات ، بيحاول يخمن مين جايله ؟ حط كل الاحتمالات بس فكره مارحش ناحية مريم نهائياً ! خبط العسكري وانتفض جسم مريم بشكل ملحوظ ، بصت لعمرو فطمنها بإبتسامه عذبه خرجوا هو والضابط وسابوها مع خالد لوحدهم شويه ، وقفت وفضلت مدياله ضهرها وفي رعشه خفيفه في جسمها أما عن خالد فأول ما دخل المكتب ولمحها عيونه لمعت وقلبه طار من الفرحه للحظه كان هيجري ويترمي في حضنها بس وقفت وإدتله ضهرها فكوا الكلبشات وقفلوا الباب قرب ووقف وراها وهي حاسه بيه وانفاسها بتتلاحق خالد : ممكن تبصيلي ؟ أول ما سمعت صوته قلبها وجعها وعلى طول دموعها سالت خالد : أنا بجد آسف إلتفتت وصرخت في وشه : آسف ! ودي بتتصرف فين إن شاء الله ويا ترى بقى بتقدر ترجع حاجه بتقدر ترجع قلب إتكسر ولا قهره بتحرق في روحي وتموتني في اليوم ألف مره آسف بتاعتك هتعمل إيه لداليا رد علياااا كلمة آسف دي هتقدر تعمل إيه ومن غير ما يرد ولا يتردد ضمها في حضنه غاصت بين ضلوعه وعم السكون إلا من صوت نحيبهم بيعزف لحن الوجع و الخوف ، قامت من حضنه وضمت وشه بين كفيها بحنان : خالد أنا مليش غيرك في الدنيا من صغري وإنت أبويا وأخويا وأعز اصحابي وكنت دايماً بتخيل فارس أحلامي شبهك وزيك عشان إنت كنت قدوتي خالد بصوت متهدج : غصب عني يا مريم أنا كنت عايش في غفله مريم : وجه الوقت عشان تفوق وتصلح غلطك أرجوك ماتضيعش الفرصه دي من إيديك مسح دموعه وسأل : فرصة إيه ؟ مريم : إعترف وإحكي كل حاجه ، قول الصدق ولما تعترف الحكم هيتخفف عنك أرجوووك لو عاوزني بجد أسامحك إعترف في الجلسه الجايه وكفايه بقى ألعايب الزفت المحامي إللي إخترت إنه يترافع عنك ارجوووك يا خالد إعترف بكل حاجه وريح قلبي بعد عنها وإدالها ضهره مريم وهي بتمسح دموعها : أفهم من كده إيه خالد : مش هقدر يا مريم صدقيني مش هقدر إلتفتلها وإبتسم : عارفه ، جاسر لسه قايلي حالاً ان المحامي خلاص أكيد هيقدر يخرجنا الجلسه الجايه هنطلع براءه وعلى طول نسافر أنا وإنتي في اي حته ونبدأ من جديد مريم : ويا ترى لو نجيت من قاضي الدنيا مين هيقدر ينجيك من قاضي السماء هتقف قدام ربنا وتقوله إيه بص في الأرض فصرخت في وشه : رد علياااهتقوله إيه خالد : مش هقدر أعتررررف أنا كنت سكران ومش في وعيي مريم : ههههههه عذر أقبح من ذنب تعرف مين أول واحد برر غلطه هو إبليس ،،، (( قَالَ مَا مَنَعَكَ أَلاَّ تَسْجُدَ إِذْ أَمَرْتُكَ قَالَ أَنَاْ خَيْرٌ مِّنْهُ خَلَقْتَنِي مِن نَّارٍ وَخَلَقْتَهُ مِن طِينٍ )) صدق الله العيظم بلاش تبقى زي إبليس وتبرر جريمتك البشعه وإنت عارف كويس أوي إنها مش أول مره الله أعلم كررت القرف ده كام مره ماتفوق لنفسك بقى كفاااايه سكتت شويه وتأملته واقف بضعف باصص في الأرض وبيبكي بحرقه مريم : سمعني آخر قرار عندك يا خالد خالد : ... مريم : رد عليا لو سمحت خالد : مش هقدر مريم : شكرا لإنك ريحتني من حيرتي ، إللي حضرتك ماتعرفهوش إني إتعرفت على داليا وبقينا صحاب قبل مايتقبض عليك كنت كل ما أسمعها تحكي عن الحادثه أتمني لو إللي عملوا فيها كده قصادي كنت أكلتهم بسناني وكانت الفاجعه لما عرفت إنك واحد منهم آآآآآ نفسي أصرخ بأعلى صوتييييي آآآآآه خالد ماقدرش يقف بيسمعها وهو قاعد لسه باصص في الأرض وبيبكي مريم : أنا وقت ماعرفت كنت فـ حيره مش عارفه هقف في صف مين فيكم بس إنت دلوقتي قطعت آخر حبل ممكن يخليني أتمسك بيك وأقف جنبك من إنهارده هقف مع الحق مع داليا وهساعدها لحد ما يعدموا المجرمين إللي ، إللي للأسف إنت واحد منهم قالت آخر جمله وإدتله ضهرها عشان ما تضعفش خبطت ع الباب وخرجت وهي بتجري ، عمرو شكر صاحبه بسرعه وجري يحصلها ركبت العربيه وهي منهاره : وعمرو بيحاول يخفف عنها وقلبه مكسور لكسرة قلبها ونفسه يعمل أي حاجه تسعدها شغل قرآن عشان تهدى من نوبة البكا إللي عندها ويتطمن قلبها وبالفعل بدأت تهدي وطلبت منه يروحها ، أصر ياخدها تهدي أعصابها في أي مكان بس رفضت وقالت إنها حابه تكون لوحدها وصلها للبيت وقبل ما تطلع شكرته وطلعت على فوق بسرعه ، أول ما دخلت البيت إنهارت من تاني فضلت تصرخ بعلو صوتها آآآآآآآآآآه يااااااااااا رب إفتكرت تفاصيل الحادثه إللي حكتها داليا وجريت ع الحمام تقيأت ، غسلت وشها ولقت نفسها بتتوضى ، لبست سيدال الصلاه ووقفت بين إيدين ربنا أصل لا ليها سند ولا ملاذ غيره هو إللي عالم بحالها أكتر من أي حد حتى منها هو جابر المنكسرين إللي في إيديه يداوي وجعها خالد بعد ما مريم مشيت ورجعوه ع السجن إنهار ع الأرض وصدى كلامها لسه بيدوي في ودنه ويزلزل كيانه ومحمود وجاسر بيحاولوا يفوقوه من حالته ويفهموا منه السبب ومين زاره لكنه ماكنش بينطق بيبكي بحرقه وبس ... _مايا إنتي إزاي ماتروحيش جامعتك أسبوعين إحنا ناقصيين مشاكل جديده يا بنت دكتور لينا كلمتني وسألت عنك مايا : مام أنا تعبانه جدا الفتره دي وبعدين بسبب إبنك مابقتش بقدر أروح كل ما حد يشوفني يلقح بكلام زي الزفت ده غير الصحفيين إللي ملاحقينني في كل مكان أنا بجد تعبت _وتفتكري الحل إنك ماتروحيش الجامعه !! وبعدين أنا فعلا ملاحظه إنك الفتره دي تعبانه و مش طبيعيه مابتاكليش كويس وشكلك مش طبيعي خالص قوليلي فيه إيه بس يا حبيبتي حاسه بإيه !! ولا أقولك أنا هتصل بالدكتور يجي يفحصك مايا بإرتباك : دكتور !! لا لا دكتور ايه بس أ أ أنا كويسه بس يعني متوتره شويه بسبب مشكلة جاسر طبعت أمها قبله على جبينها : ماتقلقيش يا روحي قريب أوي هينتهي الكابوس ده سابتها وخرجت ، بصت مايا في مرايتها ولقت وشها شاحب وباين عليه آثار التعب ، سالت دموعها وهي بتتأمل منظرها والحاله إللي وصلتلها فضلت تردد : حقييير بكرهككك بكرهككك مسكت إزاة برفيوم ،حدفتها في المرايا وقعدت تبكي في الأرض ... أخيرا بعد توتر وطول إنتظار إتصل طارق بداليا وبشرها إن أخوها عادل دلوقتي موجود في المصحه ومتوصي عليه ومش هيقدر هيرب منها داليا بفرحه : بجد يا طارق يعني خلاص عادل هيتعالج ويرجع إنسان طبيعي طارق : إن شاء الله يا داليا داليا : طيب يعني أكيد كل الإجراءات دي بشكل ودي صح ؟ طارق : صح ما عدا المصحه الدكتور صديقي أه لكن أصر يمشي بشكل رسمي ومش مشكله مفيش ضرر على عادل أو على سمعته إن شاء الله داليا : بجد مش عارفه أشكرك إزاي ربنا يفرح قلبك زي ما فرحت قلبي طارق : ماتشكرنيش يا داليا ده واجبي داليا : طيب بعد إذنك بقى أروح ألحق إللي ع النار وإلا مامتك هتعلقني عشان قالت هدخل أصلي وخدي بالك من الأكل طارق : ههههههه خلاص ماشي وأنا ساعه إن شاء الله وهكون عندكم مع السلامه داليا : مع السلامه بعد ما طارق قفل معاها لقى نفسه بيبتسم فرح أووي لفرحتها ، بدأ يكمل شغل بس مش قادر يركز في حاجه فلم الملفات وقرر يروح بدري إنهارده .... داليا خلصت طبخ وراحت تطمن على أحمد لقته نايم غطته كويس وطبعت قبله على جبينه ، إتناولت موبايلها وإتصلت بخالها حكتله كل إللي حصل وكان مصدوم وقرر يرجع في أقرب وقت وكذلك حكت لعلياء إللي متابعه معاها بالتليفون الأحداث خطوه بخطوه وداليا عذراها وطلبت منها تبطل خناق مع زوجها وهي مقدره ظروفها ومش زعلانه منها سمعت صوت طارق بره فصحت أحمد بهدوء عشان يتغدى ، لبست حجابها وقامت تساعد أم طارق وتحط الأكل ع السفره وهم بيتغدوا سألت أم طارق : راجع بدري إنهارده يعني يا حبيبي طارق : صدعت قلت أروح بدري إنهارده يا أمي وكمان صراحه كنت جعان تسلم إيديك يا ست الكل _إللي تستحق الكلمه دي بقى هي داليا عشان هي إللي طبخت انهارده بص لداليا وإبتسم : تسلم إيديك يا داليا ابتسمت بخجل : بالهنا والشفا وبعد الغدا رتبت داليا حجاتها وغيرت هدومها استعداداً للرحيل ، أم طارق اصرت عليها تقعد معاهم لكن خلاص مشكلتها إتحلت ومابقاش في داعي لوجودها عندهم ، شكرت أم طارق على استضافتهم ومشيوا مع طارق إللى أصر يوصلهم للبيت وصلوا وقبل ما يمشي ندهتله طارق : خير يا داليا فيه حاجه ؟! داليا : كنت عاوز أشكرك عشان ساعدتني في موضوع عادل ومازلت بتساعدني في القضيه وبجد أساسا كلمة شكرا قليله عليك طارق : قولتلك قبل كده أنا هقف جنبك للآخر وفي أي وقت تحتاجيني فيه هتلاقيني إن شاء الله إبتسمت بإمتنان طارق : خدي بالك من نفسك وبلاش توتر إن شاء الله خير داليا : حاضر إن شاء الله طارق : مع السلامه داليا : مع السلامه طلعت بيتهم ولقت أحمد منتظرها في الصاله أحمد : أنا فضلت ساكت عند الناس لحد مانيجي هنا ممكن تفهميني بقى إيه إللي بيحصل حوليا !! داليا وهي بتقعد جنبه : يوم ما وديتك المستشفى وبابا كمان بقى هناك رجعت البيت لوحدي وإتخانقنا أنا وعادل ضر.بني وطردني من البيت أحمد : نعممم انتي مش قولتي اتخبطتي وازاي يطردك من البيت اصلا داليا : إهدي بس وإسمعني للآخر ،، ماكنتش لاقيه مكان أروح فيه كلمت نهال كانت مسافره وهي كلمت طارق إبن خالتها واستضافوني في بيتهم ولإن عادل هددني من رجوعي للبيت وكمان إتضح إن عزيز بيلوي دراعي بيه طارق ساعدني وعمل تمثيليه بسيطه كده وحط عادل في مصحه عشان يجبره يتعالج أحمد : ماشي كل ده تمام بس فهميني بقى عادل علاقته إيه بعزيز !! داليا : الله أعلم ، هو طلب مني أتنازل عن القضيه وبالليل عزيز اتصل بيا وقالي ان هو إللي رجع عادل وقومه عليا واستغل تعاطيه للمخدرات وهددني بيه بس دي كل الحكايه ومش مهم كل ده المهم عندي دلوقتي إنك تركز في مذاكرتك وماتنساش حلمك يا حبيبي وهنبدأ أنا وإنت مذاكره من دلوقتي حالا ومش عوزاك تفكر في أي حاجه ،،،كل حاجه هتتحل إن شاء الله إبتسم أحمد : إن شاء الله ساعدته يغير هدومه وبدأت تنظمله جدول مذاكره مكثف عشان الإمتحانات قربت جدا ..... ... مريم من وقت ما جت من عند خالد وهي مابتنامش ولا بتاكل حاولت تكلم داليا أكتر من مره لكن بتتراجع في آخر لحظه لإنها مابتلاقيش كلام تقوله مسكت الموبايل بتردد ولقت رساله جايلها من عمرو ، أول مالمحت اسمه خفق قلبها اتنهدت وفتحت الرساله حاسس بيكي وعارف اد إيه بتعاني بس أرجوكي يا مريم ماتنسيش حلمك وتضيعي تعب السنين إللي فاتت حاولي ماتفكريش في أي حاجه ولا تركزي غير في إمتحاناتك ضحكت بسخريه : هه حلمي ! هو يا ترى فيه ميت بيحلم داليا قاعده جنب أحمد وهو بيذاكر وبتتسلي في قراية الأخبار ع النت ، عرفت مواعيد امتحانات الكليات وأول ما لمحت هندسه جت في بالها مريم واستغربت من إختفائها المفاجئ وآخر لقاء عجيب بينهم فقررت تسأل عنها ، خرجت بره الأوضه واتصلت بيها مريم بعد ما قرأت الرساله فضلت قاعده شارده وماسكه الموبايل وفجأه رن موبايلها وأول ما لمحت إسم داليا سرت قشعريره في جسمها ، داليا بتتصل وهي باصه للإسم وانفاسها بتتلاحق بتحاول ترتب أي كلام تقوله بس مش قادره ولا لاقيه حاجه تقولها لحد ما انقطع الإتصال اخدت نفس عمييق واتصلت هي وعلى طول جالها الرد بلهفه داليا : أيوه يا مريم أخيرا مريم بصوت مرتعش : ا ازيك يا داليا ؟ داليا : زعلااانه منك جدا عشان مابتسأليش ولا بتردي على تليفوناتي وكنتي وعداني مش هتسيبيني لوحدي بس فجأه لقيتك إختفيتي ومش عارفه اوصلك من بعد آخر لقاء غريب بيننا مريم : ... داليا : ألو مريم سامعاني ؟ مريم : أ أيوه يا داليا سمعاكي ، داليا هو أنا كنت عاوزه أقابلك لإن إجابة أسئلتك مش هتنفع في التليفون ممكن؟ داليا : ياريت لإنك وحشاني جدا وتصرفاتك قلقاني زي ما صوتك دلوقتي قالقني ونفسي أتطمن عليكي Sad( مريم : يناسبك بكره بعد العصر إن شاء الله ؟ داليا : أيوه مناسب يا حبيبتي هنتقابل فين ؟ مريم : المكان إللي يعجبك داليا : امممم ايه رأيك نقعد شويه ع النيل حيث مكاني المفضل مريم : إتفقنا اشوفك بكره إن شاء الله ،،مع السلامه داليا : مع السلامه قفلت داليا معاها وهي مازالت مستغربه لكن إللي مصبرها إنها هتجاوب على كل التساؤلات إللي جواها بكره لما تشوف مريم لسه هتقوم جالها اتصال من نهال بتطمن عليها وتبلغها إنها راجعه بكره إن شاء الله خلصت المكالمه وقامت تطمن على أحمد قبل ما تروح لأمها المستشفى أحمد : استني هاجي معاكي داليا : أحمددد احنا اتفقنا مش هنضيع وقت تاني مصدع يبقى تاخد دواك و تنام شويه نسينا هدفنا وحلمنا ولا إيه يا دكتور !! إبتسم أحمد : لأ ماتقلقيش مانسيتش داليا : تمام أوي يبقى أروح اطمن على بابا وماما واجي ألاقيك خلصت ال 3 امتحانات دول اتفقنا ؟ أحمد : إتفقنا فضلت مع أمها في المستشفى لحد ما انتهى وقت الزياره وكالعاده أمها رفضت تروح البيت وهي في طريقها للبيت كلمتها شيماء داليا : شيماء أنا عندي مشاكل كتيره جدا وبابا في المستشفى أرجوكي بلاش تفتحي موضوع اللقاء ده خالص شيماء : هو انا فتحته بنتي ! ثم انا بتصل اتطمن عليكي يا استاذه داليا اخبارك ايه داليا : الحمدلله عايشه فضلوا يتكلموا سوا لحد ما داليا وصلت البيت ، تعبانه ونفسها تنام أوي بس ضغطت على نفسها وفضلت سهرانه مع أحمد عشان يذاكر .... وفي عصر اليوم التالي داليا كانت قاعده عند النيل في إنتظار مريم إللي وصلت ورايحه ناحية داليا تقدم خطوه وترجع خطوتين وهي مش عارفه هتقولها إيه ورد فعلها هيكون إيه بس اكتر احساس مسيطر عليها انها هتخسر داليا انهارده لمحتها داليا فوقفت وابتسمتلها ، اتنهدت مريم واتشجعت تقرب منها أكتر ، ضمتها داليا بود فلمعت الدموع في عيون مريم واتمنت لو الارض تنشق وتبلعها في اللحظه دي داليا : وحشاني أوي تعالي أقعدي وطمنيني عليكي يا بنتي إيه سر الإختفاء المفاجئ ده !!! مريم متوتره ، بتفرك في إيديها ومش لاقيه كلام تقوله : داليا : مالك يا مريم فيه إيه مريم : يمكن صداقتنا مش طويله ولا من سنين بس انا حبيتك اوي وربنا وحده يعلم وكان نفسي اقف جنبك واساعدك لكن لكن اووفف حقيقي مش عارفه اقول ولا لاقيه كلام يتقال داليا : انا مش فاهمه حاجه وليه المقدمات دي كلها اتكلمي على طول وماتقلقيش يا حبيبتي فيه ايه ؟ مريم : انا انا عارفه اني ممكن اخسرك بعد لحظات بس عوزاكي تتأكدي ان مليش ذنب في اي حاجه داليا : مريم لو سمحتي انا كده قلقت جدا فهميني فيه ايه !!! فتحت شنطتها وطلعت صوره ناولتها لداليا وهي باصه في الأرض وبتبكي بصمت مسكت داليا الصوره وهي مستغربه وأول ما بصت فيها جحظت عنيها وشهقت لما شافت مريم في حضن خالد وبيضحكوا بصت لمريم : ايه ده !! مش ممكن ،انا مش فاهمه حاااجه ساكته لييييه ردي ايه ده مريم بصوت متهدج : خ خ خالد يبقي يبقي ا ا اخويا يا داليا بس اقسملك بالله ماكنتش اعرف اي حاجه يوم ما عرفت ماكنتش مصدقه وروحتلك المصحه إتأكدت منك وبعدها اختفيت اصلي ماكنتش قادره ابص في وشك ولا كنت عارفه هقولك ايه بس ارجوكي تصدقيني والله ما ليا ذنب في اي حاجه حصلت داليا بتسمعها وعلى وشها آثار الصدمه ولسانها تقل مش عارفه ترد عليها ولا لاقيه كلام تقوله في موقف زي ده بصت للصوره مره تانيه وحست بألم في قلبها ، غمضت عنيها وفضلت تردد : لا إله إلا أنت سبحانك إني كنت من الظالمين عم الصمت للحظات بينهم مريم منهاره وداليا بتبكي بصمت ولسه مصدومه ، طلعت منديل من شنطتها وناولته لمريم بصتلها مريم وعنيها دبلانه وحمرا من كتر البكا بصتلها وكإن عيونها بتسأل داليا هتسامحيني ولا هتاخديني بذنب أخويا قربت منها داليا ومسحت دموعها ، اتنهدت وجاوبت على سؤال عيونها : أنا مصدقاكي يا مريم وعارفه إن ملكيش ذنب في إن أخوكي يكون بالشكل ده وقبل ما تكمل كلامها اترمت مريم في حضنها وبكت بحرقه ربتت داليا على كتفها : كفايه عياط بقى انا مش زعلانه منك وعشان خاطري ركزي في امتحاناتك اللي هتبدأ بعد ايام ان شاء الله وفكري في مستقبلك وحياتك وانتي كمان ماتظلميش نفسك وتيجي عليها بذنب اخوكي فضلت مريم تفضفض لداليا وتعبر عن إللي جواها لحد ما هديت ووعدت داليا تركز في مذاكرتها وتقف جنبها في القضيه لحد ما تجيب حقها داليا : يلا بقى نمشي دلوقتي عشان تروحي تذاكري شويه ولو سمحتي لما اتصل ابقي ردي عليا يا انسه عشان ما اقلقش عليكي مريم : حاضر قاموا يتمشوا سوا ويوقفوا تاكسي وهم ماشيين سمعوا حد نده : داليا التفتت داليا ولقت اتنين راكبين موتوسيكل واحد منهم ماسك ازازه رش منها في وشها فصرخت بألم وصرخت مريم : دالياااا _ المره دي مايه سخنه هتحرق وشك شويه لكن المره الجايه إنتي عارفه هيترش فى وشك ايه اعقلي واسمعي كلام الكبار أحسنلك قال جملته وهرب الموتوسيكل بسرعه مريم : داليا أرجوكي طيب ردي عليا إنتي كويسه قعدت داليا في أقرب مكان مش قادره تقف على رجلها من هول الموقف ، كل حاجه حصلت في لحظه جسمها كله بيرتجف و مريم ضامه إيديها وبتحاول تهديها داليا : مريم وقفي تاكسي لازم نروح لطارق مريم : طيب تعالى نروح أي صيدليه الأول وشك بدأ يحمر داليا : ماتقلقيش أنا كويسه يلا نمشي من هنا وقّفت تاكسي وراحوا عند طارق حكتله مريم على كل إللي حصل لإن داليا ماكنتش قادره تتكلم لسه بترتجف من الخوف بصلها طارق بعيون لامعه وحاسس بخوف مش طبيعي عليها داليا : طارق أنا تعبت أنا كنت فاكره إنها مية نار الفكره دي لوحدها لما خطرت على بالي كنت هتجنن مريم : حضرتك داليا كده حياتها في خطر أنا سمعته هددها وتهديده واضح منه إن المره الجايه هيرش في وشها مية نار طارق : طيب ماقدرتيش تسجلي رقم اللوحه أو تقولي أوصاف أي واحد منهم يا بشمهندسه ؟ مريم : دي أول حاجه عملتها بصيت ع اللوحه بس ماكنش فيه أي ارقام !!!وصراحه مالحقتش ألمح شكلهم الموضوع كله حصل فجأه وفي لحظه وبص لداليا : وإنتي يا داليا مش فاكره شكل أي واحد ؟؟! داليا : مالحقتش اشوف من الأساس أول ما إلتفتت للي بينده الميه اترشت فحطيت ايدي على وشي وماشفتش اي حاجه زفر طارق بضيق : عموما ماتقلقيش يا داليا ده آخره مش هيقدر يأذيكي آخره يهددك ويشن عليكي حرب أعصاب ظنا منه إنك ضعيفه وممكن تستسلمي وتتنازلي عن القضيه ولكن زياده في الإحتياط أنا هعين حراسه ليكي داليا : ﻷ يا طارق أنا مش عاوزه أي حراسه مش عوزاه يحس إني خايفه منه بل بالعكس ألعايبه دي هتزيد من إصراري ، خلاص ماتشغلش بالك أنا هبقى كويسه ان شاء الله بصت لمريم : يلا يا مريم نمشي عشان ما تتعطليش أكتر من كده ، بعد إذنك طارق : خدي بالك من نفسك مريم ودعت داليا وراحت ع البيت وهي مزهوله مش مصدقه ان فيه جبروت بالشكل ده !!! كل مدى بتتأكد انها لما قررت تكون في صف داليا ومع الحق فكرت صح.. وصلت داليا البيت ، دخلت اوضتها ولسه فيه رعشه خفيفه في أطرافها ، كل ماتفتكر احساسها لحظة ما المية اترشت في وشها يرتجف جسمها رن الموبايل وكان رقم غريب احساسها قالها انه عزيز البنا فتحت الخط وسكتت واحساسها كان في محله كلمها من رقم غير إللي فات عزيز : فوقتي من الخضه ولا لسه هههههههههه ؟! دي كانت مجرد قرصة ودن صغيره بس لو لسه مش ناويه تعقلي يبقي ودعي ملامح وشك بنظره اخيره في المرايا لإن في ايدي دلوقتي ازازة مية نار جعانه وعاوزه اغذيها على جمال وشك ههههههههههه داليا : تصدق طلعت بتعرف تقول نكت ! إوعى يا شاطر تكون فاكر الحركات الهبله دي هتخليني أضعف بل بالعكس دي زادت من إصراري ومستحيل هتنازل عن حقي معلش بقى مضطره اقفل لإن ودني مابتحبش تسمع أصوات مقرفه مثيره للإشمئزاز ! قفلت السكه في وشه وبدون تردد طلبت رقمها وأول ما جالها الرد قالت بحسم : أنا مستعده أطلع في البرنامج يا شيماء شيماء بفرح : داليا إنتي بتتكلمي بجد داليا : أيوه بتكلم بجد مستعده جدا قفلت شيماء مع داليا وبشرت مديرها وفرحتها بقت فرحتين لما عرفت إن هي إللي هتحاور داليا وهيظهروا شخصية أمل الحقيقية ، قفلت معاه والفرحه مش سيعاها كلها 4 ايام بالضبط وحلمها هيتحقق وهيظهر اسمها الحقيقي مش كده وبس هتقدم كمان برنامج حاسه انها بتحلم ، جريت بشرت أمها وأبوها وبدأت على طول تجهز الحوار وتستعد...... ... نهال أول ما وصلت من السفر كلمت داليا داليا : حمدلله ع السلامه يا حبيبتي نهال: الله يسلمك يا دولي وحشتيني أوووي وعاوزه أشوفك داليا : تمام أنا لسه كنت بلبس حجابي عشان رايحه لماما في المستشفى هتطمن عليهم هناك وأكلمك نتقابل إن شاء الله تمام ؟ نهال : تمام إتفقنا قفلت مع نهال وكملت لبس حجابها أخدت شنطتها ونزلت وقفت تاكسي وراحت ع المستشفى اتطمنت على أمها وسألت الدكتور عن حالة أبوها ومازال على حاله في غيبوبه فضلت تتحايل على أمها تروح لإن الإرهاق واضح في ملامحها لكنها رافضه تماما ومش عاوزه ترجع البيت من غير زوجها، قعدت معاها لحد ما جالها اتصال من نهال واتفقوا ع المكان إللي هيتقابلوا فيه، مشيت من المستشفى ووقفت تاكسي وهي ملاحظه حاجه غريبه بس طنشتها وقالت بيتهيألها ! أول ما لمحت نهال جريت وضمتها: شوفتي لما غيبتي عني حصلتلي البلاوي دي كلها إزاي ماتغيبيش تاني لو سمحتي نهال: وحشاااااني سامحيني غصب عني والله كنت مضطره اروح مع ماما تزور صحبتها لإني بخاف عليها تسافر لوحدها المهم اقعدي يلا وطمنيني عليكي داليا : فيه حاجتين جداد حصلوا لأ هم 3 نهال: إيه إللي حصل !!!! حكتلها داليا على مقابلتها مع مريم والتهديد اللي حصل واتصال عزيز واخيرا قرارها بالظهور في البرنامج نهال : انا مش مصدقه معقوله فيه ناس ببشاعة الزفت عزيز ده !!ولا مريم انا مش قولتلك من آخر تصرف ان ليها علاقه بحد من المتهمين ؟! داليا : اها بس انا مش هاخدها بذنب أخوها مريم انسانه كويسه جدا وانا مصدقاها ان ماكنتش تعرف ولا ليها اي علاقه بالموضوع نهال : تمام وموضوع البرنامج ده متأكده إنك مقتنعه تظهري ولا كان قرار في لحظة غضب من كلام عزيز داليا : هو كان في لحظة غضب أه بس شايفه انه صح حتى لما فكرت بيني وبين نفسي خلاص يا نهال مابقتش فيه حاجه في حياتي اخاف عليها هجيب حقي لو فيها نهايتي ربتت على ايديها وابتسمتلها ابتسامه عذبه فبادرتها داليا بإبتسامه اعذب منها فضلوا يحكوا شويه وبعدين داليا ودعت نهال ، ركبت تاكسي وروحت حكت لأحمد عن قرارها وهو قالها إن أي حاجه هتريحها هو موافق عليها طبعت قبله على جبينه وكعادة كل يوم فضلت سهرانه بتذاكر معاه.... تاني يوم كانت اعلانات البرنامج بدأت تعلن عن مدي أهمية الحلقه الجايه وبدأ توتر داليا يزيد توفيق بمجرد ما شاف الإعلان كلم عزيز ورغم انه ماكنش متوقع داليا تظهر في أي برامج لكن طمن توفيق ان مش مهم أي برامج أو مقالات المهم الجلسه الجايه أم جاسر : أنا خايفه أوي يا توفيق توفيق : مش هكدب وأقولك إني متطمن انا كمان قلقان خصوصا ان قضية ابنك بقت حديث كل الناس بس مش عارف مضطر اثق في عزيز وافضل مصدقه لحد ما نشوف النهايه هتكون ايه !! قطعت حديثهم مايا مايا : هاي يا مامي ، هاي يا بابي أمها : رايحه فين ؟؟! مايا : خارجه مع صحابي شويه أمها : ده وقته يا مايا ؟! مايا : أمال وقته امته يا مامي انا بقالي كتير ماخرجتش من البيت وكمان عاوزه اعرف ايه اللي فاتني في المحاضرات توفيق : خلاص سيبيها فيه ايه اوك يا حبيبتي روحي بس خدي بالك من نفسك طبعت قبله على خد ابوها : ميرسي أوووي يا بابي ركبت عربيتها ومشيت ، جالها اتصال مايا : أيوه يا هايدي متأكده انه لسه موجود هايدي : أيوووه بس بليز تعالي بسرعه ده أنا ما صدقت عرفت انه رجع من السفر وظهر فكلمتك مايا : ميرسي يا حبيبتي ربع ساعه وهكون عندك باي سايقه والشرر بيتطاير من عنيها لحد ما وصلت لقته قاعد وسط الشله فندهتله مايا : أخيرا ظهرت يا حسام ! حسام : هاي يا مايا انتي كويسه ؟! مايا : مش كويسه خالص !! حسام انا حامل حسام : ما انتي بعتيلي مع هايدي قبل كده ووصلها ردي مايا : مفهمتش ردك فحبيت انت تفهمني بنفسك حسام : ردي واضح انا معنديش استعداد دلوقتي اتحمل مسئولية جواز وكلام فاضي زي ده لذلك مفيش حل غير انك تعملي اجهاض اظن انتي كمان مش مستعده لأمومه وأي مسئوليه وانا خلاص قطعت الورقتين بتوع الجواز العرفي وممكن كمان نفس الدكتور يرجعك زي ماكنتي وانا هتكفل بكل المصاريف والدكتور اللي بيعمل عمليات من النوع ده واحد صاحبي يعرفه هبقى اجيب العنوان بالضبط وابعتهولك في رساله مفيش داعي تتعبي نفسك وتيجي هنا تاني واقفه مصدومه ومش قادره تنطق، ادالها ضهره ولسه هيمشي سألت : طاب وأنا وحبنا !!! حسام : حب ههههههه ! احنا هنضحك على بعض يا مايا بلاش كلام الروايات ده من الاول وانا وانتي عارفين ان علاقتنا ماكنتش حب فيه اي اضافه تانيه عاوزه تقوليها ولا امشي الشله واحشاني جدا ومش عاوز اضيع وقتي قربت ورفعت ايديها استعدادا لصفعه لكنه مسك ايديها : لأ انا كده هزعل اعقلي احسنلك وماتنسيش نفسك ويلا يا شاطره خدي صحبتك وامشوا من هنا مشي وسابها واقفه مكسوره ومش عارفه تتصرف قربت منها صاحبتها فإترمت في حضنها وبكت بحرقه، خدتها ومشيوا من المكان ، ساقت بيها لمكان هادي هايدي : مايا كفايه يا حبيبتي عشان خاطري مايا : الحقير القذر بكل بجاحه بيقولي علاقتنا ماكنتش حب انا من الاول اللي استاهل عشان صدقت حقير زي ده ورخصت نغسي انا بكرهه هايدي : وناويه تعملي ايه ؟! هتعملي العمليه ؟ مايا : مفيش حل غير كده فضلت مع صاحبتها لحد ما هديت وروحت تهرب من مصيبتها بالنوم .....

مقالات ذات صلة

قطة في عرين الأسد بقلم منى سلامة الجزء السابع

من أنا بقلم فاطمة الزهراء

رواية سبر أغوار قلبي ولكن بقلم نورهان سامي الجزء الثالث

حكاية ياسين وعطر بقلم ملك إبراهيم الجزء الأول

ممرضة دمـ.ـرت حياتي بقلم شيماء سعيد الجزء الأول

ذات الوجه الدميم بقلم ياسمينا الجزء الرابع

اترك تعليقاً إلغاء الرد