عود ثقاب بقلم ندا سليمان الجزء الأول

إفتكرت داليا كل حاجه بتفاصيلها كإنها بتحصل تاني قصادها دلوقتي ، حست بكل ألم شافته فـ الليله دي ، سامعه صرخاتها فـ ودنها ، بدأت ترتجف ع السرير وتهتز بقوه وكإن الروح بتطلع من جسمها

قربت منها نِهال وبتندهلها بخوف : داليا ، داليا إنتي سامعاني

شافت داليا وشوشهم ، شافت كل واحد وهو بينهش لحمها بالدور وبدأت تصرخ بكل قوتها وتقاوم وكإنها بتقاومهم وتعمل إللى ما قدرتش تعمله فـ لحظة ضعفها وهي زي الدبيحه تحت إيديهم

هزتها نِهال بتفوقها وبلا جدوي بتصرخ وتقاوم نِهال ، جريت أمها وهي بتبكي جنبها فيه إيه يا دكتوره حصل إيه

جت الممرضه وناولت الدكتوره حقنه مهدئه إدتها لداليا،، بدأت داليا تهدي وصرخاتها تتحول لأنين لحد ما هديت وراحت فـ نوم عميق

خرجوا وسابوها بعد ما نِهال وصّت الممرضه تحط عينها عليها وتبلغها لو فاقت

خديجه : خير يا دكتوره إيه إللى حصلها ؟

نِهال : أنا سألتها عن إللى حصل فـ يوم إغتصابها لأول مره بتلتفتلي جحظت عنيها وأظن كانت بتفتكر كل حاجه حصلت وفجأه بدأت تصرخ وأكيد ده بسبب تذكرها لتفاصيل الحادثه

خديجه : يا حبيبتي يا بنتي وهتفضل ع الحال ده لإمته يا دكتوره

نِهال : أنا هعمل اللازم إن شاء الله ، و ربنا ييسر ،، بس المهم دلوقتي بعد إذنكم هنقلها فـ المصحه عندي

خديجه : إتفضلي يا دكتوره فـ أى حته بس المهم بنتي ترجعلي :

ربتت نِهال علي كتفها : إن شاء الله يا أمي إدعيلها :

وقبل ما داليا تفوق من تأثير المهدئ نقلوها المصحة بتاعة دكتورة نِهال عشان تبدأ معاها العلاج