رواية سبر أغوار قلبي ولكن بقلم نورهان سامي الجزء الثامن
نظرت لها أسيل باستغراب و قالت بدهشة : هتقولى لأدهم ! صاحت بها قائلة بفرحة : هتكلميه يعنى هتصالحيه
أدركت ما قالتله لحظة انفعال فقالت بارتباك : ابعدى عن أسر يا أسيل و ماتكلمهوش تانى و خصوصاً بعد المعاكسة الصريحة اللى عكسهالك و بلاش وجع دماغ
استلقت أسيل على السرير بجانبها و ظلت صامتة لبعض الوقت ثم اعتدلت بجلستها لتصبح مقابلها قائلة بحيرة : تالا هو أنا غلطت لما سامحتك ؟
نظرت لها تالا بإستغراب و عدم فهم لتجلس أسيل على ركبتها و هى تقول بتفكير : أصلى لما فكرت و ده نادراً أما بيحصل لقيت إنى ماكنتش المفروض أسامحك و كان المفروض أتضايق منك جامد زى ما أنتِ عملتى مع أدهم
نظرت لها تالا بدهشة و قالت بضيق : ايه اللى بتقوليه ده !
أسيل بحيرة : مش عارفة بس أنا حاسة إنى هبلة عشان مخدتش منك موقف و صالحتك بسرعة
تحسست تالا رأس أسيل و قالت بتساؤل : أسيل أنتِ رجعتى تشربى القرف اللى كنتِ بتشربيه مش كده !
ظلت تنظر لها لبعض الوقت بملل ثم صاحت بها قائلة : أنتِ كدابة زى أدهم
أتسعت حدقة عينها لتكمل أسيل قائلة : أيوه كدابة زى أدهم .. مش أنتِ كدبتى عليا و قولتيلى إنى كنت خارجة من الــ ” Night club ” و أدهم كان هيدوسنى بالعربية عشان كده أنتِ خدينى بيتك بدل ما تسبينى فى الشارع
قاطعتها تالا سريعاً و هى تدافع عن نفسها : أسيل أنا قولتلك كده عشان أى كلام تانى كنت هقولهولك كنتِ هتقولى عليا مجنونة و مكنتيش هتصدقينى زى ما حصل أول ما قولتلك إنى هاساعدك
تنهدت بملل و قالت بتفكير : فى الأول و فى الأخر كدبة برده و أنتِ كدابة زى أدهم .. متبرريش كدبتك .. بصى هشرحلك .. أنا مامى الحقيقية قبل ما تموت قالتلك خلى بالك من أسيل و أنكل أحمد برده قال لــ أدهم أتجوز تالا عشان تخلى بالك منها .. ظلت صامتة لبعض الوقت ترتب أفكارها بعقلها ثم أردفت : و أنتِ كدبتى عليا عشان تخلى بالك منى و أدهم كدب عليكِ عشان يخلى باله منك .. أنتو الأتنين كدابين .. بس أنتِ لما كدبتى عليا أنا سمحتك لكن أدهم لما كدب عليكِ أنت ماسمحتهــوش .. يبقى أنا المفروض ماسمحكيش عشان أنتِ كدابة و خدعتينى زى ما أنتِ عملتى مع أدهــ..
قاطعتها قائلة بضيق و دموعها تنزل : فيه فرق كبير يا أسيل .. أنا لما قربت منك كدبت عليكِ فى موضوع التعارف بس مكدبتش فى أى حاجة تانية .. أنا لما قربت منك كنت صديقة مش أكتر لكن هو كان حبيب و بقى زوج و كان هيبقى أب و بعد الأب هيبقى جد يعنى عيلة و حياة كاملة هتتبنى على كدبة .. أنا مكنتش مرغمة على صداقتنا لكن اللى متأكدة منه أنه كان مرغم على الجواز منى
