عود ثقاب بقلم ندا سليمان الجزء السادس
داليا ممدده ع السرير وإفتكرت لما شافت هاله فـ العياده ورجعت فلاش باك لأيام ماكانت هي وعلى بيخططوا لمستقبلهم ، لمعت الدموع فـ عنيها مع شبح الابتسامه إللي ظهر على شفايفها حاولت تطرد كل الأفكار من راسها وقامت تطبطب على قلبها بـ القرآن
مسكت المصحف وبدأت ترتل بصوت عالي عشان يتطمن قلبها شويه ويرتاح
فـ نفس الوقت إللي على سرحان فـ همومه…. فـ داليا وهاله وحملها وفـ مصير الطفل إللي جاي ده ! إفتكر كل الأحلام إللي بنوها هو وداليا سوا ورجع فلاش باك لداليا لما كانوا قاعدين سوا ع النيل وبيخططوا لمستقبلهم
داليا : إنت نفسك نسمي ولادنا إيه إن شاء الله ونفسك نجيب كام
على : أممم البنت هسيبك تسميها والولد انا هسميه عمر أما بقى نجيب كام فـ دي حاجه من عند ربنا بس انا نفسي نجيب دستيتين تلاته أربعه كده
داليا : نعم هتتجوز أرنبه حضرتك إن شاء الله ولا إيه
على : بجد انا عاوز يبقى عندي أطفال كتيير كلهم شبهك وبنفس طباعك وطيبة قلبك إللي لحد دلوقتي ماشفتش حد عنده زيها
داليا : ربنا ييسرلنا الأمور ونجتمع فـ بيت واحد ونحقق كل أحلامنا سوا
على : يــــــــا رب يا أم عمر
داليا : ههههههههههه ماشي يا أبو عمر
ضحك على وكإن الموقف بيتكرر قصاده ووقف ضحك لما دمعه سالت من عيونه
مد إيديه مسحها وكالعاده قام يهرب للنوم عشان يحلم بـ داليا
دخل طارق مكتبه متعصب ، قعد وبدأ يقلب فـ الملفات إللي قدامه……….لحد ما رن موبايله
طارق : أيوه يا نِهال ؟
نِهال : أخبارك ؟
طارق : الحمدلله
نِهال : فيه ايه مال صوتك ؟
طارق : أممممم حصلت حاجه كنت خايف منها ومتوقع انها تحصل
نِهال : فـ قضية داليا ؟؟
طارق : أيوه
نِهال : حصل ايه !
طارق : محامي توفيق الصايغ عزيز البنّا لو تسمعي عنه
نِهال : طبعاً هو فيه حد ما يعرفهوش فـ البلد دي محامي النصب والإحتيال والدفاع عن المجرمين وكنت متوقعه توفيق الزغبي يمسّكه القضيه
طارق : بالضبط كده مكتبه مسك القضيه بالكامل وهيدافع عن كل المتهمين بما فيهم عوض البواب
نِهال : طاب وإنت متضايق ليه إن شاء الله خير
طارق : ما انا جايلك فـ الكلام اهه عوض غير أقواله وقال ان كل اللي اعترف بيه تحت ضغط وتهديد مننا بالإضافه طبعاً لإن باقي المتهمين من أول ما اتقبض عليهم وهم بينكروا كل التهم
نِهال : إيه !
