عود ثقاب بقلم ندا سليمان الجزء الثالث

علي رجع من السفر قبل ميعاده بيومين ، راح ع البيت حط الشنط ورمي نفسه ع السرير راح فـ نوم عمييق بقاله فتره مابينامش لا ليل ولا نهار ! صحي علي صوت جرس الباب قام بكسل فتح الباب ولقاها قصاده علي : مش ممكن عليا !! علياء : كويس إنك لسه فاكرني ولا هتفتكرني ليه صح ما إنت بعت واحده كنت بتقول عليها هي نفسك وماكنلكش خير فيها يبقي هيكونلك خير فيا !!! بص فـ الأرض وكإنه كان ناقصه كلام علياء كمان فوق همومه ، سابها ع الباب ودخل قعد علي كرسي الأنتريه ، دخلت علياء وقفلت الباب وراها ، قعدت ع الكرسي إللي قصاده بصلها علي وسأل : داليا عامله إيه يا عليا ؟! علياء : ويهمك أوي تعرف ؟! علي : عليا لو سمحتي ماتقسيش عليا بالشكل ده إنتي عارفه انا بعشق داليا ازاي علياء : ما هي المصيبه إني عارفه كويس أوي يا علي وده السبب إللي مخليني هتجنن ومش قادره استوعب لحد دلوقتي ليه حالكم وصل لكده يا علي ليه إتخليت عنها ! علي : عليا كفايه أرجوكي أنا بموت فـ اليوم ألف مره فـ بعدها ما تزوديهاش عليا عليا : علي : أكيد شوفتيها مش كده ؟! هي كويسه ؟! عليا : يعني إلي حد ما الحمدلله بقت أحسن هَنا خرجتها شويه من حالتها خصوصاً إني باخدهالها من الصبح ونقضي معاها اليوم كله فـ المصحه علي : مصحه !!! مصحة إيه دي ؟! عليا : يـــاه كمان ما تعرفش دي !! داليا فـ المصحه بقالها فتره بعد ما حاولت تنتحر إنتفض علي من ع الكرسي : إنتي بتقولي إيه داليا حاولت تنتحر إمته وإزاي ؟! عليا : يوم فرحك تحديداً حاولت تقطع شرايين إيديها والحمدلله لحقوها علي آخر لحظه ومن يومها وهي موجوده فـ مصحه نفسيه علي : مش ممكن !!! لا حول ولا قوة إلا بالله العلي العظيم ليييه كل ده يحصلنا يا رب لييه أنا بجد تعبت ، انا حاسس إني بضيع بل بالفعل انا ضعت خلاص بص لـ علياء : يلا بينا نروح عند داليا علياء : داليا مين لأ إستنه إنت ماينفعش تقربلها خالص ظهورك ممكن يخلي حالتها تنتكس بلاش يا علي عشان خاطري ،، إلا صحيح أنا مش شايفه مراتك هنا يعني هي فين ؟! بص علي فـ الأرض : هاله عرفت كل حاجه وهنتطلق بعد يومين إن شاء الله علياء : إيييييه مش ممكن ! ... دكتوره يسرا عملت لهاله شوية إختبارات وبعد إنتظار ردت يسرا وهي فرحانه : مبروك يا ماما هاله إنتي حامل هاله : لأ لأ مش ممكن يحصل أرجوكي يا يسرا إتأكدي !! يسرا : والله متأكده إنتي حامل ، عارفه فرحة أول خبر بتبقي الأم مش مستوعبه هاله : لأ ده مش ممكن يحصل ، مستحييل ماينفعش أصلاً !! يسرا : هو إيه ده إللي ماينفعش !! أنا مش فاهمه حاجه يا هاله مالك !!! هاله : أنا أسفه يا يسرا بس لازم أمشي حالا متشكره جداً يسرا : هاله طاب إستني يا بنتي شكلك مش طبيعي إنتي كويسه ؟!! هاله هاله !!! مشيت هاله من غير ما ترد عليها ، ماقدرتش تسوق فنزلت من عربيتها وركبت تاكسي لبيتهم ، دخلت بسرعه وقفلت الباب علي نفسها ، بصت فـ المرايه وصوت يسرا بيتردد فـ ودنها : (( مبروك يا ماما هاله إنتي حامل ))(( إنتي حامل ، إنتي حامل )) حطت إيديها علي ودنها وصرخت : لأااااا ماينفعش ، رحماك يا رب أمها إستغربت إنها دخلت علي أوضتها وماردتش عليها ولا رضيت تفتح باب الأوضه ، لقت التليفون بيرن ردت وكانت يسرا بتطمن علي هاله لإنها لقت موبايلها مقفول وأمها عرفت من يسرا إنها حامل وفرحت جداً عشانها فضلت تخبط ع الباب وبعد إلحاح منها فتحت هاله وعيونها حمرا من كتر البكا _ هاله حبيبتي مالك يا روح قلبي ! إترمت فـ حضن أمها : أنا تعبانه اووي يا ماما إنتوا ليه جوزتوني ليييييه _ ليه كل ده يا روح قلبي فيه واحده لسه عارفه إنها حامل وتعمل كده !!!!!! هاله : الجنين ده مش لازم يعيش _ إيه إللي بتقوليه ده يا هاله إنتي إتجننتي إستغفري الله يا ماما هاله : إستغفر الله العظيم وأتوب إليه ، يـــــــــــــــا رب _ ليه بتقولي الكلام ده يا حبيبتي !! هاله : _ شكل شكّي فـ محله إنتي متخانقه مع علي ؟ سكتت هاله شويه وبعدين ردت : أنا وعلي هنتطلق بعد يومين _ إييييييييه :: إنتي بتقولي إيه إنتي إتجننتي هاله : ماما لو سمحتي من غير أسئله كتير انا وعلي إكتشفنا إننا مش مناسبين لبعض وإتفقنا ع الطلاق بعد ما يرجع من السفر إن شاء الله _ إنتوا إتهبلتوا هو لعب عيال ده جواز هاله : ماما أرجووكي ما تزوديهاش عليا انا بموت فـ اليوم ألف مره ومحدش حاسس بيا _ نزلت دموع أمها وهي بتضمها لحضنها : بس يا روح قلبي طيب إستهدي بالله وهنتكلم فـ الموضوع ده بعدين إتسطحت هاله ع السرير وأمها بتمسح علي شعرها وتقرالها قرآن لحد ما نامت بصتلها بألم لحالها وحيره ،،نفسها تعرف حصل إيه يوصلهم للطلاق ! هي عارفه كويس أوي إن بنتها بتحب علي من قبل ما تتجوزه وهاله بطبيعتها صبوره أكيد إللي يخليها توصل للحاله دي حاجه كبيره اوي ،، تمتمت وهي باصه لبنتها إللي نايمه ودموعها علي خدها : يا تري عملت إيه يا علي كسر بنتي بالشكل ده : ... جاسر وناريمان إتقربوا من بعض جداً وكل ما تتقرب المسافات بينهم أبوه ينبسط منه أكتر وبالتالي يديله صلاحيات وأملاك فقرر إنه يقبل بقرارهم ويخطب ناريمان وتوقيع عقد الشراكه إللي بين الزغبي والصايغ هيكون يوم الخطوبه إحتفالاً بالشراكه والنسب مع بعض صحيت هاله ولقت أمها مجهزالها كوباية لمون شربتها وإبتسمت لأمها عشان تطمنها ، إتكلمت مامتها معاها شويه وحاولت تفهم سبب الخناقه إللي بينها وبين علي ! لكن هاله برده ما إتكلمتش فضلت تقول شوية أسباب مش مقنعه وأول ما أمها قالت إن أبوها عرف وناوي يكلم علي راحتله أوضته وطلبت منه وهو وأمها ما يتدخلوش فـ أي حاجه لإنها مصممه ع الطلاق بالإضافه لإنها طلبت محدش يقوله عن حملها علي الأقل فـ الوقت الحالي لحد ماهي إللي تقوله ~ وأخيراً داليا خلّصت اللوحات وبعتت ممرضه لدكتوره نِهال تبلغها جت نِهال لأوضة داليا وهي متحمسه جداً ومبسوطه نِهال : وأخيراً يا داليا خلّصتي داليا : خلّصت وغيرت هدومي وجاهزه أروح معاكي دلوقتي حالاً القسم هاله : تمام بس معلش هننتظر ساعه لحد ما طارق يكون موجود هناك ولحد ما نروح إيه رأيك ندردش شويه مع بعض وتفرجيني علي رسوماتك) ؟ مسكت داليا اللوحات وناولتهالها : شوفيهم إنتي انا مش عاوزه ابص فيهم تاني قلّبت نِهال فـ اللوحات وبصت لداليا : هو المتهمين 4 داليا : لأ ، أول 3 دول إللي إرتكبوا الجريمه فعلياً والرابع ده البواب الشاهد الوحيد علي إللي حصل ويعتبر مشترك فـ الجريمه بصمته نِهال : تمام طيب مش فاكره أي أسماء ؟؟!! داليا : فاكره إسم البواب كويس أوي إسمه عوض وتالت واحد كمان هو الوحيد إللي سمعت اسمه يومها نادوه بـ مصلحه ! نِهال : كويس جداً ، حقيقي بجد بهنيكي علي شجاعتك دي يا داليا داليا : ممكن أنزل عنبر 121 ؟ نِهال : ليه ؟! داليا : عاوزه أطمن ع البنات إللي فيه نِهال : طيب يلا بينا داليا : لأ عاوزه أروح لوحدي نِهال : خلاص زي ما تحبي روحي وانا هنتظرك تحت نزلت داليا للعنبر وبصت لساميه وإفتكرت قصتها شافتها وهي بتصرخ لحظة ألمها > ، وبسرعه حوّلت نظرها علي لبني تخيلت كل ليله وجوزها بيضربها ويغتصبها وهي مكسوره وضعيفه ولاّ عبير إللي لسه بتتلفت حوليها بخوف ، تخيلت صدمتها لما فتحت عيونها ولقت كل شيئ إنتهي، وأخيراً وقفت عند منار تأملتها وتخيلت الحادثه بكل تفاصيلها ، سمعت صرخات الطفله منار فـ ودنها إتمنت لو لحظتها كانت معاها تحميها وتطمنها قربت منها بهدوء وضمتها لحضنها أووي ونزلت دموعها :'( رغم إنها متأكده إن منار مش هتفهمها بس فضلت تشكيلها وتقولها : أنا خلاص قررت أخدلك حقك إنتي وباقي البنات اللي هنا ، هاخدلك حقك من إللي إغتصبك وقتل طفولتك وأردلك إعتبارك وحياتك يا منار ما تخافيش أنا جنبك وحاسه بيكي أوي يا حبيبتي وزي ما تكون منار فهمت بصتلها بكل براءه ونامت فـ حضنها فضلت داليا تربت علي كتفها لحد ما جت ممرضه وبلّغتها إن دكتوره نِهال فـ إنتظارها ، فودعت منار وباقي البنات وقبل ما تمشي بصّت علي السرير الفاضي وتمتمت : قريب أوي هتتشال من هنا ، قريب أوي العنبر ده هيفضي ،يــــا رب قوّيني ... أم هاله وابوها كلموا علي وطلبوا منه يجي البيت عشان يشوفوا حل لمشكلته هو وهاله ! راح علي ولما سألوه عن إللي حصل ماعرفش يقولهم إيه أنقذته هاله من الموقف ده وطلبت منهم محدش يتدخل ده قرارهم النهائي ، أمها كانت علي وشك تقوله عن حملها لكن هاله وقفتها ، مشي علي بعد ما هاله أقنعتهم إنها خلاص مصممه علي قرار الطلاق أم هاله : طيب وإللي فـ بطنك يا هاله ثم إن علي من حقه يعرف ؟!! هاله : مفيش داعي يعرف يا ماما لإني هنزل الجنين أم هاله : يا نهارك مش فايت إنتي خلاص إتجنيتي إزاي تفكري فـ حاجه زي ده هاله : ماما عشان خاطري سيبوني براحتي _ هو لبس هتشتريه ولا أكله دي حياتك يا ماما !!! هاله : وانا عرفت إن مفيش خطر علي حياتي حالياً الجنين لسه فـ بداية أيامه مش هيأثر عليا صحياً ، وكده كده أنا وأبوه هنتطلق خلاص وانا مش عاوزه أي حاجه تربطني بـ علي بعد الطلاق إن شاء الله هسافر بره وأرجع لحياتي الطبيعيه إللي كانت قبل الجواز _ يا حبيبتي بسـ قاطعتها : ماما أرجوكي أنا مش مستحمله اي كلمه أنا مستحيل هرجع عن القرارات إللي أخدتها دي وإنتي وبابا عودّتوني من صغري إنكم تحترموا قراراتي فأرجوكم تسيبوني علي راحتي أنا فاهمه انا بعمل إيه ومعلش يا ماما من فضلك انا تعبانه وعاوزه انام شويه ممكن تسيبيني لوحدي _ حاضر يا حبيبتي خرجت وسابتها لوحدها ، بصت هاله للمرايه وهي حاطه إيديها علي بطنها ، إفتكرت إزاي حلمت باليوم ده ودلوقتي بعد ما جه اليوم إللي حلمت بيه هتدمر كل حاجه بإيديها لـ لحظه فكرت ترجع عن قرارها وتربي هي طفلها لكن إفتكرت إنها مش عاوزه حاجه تربطها بـ علي ، فضلت ماسكه بطنها وبتبكي فتحت شنطتها وطلعت الموبايل أكدت ع الحجز بكره عشان تنزل الجنين ... نِهال وداليا وصلوا القسم ، داليا أول مره تدخل قسم فأول ما دخلت من البوابه إرتبكت مسكت نِهال إيديها وضغطت عليها بلين وهي مبتسمه عشان تطمنها ، سمّت الله وكملت مشي ، وصلوا لـ مكتب طارق ، رحّب بيهم جداً وشكر داليا علي شجاعتها فـ إنها إتخذت قرار زي ده، طلب من داليا تحكيله الحادثه بالتفصيل ، بدأت تحكي ومن العصبيه والألم لما إفتكرت الحادثه بقت بتضغط علي إيديها بأظافرها نِهال لاحظت حركتها دي لما لقت إيديها مجروحه فسحبت إيد داليا وضمتها بينإيديها وهي بتحاول تهديها ، خلّصت داليا ودموعها نازله من غير صوت ، وجه وقت الرسومات مسك طارق اللوحات ، نِهال شرحتله زي ما داليا قالتلها فـ المصحه بس أضافت : أول واحد ده يا طارق من وقت ما شفت اللوحه وانا حاسه إني شفته قبل كده بس مش قادره افتكر فين !! سكت طارق شويه وهو بيتأمل الصوره : أها شوفتيه لما كنتي عندي هنا يا نِهال نِهال : إزاي طارق : ده جاسر الزغبي كنتي عندي هنا لما كان فـ لقاء فـ التليفزيون نِهال بتحاول تفتكر .. نِهال : أيوه أيوه صح إييييه مش ممكن : معقوله يكون هو واحد من الـ .. أه يا حقير يا قذر داليا مش فاهمه حاجه ، فتح طارق اللآب توب وشغّل النت كتب إسم البرنامج وتاريخ الحلقه ع اليوتيوب وجتله ، بص لداليا وقالها : داليا أنا دلوقتي هعرض عليكي فيديو وعاوزك تركزي كويس أوي وتشوفي الشخص إللي فيه واحد من إللي إعتدوا عليكي ولا لأ ماشي ؟ هزت راسها بالموافقه طارق : جاهزه ؟ إتنهدت داليا وردت : جاهزه شغّل الفيديو وحطه قصاد داليا ....بصت بتوتر وأول ما لمحت جاسر جحظت عنيها ورجعت للحادثه بكل تفاصيلها سمعت فـ ودانها كل كلمه قالها وحست بكل لمسه حتي ريحة أنفاسه القذره شمّتها طارق : ها يا أنسه داليا ده واحد من إللي إعتدوا عليكي ؟ بدأ جسمها يرتجف،،، الفيديو شغال بس هي ما بتتفرجش عليه عقلها دلوقتي رجع بيها لفيديو تاني خالص ، فيديو مصوّر فـ ذهنها بأدق تفاصيله ومش قادره تنساه، طارق ونِهال بيبصوا لبعض ومنتظرين داليا ترد ، بدأت داليا تتنفس بصعوبه وتخرج منها صوت أنّات مكتومه، زادت رجفتها ونِهال بتكلم فيها وهي ولا هي هنا ، رفعت إيديها للشاشه وحطتها علي وشه وبدأت تخربش الشاشه بأظافرها وهي بتجز علي سنانها رفع طارق اللآب توب بعد ما خلاص فهموا إن جاسر واحد منهم وداليا بدأت تتشنج ونِهال بتحاول تفوقها من الحاله دي ... علياء : علي أنا بجد مش مستوعبه الإستهتار إللي إنت فيه ده !!! هو حياة بنات الناس لعبه ! إزاي هتطلقها !! علي : هاله هي إللي مُصره ع الطلاق يا علياء علياء : طيب هي مُصره إنت عادي كده تنفذلها رغبتها !!! علي : وعوزاني أعمل إيه ؟!! علياء : يا جبروتك يا اخي انا مش مصدقه ان علي أخويا هو إللي واقف قصادي دلوقتي ده !! إنت مش مكفيك إللي عملته فيها ! أنا لو من هاله كنت قتلتك علي : علياء الله يكرمك ! إنتي جايه عشان تزودي همي علياء : كنت جايه اسلم على أخويا إللي بحسبه زي ما هو بس إتغير أووي أو يمكن انا اللي كنت فاهمه غلط من الأول يا علي علي : علياء عشان خاطري خليكي جنبي ، أنا عارف إني غلطت فـ حق داليا أووي علياء : مابقتش داليا لوحدها إنت غلطت كمان فـ حق هاله وإللي المفروض تعمله دلوقتي تصلح الغلط ده وتعتذر لمراتك وتراضيها بكل الطرق وتحاول ترجعها للبيت من تاني علي : مابقاش ينفع يا علياء أنا مش هقدر أعيش مع واحده غير داليا علياء : بس داليا خلاص بقت أبعد ما يكون ليك ، من عاشر المستحيلات إنك ترجعلها ومن عاشر المستحيلات إنها تسامحك علي كسرة قلبها صالح هاله بدل ماتخسر كل حاجه !!!! علي : أنا تعبت بجد وحاسس إن حياتي كلها إتدمرت علياء : إنت إللي دمرت حياتك بإيديك يا علي علي : بصت علياء فـ الساعه وقالت : عموماً أنا لازم أمشي دلوقتي زمان داليا رجعت المصحه ولازم أشوفها قبل ما الزياره تنتهي علي : هي داليا راحت فين ؟ علياء : راحت عشان تبـلّـ ........ مش شغلك يا علي ،المهم تفكر فـ إللي قولتلك عليه وتروح ترجع هاله حاول تاخد قرار واحد صح فـ حياتك ! مشيت علياء بعد ما رمقته بنظرة أسي قلبها واجعها علي أخوها ونفسها تضمه لحضنها أوي بس فـ نفس الوقت مقهوره من تصرفاته ، نزلت أخدت تاكسي وراحت ع المصحه ...... ... هديت داليا من التشنجات ، خلّصوا كتابة المحضر ، نِهال ضامه إيد داليا وبتشربها كوباية اللمون إللي طارق طلبهالها نِهال : وبما إننا خلاص دلوقتي يا طارق أصبحنا متأكدين إن الحقير إبن توفيق الزغبي واحد من المتهمين وداليا قدمت البلاغ رسمي ياريت تقبض عليه وفـ أسرع وقت طارق : لا يا نِهال الامور ما تتاخدش بالشكل ده خالص وخصوصاً إن توفيق الزغبي مش شويه فـ البلد رفعت داليا راسها وبصت لطارق وعيونها حمرا من كتر البكا والقهره : وهو عشان أبوه مش شويه فـ البلد مش هقدر أخد حقي !!!!! طارق : لا خالص انا ماقولتش كده ، إللي أقصده إن الموضوع محتاج تخطيط لإن أى خطوه غلط فـ الموضوع ده هتتاخد ضدنا بص لـ نِهال وكمل : وأظن يا نِهال إنتي شوفتي إزاي قدر يطلع من قواضي الأغذيه الفاسده وغيرها رغم إننا بنمسكه متلبس بس برده بيطلع منها بكل سهوله تِعبان زي ده لازمله تفكير بطريقته هو ! نِهال : بس دي مش قضية عاديه يا طارق دي قضية إغتصاب المجني عليها جايه تقدم البلاغ ورسمت الصور بكل وضوح ؟! طارق : عارفه لو سمعت كلامك وروحت دلوقتي قبضت عليه فـ ظرف ساعه هيختفي البواب من الوجود بل وممكن الفيلا نفسها ، هينفي إنه يعرف الباقيين اصلاً ومش بعيد يلبس لداليا كام تهمه وكام قضيه و لحد ما تطلع منهم يكون إبنه فـ طيارته لبره مصر ! نِهال وداليا : !!!!! نِهال : طاب وناوي علي إيه يا طارق ؟!! طارق : مبدأياً كده إن شاء الله ناوي أراقبه هو وباقي المتهمين عشان نقدر نجيب معلومات كافيه عنهم المهم ما تقلقيش وباقي التفاصيل ده شغلي بقي يا دكتور ما تسألنيش عن حاجه تاني نِهال : مش عارفه ليه بدأت أقلق .. فـ الأول فرحت وقلت الموضوع سهل بس كلامك خوفني طارق : كلامي مش عشان أخوفك عشان بس تبقي عارفه نوع الخصم إللي بتتعاملي معاه فـ القضيه وتبقي عارفه راسك من رجليكي مش معناه إننا مش هنقدر ناخد حق داليا لا بالعكس ما تقلقيش نِهال : ربنا يستر طارق : وبعدين إنتي مش واثقه فيا وفـ قدراتي ولا إيه يا بنت خالتي !! نِهال : ولو مش واثقه إنك هتقدر ماكنتش لجأتلك من الأول يا طارق طارق : نِهال : هنمشي إحنا بقي عشان تشوف شغلك ربنا يعينك طارق : تمام وماتقلقيش عاوزكم تطمنوا خالص المره دي أنا مش هسمح لتوفيق الزغبي يمارس سلطاته عشان يداري علي قذارة إبنه إبتسمت نِهال ومسكت داليا من إيديها ولسه هيمشوا نده طارق : أنسه داليا ! إلتفتتله داليا طارق : إنتي ماتعرفنيش عشان أطلب منك تثقي فيا بس رغم كده أنا بطلب تثقي فيا وتأكدي أنا هجيبلك حقك وإلا هبقي ما استحقش البدله إللي لابسها دي بل ومااستحقش كلمة راجل) ! هزت داليا راسها وظهر شبح إبتسامه علي شفايفها فبادرها طارق بإبتسامه قبل ما تمشي هي ونِهال ...... بعد ما خرجوا بص طارق للرسومات وهو بيفكر فـ إللي ناوي يعمله ، مسك موبايله وطلب رقم : أيوه يا وحيد عاوزك فـ مكتبي دلوقتي ! طارق قرر مش هيضيع وقت وهيبدأ من اللحظه دي ~ ... هاله من وقت ما صحيت وهي حاسه قلبها مقبوض أو مكسور مش عارفه حاسه بإيه بالضبط مشاعر كتير متلغبطه قفلت شنطتها بكسل وقبل ما تخرج من الأوضه بصت فـ المرايه ولقت واحده تانيه ، حطت إيديها علي بطنها فإرتعشت إيديها لما إفتكرت إنها رايحه دلوقتي عشان تتخلّص من حته من روحها إتكونت فـ أحشائها وعلي طول حضنت دموعها خدودها وكإن الدموع دي بتحاول تواسي قلبها ، كانت حاسه من يوم ما إرتبطت بـ علي إنها مش هتشوف الدموع فـ عنيها ولا هتشوف لحظة أسي أو ألم وكل إللي كانت فاكراه طلع سراب وأصبح علي هو أكبر ألم فـ حياتها خرجت من شرودها علي إيد أمها بتربت علي كتفها فرفعت إيديها ومسحت دموعها عشان ماتوجعش قلب أمها أكتر من كده : * عشان خاطري يا هاله فكري تاني والله لتندمي علي القرار ده لو نفذتيه مافيش أم بتفكر تعمل كده عشان خاطري ماتخليش الغضب يعمي عنيكي هاله : ماما عشان خاطري ماتزوديش وجعي أنا ما صدقت أقنعت نفسي ومش مستعده أرجع عن قراري > بدأت أمها تبكي فضمتها هاله لحضنها : أنا أسفه إني وجعتك وخليت دموعك تنزل ونكدت عليكي إنتي وبابا الفتره دي غصب عني والله يا ماما سامحوني * يا حبيبة قلبي إحنا كل همنا راحتك ومصلحتك طيب علي الأقل قوليلنا حصل إيه بينكم وصّل الأمور لكده ؟!! هاله : ـــــــــــــــــــــــــ ــــــــــــــــــــــــ * طيب بلاش أبوكي إحكيلي أنا ووعد والله ما هحكيله حاجه بس طمني قلبي بقي يا بنتي هاله : ماتقلقيش عليا يا ماما ، صدقيني لو كان ينفع أقول أكيد كنت هقولك مش قصة إني بعتبركم غرب ولا عاوزه أقلقكم بس شايفه إن أنا وعلي خلاص هننفصل فملهوش داعي نتكلم عن الأسباب مادامت النتيجه واحده وقبل ما أمها تتكلم تاني بصت فـ الساعه : بعد إذنك يا ماما بقي عشان ما أتأخرش علي يسرا ، العمليه مش هتاخد وقت خالص ساعه بالكتير وهتلاقيني عندك يلا بقي عاوزه أشوف إبتسامتك إبتسمت هاله غصب عنها فبادرتها أمها بشبح إبتسامه :')) ، إتنهدت هاله ومشيت ، شاورت لتاكسي وقالتله علي عنوان العياده .. وطول الطريق حاطه إيديها علي بطنها وبتسترجع كل إللي مر فـ حياتها مع علي > ، ونزلت دموعها لما إفتكرت اليوم إللي حست فيه بندمه علي جوازه منها وحكلها كل الحقيقه إللي كان مخبيها عنها وسايبها عايشه مخدوعه وعلى عماها معاه خرجت من شرودها علي صوت السوّاق : إتفضلي يا مدام العنوان أهه هاله : شكراً ! أول مره تدخل العماره إللي كل يوم بتدخلها لعيادتها وتحس الإحساس ده لـ لحظه كانت هتتراجع عن قرارها وترجع مع نفس التاكسي لبيتهم بس كلام علي رن فـ ودنها فإستجمعت قواها ودخلت العماره وقفت على باب عيادة يسرا لـ لحظات بتتأمل العياده والموجودين فيها ، إستقبلتها الممرضه أحسن إستقبال وخلتها تقعد 10 دقايق لحد ما تبلغ دكتوره يسرا قعدت هاله وتأملت الحوامل إللي فـ العياده، شايفه إللي قاعده هناك قصادها واضح إنها فـ شهرها الأخير بطنها كبيره أوي وجوزها قاعد جنبها ماسك إيديها وحاطط إيديه التانيه علي بطنها وبيكلمها وهو مبتسم وواضحه الفرحه فـ عيونها بصت لـ إللي هناك عند الباب بطنها يدوبك ظاهره ، قاعده جنب جوزها وسانده راسها علي كتفه قبّل راسها بحنان وهو ماسك إيديها ، منظرهم خلّي هاله غصب عنها تبتسم ، إفتكرت أحلامها باليوم ده ، اليوم إللي تيجي فيه العياده وتسند راسها على كتف علي ، أهه دلوقتي قاعده فـ العياده بس فرق كبير أوي بين حلمها وبين الكابوس إللي عايشه فيه دلوقتي خرجت من شرودها علي سؤال إللي جنبها : إنتي فـ الشهر الكام يا حبيبتي إبتسمت هاله ونسيت هي جايه ليه : أنا لسه فـ أول شهر _ ما شاء الله ، أنا فـ السابع بس خدي بالك هتتعبي فـ أول الشهور كده معلش هي الشهور الأولي والأخيره متعبه شويه ربنا يقومك بالسلامه هاله : اللهم آمين _ الدكتوره شافت فـ السونار إن فـ بطني بنوته ^_^ إنتي نفسك ربنا يرزقك بولد ولا بنت ؟ هاله : أنا نفسـ ..... وكإن الذاكره رجعتلها وإفتكرت هي جايه هنا ليه فحست بوجع فـ قلبها > ولما الست إللي جنبها كررت السؤال ردت بلا مبالاه : كل إللي يجيبه ربنا خير وهنا جت الممرضه وبلّغت هاله إن الدكتوره فـ إنتظارها ، قامت معاها ، سلمت علي يسرا يسرا : هاله خلاص متأكده إن ده قرارك النهائي ؟ هاله : أه يا يسرا يسرا : يعني مستعده ؟ هزت براسها بخوف > ، أخدتها الممرضه أوضة العمليات وبدأت تغيّر هدومها ، لبست وإتمددت ع السرير ، حطت إيديها علي بطنها وسرحت فـ السقف ، إفتكرت المشاهد إللي شافتها بره وكل أحلامها إللي إتدمرت دخلت يسرا ومعاها دكتورة التخدير ، وبدأوا ، لحظات تأمل فـ السقف وسري المخدر فـ جسم هاله فراحت لدنيا تانيه ... داليا بعد ما رجعت المصحه لقت علياء فـ إنتظارها حكتلها عن إللي حصل ومشيت علياء ، أما عن داليا فحاولت تنام بس ما قدرتش كل ما تغمض عنيها تشوف جاسر فـ الفيديو إللي شافته عند طارق ، تفتح عنيها تشوف الحادثه مش عارفه تهرب إزاي حتي النوم بقي مصدر وجع ليها مش عارفه تهرب من واقعها بيه > لبست حجابها وفضلت تتمشي فـ المصحه لحد ما وصلت عند العنبر 121 ، لقتهم نايمين ماعدا منار بل ومالقتهاش فـ سريرها ! قلقت داليا ولسه هتخرج تبلّغ أي حد لمحت منار قربت فسمعت صوت بكاها ، لقتها قاعده فـ ركن وبتبكي ، سرت رعشه فـ جسم داليا أول ما شافتها وجريت عليها قعدت جنبها وضمتها لحضنها فضلت تهديها ، قومتها لسريرها ونامت جنبها وهي ضامّاها فـ حضنها عشان تطمنها وتحسسها بالأمان ... هاله من وقت ما رجعت من عند يسرا وهي مابطلتش بكا ، نايمه فـ سريرها وبتبكي دخلت أمها بالأكل وبتتحايل عليها تاكل _ يا هاله عشان خاطري كلي حاجه يا ماما وشك أصفر يا حبيبتي إنتي لسه عامله عمليه لازم تاكلي كويس هاله وهي بتبكي : يا ماما عشان خاطري سيبيني بقي قولتلك مش جعانه انا كويسه بس عاوزه انام لو سمحتي سيبيني أنام شويه _ ما انا لو شيفاكي نايمه هسيبك انما من ساعة مارجعتي ما بطلتيش بكا مش قولتلك هتندمي علي القرار ده > هاله : مامااااااااا كفايه أرجوكي لو سمحتي سيبيني لوحدي شويه خرجت أمها وسابتها لسه بتبكي قعدت مع زوجها بره وسمعت جرس الباب فتحت وكانوا أهل علي عرفوا إللي حصل بين علي وهاله وجم يفهموا منها السبب لإن علي مش راضي يتكلم ، أمها كانت داخله تبلغها وقفتها علا وطلبت منها تدخلها ، خبّطت ع الباب هاله : ماما قولتلك من فضلك سيبيني لوحدي شويه علا : طيب ممكن أدخل أنا ولا هتطرديني بقي مسحت هاله دموعها وحاولت تقوم ، قعدت ع السرير بوهن : إتفضلي يا علا سلمت علا عليها وقعدت علي حرف السرير علا : إيه إللي عرفته ده بقي إن شاء الله !! طلاق إيه إللي ناويين عليه ده يا هاله ؟! هاله : زي ما سمعتي كده يا علا أنا وعلي هنتطلق علا : والسبب ؟! هاله : عادي إكتشفنا إننا مش مناسبين لبعض علا : وإنتي شايفه ان ده سبب مقنع يعني ! وبعدين أنا أول ما اتجوزت انا وجوزي كان بينا خناقات كتير ده غير الخناقات إللي بيني وبين أهله ودلوقتي عايشيين حياه سعيده الحمدلله ومافكرناش لحظه واحده فـ الطلاق ، أي إتنين فـ بداية حياتهم بتحصل خناقات عادي يا حبيبتي بس ماينفعش نوصل أي حاجه للطلاق كده ! هاله : ليه عملتي فيا كده يا علا علا بتعجب : مش فاهمه عملت فيكي إيه ؟! هاله : أنا وإنتي كنا صحاب أوي ، أخوكي وخبّي عني الحقيقه ونقول عادي رجاله كتير بيخبّوا ماضيهم لكن إنتي إزاي قبلتي إني أتحط فـ الموفق ده وأخوكي يخليني أعيش معاه مخدوعه بالشكل ده ! حست علا بغصه فـ حلقها ، بلعت ريقها وردت : أفهم من كده إن السبب فـ قرار طلاقكم هو موضوع داليا ! هاله : بالضبط كده ، كان نفسي تكوني ليا صاحبه بجد وماتخبيش حقيقة أخوكي وتجمليه فـ عنيا أكتر وتداري عليه ! علا : علي ما عملش حاجه غلط يا هاله عشان أداري عليه هو بس كان محتاج شوية وقت ! هاله : طاب وانا ذنبي إيه ! علا : أنا عارفه انك بتحبيه عشان كده كنت متأكده إنك هتقدري تنسيه داليا والدنيا كلها ضحكت هاله بسخريه : هه تقصدي أكون أسبرين يسكن ألمه يعني ! سكتت علا وماعرفتش ترد ، إتنهدت هاله وكسرت الصمت اللي بينهم هاله : أتمني ماتجبيش سيرة الموضوع او سبب الطلاق يعني لحد من أهلي وخلاص الموضوع مش مستحق نتكلم فيه أكتر من كده علا : أيوه يا هاله بسـ قاطعتها : علا أنا تعبانه جداً من أول اليوم ونفسي أنام شويه ، ممكن من فضلك تسيبيني لوحدي ! قامت علا من غير ما تنطق ، حاولوا بره يفهموا منها اللي حصل بس قالت ان هاله مش راضيه تتكلم وهاله بعد ما علا خرجت إتمددت ع السرير وحاولت تسترخي شويه يمكن النوم يزورها ... علي مش عارف ينام حاول لكن كالعاده النوم مجافيه كان متعود دايماً لما يتوجع وتضيق بيه الدنيا داليا ببسمتها وكلامها بتقدر تنسيه أي وجع ، عنيها بتاخده لدنيا تانيه .. دلوقتي مش لاقي حد يسانده فـ لحظة ألمه لإن الوحيده اللي معاها مفتاح ضحكة قلبه هي داليا قام من ع السرير ووقف فـ الشباك بص للسما وفضل يكلم النجوم ويبعت لـ داليا رساله مع القمر زي ما عودته دايماً / سكت فجأه وبدأت دموعه فـ النزول يمكن دموعه تخفف شويه من تقل الهموم إللي علي قلبه داليا نعست ومنار فـ حضنها ، قامت بهدوء وطلعت أوضتها وقفت فـ الشباك وبصت للسما ، فضلت تحكي للنجوم وتشكي للقمر، ورجعت فلاش باك ليوم ما راحت مع خالتها المصيف فـ إسكندريه ، بتحب أوي تقعد ع البحر فـ الليل ، وقتها ماكنتش مخطوبه لـ علي بس كانت بتجمعهم قصة حب من صغرهم ، فـ اليوم ده كانت متخانقه معاه، خرجت من الشاليه بالليل وكلهم نايمين ، قعدت ع البحر ، سرحت فـ جمال النجوم والقمر وصورتهم المعكوسه ع المايّه وخرجها من شرودها صوت علي : ولما حد يخطفك بالليل كده يعني أنا أروح فيها ! فيه واحده عاقله تخرج من الشاليه فـ الوقت ده ! داليا : علي : هي القطه كلت لسانك ولا إيه ! سابته داليا ولسه هتمشي مسك إيديها داليا : سيب إيدي لو سمحت يا علي علي : مش هسيبها غير لما تقفي وتكلميني زي ما بكلمك وقفت داليا وزفرت : نعم ؟! علي : إيه إللي مطلعك دلوقتي كده فيه إيه ؟! داليا : متضايقه شويه علي : من إيه ؟! داليا : والله ؟! طيب مفيش حاجه يا علي علي : طيب كنتي بتكلمي مين ؟! داليا : كنت بكلم أصحابي علي : أصحابك مين هنا داليا : القمر والنجوم علي : هههههههههههههههه ناقصه جنان حضرتك ! داليا : مش مصدقني !! حتي كنت دلوقتي بشتكيلهم علي : أمممممم بتشتكيلهم من إيه ؟! داليا : منك علي : والله ! داليا : أه والله وأصلاً دايماً لما تزعلني بشتكيلهم برده علي : طاب وقولتلهم ايه دلوقتي بقي ؟ داليا : قولتلهم إنك مزعلني وزعقتلي قصاد الناس إنهارده علي : كنتي عوزاني أعمل إيه يعني يا داليا والواد الفرفور ده بيتكلم معاكي كده عادي داليا : يا علي وهو حصل حاجه !! بيدرس فـ نفس كليتي وسألني شوية أسئله عاديه وكنا كلنا قاعدين يعني ماروحتش أتكلم معاه لوحدنا ! علي : بس إنتي عارفه إني مابحبش تتكلمي مع أي راجل وبغير عليكي جداً إنتي ماتتخيليش بحبك أد إيه يا داليا ، وبعدين فيه حد يزعل من حبيبه كده بقي داليا : ما هي المشكله إني مابعرفش أزعل من حضرتك علي : ما أنا عارف لإن مفيش أطيب ولا أرق ولا احن من قلبك فـ الدنيا دي كلها داليا : بس ما تاخدش علي كده هه حرك شفايفه وهمس : بحبك باصه داليا للسما ولسه قصادها صورته وهو بيهمس بشفايفه بحبك ! ضحكت بسخريه : هه ماكنتش أعرف يا علي إنك أكبر كداب ! إزاي كنت مخدوعه كل ده فيك ! إزاي بغبائي صدقت إنك بتحبني بجد ! إزاي ما شفتش السكينه إللي حاطتها ورا ضهرك وأول ما وقعت و كل سكاكينهم إتمدت عشان تدبح قلبي سكينتك إنت أول سكينه تدبحه ، وأكبر جرح وجعني هو جرحك إنت يا علي ، ده أنا بقيت بكره نفسي عشان بعد كل اللي عملته لسه مش قادره أكرهك بدأت تبكي كالعاده رفعت إيديها للسما ودعت بحرقه :يــــا رب إنزع من قلبي كل ذرة حب ليه :'( يا جابر المنكسرين إجبر كسر قلبي ... إنهارده ميعاد طلاق هاله وعلي إللي تفقوا عليه بعد تأجيلات كتيره بسبب أهلهم، هاله كانت بتلبس حجابها لما باباها خبّط ع الباب ودخل ، حاولت تبتسمله بس ما قدرتش ، قرب وطبع قبله علي جبينها أبوها وهو بيقعد ع السرير : أقدر أتكلم مع بنوتّي شويه ؟ هاله : بابا عشان خاطري خلاص فات أوان إننا نتكلم فـ الموضوع ده أو نأجله تاني أنا خلاص بلبس حجابي ومش هتأخر علي حضرتك عشان نمشي أبوها : طيب ومين قال إني جاي أقولك إرجعي فـ قرارك ؟! طاب ده حتي أخوكي لما عرف كان عاوز يتكلم معاكي وأنا منعته هاله : كويس أووي يا بابا لإني فعلاً خلاص مش مستحمله أي كلام تاني فـ الموضوع _ فاكره وإنتي صغيره ! لما تقعي فـ مشكله كنتي تيجي جري وتحكيلي ونحلها سوا فاكره ؟ إبتسمت هاله وعيونها بتلمع : فاكره طبعاً _ ومهما كبرتي هتفضلي بنتي الصغيره برده يا هاله ولاّ كبرتي عليا ! هاله : إيه إللي حضرتك بتقوله ده يا بابا !! لأ طبعاً _ طيب جربي تشاركيني همّك زي زمان يمكن نلاقي حل للمشكله دي ! هاله : بس المشكله دي خلاص ملهاش حل غير الطلاق _ طاب ممكن أعرف إللي حصل ؟! زفرت بنفاد صبر ، قربت من أبوها وقعدت جنبه هاله : بص يا بابا بإختصار علي فـ حياته واحده تانيه ومش بنتك هي إللي تكون مجرد إستبن ولا إسبرين ينسيه قصة حب دمرها بإيديه وأرجوك بعيداً عن أي تفاصيل دي كل الحكايه وبالتالي ماينفعش أعيش معاه تاني ، ماينفعش أغصبه يعيش معايا وهو 24 ساعه بيفكر فيها وكل مايبتسم فـ وشي ولا يقول كلمه حلوه بيبقي شايفها هي مش أنا مش هقدر أستحمل كده انا بجد تعبت وشوفت أيام صعبه اووي يا بابا أنـ ماقدرتش تكمل فضمها أبوها لحضنه وهو بيربت علي كتفها ويهديها : طيب خلاص يا حبيبتي عشان خاطري كفايه عياط ويلا قومي خلاص انا آسف ومحدش هيتكلم معاكي تاني فـ الموضوع ده وهعمل اللي إنتي عوزاه وإللي يريحك بس ما تعمليش فـ نفسك كده يا حبيبتي قامت من حضنه وهي بتمسح دموعها : بابا عشان خاطري ما تتكلمش مع علي فـ أي حاجه خلاص مابقاش له لازمه الكلام زفر أبوها : حاضر إللي تشوفيه ! إتناولت شنطتها ونزلت وهي حاضنه دراع أبوها ... مازالت علا بتتحايل على (علي) وتقنعه يكلم هاله تاني وبلاش موضوع الطلاق وهو بيرد هي إللي مصره ع الطلاق ! ، هرب من إلحاحها ركب عربيته وراح ع المأذون مكان ما إتفقوا يتقابلوا ... نِهال قدرت تخلّي داليا تثق فيها وبالتالي بدأت الجلسات وداليا فـ كل جلسه بتحكيلها عن حياتها من وقت ما كانت طفله ، كانت فـ جلسه مع داليا لما دخلت الممرضه _ دكتوره نِهال فيه تليفون عشان حضرتك نِهال : مين ؟ _ طارق بيه إبن خالة حضرتك إنتفضت نِهال من مكانها وهي بتقول لداليا : أكيد طارق عنده أخبار جديده فإبتسمت داليا وسابتها نِهال وراحت للتليفون نِهال : ألو أيوه يا طارق طارق : أيوه يا نِهال أخبارك ؟ نِهال : تمام الحمدلله ماكلمتنيش ع الموبايل ليه ؟! طارق : أنا بقالي ساعه برن ومابترديش حضرتك خبطت نِهال علي راسها : آآآآه صح أنا عملاه صامت وسيباه فـ المكتب عشان كنت فـ جلسه مع داليا طارق : هي داليا كويسه دلوقتي ؟ نِهال : أه أحسن الحمدلله المهم طمني عندك أخبار جديده ؟ طارق : الحمدلله جمعت كل كبيره وصغيره عن المتهمين نِهال : الله أكبر أخيييراً يا طارق طارق : معلش بقي طولنا شويه عشان كنت عاوز اعرف كل ثغره فـ حياتهم نِهال : طيب تمام أووي نقدر نجيلك إمته ؟ طارق : دلوقتي ياريت نِهال : تمام أووي هجيب داليا ونيجي إن شاء الله طارق : طيب بقولك هو مش هيكون خطر علي حالة داليا يعني إنها تسمع كلام فيه سيرتهم تاني يعني يمكن تتشنج وتحصلها الحاله إللي حصلت أول مره جيتوا هنا !! نِهال : لأ ما تقلقش بل بالعكس أنا عوزاها تعرف إنك ماشي فـ القضيه تمام عشان تحس من جواها بالطمئنينه وإنها هتاخد حقها ) طارق : طيب تمام فـ إنتظاركم نِهال : مع السلامه طارق : مع السلامه قفلت نِهال مع طارق وجريت علي داليا : قومي غيري هدومك حالاً داليا : خير فيه إيه ؟ نِهال : طارق قدر يجمع المعلومات عن المتهمين وعاوزنا عنده دلوقتي عشان نشوف آخر التطورات فـ القضيه إبتسمت داليا بقليل من الأرتياح وقامت تغير هدومها .... ... ليله من أحلى الليالي .... القمرفيها يرسل السلام والنجوم حولها تنسق الكلام ...عن قلبين محبين جمعهما الهيام سيتم خطوبة ابننا جاسر توفيق الزغبي على الآنسة ناريمان كريمة أشرف منير الصايغ وذلك في يوم_____وفي قاعة____ نتمني حضوركم حتي تكتمل فرحتنا ..... مريم كانت ماسكه الكارت ده وبتقراه ، لقته علي مكتب خالد وهي بتنضف أوضته ، قرأت الكارت : ده الليله !!! ضحكت بسخرية : هه هو إللي زي الأشكال دي بتاع جواز !!!!! الله يسامحك يا خالد معرفش ليه متصاحب علي ناس بالشكل ده !! دخل خالد : إيه يا مريوم خلّصتي ؟ مريم : أه يا حبيبي خلّصت أهه خالد : طاب الله يكرمك إكويلي القميص والبنطلون بتوع البدله مريم : حاضر خالد : ماسألتيش يعني كعادتك الفضوليه ( وهو بيقلد صوتها ) إنت رايح علي فين ؟! ضحكت مريم : هههههههه الله يسامحك أنا بتكلم كده ماشي ماشي ، عموماً ما سألتش يا سيدي لإني لسه قاريه الكارت حالاً مبروك خالد : الله يبارك فيكي مريم : عقبالك يا حبيبي قرب وحوطها بدراعه : لا لا لا عقبالي دي بعد ما أجوز حبيبة قلبي الباشمهندسه مريوم طبعت قبله علي خده : ربنا ما يحرمني منك أبداً يا روح قلبي قبّل خالد جبينها : ولا يحرمني منك أبداً يا أحن أخت وأم وبنت فـ الدنيا إبتسمت مريم وميّلت راسها لـ حضنه ..... ... شرب آخر نفس فـ السيجاره ، رماها تحت رجله وداس عليها_ خلاص يا مصلحه البدله السنيييييه جاهزه بس بالسعر إللي قولتلك عليه معلش بقي يا مصلحه مش هعرف أنزل أكتر من كده ثم إن أنا نفسي إشترتها ولسه ما لبستهاش ، المفروض أول لبسه بتمنها محمود : إنت هتصيع عليا ده أنا مصلحه يالا قاريك وحافظك البدله دي منظر والبدل القديمه إللي عندي أحسن منها مليون مره بس أنا حبيت أغير لإن إنهارده عزومه فـ مكان محترم فبلاش ترغي كتير هي الـ 60 جنيه ولو نطقت كلمه زياده هنزلهم لـ 50 وإنت عارفني صاحب البدله بنفاد صبر : طيب هات الـ 60 جنيه حط إيديه فـ جيبه وطلّع 50 جنيه _ لا لا لا قولنا 60 يا مصلحه محمود : أصبر يا إبن الـ (......) هطلع العشره من الجيب التاني طلّع 10 جنيه من الجيب التاني وإدهاله بضيق ، خد البدله ومشي ع البيت وهو بيصفّر ..... ... جاسر نايم وأمه مانعه أي حد يصحيه عوزاه يسترخي وينام براحته عشان يكون فايق فـ خطوبته الليله ، وبتباشر التجهيزات بعصبيه ونرفزه ع الخدم : أنا مش عاوزه أي غلطه إنهارده بالذات ، الصحافه والإعلام والعائلات المحترمه العيون كلها هتكون علينا وإللي هيغلط غلطه مهما كانت صغيره مش هغفرهاله وهيتطرد علي طول إتفضلوا علي شغكلم مايا : مامي مامي بليييز بقي تعالي علشان أوريكي الفستان أمها : مش ممكن مايا إنتي لسه جايه تجهزي الفستان إنهارده مايا : لا يا مامي بس أصل صراحه محتاره فـ الكولكشن إللي جالي من باغي وعوزاكي تيجي تختاري معايا فستان ! أمها : أوك روحي وهحصلك مايا : بس مام بلييز ما تتأخريش عاوزه ألحق أكمل تجهيزات ردت أمها وهي بتطلب رقم ع الموبايل : أوك أوك ! ... وصل علي للمأذون ولقي الكل فـ إنتظاره ، ألقي التحيه وبص نظره عامه ع الموجودين وإستقرت عنيه علي هاله إللي قاعده جنب أبوها باصه فـ الأرض والتوتر باين على ملامحها قعد وبدأ المأذون يكلمهم عن الطلاق وكونه أبغض الحلال عند الله وإقترح إنهم يقعدوا شويه مع بعض يمكن يتوصلوا لأي حل لكن قاطعته هاله وردت بـ حده : إحنا قعدنا كتير ولقينا أنسب حل هو الطلاق فياريت نبدأ فـ الإجراءات لذلك بدأ المأذون الإجراءات ، هاله سرحت فـ يوم كتب كتابها كان نفس المأذون إفتكرت فرحتها فـ اليوم ده وأحلامها والوعود إللي وعدتها لعلي بينها وبين نفسها إنها تسعده لآخر يوم فـ عمرها ، سمعت فـ ودنها (( بارك الله لكما وبارك عليكما وجمع بينكما في خير )) وفاقت منها علي صوت المأذون بيطلب توقّع علي الأوراق ، مسكت القلم بإيدين مرتعشه ووقعت إسمها وهي بتفتكر توقيعها علي قسيمة الجواز حست بغليان وخلاص دموعها هتنزل ، وقّعت بسرعه ، سحبت شنطتها وسبقت أبوها علي بره ، ركبت العربيه وإتفتحت فـ العياط خرج أبوها وهو بيبص لـ علي بغضب ، حاسس إنه عاوز يخنقه ويحسسه بكل لحظة ألم بنته حست بيها معاه لكن تراجع حتي إنه يرد على ( علي ) لم ندهله إحتراماً لرغبة بنته فـ إنه ما يتكلمش مع علي فـ الموضوع ساب علي وراح لبنته وهو سامع صوت شهقاتها ، بصلها بأسي ومانطقش مشي بالعربيه علي مكان هادي وأول حاجه عملها ضمّها لحضنه فضل يربت علي كتفها لحد ما هديت ، نزلوا بعد إلحاحه عليها طلبلها لمون وقعدوا يتكلموا شويه وتعمد ما يجيبش سيرة الموضوع ويحكيلها عن مغامرات شبابه وهو فرحان أوي لإبتسامتها وضحكتها علي المواقف إللي بيحكيها ، نقطة ضعف الأب ولاده وخاصه لو أب بيحب بنته بالشكل إللي أبو هاله بيحبها بيه، قرر يعمل المستحيل عشان يرجعلها ضحكتها من تاني ... وصلوا نِهال وداليا لمكتب طارق رحب بيهم كالعاده وبعد صمت ساد لدقايق سألت نِهال : ها يا طارق طلبت نيجي دلوقتي عشان تبلغنا بتطورات القضيه يلاا بقي ريحنا إبتسم طارق وإتناول ظرف أصفر من درج المكتب حطه قصاده وفتحه فيه 4 ملفات ، فتح أول ملف صوره وتحتها معلومات ، ،،أول صوره لـ (جاسر توفيق محمد أحمد ممدوح الزغبي ) الشهير بـ ( جاسر الزغبي ) داليا لما سمعت إسمه حست بقشعريره فـ جسمها ، كمّل طارق : توفيق الزغبي طبعاً غني عن التعريف عنده جاسر وبنت تانيه إسمها مايا، مايا أصغر من جاسر وبتدرس فـ أولي كلية إعلام ،،،،،،، جاسر إتخرج من كلية التجاره شعبة اللغه الإنجليزيه من صغره وطلباته من قبل ما يطلبها مجابه ، توفيق الزغبي كان نفسه بعد ما إتحرم سنين من الخلفه وجاله إبن يحمل إسمه إنه يكون إبنه ده سند ليه لكن خذله جاسر وكان عكس توقعاته عدي من الكليه بالعافيه ومابيروحش شغله إللي أبوه سلمهوله قبل حتي ما يتخرج حياته كلها سكر وسهر وكل يوم مع واحده ! داليا بتسمع وهي بتعتصر هدومها بإيديها من شدة الغضب ولإن صنف توفيق الزغبي طماع رغم كل إللي عنده من أملاك قرر يعمل صفقه وشراكه بينه وبين رجل الأعمال المعروف أشرف الصايغ وكان كالآتي إن جاسر يتجوز ناريمان بنت الصايغ وطبعاً الموضوع تم بسرعه و .... (إتردد طارق قبل ما يقول ) والليله خطوبة جاسر الزغبي وناريمان الصايغ إنتفضت داليا من مكانها بعصبيه : نعمممممم بأي حق وفـ شرع مين يعيش حياته ويخطب ويتجوز وأنا بعاني وحياتي كلها إتدمرت بأي حق قامت نِهال وربتت علي كتفها : إهدي يا داليا الله يخليكي ماتقلقيش يا حبيبتي طارق وعدنا هيجيبلك حقك أرجوكي إهدي رد طارق وعلي وشه علامات الأسف : بالضبط كده أرجوكي يا أنسه داليا تهدي أنا بس مجرد بقولك تفاصيل عنهم عشان تتعرفي علي خصمك ومش معني إنه هيخطب إنهارده يبقي هيعيش فـ هنا ما تقلقيش (قال بنبرة ثقه) : إللي مستنيه هيخليه مايشوفش لحظة سعاده فـ حياته أرجوكي إهدي بدأت ثورة داليا تخمد وقعدت من تاني عشان تسمع باقي الكلام بص طارق فـ الورق الخاص بـ جاسر وعدي باقي المعلومات عنه وفتح الملف الخاص بتاني متهم (خالد منصور الضبع ) متخرج من كلية التجاره شعبة اللغه الإنجليزيه برده عنده أخت واحده مريم فـ آخر سنه فـ كلية الهندسه ، أبوه وأمه عملوا حادثه وماتوا وسابوا خالد وهو فـ الإعدادي وأخته مريم صغيره كانوا عايشين فـ إسكندريه وبعد الحادثه إتنقلوا القاهره وعاشوا مع جدتهم مرت الأيام وسلوك خالد سوي لحد ما وصل للكليه ماتت جدته وأصبح هو و مريم لوحدهم فضل جنبها وبيصرف عليها من الميراث وأصبح أبوها وأمها وكل أهلها وبيخاف عليها جداً لحد ما إتعرف فـ الكليه علي جاسر و المتهم التالت وبدأت حياته تتغير للأسوأ وإختفت آخر صفاته المحترمه مع أول كاس وسيجارة حشيش يشربها مع الإتنين التانيين ولما لاحظ ملامح داليا فضل إنه مايكملش ويكتفي بشوية معلومات بسيطه عن كل متهم وبالتالي إنتقل لـ الملف التالت ( محمود رمضان الدهشوري ) والشهير بـ مصلحه إرتجفت داليا أول ما سمعت الإسم ، بصت بطرف عنيها ع الصوره المحطوطه وإفتكرت لحظة ما حط المطوه علي رقبتها وسحبها من شعرها ، سمعت فحيح صوته وألفاظه القذره فـ ودانها وبدأت دموعها تنساب لاحظ طارق دموعها فـ سكت ، إتناول منديل وإدهولها : أنا آسف مسكت داليا المنديل منه وقالت بصوت متهدج : أنـ أنا إللي إللي أسفه بس حقيقي غصب عني إللي شفته مش شويه طارق : طيب تحبي نكمل وقت تاني ؟؟ داليا وهي بتمسح دموعها : لأ لأ إتفضل أنا كويسه بدأ طارق يكمل : محمود درس شهر فـ تجاره إنجليزي مع جاسر وخالد بعدين حول لـ تجاره عربي معندوش إخوات غير بنت وولد من أمه ،، أبوه وأمه متطلقين من وهو عنده 9 سنين عاش مع أمه لكن بعد ما إتجوزت جوزها ماكنش مرحب بوجوده فـ البيت وبالتالي أمه إتخلت عنه وبعتته لأبوه لكن كان أبوه هو كمان إتجوز ، وبعدها قرر يسافر السعوديه و مراته وافقت ابنه يعيش معاها لحد ما أبوه يرجع ، فضلت معيشاه معاها زي الخدام فـ البيت و خلته يسرح بمناديل فـ الإشارات عشان يصرف علي نفسه وخدت هي المصاريف إللي كان بيبعتهاله أبوه ، مروا سنتين ورجع أبوه وطبعاً كانت ممثله بارعه فـ إظهار حبها لمحمود وحسن تربيتها ليه وهو ماقدرش ينطق ، إستقر أبوه فـ مصر ومحمود بقي عايش مشتت بين أبوه وأمه ومراة أبوه إللي معذباه فـ حياته لحد ما كبر محمود وإشتكت لجوزها إنها مش عارفه تاخد راحتها فـ بيتها فساب محمود عند جده إللي قرر يحتويه بدل الجفاء إللي عايش بيه بين أمه وأبوه وبالفعل رباه جده وبدأ يصلح إللي إتشوه فـ نفسيته وبدأ محمود إلي حد ما يبقي إنسان سوي ، كمل دراسته لحد ما وصل لتجاره انجليزي جده دفع مصاريف أول سنه وقبل ما تبدأ الدراسه كان جده ميت ، بدأ الدراسه ولقاها كلها كورسات ومصاريف وأبوه من زمان قاطع عنه أي فلوس وبالتالي قرر يحول لتجاره عربي لإنه مش هيقدر يكمل للآخر وقبل ما يحول كان إتعرف علي جاسر وخالد إللي علاقتهم ببعض فضلت مستمره حتي بعد ما حول شاركوا بعض حياة السكر والعربده ومابقاش يهمهم أي حد فـ الدنيا ، معاهم جاسر البنك المتحرك ومصلحه هو إللي بيجيبلهم أنواع المخدرات ودي أصبحت شغلته إللي بيصرف بيها علي نفسه عشان كده بقي مشهور بمصلحه زفر طارق ، بص لداليا ولقاها متحمسه تسمع أكتر ، ساب ملف محمود ومسك الأخير : ده بقي البواب ( عوض إسماعيل الهلالي ) عنده 50 سنه راجل صعيدي جه القاهره يشتغل بواب ومعاه مراته وبنته الوحيده هنادي عندها 17 سنه إشتغل بواب لعمارات كتيره قبل مايشتغل بواب لفيلا من فيلل توفيق الزغبي وهي الفيلا إلليـ وسكت طارق لما شاف عيون داليا إللي بقي لونها أحمر من شدة الغضب داليا أول ماسمعت إسم عوض علي طول رن فـ ودنها صوت جاسر : إقفل البوابه بسرعه يا عم عوض ! سمعت صوت صراخاتها وتوسولاتها وهي بتترجاه ينجدها وتقوله إعتبرني بنتك لكن هو إغتصبها زيهم بصمته بدأ صوت شهقات داليا يعلى لما إفتكرت إحساسها وهي بتتسحل فـ أرضية الفيلا بصت ع الملفات ولمحت صوره فيها التلاته بيضحكوا سوا إفتكرت الرعب إللي شافته ليلتها وكل لحظة ألم حستها وبدأت تتشنج ، قربت نِهال لكن داليا صرخت فـ وشها وفضلت تدفع نِهال وكإنها بتدافع عن نفسها منها ، وقف طارق وهو مرتبك مش عارف يعمل إيه ، هو ده إللي كان خايف منه وخرّجه من حالة الإرتباك نِهال وهي بتطلب منه يمسك داليا عشان تعرف تديلها الحقنه وأول ماقرب طارق منها إتشنجت أكتر وصرخت : إبعد عنييييي كلكم كلاااااب إبعد عنيييي لأااااااااااااااا قرب طارق من ورا ضهرها ومسكها من كتفها بحركه خلتها تثبت مكانها إدتلها نِهال الحقنه بسرعه دقايق وهديت داليا وبدأت تترنح وقبل ما تفقد الوعي سندها طارق علي الكنبه إللي فـ مكتبه وقفت نِهال وهي بتاخد نفسها بعد إللي حصل وطارق بعد ما سند داليا وقف وبصلها بعصبيه : قولتلك يا نِهال بلاش تجيبيها معاكي كنت متوقع هيحصلها كده نِهال : ماتقلقش يا طارق دي حالة طبيعيه وكنت متوقعاها شويه وهتفوق وترجع لطبيعتها إن شاء الله ، إتناول الجاكيت بتاعهه ، حطه علي داليا ورجع قعد علي مكتبه كمل كلام لـ نِهال عن المتهمين والإجراءات إللي هيبدأها وبعد ساعه فاقت داليا من غير كلام قربت منها نِهال بصت داليا حوليها بتحاول تفتكر ، وأول ما إفتكرت إللي حصل إعتصرت دماغها بإيديها وهي مش قادره تقاوم الصداع بصت لـ نِهال بوهن : ممكن نمشي ! نِهال : حاضر يلا بينا طارق : لحظه وهاجي أوصلكم نِهال : لا لا يا طارق خليك فـ شغلك إنت وماتقلقش أنا معايا عربيتي مشيت داليا نِهال سانداها لحد ما ركبوا العربيه ورجعوا ع المصحه وداليا طول الطريق ساكته ، طلعت أوضتها وإترمت ع السرير بصت للسقف شويه ، إفتكرت كلام طارق عن المتهمين ، كورت نفسها وبدأت نوبة البكا اليوميه ... علي من وقت ما طلق هاله وهو حاسس بالذنب أووي وبدأ حنينه لداليا يعذبه إتجمعت عليه كل أحزانه وفضل يفتكر فـ داليا وحياته معاها وحاله دلوقتي ودموعه نازله صفعات علي خده هاله منتظره شهور العده عشان تسافر ، جهزت كل الإجراءات وأبوها موافق علي كل حاجه تعملها المهم تكون سعيده ، جهزت كل حاجه وقررت ترجع تاني تستقر بره زي ما كانت قبل جوازها داليا هديت بعد ما راحت فـ نوع عميق وصحيت منه علي صوت هنا بنت علياء ،،،علياء راحت لداليا المصحه ومعاها هديه إتناولتها داليا وهي مبتسمه وأول ما شالت الغلاف وشافتها إيديها إرتعشت فوقعت الهديه من إيديها وبصت لـ علياء رجعت بصت للهديه والذكريات بتدور فـ دماغها ماقدرتش تقف قعدت ع السرير ، مسكت الهديه بإيدين مرتعشه ونزلت دموعها وهي بتتأملها مش عارفه تبتسم ولا تبكي من الحسره والقهره يا سلام يا سلام بقالي كتير أوووي محدش فاجئني بهدايا تفحصتها وهي بتقول : أممممم أخمن قبل ما أفتح ؟ علياء : خمني بس أنا واثقه إنها هتعجبك إن شاء الله داليا : هي أياً كانت هتعجبني لإن أبسط حاجه منك بتفرح قلبي وتخميني بيقول إنه كتاب أو يمكن بتمني كده أصل مدمنة قرايه زيي بقالها كتيير أوي ما قريتش بتتمني يقع فـ إيديها دلوقتي أي كتاب علياء : طاب إفتحي الغلاف يا دودة الكتب داليا : دوده برده ماشي ماشي أنا بس عامله إحترام لهنوش لولاها كان هيبقي ليا تصرف تاني معاكي يا بت إنتي بدأت تشيل الغلاف وأول ما شالته لقت كتاب إبتسمت بفرحه لكن إختفت الإبتسامه دي فجأه و إيديها إرتعشت فوقع الكتاب وبصت لـ علياء رجعت بصتله والذكريات بتدور فـ دماغها ماقدرتش تقف قعدت ع السرير ، مسكت الكتاب بإيدين مرتعشه ونزلت دمعه حيرانه وهي بتتأمله مش عارفه تبتسم ولا تبكي من الحسره والقهره علياء : داليا إنتي كويسه ؟؟؟ هزت داليا راسها بأيوه من غير ما تبصلها ،، بصت ع الغلاف (( Don't give up .... لا تستسلم )) للكاتب ريّان المصري علياء : أنا عارفه إنتي أد إيه بتحبي كتابات ريّان المصري وعرفت إنه منزل كتاب جديد قلت أجيبهولك أكيد مشتاقه للقراءه بصتلها داليا وهي بتبتسم بإمتنان تأملت الكتاب لمست حروف الإسم بإيديها وكإن اللمسه دي رجعتها للذكريات......لأيام ماكانت طالبه فـ الجامعه ، قاعده فـ الكافتريا منتظره علي وبتتسلي فـ روايه لنفس الكاتب ، وأخيراً ظهر (علي) من باب الكافتريا دخل وقعد وداليا مندمجه فـ القرايه ومش حاسه بيه ، نتش الكتاب من إيديها فـ إلتفتت داليا : إخص عليك يا علي جاي تنتشه فـ حته مهمه زي دي علي : أه أقوم أمشي يعني وجودي ملهوش لازمه داليا : لأ طبعاً إيه إللي بتقوله ده !!! ثم أنا مستنيه حضرتك بقالي ساعتين هه وتقولي أقل من ساعه وهكون عندك صح !!! علي وهو بيقفل الكتاب ويحطه قصادها : معلش يا حبيبتي الدكتور رخّم علينا وطوّل شويه غصب عني والله إبتسمت داليا : خلاص ولا يهمك مش زعلانه الأهم عندي مصلحتك إبتسم علي : هو أنا مش بقول أحن قلب فـ الدنيا يا ناس تشربي إيه ؟ داليا : مـ إللي إنت هتختاره إبتسم علي بخبث : طاب أنا هشرب بيريل تشربي معايا ؟! داليا : يععععع ع علي وهو بيضحك : ليه ده حتي طعمه لذيذ مسكت الكتاب وهتضربه بيه ،، علي : ههههههههه خلاص خلاص ده طعمه إستغفر الله العظيم انا عارف الناس دي بتشربه إزاي أنا بقول نخليها كوكتيل داليا : إذا كان كده ماشي جاب العصير ورجع لقاها بتقرا فـ الروايه علي :يا ربّي مش عارف إيه حكاية الكتب دي ،، الراجل ده بيستفزني داليا : ليه بس هو عملك إيه وبعدين إنت قريتله إمته يا بكاش عشان يستفزك !! علي : قريتله نص الكتاب إللي حضرتك جبتهولي هديه الشهر إللي فات بصراحه ومعرفش السبب ايه اتقفلت من القرايه ليه وماكملتش الكتاب وبعدين إنتي ليه بتقري كل كتبه بشكل مستفز كده داليا : مستفز ! كاتب وبحبه وـ قاطعها علي : نعم نعم قولي تاني كده كاتب وإيه ؟ داليا : إحم كاتب وبحب أقرا الكتب بتاعته أسلوبه ساحر بالفعل بحسه كده بيتكلم عني وسبحان الله لما أقع فـ مشكله ألاقي كتاب جديد نازل ليه وكإنه رساله ليا بتوجهني للصواب وتديني دفعة أمل معرفش إزاي بس بجد بلاقي نفسي بين سطور رواياته وكتبه العاديه كمان علي : أممممممم يمكن بس أنا سمعت إنهم ملقبينه بالكاتب الغامض ! داليا : أها ، لقبوه بالكاتب الغامض لإن محدش يعرف شكله ولا أي معلومات عنه غير إسمه حتي دور النشر مابيتعاملش معاهم بشكل مباشر وصرّح قبل كده فـ كتاب من بتوعه إنه حابب الأسلوب ده,,,, إنه مايعلنش عن نفسه و يكفي إسمه ،،بيحب الغموض وشخصيته بطبيعتها غامضه فحابب حياته لجمهوره والناس اللي بتقراله يعني تكون غامضه كمان ) علي : أممممم ما شاء الله ما شاء الله إلا قوليلي بقي هو بيحب ياكل إيه وإيه لونه المفضل ؟ داليا : إيه السؤال الغريب ده بقولك محدش يعرف غير اسمه تقولي معرفش لون وأكل ! علي : لأ أصل شايفك بتتكلمي عنه بحماسه زايده يعني ! داليا : عادي يعني وإيه المشكله !!!! علي : أممممم إيه المشكله دي بالنسبه ليكي لكن بالنسبه ليا تختلف !! داليا : مش فاهمه ؟! علي : طيب يا داليا أبسطهالك أنا مابحبكيش تتكلمي عن أي راجل تاني فـ وجودي ولا غير وجودي خلاص !!! ضحكت داليا : ههههههه علي إنت مجنون غيران من إيه من واحد مانعرفش حاجه عنه غير كلماته إللي بنقراها وبعـ قاطعها : داليا خلص الكلام لو سمحتي ويلا بقي حطي الزفت الكتاب ده فـ الشنطه وماتقفلنيش أكتر من الراجل ده حطت داليا الكتاب فـ الشنطه وهي بتضحك وتقوله : يا مجنوون ! علياء : ها يا داليا إيه رأيك فـ الموضوع ده ؟ إلتفتت داليا : هه رأيي فـ موضوع إيه ؟!! علياء : لا ده إنتي ماكنتيش معايا خالص ! داليا : معلش يا عليا مش مركزه عشان حاسه بصداع شويه قربت علياء منها : سلامتك يا روح قلبي طيب خلاص إرتاحي وإحنا هنجيلك وقت تاني داليا : لأ ما تمشيش أرجوكي خليكي جنبي مش عاوزه أقعد لوحدي ما تقلقيش أنا كويسه علياء : طيب يا حبيبتي أنا هفضل جنبك بس مددي ع السرير عشان ما تتعبيش إبتسمت داليا : بجد مش عارفه أشكرك ع الهديه دي إزاي ربنا ما يحرمني منك أبداً علياء : ولا يحرمني منك يا دوّلي يا قلبي إنتي حطت الكتاب تحت المخده وبدأت تطرد كل الأفكار من دماغها ، مددت ع السرير جنب هنا إللي راحت فـ سابع نومه وعلياء قعدت جنب داليا بتمسح على شعرها ويحكوا سوا ... بدأت حفلة الخطوبه..... هناك فـ ركن فـ القاعه خالد واقف وجنبه محمود إللي ماسك كاس وبيتفرج علي بنات الطبقه الأرستقراطيه ! محمود : أووووف يالا يا خالد شايف إللي أنا شايفه ! إيه الصوارخ دي يا جدع يخربيت كده ! خالد : يا شيخ إتلهي كل دول قشره يعني منظر من بره لكن هتلاقيهم فارغين من جواهم وأصلاً إللي عاملينه فـ نفسهم ده عمليات تجميل بلا نيله محمود : إحياة أبوك ما تعملّي فيها فيلسوف دلوقتي مش وقتك خليني أملّي عيني من المزز دي آآآآآخ يا بختك يا جاسر يا ابن المحظوظه ،، وبعدين انا واقف جنبك ليه جتك القرف أنا أروح أتفرج براحتي بعيد عنك خالد : مصلحه أوعي تنسي نفسك وتعمل حاجه كده ولا كده تطينها وماتنساش أم جاسر عنيها علينا ومش مرحبه بوجودنا هنا خالص طنشه محمود ومشي ووقف خالد يتفرج علي صاحبه وهو شارد، خرّجه من شروده صوت موبايله ولقاها مريم بتطمن عليه ، قفل معاها والإبتسامه علي وشه ، بيتمني حاجه واحده بس ، بيتمني يجي اليوم إللي يشوفها فيه عروسه ويسلّمها بإيديه لعريسها جاسر قاعد جنب عروسته والإبتسامه مش مفرقاه ...ماسك إيديها وبيبصلها وكإن جمعتهم قصة حب من سنين !! وهي بتبصله بفرحه وهو بيقبّل إيديها ، ولحظة ما لبّسها الخاتم حست إنها أسعد واحده فـ الكون وفلاش الكاميرات حوليهم ماوقفش لحظه واحده من أول ما بدأت الخطوبه ...... وهناك فـ جو هادي من الحفله توفيق الزغبي وأشرف الصايغ رافعين كاساتهم إحتفالاً بالشراكه إللي بدأت ولسه موقعين ورقها من دقايق ... صحيت داليا فـ نص الليل حاسه بعطش ، إتناولت ميّه من جنب السرير وحطت راسها تاني ع المخده فجأه إفتكرت الكتاب إللي جابته علياء ، طلّعته وفضلت تتأمله تاني ، إبتسمت وفتحته ، بدأت تقرا وهي حاسه بإنتعاش و مانامتش غير لما خلّصته بالكامل وكعادة أي كتاب بتقراه لريّان المصري حسته بيكلمها ويشجعها أكتر ، حست إن كلماته ملت قلبها قوه وأمل ، وقررت بالفعل مهما حصل مش هتستسلم ) ! إفتكرت علي لما كان بيتخانق معاها بسبب الكاتب ده وإزاي إنقطعت فتره كبيره عن قراية أي كتاب ليه لمجرد إن علي ما بيحبهوش/ من كتر حبها ليه كانت بتلغي شخصيتها وتتخلي عن أي حاجه مهما كانت بتحبها عشان بس ترضيه ، حست بوجع فـ قلبها وقبل ما الحزن يسيطر عليها قامت بسرعه إتوضت وبدأت تطرد الحزن والهم بصلاة الفجر ... علي صحي الصبح وراح ع الجامعه بكسل كان عنده محاضره بدأ يشرح وفجأه لمح حاجه وقفته عن الكلام لمح كتاب طالبه حطاه قصادها ، قرب ومسك الكتاب (( Don't give up .... لا تستسلم )) للكاتب ريّان المصري أول ما لمح إسم الكاتب حس بقشعريره إفتكر داليا وإزاي كانت بتحب تقرا للكاتب ده ، حط الكتاب قصاد الطالبه وبدأ يكمل شرح، أول ما خلّص المحاضره ، ركب عربيته وهو بيفكّر فـ داليا ،، رجع بذكرياته ليوم ما جابتله هديه وكانت كتاب علي وهو ماسك الكتاب : يووووه مالقتيش غير الراجل ده يا داليا داليا : ما أنا شايفه إن كتبه قيمه جداً عشان كده جبتهولك علي : ماشي يا ستي أي هديه منك أصلاً عندي بالدنيا فاكر إبتسامتها الخجوله يومها ،، إفتكر إزاي كان بيغير من الكاتب لمجرد كلام داليا عنه !!!!! ولقي نفسه رايح علي أقرب مكتبه وطلب كتب ريّان المصري _ حضرتك عاوز الروايات ولا كتب علم النفس ولا الـ علي : كله كله عاوز أي كتاب لريان المصري إشترا كل كتبه ورجع ع البيت بفرحه، أصله إفتكر داليا لما كانت بتقوله (( بلاقي نفسي بين سطور الكتب دي )) من كتر إشتياقه ليها قرر يدور عليها بين سطور الكتب إللي بتحبها ... داليا قضت يومها ما بين جلسه مع نِهال ، قعاد مع منار وقرايه لكتاب لا تستسلم للمره التانيه ) علياء راحت لعلي تطمن عليه ، رنت الجرس كتير ومحدش بيرد ، لسه هتنزل من ع السلم ولقته فتح الباب وواضح إنه كان نايم علياء : أنا أسفه ما عرفش إنك نايم علي : محصلش حاجه كويس إنك صحتيني ، تعالي إدخلي دخلت علياء وهو شال منها هنا وبيلاعبها ، لقت كركبة كتب فـ الصاله بدأت تلمهم من الأرض وإستغربت ! علياء : غريبه ! من إمته يعني بتقرا لـ ريّان ! علي : عادي يعني كنت غلطان فـ الحكم عليه بس لقيت كتبه تستحق علياء وهو بتلم الكتب : أمممم طيب كويس ،، أخبار هاله إيه ؟ علي : وبتسأليني ليه خلاص إتطلقنا هعرف منين يعني أحوالها !! علياء : إنت للدرجه دي ماكنتش طايقها علي : أنا كنت بحترم هاله جداً يا علياء ومازلت بس إني أحبها كزوجه وشريكه ليا فـ حياتي حاولت وماقدرتش ! علياء :ده بابا علي آخره منك ، روحتلهم من يومين وكان متضايق ومكسوف من إللي عملته مع بنت صاحبه بس قدر الله وما شاء فعل خلاص مابقاش له لازمه الكلام فـ الموضوع ده سكتوا لدقايق وعلياء ملاحظه علي عاوز يقول حاجه بس مش متردد علياء : عاوز تقول حاجه يا علي ؟! علي : علياء بصي أنا أنا عاوز أتجوز داليا سابت الكتب من إيديها ووقفت بدهشه : نعمممممم إحنا هنهزر يا علي !!! علي : والله ما بهزر بتكلم جد خدي رأيها وأقسملك بالله أنا ندمان ومستعد أعوضها عن كل لحظة ألم شافتها فـ حياتها أنا فعلاً حاسس قلبي مش مخلوق لبنت غير داليا علياء : بس فـ حالة داليا ندمك مش هيفيد ولا هيرجعلها إللي إتكسر جواها يا علي وسبق وقولتلك إصرف نظر عن الموضوع ده علي : أرجوكي يا عليا أقفي جنبي إتكلمي معاها واقنعيها علياء : أنا !!! مستحيييل الله يكرمك ماتدخلنيش فـ مواويلك الفاضيه دي ! علي : مواويل فاضيه !!! علياء : أيوه مواويل فاضيه ! بسهوله تكسر قلبها وتبيعها وعاوزها ترجعلك بسهوله برده !!! ثم إنت لسه واجع قلب واحده تانيه يا اخي ومدمره حياتها ده انا قلت نفسيتك هتتعب عشان خاطرها بس ما شاء الله جيت ولقيتك بتفكر تتجوز تاني اهه بس قبل ما تتعمق فـ ففكرتك دي أحب أقولك شيلها من دماغك ، داليا عمرها ما هترجعلك وياريت تسيبها فـ إللي هي فيه بقي علي : بس يا عليا أنا مـ قاطعته : كويس إني إتطمنت عليك ، مع السلامه رمقته بنظرة غضب ، خدت هنا ومشيت ..... ... طارق كان بيتناقش مع مجموعه من أصحابه إللي وافقوا يساعدوه فـ قضية داليا ، خلّص شغل معاهم ورجع البيت لقي أمه مجهزاله الغدا ،إتغدي معاها وقعد يشرب الشاي وهو بيقرا الجرايد ، وأول ما شاف صور خطوبة جاسر إفتكر داليا وحالتها وكل إللي حصلها ، إتعصب ولقي نفسه بيقطع الصفحات إللي فيها الصور بغل >.< أمه : إنت كويس يا طارق ؟ إلتفت لأمه وإبتسم : كويس الحمدلله يا ست الكل Smile _ طيب خد ......... إتناول منها الصور وهو بيسأل : إيه دول ؟؟ أمه : طنط مني عدت عليا إمبارح وجابتلي الصور دي تشوفها يمكن تلاقي واحده تعجبك فيهم إتعصب طارق وحط الصور ع التربيزه : تاني يا أمي مش كفايه بقي أنا بجد زهقت وقلت مليون مره مش هتجوز بالطريقه دي بدأت أمه تبكي : ما أنا نفسي أفرح بيك وأشوف ولادك قبل ما أموت لانت ملامح طارق وقرب منها ، قبّل جبينها ومسح دموعها : بعد الشر عنك يا أمي ،خلاص يا حبيبتي أنا أسف أمه : ريحني الله يريح قلبك يا حبيبي ده أنا حتي بجيبلك صور أجمل البنات ومن عائلات محترمه كمان ، طيب بلاش دول قولي لو فيه واحده فـ بالك وأنا أخطبهالك طارق : يا روح قلبي وعمري كله مفيش واحده فـ بالي ومفيش واحده من إللي فـ الصور هفكر حتي بس مجرد إني أبصلها لإني مش هتجوز بالطريقه دي إنتي إللي مربياني يا أمي المفروض تفهمي طريقة تفكيري أنا مش عاوز شكل ولا منظر ولا واحده مجرد أنتيكه أتفرج عليها ، أنا عاوز جمال روح وكيان، عاوز واحده تخليني أحبها وتخطف قلبي وتجبرني أعشق تفاصيل ملامحها مهما كانت درجة جمالها ، عاوز واحده تشاركني همومي وتحس بيا وتقدّر ، وبعدين أنا عاوز واحده شبهك فـ كل حاجه مع إني مش هلاقي فـ الكون زيك يا جميل أمه وهي بتمسح دموعها وتضحك : أيوه يا ولا كل بعقلي حلاوه ماشي ماشي كان مالها بس نِهال بنت خالتك أدب وذوق وعلم وجمال طارق : نِهال متربيه معايا وزي أختي وبس يا أمي ثم إن حضرتك عارفه إن نِهال ودكتور أحمد زميلها هيتخطبوا قريب إن شاء الله أول مايرجع من السفر ، عشان خاطري بقي ماتخديش الموضوع ده بعصبيه كده وإن شاء الله أول ما ألاقي إللي تخطف قلبي يا ست الكل هبلغك علي طول أمه : ماشي أما نشوف مع إني أشك فـ كده إنت عاوزلك واحده تفصيل :/ ، أما أقوم أحسن مرارتي مابقتش مستحمله >.< مشيت وسابته بيضحك....بيحب أمه أووي أبوه إتوفي وهو لسه صغيره وأمه رغم إنها كانت صغيره رفضت تتجوز تاني وقررت تتفرغ لتربية إبنها وبس ، ربته وكبرته وبقت بتتمني اليوم إللي تشوفه فيه عريس وتشيل ولاده ، بتدورله علي عروسه وهو كل ما تجيبله واحده يرفض يتجوز بالشكل ده وفيه كام مره سمع كلامها عشان يرضيها ويريحها وراح معاها وقعد مع بعض من البنات دول ومارتحش هو مش بيدور علي جمال هو بيدور علي واحده أد المسئولية واحده يحس معاها بمعني الحب بجد ويحبها من غير سبب مش عشان شكل !!! ولحد دلوقتي مش قادر يلاقي إللي تخطف قلبه وتخليه يوافق أخيراً إنه يتجوز !!! ... هاله من يوم ما إتطلّقت وهي حابسه نفسها فـ أوضتها أبوها وأمها حاولوا كتير أوي يخرجوها من حالة الإكتئاب دي لكن هي مازالت علي حالتها أمها كانت فـ المطبخ لما رن الجرس ، فتحت الباب ولقت تقارير وورق مبعوتين لهاله ، إستلمتهم وقبل ما الأكل يتحرق رمت الملف علي كنبة الأنتريه وجريت طفت ع الأكل خرجت فـ الصاله وأول ما عنيها وقعت ع الورق إتصدمت مسكته وبدأت تقلب فيه وتقرا التقارير وبسرعه جريت علي أوضة هاله ولقتها لسه صاحيه ، وقفت أمها بعصبيه وهي ماسكه الورق وقالت : أقدر أفهم إيه ده مسكت هاله الورق من أمها وماردتش !! أمها : أممممم مابترديش ! طيب يا هاله يا تري إللي فهمته من الورق ده صحيح ؟ ردت من غير ما تبص لأمها : أيوه يا ماما مانزلتش الجنين ... أنا لسه حامل أمها مندهشه : هاله إنتي إنتي بتتكلمي بجد ؟! هاله : أيوه يا ماما أمها : طاب إزاي ده إنتي كنتي راجعه والبنج لسه أثره عليكي ووشك أصفر أنا أنا مش فاهمه حاجه !!!!!! هاله : أقعدي يا ماما وأنا هفهم حضرتك كل حاجه قعدت أمها علي حرف السرير بتسمعها ، وهاله بدأت تحكي رجعت فلاش باك ليوم العمليه فاقت من البنج ولقت نفسها فـ عيادة يسرا ولما إفتكرت إنها نزّلت الجنين إنهارت ، دخلت يسرا وحاولت تهديها لكن هاله مازالت بتبكي بحرقه لحد ما سمعت يسرا بتقول : الحمدلله إني إتخذت القرار السليم ومانزلتش الجنين لإني كنت واثقه إنك هتندمي ) وقفت هاله عن البكا وبصتلها بدهشه ومش فاهمه أي حاجه !!!!! إبتسمت يسرا وقربت منها : أنا أفهمك يا ستي ، بعد ما إدنالك جرعة المخدر لقيتك بدأتي تبكي وتهلوسي وقولتي تحديداً (خلاص أنا عاوزه إبني مش هنزله ، إبنييييي ) وبعدها غيبتي عن الوعي وإنتي بترددي إبني إبني وبالتالي قررت مش هعملك العمليه وجبناكي فـ الأوضه هنا عشان تفوقي من البنج يا ماما هاله هاله مصدومه : يعني أنا أنا لسه فيه بيبي فـ بطني يعني وهبقي أم ؟ يسرا : أيووووووه الحمدلله إنتي والجنين بخير وهنبدأ أول متابعه من الأسبوع الجاي إن شاء الله هاله : إن شاء الله ، بجد مش عارفه أشكرك إزاي يا يسرا يسرا : ماتشكرنيش يا حبيبتي لإني ماعملتش غير الصح وإللي كان المفروض يحصل ولو سمحتي تاني مره قبل ما تاخدي أي قرار تفكري كويس وبلاش تسرع يا مدام خلاص حضرتك هتبقي أم وماينفعش الكلام ده إبتسمت هاله : حاضر كلمة هتبقي أم فرحت قلبها أوووي وخلتها تبتسم رغم الهموم ، حطت إيديها علي بطنها وكلمت الجنين : أنا أسفه يا روح قلب ماما ، أوعدك إللي عملته ده مش هيتكرر تاني وهاخد بالي منك ومن نفسي عشان خاطرك بعد كده إن شاء الله وفجأه إفتكرت علي ، إفتكرت كل حاجه وإختفت البسمه إللي علي وشها ، حاسه إن علي أهان كرامتها أووووي ، فكرت فـ كل إللي حصل وكان نفسها يطلب منها مايتطلقوش أو تحسه متمسك بيها ولو للحظه لكن لقته كل إللي هامه إنها تكون مسامحاه قبل ما يطلقها وبس فعرفت إنها مش فارقه معاه هيطلقها ويرجع لبنت خالته وهي قررت مش هتقوله عن حملها ، تطلق منه وتربي هي طفلها ، حاسه إنه الحاجه الوحيده إللي ممكن تنسيها الوجع إللي سببه علي لقلبها مسحت دموعها ، قامت غيرت هدومها وهي لسه دايخه من أثر البنج ، إتناولت شنطتها ورجعت ع البيت كانت هتقول لأمها لكن خافت أمها تقول لعلي وتوقف موضوع الطلاق فقررت مش هتقول لأي حد لغاية ما تطلق ، وبالفعل فضلت مخبيه موضوع الحمل عشان محدش يقول لعلي ، وراحت أول متابعه ، كانت حاسه بإحساس جميل أووي قعدت فـ العياده وكالعاده تأملت الموجودين ، كانت بتتمني أول متابعه يكون علي فرحان معاها وقاعد جنبها متشوق زيها يشوف أول سونار للجنين ، مسحت دموعها وحطت إيديها علي بطنها وهمست : إنت عندي بالدنيا كلها دخلت فـ دورها ونزلت منها دموع الفرحه وهي شايفه البذره إللي قاعده فـ سكينه فـ رحمها ، رجعت البيت وفضلت حاضنه صورة السونار إللي إنتشلتها من الغم إللي عايشه فيه لحد ما جه ميعاد الطلاق ، أول ما شافت علي عند المأذوون مش عارفه ليه حست بحنين ليه حست إنها عاوزه تصرخ فـ وشه وتعاتبه وبعدها تترمي فـ حضنه وتبكي بحرقه فاقت علي صوت المأذون بيطلب منهم يقعدوا مع بعض لآخر مره يمكن يوصلوا لحل ،،، فـ اللحظه دي إتشجعت إنها تقوله عن حملها لكن لاحظت فـ ملامحه اللآمبالاه وإنه عاوز يخلّص الإجراءات دي بسرعه فردت بكبرياء : إحنا قعدنا كتير ولقينا إن الطلاق هو أنسب حل فياريت نبدأ فـ الإجراءات أول ما رمي عليها يمين الطلاق إرتجفت وحست كإنه صوب سكينه لقلبها ، مسكت نفسها بالعافيه لحد ما تخلص الإجراءات وجريت علي عربية أبوها إتفتحت فـ العياط راحت من قريب متابعه تانيه عند يسرا برده من غير ما تقول لحد ولما تتعب من الحمل بتبرر لأمها إن معدتها تعباها هاله : ده كل إللي حصل يا ماما والورق ده بتاع آخر متابعه وأنا كنت مستعجله وما أخدتش التقارير من العياده فيسرا بعتتهالي هنا ، كنت هقول لحضرتك بس حضرتك سبقتيني وشوفتي الورق أمها : ياااه كل ده حصل يا هاله وأنا نايمه علي وداني : إخص عليكي ماقولتليش لييييه هاله : كنت خايفه تقولي لعلي يا ماما أمها : ومش حرام عليكي تحرمي طفلك اللي جاي ده من أبوه وتحرميه حقه فإنه يعيش حياه مستقره مع أبوه وأمه هاله : مستقره !!!! علي فرحان ومرتاح جداً بموضوع الطلاق يا ماما وطفلي إللي بتقولي عليه هحرمه من ابوه ده ابوه مش فارق معاه أصلاً ومش بعيد علي لو عرف إني حامل يتضايق ويحس إن لسه فيه حاجه هتربطه بيا ، أرجوكي يا ماما ماتقوليلهوش أي حاجه وأنا خلاص هسافر بعد 3 شهور إن شاء الله وهربي طفلي بعيد عن أي ضغوط وبعيد عن علي أمها : ولحد إمته هتخبي ثم إن حرام كده جوزك من حقه يعرف حتي لو كان مطلقك بس ده حقه لازم يعرف إنك حامل يا هاله هاله : مسيره هيعرف يا ماما إن شاء الله أمها : لو ماقولتيش إنتي أنا هقوله هاله : شفتي بقي !! عرفتي ليه ماكنتش عاوزه أقولك قبل الطلاق عشان كنت واثقه هتروحي تقوليله ، ماما عشان خاطري بلاش دلوقتي و أوعدك إني هقوله إن شاء الله فـ أقرب وقت أمها : إنتي حره يا هاله بس بلاش تفكري بأنانيه وتقولي كرامتي وكبريائي لما تولدي إن شاء الله وتكتمل الأمومه عندك هتعرفي إن الأم مستعده تضحي وتدوس علي كرامتها بل وتذل نفسها عشان بس راحة ولادها ، فكري كويس يا قلب أمك وبلاش العناد هاله : حاضر يا ماما ، ممكن بقي تسيبي أي حاجه علي جنب وتيجي جنبي هنا محتاجه أنام فـ حضنك أووووووي قربت إمها والدموع بتلمع فـ عنيها مش عارفه تفرح إن بنتها مانزلتش الجنين ولا تزعل علي حالها بعد ما بقت دلوقتي مُطلقه وحامل ضمت بنتها لحضنها وفضلت تمسح علي شعرها وتربت علي كتفها وهاله حاسه براحه وأحزانها بتدوب فـ دفا أحن حضن

مقالات ذات صلة

احمد وفيروز بقلم إسراء إبراهيم الجزء الأول

وصية صفية بقلم منال ام ابراهيم مرجان الجزء الخامس

للهوى رأي آخر بقلم سارة حسن الجزء الثاني

وجع الهوى بقلم إيمي نورالجزء الثاني

تائهة في نيران غدره بقلم آية الرحمن الجزء الثالث

أسيرة ظنونه بقلم إيمي نور الجزء الأول

اترك تعليقاً إلغاء الرد