جنتي على الأرض بقلم Fallen angel الجزء الثاني
الفصل السادس
” و عن تلك النظرةِ ….أبحث”
————————————————–
دلفت جنه إلى الشقه لتواجه بوابل من الاسئله من سماح.
قالت جنه : طب سبيني استريح الأول .
قالت سماح: انتي متتخيليش قلقت عليكي ازاي.
قالت جنه : مش الدكتوره نوال كلمت المشرفه و طمنتكم عليا.
قالت سماح : ايوه …بس مقلتش التفاصيل و انا دماغي كانت بتودي و تجيب.
تنهدت جنه و قالت: طب أنا هاحكيلك كل حاجه بس اديني فرصه.
قصت عليها جنه ما حدث لها و كيف أصرت د.نوال على بقائها و كرمهم معها.
قالت سماح : الدكتوره نوال دي مفيش أطيب من قلبها.
قالت جنه : نسيت اقلك نسرين عزمتني على عيد ميلادها و أصرت إنك تحضري الحفله.
قالت سماح بتردد: اه هي عزمتني بس أنا كنت اعتذرتلها.
قالت جنه : طب عشان خاطري .. أنا نفسي أغير جوو انتي كمان بلاش النكد اللي معيشه نفسك فيه ده.
قالت سماح بأسى: غصب عني يا جنه.
قالت جنه : يعني عشان تجربه صعبه مريتي بيها يبقى تدفني نفسك بالحيا.
قالت سماح : انتي مش فاهمه.
قالت جنه بمرح : ما هو يا تفهميني …يا نروح الحفله.
قالت سماح مستسلمه: طب يا غلباويه… خلاص نروح و امري لله.
**************************
شعرت نسرين بالحرج مره أخرى من نفسها و للمره الثانيه كان هذا الحرج بسبب كريم..فلقد عاملت جنه بأسلوب سيء للغايه لمجرد أن أبدى كريم اهتمامه بها .. لم تقترف جنه أي ذنب بل على العكس كان باديا على محياها الضيق الشديد من أسئلة كريم .. لذا حاولت نسرين تصليح موقفها بإصرارها على حضور جنه لحفل عيد ميلادها و لم يكن ذلك السبب الوحيد فهي بالفعل أحست بالراحه من خلال تعاملها مع جنه و تعاطفت معها بسبب ظروفها.
أما كريم فقد حان الوقت بالمضي قدما و نسيانه ..ليس بالكلام فقط..عليها أن تتخذ خطوه فعليه.
حملت نسرين أفكارها تلك و طرقت غرفة والدتها.
د.نوال : اتفضل.
أطلت نسرين برأسها و قالت : الجميل فاضي نقعد ونتكلم سوا.
ابتسمت نوال وقالت: و لو مش فاضيه يا حبيبه افضيلك نفسي ثم ربتت بيدها على طرف السرير و قالت: انتي لسه واقفه تعالي هنا.
جلست نسرين حيث أشارت والدتها و قالت : باختصار يا ست الكل … أنا موافقه مبدئيا اني ارتبط برائد ابن طنط ثريا.
هتفت نوال : بجد يا نسرين بجد !
قالت نسرين بجديه : طبعا يا ماما هي الحاجات دي فيها هزار.
